Sigaba 10
Sembulo lesaniketwa Joseph Smith umPhrofethi, eHarmony, ePennsylvania, cishe kuMabasa 1829, nakube tincenye kungenteka kutsi tatfolakala kusukela ehlobo langemnyaka wa 1828. Lapha iNkhosi yatisa Joseph ngetingucuko letentiwa bantfu lababi emakhasini langu 116 embhalo lobhalwe ngesandla losuka ekuhunyushweni kwencwadzi yaLehi, leseNcwadzini yaMormon. Lamakhasi embhalo lobhalwe ngesandla abelahleke kuMartin Harris, lobekaniketwe lamaphepha kwesikhashana ngekwetsenjwa. (Buka sihloko sesigaba 3.) Lisu lebubi bekukugadza kuhunyushwa kabusha lobekugadziwe kwendzaba lebeyisemakhasini labekebiwe bese kwehlisa sitfunti umhumushi ngekukhombisa kungahambisani lokudalwe tingucuko. Kutsi lenhloso lembi beyicatjangwe ngulomubi nekutsi beyateka eNkhosini ngisho nangesikhatsi Mormon, umbhali wemilandvo wekucala wemaNefi, bekenta sifinyeto sakhe sabongcwengcwe labebacwabelene, iyakhonjiswa eNcwadzini yaMormon (buka EmaVi aMormon 1:3–7)
1–26, Sathane ubhebhetela bantfu lababi kutsi baphikisane nemsebenti weNkhosi; 27–33, Ufuna kubhubhisa imiphefumulo yebantfu; 34–52, Livangeli kumele liye kumaLamani nakuto tonkhe tive ngeNcwadzi yaMormon; 53–63, INkhosi itawusungula liBandla Layo kanye nelivangeli Layo emkhatsini webantfu; 64–70, Itawugcogcela labaphendvukako eBandleni Layo futsi ibasindzise labayitfobelako.
1 Manje, buka, ngitsi kuwe, ngoba unikele leyo mibhalo lowawuniketwe emandla ekuyihumusha nge-Urimu neThumimu, etandleni temuntfu lomubi, sewuyilahlile.
2 Futsi nawe ulahlekelwa sipho sakho ngaso leso sikhatsi, nemcondvo wakho wafiphala.
3 Noko, manje sesibuyiselwe kuwe futsi; ngako-ke yenta siciniseko kutsi uyetsembeka futsi uchubeka kute kube sekupheleni kwemsebenti losele wekuhumusha njengoba bewucalile.
4 Ungagijimi ngetulu noma usebente ngalokungetulu kwemandla netindlela lonikwe tona kute ukwati kuhumusha; kodvwa khutsala kute kube sekugcineni.
5 Thandaza njalo, kute ube ngumncobi; yebo, kute uncobe Sathane, futsi kute uphunyule etandleni tetinceku taSathane letisekela umsebenti wakhe.
6 Buka, bebafuna kushabalalisa ludvumo lwakho; yebo, ngisho nendvodza lobewuyetsembile beyifuna kushabalalisa ludvumo lwakho.
7 Ngulesi sizatfu lesenta kutsi ngitsi uyindvodza lembi, ngoba bekafuna kutsasa letintfo lebewuphatsiswe tona ngekwetsenjwa; futsi bekafuna kuphindze ashabalalise sipho sakho.
8 Futsi ngenca yekutsi unikele imibhalo etandleni takhe, buka, bantfu lababi bayitsetse kuwe.
9 Ngako-ke, uyinikele, yebo, loko lobekungcwele, kulababi.
10 Futsi, buka, Sathane ukufake etinhlitiyweni tabo kugucula emagama lowente kutsi abhalwe, noma uwahumushe, lasasukile etandleni takho.
11 Buka, ngitsi kuwe, ngoba sebawaguculile emagama, asehlukile kuloko lowakuhumusha naloko lowenta kutsi kubhalwe;
12 Ngalendlela, develi ufune kubeka licebo lebucili, kute ashabalalise lomsebenti;
13 Ngoba ukufakile etinhlitiyweni tabo kutsi bente loku, kute ngekucamba emanga batsi bakubambile mayelana nemagama lowente shengatsi uyawahumusha.
14 Ngicinisile, ngitsi kuwe, angeke ngivume kutsi Sathane aphumelele kufeza inhloso yakhe lembi ngalesi sento.
15 Ngoba buka, ukufakile etinhlitiyweni tabo kukwenta kutsi ulinge iNkhosi Nkulunkulu wakho, ngekucela kutsi uphindze uhumushe kabusha.
16 Buka, bayasho baphindze bacabange etinhlitiyweni tabo—Sitawubona kutsi Nkulunkulu umnikile yini emandla ekuhumusha; uma kunjalo, utawuphindze amnike emandla futsi;
17 Uma Nkulunkulu amnika emandla futsi, noma ahumusha futsi, noma ngalamanye emavi, uma aletsa emagama lafanako, buka, natsi sinawo, futsi sesiwaguculile;
18 Ngako-ke angeke avumelane, futsi sitawutsi ucambe emanga emavini akhe, nekutsi ute siphiwo, nekutsi ute emandla,
19 Ngako-ke sitawushabalalisa ludvumo lwakhe, kanye nalomsebenti; futsi sitawukwenta loku kute singahlazeki ekugcineni, nekutsi sitfole ludvumo lwemhlaba.
20 Ngicinisile, ngicinisile, ngitsi kuwe, Sathane ulawula tinhlitiyo tabo, ubabhebhetela kutsi bone ngalokuphambene naloko lokuhle;
21 Futsi tinhlitiyo tabo tonakele, tigcwele bubi netinengiso; batsandza bumnyama kunekukhanya, ngoba tento tabo timbi; ngako-ke angeke bacele kimi.
22 Sathane uyababhebhetela, kute aholele imiphefumulo yabo ekubhujisweni.
23 Ngaleyo ndlela sewubeke licebo lebucili, acabanga kushabalalisa umsebenti waNkulunkulu; kodvwa ngitawufuna loku etandleni tabo, futsi kuyawuba lihlazo nekulahlwa ngelilanga lekwehlulela.
24 Yebo, ubhebhetela tinhlitiyo tabo kute bawucansukele lomsebenti.
25 Yebo, utsi kubo: Khohlisa labanye ulale ubhace ulindzele kubamba, kute ubulale; buka, loku kute bubi. Futsi ubakhohlisa ngaleyondlela, abatjele kutsi akusiso sono kucamba emanga kute babambe loyo locamba emanga, kute bashabalalise ludvumo lwakhe.
26 Ubakhohlisa ngaleyo ndlela, abahole ate advonsele imiphefumulo yabo phansi esihongweni; ngaleyo ndlela wenta batibambe ngelwabo lugibe.
27 Futsi uhamba ngaleyo ndlela ehla enyuka, ahlamahlama emhlabeni, afuna kushabalalisa imiphefumulo yebantfu
28 Ngicinisile, ngicinisile, ngitsi kuwe, maye kuloyo locamba emanga ngenhloso yekukhohlisa ngoba acabanga kutsi nalomunye umuntfu ucamba emanga ngenhloso yekukhohlisa, ngoba labo labanjalo angeke bakhululwe ekulungeni kwaNkulunkulu.
29 Manje, buka, bawaguculile lamagama, ngoba Sathane utsite kubo: Unikhohlisile—ngaleyo ndlela ubakhohlisa kutsi bente bubi, kute akwente ulinge iNkhosi Nkulunkulu wakho.
30 Buka, ngitsi kuwe, ungawahumushi futsi lawo magama lasukile etandleni takho;
31 Ngoba, buka, angeke baphumelele etinhlosweni tabo letimbi ngekucamba emanga ngekumelana nalawo magama. Ngoba, buka, uma ungaveta lawo magama lafanako batawutsi ucambe emanga futsi wente shengatsi bewuhumusha, kodvwa utiphikisile wena lucobo.
32 Futsi, buka, bayawukwatisa loku emhlabeni, futsi Sathane utawutenta lukhuni tinhlitiyo tebantfu kute ababhebhetele kutsi bakutfukutselele, ngaleyo ndlela angeke bawakholwe emavi ami.
33 Ngako Sathane wenta licebo lekucedza emandla ebufakazi bakho kulesi situkulwane, kute umsebenti ungachubeki kulesi situkulwane.
34 Kodvwa buka, naku kuhlakanipha, futsi ngoba ngikukhombisa kuhlakanipha, ngiphindze ngikunika nemiyaleto mayelana naleti tintfo, lokufanele ukwente, kungakuveti emhlabeni ute uwucedze umsebenti wekuhumusha
35 Ungamangaliswa kutsi ngitsite kuwe: Naku kuhlakanipha, ungakuveti emhlabeni—ngoba ngitsite ungakuveti emhlabeni, ngenhloso yekutsi ulondvolotwe.
36 Buka, angisho kutsi angakukhombisi kulabalungile;
37 Kodvwa njengoba ungeke ubone njalo kutsi ngubani lolungile, noma njengoba ungeke ukwati kuhlukanisa lababi kulabalungile, ngako-ke ngitsi kuwe, thula ngite ngibone kufanele kwatisa ngetintfo tonkhe emhlabeni mayelana naloludzaba.
38 Manje, ngicinisile ngitsi kuwe, umlandvo ngaleto tintfo lowutibhalile, letisukile etandleni takho, ucoshwe kubongcwengcwe baNefi
39 Yebo, futsi uyakhumbula kwashiwo kuleyo mibhalo kutsi umlandvo lonemininingwane letsite wabhalwa ngaleti tintfo kubongcwengcwe baNefi.
40 Manje, ngoba umlandvo locoshwe kubongcwengcwe baNefi unemininingwane letsite mayelana netintfo, ngekuhlakanipha kwami, lengitawutatisa kubantfu kulomlandvo—
41 Ngako-ke, uyawuhumusha imibhalo lecoshwe kubongcwengcwe baNefi, usuke emuva ute ufike ekubuseni kwenkhosi Bhenjamini, noma ute ufike kuloko lowukuhumushile, lowukugcinile.
42 Futsi buka, uyawuyishicilela njengembhalo waNefi, ngaleyo ndlela ngitawubavimbela labo labagucule emavi ami.
43 Angeke ngivume kutsi bashabalalise umsebenti wami; yebo, ngitawubakhombisa kutsi kuhlakanipha kwami kungetulu kunebucili badeveli.
44 Buka, batfole incenye nje kuphela, noma umlandvo lofinyetiwe waNefi.
45 Buka, tiningi tintfo leticoshwe kubongcwengcwe baNefi letiniketa kucondza lokwengetiwe mayelana nelivangeli lami; ngako-ke, kukuhlakanipha kimi kutsi uhumushe lencenye yemibhalo lecoshiwe yaNefi, futsi watise bantfu bonkhe lokubhalwe kulomsebenti.
46 Buka, konkhe lokusele kwalomsebenti kucuketse tonkhe leto tincenye telivangeli lami baphrofethi bami labangcwele, yebo, kanye nebafundzi bami labaticela emithandazweni yabo kutsi tifinyelele kulaba bantfu.
47 Futsi ngatsi kubo, ngitawubapha ngekwelukholo lwabo emithandazweni yabo;
48 Yebo, lukholo lwabo bekunguloku—kutsi livangeli lami, lengabanika lona kute bashumayele emalangeni abo, lifinyelele kubomnakabo emaLamani, kanye nabo bonkhe labo labesebangemaLamani ngenca yekuhlubuka kwabo.
49 Manje, akusiko loku kuphela—lukholo lwabo emithandazweni yabo bekungukutsi lelivangeli kumele latiswe futsi, uma kungenteka kutsi letinye tive titsatse lelive libe ngelabo;
50 Ngaleyo ndlela bashiya sibusiso kulelive emithandazweni yabo, kutsi noma ngubani loyawukholwa nguleli livangeli kulelive atfole kuphila lokuphakadze;
51 Yebo, kute libe live lelikhululekile kubo bonkhe bantfu banoma ngusiphi sive, tihlobo, tilimi, noma bantfu.
52 Manje, buka, ngelukholo lwabo emithandazweni yabo ngitawuletsa lencenye yelivangeli lami kubantfu bami. Buka, angiyiletsi kutawucedza loko labakutfolile, kodvwa kutawukwandzisa.
53 Futsi ngalesi sizatfu ngitsite: Uma lesi situkulwane singatenti lukhuni tinhlitiyo taso, ngitawusungula libandla lami emkhatsini wabo.
54 Manje loku angikusho kute ngibhubhise libandla lami, kodvwa ngikusho kute ngakhe libandla lami.
55 Ngako-ke, noma ngubani losebandleni lami akukafaneli esabe, ngoba labo bayawukudla lifa lembuso welizulu.
56 Kodvwa ngulabo labangesabi, nalabangagcini imiyaleto yami kodvwa bakha emabandla abo kute batfole inzuzo, yebo, nabo bonkhe labo labenta bubi nalabakha umbuso wadeveli—yebo, ngicinisile, ngicinisile, ngitsi kuwe, ngulabo lengitawubakhatsata, futsi ngibente batfutfumele ngekhatsi.
57 Buka, nginguJesu Khristu, iNdvodzana yaNkulunkulu. Ngeta kubami, kodvwa abatange bangemukele.
58 Ngikukhanya lokukhanya ebumnyameni, kodvwa nebumnyama bangakucondzi.
59 Nginguye loyo lowatsi—Nginaletinye timvu letingesito talomhlambi—kubafundzi bami, futsi baningi labangatange bangicondze.
60 Futsi ngitawubakhombisa laba bantfu kutsi nganginaletinye timvu tami, nekutsi tatiligala lendlu yaJakobe;
61 Futsi ngitawukwembula imisebenti yabo lemangalisako, labayenta egameni lami;
62 Yebo, ngitawuphindze ngembule livangeli lami lelashunyayelwa kubo, futsi, buka, angeke bakwale loko lowukutfolile, kodvwa batawukwandzisa, futsi bayawuveta incenye letsite leliciniso yemfundziso yami, yebo, lokunguyona yodvwa imfundziso lekimi.
63 Futsi loku ngikwenta kute ngicinisekise livangeli lami, kute kubete imphikiswano leningi; yebo, Sathane ubhebhetela tinhlitiyo tebantfu kute babe nemphikiswano mayelana nencenye letsite yemfundziso yami; futsi kuleti tintfo bayaphambuka, ngoba bayayihlanekela imibhalo lengcwele futsi abayicondzi.
64 Ngako-ke, ngitawudalula kubo lemfihlakalo lenkhulu;
65 Ngoba, buka, ngitawubagcogca njengesikhukhukati sigcogcela ndzawonye emantjwele aso ngaphansi kwetimphiko taso, uma bangeke batente lukhuni tinhlitiyo tabo;
66 Yebo, uma bafisa kuta, bangeta, banatse emanti ekuphila ngaphandle kwenkhonkelo.
67 Buka, lena yimfundziso yami—noma ngubani lophendvukako ete kimi, nguye loyo longuwelibandla lami.
68 Noma ngubani lomemetela lokuningi noma lokuncane kunaloku, nguye loyo longasiye wami; kodvwa uphambene nami, ngako-ke akasiye welibandla lami.
69 Manje, buka, noma ngubani longuwelibandla lami, futsi lobeketela ayincenye yelibandla lami kute kube sekugcineni, ngiyawumakhela etikwelidvwala lami, nemasango esihogo angeke abancobe.
70 Manje, khumbula lamavi akhe loyo lokuphila nekukhanya kwemhlaba, uMhlengi wakho, iNkhosi yakho naNkulunkulu wakho. Amen.