Sigaba 38
Sembulo lesaniketwa ngaJoseph Smith umPhrofethi, eFayette, eNew York, mhlaka 2 Bhimbidvwane, 1831. Kwakusikhatsi semhlangano weliBandla.
1–6, Khristu wadala tonkhe tintfo; 7–8, Usemkhatsini walabaNgcwele Bakhe, labatawumbona masinyane; 9–12, Yonkhe inyama yonakele phambi Kwakhe; 13–22, Ubekele labaNgcwele Bakhe live lesetsembiso esikhatsini naphakadze; 23–27, LabaNgcwele bayaletwa kutsi babe munye baphindze batisane njengebazalwane; 28–29, Timphi tiyaphrofethwa; 30–33, LabaNgcwele kufanele baniketwe emandla lavela ezulwini futsi bahambe emkhatsini wetive tonkhe; 34–42, LiBandla liyaletwa kutsi linakekele labamphofu nalabeswele liphindze lifune ingcebo yaphakadze.
1 Naku lokushiwo yiNkhosi Nkulunkulu wenu, ngisho Jesu Khristu, lomKhulu ngiNguye, Alfa na-Omega, sicalo nesiphetfo, loyo lowabuka bubanti baphakadze, nawo onkhe emabutfo emaserafi asezulwini, ngaphambi kwekudalwa kwemhlaba;
2 Loyo lowati tonkhe tintfo, ngoba tonkhe tintfo tiphambi kwemehlo akhe;
3 Nginguye lowakhuluma, umhlaba wadalwa, futsi tonkhe tintfo tavela ngami.
4 Nginguye lotsatse iSiyoni ya-Enoki wayiletsa esifubeni sami; futsi ngicinisile, ngitsi, bonkhe labakholelwe egameni lami, ngoba nginguKhristu, nangekubita libito lami, ngenca yengati lengiyicitsile, ngibancusele phambi kwababe.
5 Kodvwa bukani, insalela yalababi ngiyigcine etinketaneni tebumnyama kute kufike kwehlulela kwelilanga lelikhulu, lelitawufika ekupheleni kwemhlaba;
6 Futsi kunjalo nje ngitawukwenta lababi kutsi bagcinwe, labo labangeke balive livi lami kodvwa labatenta lukhuni tinhlitiyo tabo, futsi maye, maye, maye, siphetfo sabo.
7 Kodvwa bukani, ngicinisile, ngicinisile, ngitsi kini, emehlo ami asetikwenu. Ngisemkhatsini wenu futsi anikhoni kungibona;
8 Kodvwa lilanga liyeta masinyane lapho niyawungibona khona, nati kutsi nginguye; ngoba sihenco sebumnyama siyawudzatjulwa masinyane, futsi loyo longakahlanteki angeke amelane nalelilanga.
9 Ngaloko-ke, bophani tinkhalo tenu futsi nitilungiselele. Bukani, umbuso ngewenu, nesitsa angeke sincobe.
10 Ngicinisile ngitsi kini, nihlantekile, kodvwa hhayi nonkhe; futsi kute lomunye lengitfokota kahle ngaye;
11 Ngoba yonkhe inyama yonakele phambi kwami; nemandla ebumnyama ayabusa emhlabeni, emkhatsini webantfwana bebantfu, ebukhoneni bawo onkhe emabutfo asezulwini—
12 Lokwenta kuthula kubuse, futsi lonkhe liphakadze liva buhlungu, netingilosi tilindze umyaleto lomkhulu wekuvunela phansi umhlaba, kubutsa lukhula kute lushiswe; bukani, sitsa sihlangene.
13 Manje nginitjela imfihlakalo, intfo lefihlekile lesemagunjini, kuletsa ngisho kubhujiswa kwenu ngekuhamba kwesikhatsi, futsi beningakwati;
14 Kodvwa manje nginitjela yona, futsi nibusisiwe, hhayi ngenca yebubi benu, netinhlitiyo tenu tekungakholwa; ngoba ngicinisile labanye benu banelicala phambi kwami, kodvwa ngitawuba nesihawu ebutsakatsakeni benu.
15 Ngako-ke, cinani kusukela manje kuya phambili; ningesabi, ngoba umbuso ngewenu.
16 Ngenca yensindziso yenu ngininika umyaleto, ngoba ngiyivile imithandzo yenu, nalabamphofu bakhalile phambi kwami, labacebile ngibadalile, yonkhe inyama ngeyami, futsi angikhetsi libala lemuntfu.
17 Ngente umhlaba wanotsa, futsi bukani usenabelo setinyawo tami, ngaloko-ke, ngitawuphindze ngime etikwawo.
18 Futsi ngininika ngalokufanele ingcebo lenkhulu, ngisho live lesetsembiso, live lelinelubisi neluju loluningi, lapho kungeke kube khona sicalekiso uma iNkhosi ibuya;
19 Ngininika lona njengelive lelilifa lenu, uma nilifuna ngetinhlitiyo tenu tonkhe.
20 Futsi lesi kuyawuba sivumelwano sami nani, liyawuba live lelilifa lenu, nelifa lebantfwana benu ingunaphakadze, ngesikhatsi umhlaba usemile, liyawuphindze libe lenu naphakadze, alisayukwendlula.
21 Kodvwa, ngicinisile ngitsi kini ngekuhamba kwesikhatsi angeke nibe nenkhosi noma umbusi, ngoba ngiyawuba yinkhosi yenu nginigadze.
22 Ngaloko-ke, vanini livi lami ningilandzele, niyawuba bantfu labakhululekile, futsi angeke nibe nemitsetfo kodvwa niyawuba neyami imitsetfo uma ngibuya, ngoba ngimi sishayamtsetfo senu, futsi yini lengavimba sandla sami na?
23 Kodvwa, ngicinisile ngitsi kini, fundzisanani ngekwemisebenti lenginibeke kuyo;
24 Wonkhe umuntfu akatise umnakabo njengoba atatisa yena, nente kulunga nebungcwele phambi kwami.
25 Futsi ngiyaphindza ngitsi kini, wonkhe umuntfu akatise umnakabo njengoba atatisa yena.
26 Ngoba ngumuntfu lonjani emkhatsini wenu lotsi anemadvodzana lalishumi nakubili, futsi angawabandlululi, nawo amsebentela ngekumlalela, atsi kuyinye: Gcoka tingubo letinhle uhlale lapha; atsi kulenye: Gcoka tidvwedvwe bese uhlala lapha—bese ubuka emadvodzana akhe atsi angikhetsi?
27 Bukani, loku ngininike kona njengemfanekiso, futsi kunjengoba mine nginjalo. Ngitsi kini, banini munye; uma ningesimunye anisibo bami.
28 Ngetulu kwaloko, ngitsi kini sitsa lesisemagunjini lafihlakele sifuna timphilo tenu.
29 Niva ngetimphi emaveni lakhashane, bese nitsi kutawuba netimphi letinkhulu emaveni lakhashane, kodvwa anitati tinhlitiyo tebantfu eveni lenu.
30 Nginitjela leti tintfo ngenca yemithandazo yenu; ngaloko-ke, gcinani inhlakanipho etifubeni tenu, funa bubi bebantfu bembule leti tintfo kini ngebubi babo, ngendlela letawukhuluma etindlebeni tenu ngelivi lelikhulu kunalelo leliyawutamatamisa umhlaba; kodvwa uma nitilungiselele angeke nesabe.
31 Kute niphunyule emandleni esitsa, nigcogcelwe kimi nibantfu labalungile, labangenasici nalabangenabala—
32 Ngaloko-ke, ngalesi sizatfu ngininika umyaleto wekutsi kufanele niye e-Ohio; lapho ngitawuninika umtsetfo wami; futsi lapho niyawuphiwa emandla lavela ezulwini;
33 Futsi kusuka kuleyo ndzawo, noma ngubani lengifise kutsi ahambe uyawuhamba aye emkhatsini wato tonkhe tive, futsi bayawukwatiswa ngalokumele bakwente; ngoba nginemsebenti lomkhulu kakhulu lobekiwe, ngoba Israyeli uyawusindziswa, futsi ngitawubaholela noma ngukuphi lapho ngitsandza khona, kute nemandla layawuvimba sandla sami.
34 Manje, nginika libandla kuleti tincenye umyaleto, wekutsi emadvodza latsite emkhatsini wabo atawukhetfwa, futsi atawukhetfwa ngelivi lelibandla.
35 Futsi batawunakekela labamphofu nalabeswele, bese bayabakhulula etidzingweni tabo kute bangahlupheki; babatfumele endzaweni lengibayalete yona;
36 Futsi lona kuyawuba ngumsebenti wabo, kuphatsa tindzaba temphahla yalelibandla.
37 Labo labanemapulazi langatsengiseki, akayekelwe noma acashiswe njengekutsandza kwabo.
38 Bonani kutsi tonkhe tintfo tigciniwe; futsi uma bantfu sebaphiwe emandla lavela ezulwini baphindze batfunywa, tonkhe leti tintfo tiyawugcogcwa tibe telibandla.
39 Futsi uma nifuna ingcebo lokuyintsandvo yaBabe kuninika yona, niyawuba ngulabacebe kunabo bonkhe bantfu, ngoba niyawuba nengcebo yaphakadze; futsi kubalulekile kutsi ingcebo yemhlaba kube ngimi lengiphisana ngayo; kodvwa caphelani kutikhukhumeta, funa nibe njengemaNefi asemandvulo.
40 Ngetulu kwaloko, ngitsi kini, ngininika umyaleto, wekutsi wonkhe umuntfu, umbonisi, umphristi, umfundzisi, ngalokunjalo nelilunga, akasebente ngemandla akhe, ngemsebenti wetandla takhe, kulungiselela nekufeza tintfo lengiyalete ngato.
41 Futsi kushumayela kwenu akube livi lekwecwayisa, wonkhe umuntfu kumakhelwane wakhe, ngemusa nangebumnene.
42 Phumani emkhatsini walababi. Tisindziseni kulokubi. Hlantekani nine leniphatsa sitja seNkhosi. Kunjalo nje. Amen.