Sigaba 44
Sembulo lesaniketwa Joseph Smith umPhrofethi naSidney Rigdon, eKirtland, e-Ohio, ngasekupheleni kwenyanga yeNdlovana 1831. Ngekuvumelana naloko lokudzingekako lokubekwe lapha, liBandla lahlela kubamba umhlangano lomkhulu ngasekucaleni kwenyanga yeNhlaba leyayilandzela.
1–3, Babonisi kufanele babutsane emhlanganweni lomkhulu; 4–6, Kufanele bahlele ngekwemitsetfo yelive baphindze banakekele labamphofu.
1 Bukani, naku lokushiwo yiNKhosi kini tinceku tami, kubalulekile kimi kutsi babonisi belibandla babitelwe ndzawonye, kusukela emphumalanga nasenshonalanga, nasenyakatfo naseningizimu, ngencwadzi noma ngalenye indlela.
2 Futsi kuyawukwenteka, kutsi nangabe betsembekile, futsi basebentisa lukholo kimi, ngiyawutfumela Moya wami kubo ngelilanga labayawubutsana ngalo ndzawonye.
3 Futsi kuyawukwenteka kutsi bayawuhamba baye etifundzeni letidvute, bashumayele kuphendvuka kubantfu.
4 Labaningi bayawuphendvuka, kangangoba niyawutfola emandla ekutihlela ngekwemitsetfo yebantfu.
5 Kute titsa tenu tingabi nemandla etikwenu; kute nigcinwe kuto tonkhe tintfo; kute ninikwe emandla ekugcina imitsetfo yami; kute bonkhe budlelwane bephulwe lokungubo sitsa sifuna kubhubhisa bantfu bami ngabo.
6 Bukani, ngitsi kini, kumele nivakashele labamphofu, nalabeswele nibanike kute batfole kukhululeka, kute bagcinwe tite tonkhe tintfo tentiwe ngemtsetfo wami leniwutfolile. Amen.