Sigaba 42
Sembulo lesaniketwa saba tincenye letimbili ngaJoseph Smith umPhrofethi, eKirtland, e-Ohio, mhlaka 9 namhlaka 23, iNdlovana 1831. Incenye yekucala, lehlanganisa emavesi 1 kuya ku 72, yatfolakala kukhona babonisi labalishumi nakubili futsi kugcwaliseka setsembiso seNkhosi lesentiwa phambilini sekutsi “umtsetfo uyawuniketwa e-Ohio (buka sigaba 38:32). Incenye yesibili ifaka ekhatsi emavesi 73 kuya ku 93. UmPhrofethi utsi lesi sembulo “sicuketse umtsetfo weliBandla.”
1–10, Babonisi babitelwa kushumayela livangeli, kubhabhatisa labaphendvukile, nekwakha liBandla; 11–12, Kumele babitwe baphindze babekwe futsi kufanele bafundzise timiso telivangeli letitfolakala emibhalweni lengcwele; 13–17, Kufanele bafundzise baphindze baphrofethe ngemandla aMoya; 18–29, LabaNgcwele bayaletwa kutsi bangabulali, bangebi, bangacambi emanga, bangabi nenkhanuko, bangaphingi, noma bakhulume lokubi ngalabanye; 30–39, Imitsetfo lelawula kunikela ngemphahla ibekwa sobala; 40–42, Kutikhukhumeta nebuvila kuyagcekwa; 43–52, Labagulako kufanele belashwe ngekubekwa tandla nangelukholo; 53–60, Imibhalo leNgcwele ilawula liBandla futsi kumele imenyetelwe emhlabeni; 61–69, Indzawo yeJerusalema leNsha netimfihlakalo tembuso titawukwembulwa; 70–73, Imphahla lenikelwako kufanele isentjetiswe kusita labasetikhundleni beliBandla; 74–93, Imitsetfo lelawula kuhlobonga, kuphinga, kubulala, kweba, nekuvuma tono ibekwa sobala.
1 Lalelani, Awu nine babonisi belibandla lami, lenibutsene ndzawonye egameni lami, ngisho Jesu Khristu iNdvodzana yaNkulunkulu lophilako, uMsindzisi wemhlaba, nangabe niyakholelwa agameni lami futsi nigcina imiyaleto yami.
2 Ngiyaphindza ngitsi kini, lalelani nive niphindze nitfobele umtsetfo lengitawuninika wona.
3 Ngoba ngicinisile ngitsi, njengoba nibutsene ndzawonye ngekwemyaleto lenginiyalete ngawo, futsi niyavumelana mayelana naloludzaba, naphindze nacela kuBabe egameni lami, ngalokunjalo-ke nitawutfola.
4 Bukani, ngicinisile ngitsi kini, ngininika lomyaleto wekucala, wekutsi niyawuhamba egameni lami, nonkhe, ngaphandle kwetinceku tami Joseph Smith, lomNcane, naSidney Rigdon.
5 Futsi ngibanika umyaleto wekutsi bayawuhamba kwesikhashana, nekutsi kutawuniketwa ngemandla aMoya kutsi bayawubuya nini.
6 Niyawuhamba ngemandla aMoya wami, nishumayele livangeli lami, ngababili, egameni lami, niphakamise emavi enu njengekukhala kwelicilongo, nimemetele livi lami njengetingilosi taNkulunkulu.
7 Niyawuhamba nibhabhatisa ngemanti, nitsi: Phendvukani, phendvukani, ngoba umbuso welizulu sewusondzele.
8 Futsi kusuka kulendzawo niyawuhamba niye etifundzeni letingasenshonalanga; nangabe nitawubatfola labatawunemukela niyawukwakha libandla lami kuto tonkhe tifundza—
9 Kute kufike sikhatsi lapho kutawukwembulwa kini kusuka ezulwini, lapho lidolobha laseJeruralema leNsha liyawulungiswa, kute nigcogcwe nibe ndzawonye, kute nibe bantfu bami nami ngibe nguNkulunkulu wenu.
10 Ngetulu kwaloko, ngitsi kini, inceku yami Edward Partridge kufanele atsatse sikhundla lengimubeke kuso. Futsi kuyawukwenteka, kutsi uma ephula umyaleto lomunye uyawubekwa esikhundleni sakhe. Kunjalo nje. Amen.
11 Ngetulu kwaloko ngitsi kini, kute loyawuvunyelwa kutsi ahambe ayawushumayela livangeli lami, noma akhe libandla lami, ngaphandle kwekubekwa ngulotsite loneligunya, kwatiwa nasebandleni kutsi uneligunya, futsi ubekwe ngendlela lefanele baholi belibandla.
12 Ngetulu kwaloko, babonisi, baphristi nebafundzisi balelibandla bayawufundzisa timiso telibandla lami, letiseBhayibhelini naseNcwadzini yaMormon, lapho kukhona khona kuphelela kwelivangeli.
13 Futsi bayawugcina tivumelwano nemigomo yelibandla bacinisekise kutsi bayayigcina, futsi loku kuyawuba timfundziso tabo, njengoba bayawukhonjiswa nguMoya.
14 Futsi Moya uyawuniketwa kini ngemthandazo welukholo; futsi uma ninganikwa Moya angeke nifundzise.
15 Konkhe loku niyawucinisekisa kutsi niyakwenta njengoba niyaletiwe mayelana nekufundzisa kwenu, kute kuniketwe kuphelela kwemibhalo yami lengcwele.
16 Futsi uma niyawuphakamisa emavi enu ngeMdvudvuti, niyawukhuluma niphindze niphrofethe ngekutsandza kwami;
17 Ngoba, bukani, uMdvudvuti uyatati tonkhe tintfo, ufakaza ngaBabe nangeNdvodzana.
18 Manje, bukani, ngikhuluma nelibandla. Ungabulali; loyo lobulalako ngeke acolelwe kulomhlaba, nasemhlabeni lotako.
19 Ngetulu kwaloko, ngitsi, ungabulali; kodvwa loyo lobulalako uyawukufa.
20 Ungebi, loyo lowebako aphindze angafuni kuphendvuka uyawulahlwa ngaphandle.
21 Ungacambi emanga; loyo locamba emanga aphindze angafuni kuphendvuka uyawulahlwa ngaphandle.
22 Tsandza umfati wakho ngenhlitiyo yakho yonkhe, unamatsele kuye hhayi lomunye.
23 Loyo lobuka wesifazane bese uyamkhanuka uyawulahla lukholo, angeke abe naye Moya; futsi uma angafuni kuphendvuka uyawulahlwa ngaphandle.
24 Ungaphingi; loyo lophingako, angafuni kuphendvuka, uyawulahlwa ngaphandle.
25 Kodvwa loyo losaphingile wase uyaphendvuka ngenhlitiyo yakhe yonkhe, wakuyekela, wangaphindzi wakwenta, ngiyawumtsetselela;
26 Kodvwa uma aphindze akwenta, angeke acolelwe, kodvwa uyawulahlwa ngaphandle.
27 Ungakhulumi lokubi ngamakhelwane wakho, noma umlimate.
28 Uyayati imitsetfo yami lemayelana naleti tintfo leniketwe emibhalweni yami lengcwele; loyo lowonako aphindze angaphendvuki ayawulahlwa ngaphandle.
29 Uma ungitsandza uyawungisebentela ugcine yonkhe imiyaleto yami.
30 Buka, ubokhumbula labamphofu, unikele ngemphahla yakho kubasita ngaleyo ncenye yalonako, ngesivumelwano nangencwadzi yesibopho lesingeke sephulwa.
31 Futsi nangabe ninikela ngetimphahla tenu kulabamphofu, nitawukwenta kimi; kutawubekwa phambi kwembhishobhi welibandla lami nakubeluleki bakhe, babonisi lababili, noma baphristi labakhulu, njengalabo latawubabeka noma lasekababekile futsi wabahlukanisela lenhloso.
32 Futsi kuyawukwenteka, kutsi emvakwekutsi sekubekwe phambi kwembhishobhi welibandla lami, emvakwekube sekatfole lobu bufakazi mayelana nekunikela ngemphahla yelibandla lami, kutsi angeke kususwe ebandleni, ngekuvumelana nemiyaleto yami, wonkhe umuntfu uyawutiphendvulela kimi, umphatsi ngetulu kwemphahla yakhe, noma loko lakutfole ngekunikela, ngangalokulingene yena nemndeni wakhe.
33 Ngetulu kwaloko, uma kuyawuba khona imphahla etandleni telibandla, noma kumuntfu ngamunye walo, lokungetulu kwalokudzingekile kubondla emvakwaloku kunikela kwekucala, lokungulokusele lokuyawunikelwa kumbhishobhi, kuyawugcinwa kute kwabelwe labo labangenako, tikhatsi ngetikhatsi, kute wonkhe umuntfu londzingile aniketwe ngalokwanele futsi atfole ngekwetidzingo takhe.
34 Ngaloko-ke, lokusele kuyawugcinwa endlini yami yengcebo, kute kwabelwe labamphofu nalabeswele njengoba kuyawuncunywa ngumkhandlu lomkhulu welibandla, nembhishobhi nemkhandlu wakhe;
35 Futsi ngenhloso yekutsenga imihlaba kute kuzuze wonkhe umuntfu ebandleni, nekwakha tindlu tekukhonta, nekwakha iJerusalema leNsha letawukwembulwa madvute emvakwaloku—
36 Kute bantfu bami besivumelwano babutsane babe ndzawonye ngalelo langa mhla ngibuya ethempelini lami. Futsi loku ngikwentela insindziso yebantfu bami.
37 Futsi kuyawukwenteka, kutsi loyo lowonako angaphendvuki uyawulahlwa ngaphandle kwelibandla, futsi angeke kubuyiselwe kuye loko lakunikele kulabamphofu nalabeswele ebandleni lami, noma ngalamanye emavi, kimi—
38 Ngoba nangabe nikwenta kulabancane balaba, nikwenta kimi.
39 Ngoba kuyawukwenteka, kutsi loko lengikukhulume ngemlomo webaphrofethi bami kuyawugcwaliseka; ngoba ngitawunikela ngengcebo yalabo labemukela livangeli lami emkhatsini webeTive kulabamphofu bebantfu bami lababendlu yaka-Israyeli.
40 Ngetulu kwaloko, ungatikhukhumeti enhlitiyweni yakho; tonkhe tingubo takho atibe nguletingakahlotjiswa, nebuhle bato bube buhle bemsebenti wetandla takho;
41 Futsi tonkhe tintfo atentiwe ngekuhlanteka phambi kwami.
42 Ungabi livila, ngoba loyo lolivila angeke adle sinkhwa noma agcoke tingubo talosebentako.
43 Futsi noma ngubani logulako emkhatsini wenu, abete lukholo lwekutsi angaphiliswa, kodvwa akholwa, uyawukondliwa ngebubele bonkhe, ngemakhambi nekudla lokutsambile, futsi loko hhayi ngesandla sesitsa.
44 Nebabonisi belibandla, lababili noma ngetulu, bayawubitwa, bathandazele baphindze babeke tandla tabo kubo egameni lami; uma bafa bayawufela kimi, futsi uma baphila bayawuphilela mine.
45 Niyawuhlala ndzawonye ngelutsandvo, kangangoba niyawulila ngekulahleka kwalabafako, ikakhulukati kulabo labete litsemba lekuvuka kwalabafile lokumangalisako.
46 Futsi kuyawukwenteka kutsi labo labafela kimi angeke bakuve kufa, ngoba kuyawuba mnandzi kubo;
47 Bese kutsi labo labangafeli kimi, maye kubo, ngoba kufa kwabo kubuhlungu.
48 Ngetulu kwaloko, kuyawukwenteka kutsi loyo lonelukholo kimi lekutsi aphiliswe, futsi angancunyelwa kufa, uyawuphiliswa.
49 Loyo lonelukholo lekutsi abone uyawubona.
50 Loyo lonelukholo lekutsi eve uyawuva.
51 Sishosha lesinelukholo lekutsi sisukume siyawusukuma.
52 Futsi labo labate lukholo lekutsi bente leti tintfo, kodvwa bakholelwa kimi, banemandla ekuba ngemadvodzana ami; futsi nangabe bangayephuli imitsetfo yami uyawububeketelela butsakatsaka babo.
53 Uyawukuma endzaweni lapho uphetse khona.
54 Ungayitsatsi ingubo yemnakenu; uyawukubhadalela loko loyawukutfola kumnakenu.
55 Futsi uma utfola lokungetulu kwaloko bekungaba kwekukondla, uyawukunikela endlini yami yengcebo, kute tonkhe tintfo tentiwe ngekwaloko lengikushito.
56 Cela, nemibhalo yami lengcwele iyawukwembulwa njengoba ngincumile, futsi iyawugcinwa iphephile;
57 Futsi kubalulekile kutsi ungasho lutfo mayelana nayo, futsi ungafundzisi ngayo ute uyitfole ngalokugcwele.
58 Futsi ngininika umyaleto wekutsi ngaleso sikhatsi niyawufundzisa ngayo kubo bonkhe bantfu; ngoba iyawufundziswa kuto tonkhe tive, tihlobo, tilimi nebantfu.
59 Niyawutsatsa tintfo lenititfolile, leniniketwe tona emibhalweni lengcwele yami njengemtsetfo, kube ngumtsetfo wami wekubusa libandla lami;
60 Futsi loyo lowenta ngekwaleti tintfo uyawusindziswa, bese kutsi loyo longatenti uyawulahlwa uma achubeka kanjalo.
61 Uma niyawucela, niyawunikwa sembulo etikwesembulo, lwati etikwelwati, kute nati timfihlakalo netintfo letinekuthula—leto letiletsa intfokoto, leto letiletsa imphilo yaphakadze.
62 Cela, futsi kuyawukwembulwa kuwe ngesami sikhatsi lesifanele lapho kuyawukwakhiwa khona iJerusalema leNsha.
63 Futsi buka, kuyawukwenteka kutsi tinceku tami tiyawutfunyelwa emphumalanga nasenshonalanga, enyakatfo naseningizimu.
64 Futsi manje, loyo loya emphumalanga akafundzise labo labayawuphendvuka kutsi babalekele enshonalanga, loku kungenca yaloko lokutako emhlabeni, nangenca yemacembu layimfihlo.
65 Buka, gcina tonkhe leti tintfo, uyawuba mkhulu umvuzo wakho; ngoba nine ninikiwe lwati lwetimfihlakalo tembuso, kodvwa umhlaba awukaniketwa kutsi utati.
66 Niyawugcina imitsetfo leniyitfolile niphindze netsembeke.
67 Emvakwaloko niyawutfola tivumelwano telibandla, njengaleto letiyawube tenele kunicinisekisa, lapha kanye naseJerusalema leNsha.
68 Ngako-ke, loyo loswele inhlakanipho akacele kimi, ngitawumnika ngekukhululeka futsi angeke ngimsole.
69 Tfokotani niphindze nijabule, ngoba umbuso ngewenu, noma ngalamanye emavi, tikhiya telibandla tiniketiwe. Kunjalo nje. Amen.
70 Baphristi nebafundzisi bayawuba nekuphatsa kwabo, njengemalunga.
71 Futsi babonisi nebaphristi labakhulu bakhetselwe kwelekelela umbhishobhi njengebeluleki etintfweni tonkhe, kufanele imindeni yabo yelekelelwe ngemphahla lenikelwe kumbhishobhi, kusita labamphofu nekufeza letinye tinhloso, njengoba kushiwo phambilini;
72 Noma kufanele batfole inkhokhelo lefanele ngayo yonkhe imisebenti yabo, kungaba kutsi batfola kuphatsa noma ngalenye indlela, njengoba kungabonakala kufanele noma kuncume beluleki nembhishobhi.
73 Futsi umbhishobhi, naye, uyawutfola kondliwa, noma inkhokhelo lefanele ngayo yonkhe imisebenti yakhe ebandleni.
74 Bukani, ngicinisile ngitsi kini, noma bobani emkhatsini wenu, labehlukene nalabashade nabo ngesizatfu sekuhlobonga, noma ngalamanye emavi, uma bayawufakaza phambi kwenu ngekutitfoba kwenhlitiyo kutsi kunjalo, aniyikubalahla ngaphandle emkhatsini wenu.
75 Kodvwa uma nitfola kutsi kukhona bantfu labashiye labashade nabo ngenca yekuphinga, nabo batoni, futsi labashade nabo baphila, bayawulahlwa ngephandle besuke emkhatsini wenu.
76 Ngetulu kwaloko, ngitsi kini, niyawuhlala nigadzile futsi nicaphele, ngekubutisisa, kute ningabemukeli labanjalo emkhatsini wenu uma bashadile;
77 Uma bangakashadi, bayawuphendvuka kuto tonkhe tono tabo nakungenjalo aniyikubamukela.
78 Ngetulu kwaloko, wonkhe umuntfu longuwaleli libandla laKhristu, uyawugcina yonkhe imiyaleto netivumelwano telibandla.
79 Futsi kuyawukwenteka kutsi noma bobani emkhatsini wenu labayawubulala bayawuletfwa baphindze baphatfwe ngekwemitsetfo yelive; ngoba khumbulani kutsi angeke acolelwe; futsi kuyawufakazelwa ngekwemitsetfo yelive.
80 Futsi noma ngumuphi wesilisa noma wesifazane loyawuphinga, uyawuletfwa embikwebabonisi lababili, noma ngetulu kutawutsetsa licala, futsi lonkhe licala liyawucinisekiswa ngekumelana naye bofakazi lababili belibandla, hhayi besitsa, kodvwa uma bangetulu kwalababili bofakazi kuncono.
81 Kodvwa uyawulahlwa ngelicala ngemlomo wabofakazi lababili; futsi babonisi bayawubeka licala phambi kwelibandla, nelibandla liyawuphakamisa tandla ngekumelana naye, kute baphatfwe ngekwemtsetfo waNkulunkulu.
82 Futsi uma kungenteka, kudzingekile kutsi umbhishobhi abekhona naye.
83 Niyawukwenta kanjalo-ke kuwo onkhe emacala layawubekwa phambi kwenu.
84 Futsi uma wesilisa noma wesifazane agebenga, uyawuletfwa emtsetfweni welive.
85 Uma eba, uyawuletfwa emtsetfweni welive.
86 Uma acamba emanga, uyawuletfwa emtsetfweni welive.
87 Uma enta noma ngubuphi bubi, uyawuletfwa emtsetfweni, ngisho lowo waNkulunkulu.
88 Uma umnakenu noma dzadzewenu akona, uyawumtsatsa nihlangane ninobabili kuphela; uma asivuma sono niyawubuyisana.
89 Uma angasivumi sono uyawumletsa ebandleni, hhayi kumalunga, kodvwa kubabonisi. Futsi loku kuyawukwentiwa emhlanganweni , hhayi phambi kwemhlaba.
90 Uma umnakenu noma dzadzewenu ona labaningi, uyawujeziswa phambi kwalabaningi.
91 Futsi noma ngubani lowona phambi kwebantfu, uyawukwekhutwa phambi kwebantfu, kute adliwe mahloni. Uma angasivumi sono, uyawuletfwa emtsetfweni waNkulunkulu.
92 Uma kukhona loyawukona ngansense, uyawukhutwa ngansense, kute abe nelitfuba lekuvuma sono ngansense kuloyo lamonile, nakuNkulunkulu, kute libandla lingakhulumi ngekumugceka.
93 Futsi niyawukwenta kanjalo-ke kuto tonkhe tintfo.