Sigaba 3
Sembulo lesaniketwa Joseph Smith umPhrofethi, eHarmony, ePennsylvania, kuKholwane 1828, mayelana nekulahleka kwemakhasi langu 116 embhalo lobhalwe ngesandla lowahunyushwa encenyeni yekucala yeNcwadzi yaMormon, leyayibitwa ngencwadzi yaLehi. UmPhrofethi bekavume ngekungabata kutsi lamakhasi asuke kuye aye kuMartin Harris, lowake wasebenta sikhashana njengembhali ekuhunyushweni kweNcwadzi yaMormon. Lesembulo saniketwa nge-Urimu neThumimu (Buka sigaba 10.)
1–4, Indlela yeNkhosi yinye ayigucuki naphakadze; 5–15, Joseph Smith kumele aphendvuke kungenjalo utawulahlekelwa sipho sekuhumusha; 16–20, INcwadzi yaMormon yembulelwe kutawusindzisa intalelwane yaLehi.
1 Imisebenti, tinhlelo, netinhloso taNkulunkulu ngeke tivinjelwe, noma tibe lite.
2 Ngoba Nkulunkulu akahambi etindleleni letigwegwile, akajikeli esandleni sangesekudla noma sangesencele, noma agucuke kuloku lesekakushito, ngako-ke tindlela takhe ticondzile, futsi indlela yakhe yinye ayigucuki naphakadze.
3 Khumbula, khumbula kutsi akusiwo umsebenti waNkulunkulu lovimbelekako, kodvwa ngumsebenti webantfu;
4 Ngoba nanoma umuntfu angaba netembulo letiningi, aphindze abe nemandla ekwenta leminingi imisebenti lemikhulu, kodvwa uma atichayisa ngewakhe emandla, angayinaki imiyalo yaNkulunkulu, futsi alandzele lokufunwa yintsandvo yakhe netifiso tenyama, kufanele awe aphindze atfole lulaka lwaNkulunkulu lolungile etikwakhe.
5 Buka, uphatsiswe leti tintfo ngekwetsenjwa, kodvwa beyicine kangakanani imiyaleto yakho; khumbula tetsembiso letentiwa kuwe, uma bewungayiphulanga.
6 Buka, kukaningi kangakanani uyephula imiyaleto yaNkulunkulu, futsi ulandzele kuboniswa bantfu.
7 Ngoba, buka, bekungakameli wesabe bantfu kunaNkulunkulu. Nanoma bantfu bangayinaki imiyalo yaNkulunkulu, futsi bawadzelela nemavi akhe—
8 Kodvwa wena bekufanele wetsembeke; futsi bekayawulula sandla sakhe akusekele kuyo yonkhe imicibisholo levutsako yesitsa; futsi bekayawuba nawe kuto tonkhe tikhatsi tenkhatsato.
9 Buka, wena unguJoseph, futsi wakhetfwa kutsi wente umsebenti weNkhosi, kodvwa ngenca yekuphambuka, uma ungacapheli utawukuwa.
10 Kodvwa khumbula, Nkulunkulu unesihawu; ngako-ke, phendvuka kuloko lowukwentile lokuphambene nemyaleto lengikunike wona, usakhetsiwe, futsi usabitiwe kulomsebenti.
11 Ngaphandle kwekutsi wente loku, uyawufulatselwa ube njengalabanye bantfu, ungabe usabanaso sipho.
12 Ngesikhatsi unika umuntfu loko Nkulunkulu labekunike kona kutsi ukubone nemandla ekutsi ukuhumushe, waniketa loko lobekungcwele etandleni tendvodza lembi.
13 Lengayinakanga imiyalo yaNkulunkulu, yephula naletingcwele kakhulu tetsembiso letentiwa ngaphambi kwaNkulunkulu, lencike kukwayo kwehlulela yaphindze yatichayisa ngekwayo kuhlakanipha.
14 Futsi lesi ngiso sizatfu sekutsi ulahlekelwe ngemalungelo akho kwesikhashana—
15 Ngoba uvumele umyalo wemcondzisi wakho kutsi unyatselwe kusukela ekucaleni.
16 Noko, umsebenti wami uyawuchubeka, njengoba lwati lweMsindzisi lute emhlabeni, ngebufakazi bemaJuda, ngisho kanjalo-ke lwati ngeMsindzisi loyawukuta kubantfu bami—
17 NakumaNefi, kumaJakobe, kumaJosefa, nakumaZoramu, ngebufakazi baboyise—
18 Futsi lobu bufakazi buyawufinyelela ekwatiweni ngemaLamani, ngemaLemuweli, nangema-Ishmayeli, labalahlekelwa lukholo ngenca yebubi baboyise, labo iNkhosi lebavumele kubhubhisa bomnakabo emaNefi, ngenca yebubi babo netinengiso tabo.
19 Kungenca yalesi sizatfu kutsi laba bongcwengcwe balondvolotiwe, labacuketse lemibhalo—kute tetsembiso teNkhosi tifezeke, leyitente kubantfu bayo;
20 Kute emaLamani afinyelele ekwatini boyise, futsi kute ati ngetetsembiso teNkhosi, nekutsi akholwe livangeli aphindze atsembele etentweni letinhle taJesu Khristu, advunyiswe ngelukholo egameni lakhe, nekutsi ngekuphendvuka kwawo asindziswe. Amen.