Sigaba 27
Sembulo lesaniketwa Joseph Smith umPhrofethi, eHarmony, ePennsylvania, ngeNgci 1830. Kulungiselela umhlangano longcwele lapho sidlo seNkhosi sesinkhwa neliwayini besitawubusiswa, Joseph watsatsa luhambo kuyawutfola liwayini. Wahlangana nesitfunywa sasezulwini wase utfola lesembulo lesi. Incenye yaso leyabhalwa ngaleso sikhatsi lokwatsi lokusele kwabhalwa ngenyanga yeNyoni lelandzelako. Emanti ngiwo manje lasetjentiswako esikhundleni seliwayini emihlanganweni yesidlo seNkhosi yeliBandla.
1–4, Tifanekiso lokufanele tisetjentiswe uma kutsatfwa sidlo seNkhosi tibekwa ebaleni; 5–14, Khristu netinceku Takhe kusukela kuto tonkhe tinhlelo tekuphatsa kufanele batsatse sidlo seNkhosi; 15–18, Hlomani tonkhe tikhali taNkulunkulu.
1 Lalelani livi laJesu Khristu, iNkhosi yenu, Nkulunkulu wenu, neMhlengi wenu, livi lakhe leliphilako nalelinemandla.
2 Ngoba, bukani, ngitsi kini, akusho lutfo kutsi niyawudlani noma niyawunatsani uma nitsatsa sidlo seNkhosi, uma nikwenta ngeliso lelibheke enkhatimulweni yami—nikhumbula phambi kwaBabe umtimba wami lowanikelelwa nine, nengati yami leyacitfwa kususa tono tenu.
3 Ngaloko-ke, ngininika umyaleto, kutsi aniyukulitsenga liwayini noma sinatfo lesidzakanako etitseni tenu;
4 Ngaloko-ke, aniyikutsatsa lutfo ngaphandle uma lentiwe kabusha emkhatsini wenu; yebo, kulombuso waBabe loyawuwakhiwa emhlabeni.
5 Bukani. Loku kukuhlakanipha kimi, ngaloko-ke, ningamangali, ngoba lihora liyeta lapho ngitawunatsa sitselo seliwayini nani emhlabeni, futsi kanjalo naye Moroni, lengimtfumele kuwe kute embule iNcwadzi yaMormon, lecuketse kuphelela kwelivangeli lami laphakadze, lengibeke kuye tikhiya tembhalo wendvuku yaEfrayimu;
6 Naku-Eliyasi, lengibeke kuye tikhiya tekufeza kubuyiselwa kwetintfo tonkhe letakhulunywa yimilomo yabo bonkhe baphrofethi labangcwele kusukela ekucaleni kwemhlaba, ngalokuphatselene netikhatsi tekugcina;
7 NakuJohane indvodzana yaZakhariya, Zakhariya yena loyo (Eliyasi) lamvakashela wamnika setsembiso sekutsi utawuba nendvodzana, libito layo kuyawuba nguJohane, futsi uyawugcwala umoya waEliyasi;
8 Johane loyo lengimtfumele kini, tinceku tami, Joseph Smith, lomNcane, Oliver Cowdery, kutsi anibeke ebuphristini bekucala leniphiwe bona, kute nibitwe niphindze nibekwe njenga-Aroni.
9 Naku-Elija, lengibeke kuye tikhiya temandla ekugucula tinhlitiyo taboyise kubantfwana, netinhlitiyo tebantfwana kuboyise, kute umhlaba wonkhe ungashaywa ngesicalekiso;
10 NakuJoseph, nakuJakobe, ba-Isaka, kanye na_abrahama, bobabe benu, ngabo tetsembiso letisekhona;
11 NakuMikhayeli, noma Adamu, babe wabo bonkhe, umholi wabo bonkhe, lomdzala wetinsuku;
12 NakuPhetro, naJakobe, naJohane, lengibatfumele kini, ngabo lenginibekile ngaphindze nganicinisekisa kutsi nibaphostoli, nabofakazi labakhetsekile belibito lami, futsi ninetikhiya tebufundisi benu netintfo letifanako lengitembule kubo;
13 Lengibeke kubo tikhiya tembuso wami, neluhlelo lwekwengamela lwelivangeli letinsuku tekugcina; nelekuphelela kwetikhatsi, kulo lengitawugcogca ndzawonye tonkhe tintfo, letisezulwini, naletisemhlabeni;
14 Nakubo bonkhe labo Babe langiphe bona bantfu basemhlabeni.
15 Ngaloko-ke, tfokotani niphindze nijabule, tilungiseleleni, nihlome ngetikhali tami tonkhe, kute nikwati kumelana nelilanga lelibi, nitsi noma senicedzile konkhe, nigcine nincobile.
16 Ngako-ke manini tinkhalo tenu tiboshwe ngeliciniso, nifake sivikelo sesifuba lesikulunga, tinyawo tenu tigcokiswe kulungela kushumayela livangeli lekuthula, lengitfumele tingilosi tami kutsi tiliphatsise kini;
17 Nitsatse sihlangu sekukholwa leniyawukwati ngaso kucima yonkhe imicibisholo levutsako yalomubi;
18 Nitsatse impantitje yensindziso, nenkemba yaMoya wami, lengitawutfululela etikwenu, nelivi lami lengilembula kini, futsi nivumelane mayelana nanoma ngayini leniyawuyicela kimi, netsembeke ngize ngite, futsi niyawuhlwitfwa, kute lapho ngikhona nani nibekhona futsi. Amen.