Sigaba 33
Sembulo lesaniketwa ngaJoseph Smith umPhrofethi ku-Ezra Thayre nakuNorthrop Sweet, eFayette, New York, ngeMphala 1830. Ekungeniseni lesembulo, umlandvo waJoseph Smith uyacinisekisa kutsi “iNkhosi…ihlale ilindzele kufundzisa labo labafuna lwati ngenkhutsalo ngekukholwa.”
1–4, Tisebenti tibitelwa kushumayela livangeli ngelihora lesihlanu; 5–6, LiBandla liyasungulwa, nalabakhetsiwe kufanele bagcogcwe; 7–10, Phendvukani ngoba umbuso welizulu sewusondzele; 11–15, LiBandla lakhelwe etikwelidvwala lelivangeli; 16–18, Lungiselelani kufika kweMyeni.
1 Bukani, ngitsi kini, tinceku tami Ezra naNorthrop, vulani tindlebe tenu nilalele livi leNkhosi Nkulunkulu wenu, lo livi lakhe liyaphila futsi linemandla, likhalipha kwengca inkemba lesika ngetinhlangotsi totimbili, lisika lidzimate lehlukanise emalunga nemnkantja, umphefumulo nemoya; futsi ubona imicabango netinhloso tenhlitiyo.
2 Ngoba ngicinisile, ngicinisile, ngitsi kini nibitelwe kuphakamisa emavi enu njengekukhala kwelicilingo, kute nishumayele livangeli lami esitukulwaneni lesigwegwile nalesiphambene.
3 Ngoba bukani, insimu seyimhlophe seyilungele kuvunwa, futsi selihora lesihlanu, nesikhatsi sekugcina lapho ngitawubita tisebenti ensimini yami.
4 Nesivini sami sesonakele sonkhana, futsi sekute labenta lokuhle ngaphandle kwalabalidlanzana; bayaphambuka kulokuningi ngenca yebuphristi-mbumbulu, bonkhe banetingcondvo letonakele.
5 Futsi ngicinisile, ngicinisile, ngitsi kini, leli liBandla ngilisungulile ngaphindze ngalibita kutsi liphume ehlane.
6 Kanjalo-ke ngitawubagcogca labakhetsiwe bami emagumbini lamane emhlaba, bonkhe labatawukholelwa kimi, balalele nelivi lami.
7 Yebo, ngicinisile, ngicinisile, ngitsi kini, insimu seyimhlophe seyilungele kuvunwa; ngaloko-ke, jikijelani emasikela enu, nivune ngawo onkhe emandla, ingcondvo, nangemfutfo wenu.
8 Vulani imilomo yenu futsi itawugcwaliswa, nitawufanana neNefi wasemandvulo, lowahamba wesuka eJerusalema waya ehlane.
9 Yebo, vulani imilomo yenu ningatibambi, nitawutfwala titfungo emihlane yenu, ngoba bukani, nginani.
10 Yebo, vulani imilomo yenu futsi itawugcwaliswa, nitsi Phendvukani, phendvukani, nilungise indlela yeNkhosi, nente imikhondvo yayo icondze; ngoba umbuso welizulu sewusondzele;
11 Yebo, phendvukani nibhajatiswe, nonkhe ngamunye nangamunye, kute nitsetselelwe tono tenu; yebo bhajatiswani ngisho nangemanti, emvakwaloko kutawulandzela umbhabhatiso wemlilo newaMoya loNgcwele.
12 Bukani, ngicinisile, ngicinisile, ngitsi kini, leli livangeli lami; khumbulani kutsi kufanele babe nelukholo kimi nakungenjalo angeke basindziswe nanini;
13 Futsi etikwalelidvwala ngiyawulakha libandla lami; yebo, etikwalelidvwala nakhelwe, futsi uma niphikelela, emasango esihogo angeke anehlule.
14 Khumbulani kugcina timfundziso netivumelwano telibandla.
15 Futsi noma ngubani loyawuba nelukholo ebandleni lami niyawumucinisekisa njengelilunga leliBandla, ngekumbeka tandla, ngitawubese ngibapha sipho saMoya loNgcwele.
16 INcwadzi yaMormon nemibhalo lengcwele yembulwe ngimi kute nifundziswe; futsi nemandla aMoya wami aphilisa tonkhe tintfo.
17 Ngaloko-ke, tsembekani, nithandaze njalo, nibe netibane tenu tilungisiwe tivutsa, niphetse nemafutsa, kute nilungele kufika kweMyeni—
18 Ngoba bukani, ngicinisile, ngicinisile, ngitsi kini, ngiyeta masinyane. Kunjalo nje. Amen.