Sigaba 16
Sembulo lesaniketwa ngaJoseph Smith umPhrofethi kuPeter Whitmer lomNcane, eFayette, eNew York, ngeNhlaba 1829 (buka sihloko sesigaba 14). Peter Whitmer lomNcane, muva waba ngulomunye waboFakazi labasiPhohlongo beNcwadzi yaMormon.
1–2, Umkhono weNkhosi usetikwawo wonkhe umhlaba; 3–6, Kushumayela livangeli nekusindzisa bantfu kuyintfo lebaluleke kakhulu.
1 Lalela, nceku yami Peter, uve emavi aJesu Khristu, iNkhosi yakho neMhlengi wakho.
2 Ngoba buka, ngikhuluma kuwe ngalokucacile nangemandla, ngoba umkhono wami usetikwemhlaba wonkhe.
3 Futsi ngitawukutjela loko lokungatiwa ngumuntfu ngaphandle kwami nawe—
4 Ngoba tikhatsi letiningi ucelile kimi kwati loko lokuyawuba ngulokubaluleke kakhulu kuwe.
5 Buka, ubusisiwe ngenca yalesi sento, nangekukhuluma emavi ami lengikunikete wona ngekwemiyaleto yami.
6 Manje, buka, ngitsi kuwe, sento lesiyawuba ngulesibaluleke kakhulu kuwe kushumayela kuphendvuka kulaba bantfu, kute uletse bantfu kimi, kute uphumule nabo embusweni waBabe. Amen.