Sigaba 18
Sembulo lesiya kuJoseph Smith umPhrofethi, nakuOliver Cowdery, kanye nakuDavid Whitmer, lesaniketwa eFayette, eNew York, ngeNhlaba 1829. NgekwemPhrofethi, lesembulo besatisa “ngekubitwa kwebaphostoli labaliShumi nakuBili kulawa malanga ekugcina, nangemiyaleto ngalokuphatselene nekwakhiwa kweliBandla.”
1–5, Imibhalo lengcwele ikhombisa kutsi libandla lakhiwa kanjani; 6–8, Umhlaba sewulungele kubhujiswa ngenca yebubi; 9–16, Kubaluleka kwebantfu kukhulu; 17–25, Kute bantfu batfole insindziso, kumele bemukele kubitwa ngelibito laKhristu; 26–36, Lubito nemsebenti wekufundzisa livangeli wabaliShumi nakuBili uyembulwa; 37–39, Oliver Cowdery naDavid Whitmer kufanele bafune labaliShumi nakuBili; 40–47, Kute bantfu batfole insindziso, kumele baphendvuke, babhajatiswe, baphindze bagcine imiyaleto.
1 Manje, buka, ngenca yaloludzaba wena, nceku yami Oliver Cowdery, lofise kwati ngalo kimi, ngikunika nawa emavi:
2 Buka, ngikwembulele, ngaMoya wami etikhatsini letiningi, kutsi tintfo lowutibhalile tiliciniso, ngaloko-ke uyati kutsi tiliciniso.
3 Futsi uma utati kutsi tiliciniso, buka, ngikuniketa umyaleto, kutsi tsembela etintfweni letibhaliwe;
4 Ngoba kuto kubhalwe tonkhe tintfo letiphatselene nesisekelo selibandla lami, livangeli lami, nelidvwala lami.
5 Ngaloko-ke, uma uyawukwakha libandla lami etikwesisekelo selivangeli lami nelidvwala lami, emasango esihogo angeke abuse etikwakho.
6 Buka, umhlaba sewucocodzele ebubini; futsi kutawufanele kutsi bantfwana bebantfu bagcugcutelwe kute baphendvuke, beTive kanye nendlu yaka-Israyeli.
7 Ngaloko-ke, njengoba wabhajatiswa ngetandla tenceku yami Joseph Smith, lomNcane, ngalokuphatselene naloko lengimyalete ngako, utifezile tintfo lengimyalete ngato.
8 Manje, ungamangaliswa kutsi ngimubitele kutsi afeze inhloso yami lucobo, inhloso leyatiwa ngimi; ngaloko-ke, uma ayawukhutsalela kugcina imiyaleto yami uyawubusiswa ngekuphila lokuphakadze; futsi libito lakhe nguJoseph.
9 Manje, Oliver Cowdery, ngikhuluma nawe, kanye nakuDavid Whitmer, ngendlela yemyaleto; ngoba, buka, ngiyaleta bonkhe bantfu yonkhe indzawo kutsi baphendvuke, futsi ngikhuluma nani, njengakuPawula umphostoli wami, ngoba nibitwe ngisho nangalolobito lolufanako nalolo lebekabitwe ngalo.
10 Khumbulani kubaluleka kwebantfu kukhulu emehlweni aNkulunkulu;
11 Ngoba, bukani, iNkhosi uMhlengi wenu weva kufa enyameni; ngaloko-ke weva buhlungu babo bonkhe bantfu, kute bonkhe bantfu baphendvuke futsi bete kuyo.
12 Uvukile futsi kulabafile, kute aletse bonkhe bantfu kuye, uma baphendvuka.
13 Kukhulu kangakanani kujabula kwakhe ngemuntfu lophendvukako!
14 Ngaloko-ke, nibitelwe kutsi nishumayele kuphendvuka kulaba bantfu.
15 Futsi uma kwenteka kutsi niyawusebenta onkhe emalanga enu nishumayela kuphendvuka kulaba bantfu, niphindze niletse, umuntfu munye kuphela kimi, kuyawuba kukhulu kangakanani kujabula kwenu naye embusweni waBabe!
16 Manje, uma kujabula kwenu kuyawuba kukhulu ngemuntfu munye lenimletse kimi embusweni waBabe, kutawuba kukhulu kangakanani kujabula kwenu uma ningaletsa bantfu labaningi kimi!
17 Bukani, ninelivangeli lami phambi kwenu, lidvwala lami, nensindziso yami.
18 Celani kuBabe egameni lami ngelukholo, nikholwa kutsi niyawunikwa, futsi niyawunikwa Moya loNgcwele, lowembula tonkhe tintfo letifanele kubantfwana bebantfu.
19 Uma ningenalo lukholo, litsemba, nelutsandvo, ngeke nente lutfo.
20 Ningabangi nelibandla, ngaphandle kwelibandla ladeveli.
21 Mukelani Khristu nibitwe ngelibito lakhe, futsi nikhulume liciniso ngesizotsa.
22 Futsi bonkhe labaphendvukako baphindze babhajatiswe egameni lami, lelinguJesu Khristu, babeketele kute kube sekugcineni, ngibo labayawusindziswa.
23 Bukani, Jesu Khristu libito leliniketwe nguBabe, futsi kute lelinye libito leliniketwe umuntfu langasindziswa ngalo;
24 Ngaloko-ke, bonkhe bantfu kufanele bemukele libito leliniketwe nguBabe, ngoba bayawubitwa ngalelobito ngelilanga lekugcina;
25 Ngaloko-ke, uma bangalati libito lababitwa ngalo, ngeke bahlale embusweni waBabe.
26 Manje, bukani, kukhona labanye lababitelwe kushumayela livangeli lami, kubeTive nakumaJuda;
27 Yebo, ngisho nalabalishumi nakubili; labalishumi nakuBili bayawuba bafundzi bami, futsi bayawubitwa ngelibito lami; futsi labalishumi nakuBili ngulabo labayawufisa kwemukela libito lami ngekutinikela lokuphelele.
28 Futsi uma bafisa kwemukela libito lami ngekutinikela lokuphelele, babitelwe kuya kuwo wonkhe umhlaba kuyawushumayela livangeli lami kubo bonkhe bantfu.
29 Futsi ngibo labo labekwe ngimi kubhabhatisa egameni lami, ngekuvumelana naloko lokubhaliwe;
30 Futsi ninako loko lokubhaliwe ngaphambi kwenu; ngaloko-ke, kufanele nikufeze ngekuvumelana nemavi labhaliwe.
31 Manje sengikhuluma kini, labaliShumi nakuBili—Bukani, umusa wami unanele; kufanele nihambe ngekulunga phambi kwami futsi ningoni.
32 Futsi, bukani, ningibo lababekwa ngimi kute nibeke baphristi nebafundzisi; kushumayela livangeli lami, ngekwemandla aMoya loNgcwele lokini, futsi ngekwelubito kanye netipho taNkulunkulu kubantfu;
33 Futsi mine, Jesu Khristu, iNkhosi yenu naNkulunkulu wenu, ngikukhulumile loku.
34 Lamavi lawa akusiwo emavi ebantfu noma emuntfu, kodvwa ami; ngaloko-ke, niyawufakaza kutsi ami futsi akusiwo emuntfu;
35 Ngoba livi lami leliwakhulumako kini; ngoba embulwe nguMoya wami kini, futsi ngemandla ami ningakwati kufundzelana lomunye nalomunye; ngaphandle uma kungemandla ami beningeke nibe nawo;
36 Ngaloko-ke, ningafakaza kutsi nilivile livi lami, futsi niyawati emavi ami.
37 Manje, buka, nginika wena, Oliver Cowdery, kanye nakuDavid Whitmer, umsebenti wekutsi niyawufuna labaLishumi nakuBili, labayawuba naleto tifiso lengikhulume ngato.
38 Futsi ngetifiso tabo nangemisebenti yabo niyawubati.
39 Futsi uma senibatfolile niyawubatjengisa leti tintfo.
40 Futsi niyawukuwa phansi niphindze nikhonte Babe egameni lami.
41 Futsi kufanele nishumayele emhlabeni, nitsi: Kumele niphendvuke niphindze nibhajatiswe, egameni laJesu Khristu;
42 Ngoba bonkhe bantfu kumele baphendvuke baphindze babhajatiswe, futsi kungabi ngemadvodza kuphela, kodvwa nebesifazane, nebantfwana lasebafike eminyakeni yekutiphendvulela.
43 Manje, ngemuva kwekutsi senikutfolile loku, kufanele nigcine imiyaleto yami kuto tonkhe tintfo;
44 Futsi ngetandla tenu ngitawukwenta umsebenti lomangalisako emkhatsini webantfwana bebantfu, kute ngikholise labaningi kutsi bonile, kute baphendvuke, nekutsi bete embusweni waBabe.
45 Ngaloko-ke, tibusiso lengininika tona tingetulu kwetintfo tonkhe.
46 Futsi emvakwekutsi senikutfolile loku, uma ningayigcini imiyaleto yami ngeke nisindziswe embusweni waBabe.
47 Bukani, mine, Jesu Khristu, iNkhosi yenu naNkulunkulu wenu, neMhlengi wenu, ngemandla aMoya wami ngikukhulumile loku. Amen.