Sigaba 46
Sembulo lesaniketwa ngaJoseph Smith umPhrofethi eBandleni, eKirtland, e-Ohio, mhlaka 8 iNdlovulenkhulu 1831. Kulesi sikhatsi sekucala kweliBandla, sibonelo lesifanako sekuchuba imihlangano yeliBandla besingakabi khona. Kodvwa, umkhuba wekwemukela emalunga kuphela nalabasaphenya libandla ngenshisekelo emihlanganweni yesidlo seNkhosi, nakuleminye imibutsano yeliBandla bese kuyintfo lejwayelekile. Lesi sembulo sivakalisa intsandvo yeNkhosi mayelana nekulawulwa kanye nekuchutjwa kwemihlangano kanjalo nemyalo Wayo ngalokuphatselene nekutama kutfola nekwehlukanisa tipho taMoya.
1–2, Babonisi kufanele bachube imihlangano ngekuholwa nguMoya loNgcwele; 3–6, Labafuna liciniso akukafaneli bakhishwe emihlanganweni yesidlo seNkhosi; 7–12, Buta kuNkulunkulu ufune netipho taMoya; 13–26, Kubalwa kwaletinye taleti tipho kuyaniketwa; 27–33, Baholi beliBandla baniketwa emandla ekwehlukanisa tipho taMoya.
1 Lalelani. Awu nine bantfu belibandla lami, ngoba ngicinisile ngitsi kini leti tintfo takhulunywa kini kute nizuze futsi nifundze.
2 Kodvwa nanoma kunetintfo letibhaliwe, bekusolo kuniketwe babonisi belibandla lami kusukela ekucaleni, futsi kuyawuhlala kunjalo, kutsi bachube yonkhe imihlangano njengoba bayaliwe futsi baholwa nguMoya loNgcwele.
3 Noko niyaletiwe kutsi ningakhipheli namunye ngaphandle emihlanganweni yenu yawo wonkhe umuntfu, lebanjelwe phambi kwebantfu.
4 Niphindze niyayaletwa kutsi ningakhipheli namunye ngaphandle longuwelibandla emihlanganweni yenu yesidlo seNkhosi; noko, uma kukhona lowonile, ningamvumeli atsatse sidlo ate ente inhlawulo.
5 Ngetulu kwaloko ngitsi kini, ningakhipheli namunye ngaphandle emihlanganweni yenu yesidlo seNkhosi labafuna umbuso ngekweliciniso—ngikhuluma loku ngalokuphatselene nalabo labangasibo belibandla.
6 Ngetulu kwaloko ngitsi kini, ngalokuphatselene nemihlangano yenu yekucinisekisa, uma kukhona labangasibo belibandla, labafuna umbuso ngekweliciniso, ningabakhipheli ngaphandle.
7 Kodvwa niyayaletwa kuto tonkhe tintfo kutsi nicele kuNkulunkulu, lophana ngekukhululeka; futsi loko lokufakazwa nguMoya kini ngifuna nikwente ngebungcwele bonkhe benhlitiyo, nihambe ngebucotfo phambi kwami, nicabange ngemphumela wensindziso yenu, nente tonkhe tintfo ngemthandazo nekubonga, kute ningayengwa yimimoya lemibi, noma timfundziso tadeveli, noma imiyaleto yebantfu, ngoba leminye ngeyebantfu, kantsi leminye ngeyadeveli.
8 Ngaloko-ke, caphelani funa nidukiswe, futsi kute ningadukiswa funani ngekweliciniso tipho letinhle kakhulu, nikhumbule njalo kutsi tiniketelwani;
9 Ngoba ngicinisile ngitsi kini, tiniketwe kute kuzuze labo labangitsandzako nalabagcina imiyaleto yami, naloyo lofuna kwenta njalo; kute bazuze bonkhe labo labafuna noma labacela kimi, labo labangaceli sibonakaliso kute basicitse etinkhanukweni tabo.
10 Ngetulu kwaloko, ngicinisile ngitsi kini, ngifuna kutsi nikhumbule njalo, niphindze nikugcine etingcodvweni tenu kutsi tiyini leti tipho, letiphiwa libandla.
11 Ngoba akusibo bonkhe labaphiwa tonkhe tipho, ngoba tiningi tipho, futsi wonkhe muntfu uphiwa sipho ngaMoya waNkulunkulu.
12 Kulabanye kuphiwa sinye, nakulabanye kuphiwa lesinye, kute bonkhe bazuze ngalendlela.
13 Kulabanye kuphiwa ngaMoya loNgcwele kute bati kutsi Jesu Khristu uyiNdvodzana yaNkulunkulu, nekutsi wabetselelwa tono temhlaba.
14 Kulabanye kuphiwa kutsi bakholwe emavini abo, kute nabo batfole kuphila lokuphakadze uma bachubeka nekwetsembeka.
15 Ngetulu kwaloko, kulabanye kuphiwa ngaMoya loNgcwele kutsi bati tindlela tekuphatsa letehlukene, njengoba kutfokotisa kuleyo Nkhosi lefanako, njengekufisa kweNkhosi, leyenta sihawu sayo ngekwetimo tebantfwana bebantfu.
16 Ngetulu kwaloko, labanye baphiwa ngaMoya loNgcwele kute bati imisebenti yemandla leyehlukene, kutsi yakaNkulunkulu yini, kute tibonakaliso taMoya tiphiwe kuwo wonkhe umuntfu kute bonkhe bazuze nato.
17 Ngetulu kwaloko, ngicinisile ngitsi kini, kulabanye kuphiwa, ngaMoya waNkulunkulu, livi lekuhlakanipha.
18 Kulomunye kuphiwa livi lekwati, kute bonkhe bafundziswe kutsi bahlakaniphe nekutsi babe nelwati.
19 Ngetulu kwaloko, kulabanye kuphiwa kukholwa kute baphiliswe;
20 Kulabanye kuphiwa kukholwa kute baphilise.
21 Ngetulu kwaloko, kulabanye kuphiwa kutsi bente timangaliso;
22 Labanye kuphiwa kuphrofetha;
23 Labanye kwehlukanisa imimoya.
24 Ngetulu kwaloko, kulabanye kuphiwa kukhuluma ngetilimi;
25 Kulomunye kuphiwa kuhumusha tilimi.
26 Futsi tonkhe leti tipho tivela kuNkulunkulu, kute kuzuze bantfwana baNkulunkulu.
27 Kumbhishobhi welibandla, nakulabo Nkulunkulu layawubakhetsa aphindze ababeke kutsi bagadze libandla nekutsi babe babonisi ebandleni, bayawuphiwa kubo kwehlukanisa tonkhe leto tipho kute kubete emkhatsini wenu lotenta waNkulunkulu kodvwa abe angasiye waNkulunkulu.
28 Futsi kuyawukwenteka kutsi loyo locela ngaMoya uyawutfola ngaMoya;
29 Kute kulabanye kuphiwe kutsi babe nato tonkhe leti tipho, kute kube nenhloko, kute onkhe emalunga azuze ngato.
30 Loyo locela ngaMoya ucela ngekwentsandvo yaNkulunkulu; ngaloko-ke kwentiwa njengoba acelile.
31 Ngetulu kwaloko, ngitsi kini, tonkhe tintfo kumele tentiwe egameni laKhristu, nanoma yini leniyenta ngaMoya;
32 Futsi kumele nibonge kuNkulunkulu ngaMoya nganoma ngusiphi sibusiso lenibusiswa ngaso.
33 Kumele nente kulunga nebungcwele phambi kwami njalo. Kunjalo nje. Amen.