1 Cunan, yalishca jipa Alma, pimi jatun mandaj Noépaj sirvij runacunamanda pacajurca, paipaj juchacunamanda, paipaj na ali ruraicunamanda arrepentirin, paipaj llactapuracunapaman pacalla rin, Abinadípaj shimicunata yachachi callarin—

2 Ari, ima shamunacunamanda, huañushcamanda cutin causarinamandapash, llactapuracunapaj jatun causachina, imami yalichun apamushca canga ushaimanda, llaquiricunamandapash, Cristopaj huañuimandapash, paipaj cutin causarimandapash, jahua pachaman vitsiaimandapash.

3 Pai yachachijurca mashna paipaj shimita uyangapaj munajcunaman. Paicunaman pacalla yachachirca, jatun mandaj ama yachaj chayashcanman yashpa. Paipaj shimicunata tauca crirca.

4 Yalishca jipa mashna crishcacuna Mormón nishca pushtuman rirca, cai shutita chasquishca carca jatun mandajmanda, llactapaj manñacunapi caimanda, huaquinbi nacashpaca huaquin punllacunapi, sacha animalcuna ninanda na alipa tiarca.

5 Cunan, Mormónpi shuj ima mapa illa yacu pujyu tiarca, Alma chaiman rij carca, yacu ladopi uchilla yuracuna junda carca, punllaca chaipi pacajuj carca jatun mandajpaj mascaicunamanda.

6 Yalishca jipa paita mashna crijcuna chaiman rij carca paipaj shimicunata uyangapa.

7 Yalishca jipa tauca punllacuna yalijpi taucacuna tandanajurca Mormón pushtupi, Almapaj shimicunata uyangapa. Ari, paipaj shimita crijcuna, tucuilla tandanajushca carca. Paicunaman yachachircapash, tucui yachachun villarca arrepentimientomanda, jatun causachinamanda, Apunchijpi femanda.

8 Yalishca jipa paicunata nirca: Riqui, caipi Mormón yacucuna (shina shutichishca carca) cunan, ña munashca canguichi Diospaj corralman yaicungapa, paipaj llactapura shutichishca cangapa, munashcapacha canguichi caishumanda chaishuhuan llashaicunata apangapa, caicuna fangalla cachun;

9 Ari, munashcapacha canguichi huacangapa maijan huacajcunahuan; ari, cushiyachina maijan cushiyachichun minishtijcunata, Diospaj testigocuna cana tucui punllacunapi, tucui cuzascunapi, tucui pushtucunapi, maipi cashpapash, huañuicamanbash, Dios cangunata jatun causachita ushachun, yupashca canga callari cutin causarinacunahuan, mana tucurina causaita chari ushanguichi—

10 Cunan cangunata nini, cangunapaj shungucunapaj cai munai cajpica, imashpata Apunchijpaj shutipi na bautizarishca canguichi, paipaj ñaupapi shuj testigo canguichi, canguna shuj convenioman yaicushca canguichi paihuan, paita sirvingapa, paipaj rurachunbacha saquishcacunata alichingapa, paipaj Espírituta ashtacatapacha cangunapa jahuaman jichachun?

11 Cunan imaura llactapuracuna cai shimicunata uyashpa, cushijuimanda maquicunata huajtarca, shinlli nirca: Ñucanchipaj shungucunapaj munaica caimi can.

12 Cunan yalishca jipa Alma Helamta japirca, callari cashpa, rishpa yacupi shayarirca, mañarcapash, nishpa: Oh Apunchij, quiquinba sirvij runaman quiquinba Espírituta jichamui, shungumanda achilcaihuan cai ruraita rurachu.

13 Imaura cai shimicunata nishca cajpi, Apunchijpaj Espíritu paipa jahuapi carca, nirca: Helam, ñuca bautizani, Tucui Ushaita Charij Diospaj autoridad charimanda, shuj testimonio cachun, shuj convenioman yaicushca cangui paita servingapa huañuicaman ismuna aichapi; Apunchijpaj Espíritu quiquinba jahuapi jicharishca cachun; pai mana tucurina causaita carachun, Cristopaj jatun causachinamanda, pimi pai alichishca cashca cai pacha rurashcamanda.

14 Alma cai shimicunata nishca jipa, Alma, Helam ishcandi yacupi pambarirca; paicuna jatarirca cushijuihuanbash yacumanda llujshirca, Espírituhuan junda cashpa.

15 Cutin, Alma cutishujta japirca, cati viaje yacuman rirca, callari laya bautizarca, ashtahuangari pai na pambarirca cutin yacupi.

16 Cashna laya pai bautizarca shujllangaman Mormón pushtuman rijta; paicuna yupaipica carca ishcai patsaj chuscu almacuna; ari, paicuna bautizarishca carca Mormón yacucunapi, Diospaj ninan juyaihuan junda carca.

17 Paicuna carca shutichishca Diospaj iglesia, nacashpaca Cristopaj iglesia, chai punllamanda ñaupaman. Yalishca jipa pipash Diospaj autoridadhuan, Diospaj ushaihuan bautizashcacuna paipaj iglesiaman quimirishca carca.

18 Yalishca jipa Alma Diospaj autoridadta charimanda, sacerdotecunata cayacacharca picha chunga sacerdotecunamanda shujta ordenarca yachachichun paicunata, Diospaj reinopaj cuzascunamanda yachachichun.

19 Pai mandarca yachachichun pai yachachishca cuzascunatalla, imami achil villachijcunapaj shimimanda parlashca carca.

20 Ari, paicunata mandarca yachachichun ashtahuangari arrepentimientomanda, Apunchijpi femandalla, pimi paipaj llactapuracunata jatun causachishca carca.

21 Paicunata mandarca caishuhuan chaishuhuan ama randimanda plituri tiachun, ashtahuangari shujlla ricuita ñaupaman charichun, feta charishpa, shujlla bautismo, paicunapaj shungucunata charichun huatarishca laya cachun shujlla caipi, juyaipi caishuhuan chaishuhuan.

22 Shina mandarca yachachichun. Shina paicuna Diospaj huahuacunaman tigrarca.

23 Mandarcapash samana punllata achil ricuchun, caita achil alichichun, punllangaman Apunchijta paicunapaj Diosta pagui nichunbash.

24 Mandarcapash sacerdotecuna picunami ordenashca carca paicunapaj maquicunahuanllata trabajachun paicunapaj causangapa minishtishcacunata charingapa.

25 Semanapi shuj punllata shicanyachirca tandanajushpa llactapuracunata yachachichun, Apunchij paicunapaj Diosta adorachun, mashna ushashcatapash tandanajuchunbash.

26 Sacerdotecuna ama llactapuracunata shuyachun paicuna causangapa minishtishcacunata charingapa; ashtahuangari paicunapaj trabajomanda Diospaj ninan juyaita chasquishca cachun, Espíritupi ninan shinllicunaman tigrangacaman, Diospaj yuyaipi chasquishcata charimanda, ushaihuan Diospaj autoridadhuanbash yachachingapa.

27 Alma cutin mandarca iglesiamanda llactapuracuna paicunapaj minishtirishcapachacunata cararichun, shujllangaman imashna charishcata; ashtacata charishpaca ashtacata caranga; pipash ashatalla charishpaca, ashatalla minishtishca canga; na charishpaca na cungachu.

28 Shina paicunapaj minishtirishcapachacunata cararirca paicunapaj libre munaimanda, Diospaj ali munaimanda, minishtij sacerdotecunapa, ari, shujllangaman minishtijcunapa, churajuna illa almapa.

29 Paicunata nirca, Dios mandashcacuna caimanda; Diospaj ñaupapi derecho purirca, caishuta chaishuta ayudashpa paicunapaj minishtishcacunapi, paicunapaj munaicunapipash temporalpi, espiritualpipash ishcandita.

30 Yalishca jipa tucui caicunata rurashca carca Mormónpi, ari, Mormón yacu ladolla, Mormón yacucuna ladolla sachapi; ari, Mormón pushtupi, Mormónpaj yacucunapi, Mormónpaj sachapi juyaillamari can paicunapaj ñavicuna picuna paicunapaj jatun causachinata yuyaipi chasquishcacuna; ari, achilyachishcami can, paicuna cantangami alabanzacunata mana tucurinacaman.

31 Cai cuzascunata rurashca carca llactapaj manñacunapi, jatun mandaj ama yachachun.

32 Ashtahuangari riqui, yalishca jipa jatun mandajca, llactapuracunapi shuj tandanajuita yachaj chayarca, paipaj servij runacunata ricuchun cacharca. Chaimanda shuj punlla Apunchijpaj shimita uyangapa tandanajushca cajpi jatun mandajpaman tupai tucushca carca.

33 Cunan jatun mandaj nirca Alma llactapuracunata ama ñucata cazuchun tangachijun; chaimanda pai cacharca macanajuj runacunata paicunata tucuchichun.

34 Yalishca jipa Alma, Apunchijpaj llactapuracunapash jatun mandajpaj macanajuj runacuna shamunajujta yachaj chayarca; chaimanda paicunapaj facha huasicunata, paicunapaj aillucunata japishpa jichushca pambaman rirca.

35 Paicuna yupaipi carca chuscu patsaj picha chunga almacuna.