Sigaba 49
Sembulo lesaniketwa ngaJoseph Smith umPhrofethi kuSidney Rigdon, kuParley P. Pratt, naLeman Copley, eKirtland, e-Ohio, mhlaka 7 iNkhwekhweti, 1831. Leman Copley bekalemukele livangeli kodvwa asebambelele kuletinye timfundziso temaShakers (United Society of Believers in Christ’s Second Appearing) [INhlangano yalabaKholwa eKuveleni kwesiBili kwaKhristu] labekahlanganyela nabo ngaphambilini. Letinye tinkholelo temaShakers bekungukutsi Kubuya kwesiBili kwaKhristu sekuvele kwentekile nekutsi wavela asesimeni semuntfu wesifazane, Anne Lee. Bebangakutsatsi njengentfo lebalulekile kubhajatiswa ngemanti. Bebangawufuni umshado bakholelwa emphilweni yekungashadi nekungalalani. Labanye bemaShakers bebangakuvumeli kudla inyama. Kwendvulela lesi sembulo, umlandvo waJoseph Smith utsi, “Kute ngibe nekucondza lokuphelele ngaloludzaba, ngabuta eNkhosini, ngase ngitfola loku lokulandzelako” Lesembulo siyayiphikisa leminye imicondvo lesisekelo yalelicembu lemaShakers. Labazalwane lasebashiwo basitsatsa lesi sembulo basiyisa emphakatsini wemaShakers (edvute naseCleveland, e-Ohio) babafundzela sonkhe, kodvwa basala.
1–7, Lilanga nelihora lekubuya kwaKhristu liyawuhlala lingatiwa ate abuye; 8–14, Bantfu kufanele baphendvuke, bakholwe livangeli, baphindze batfobele timiso kute batfole insindziso; 15–16, Umshado ubekwe nguNkulunkulu; 17–21, Kudla inyama kuvumelekile; 22–28, ISiyoni iyawuphumelela nemaLamani achakaze njengembali ngaphambi kweKubuya kwesiBili.
1 Lalelani livi lami, tinceku tami Sidney, naParley, naLeman; ngoba bukani, ngicinisile ngitsi kini, ngininika umyaleto wekutsi niyawuhamba nishumayele livangeli lami lenilemukele kumaShakers, njengoba nilitfolile.
2 Bukani, ngitsi kini, balangatelela kwati incenye yeliciniso, kodvwa hhayi lonkhe, ngoba abakalungi phambi kwami futsi kufanele baphendvuke.
3 Ngaloko-ke, ngiyanitfuma, tinceku tami Sidney naParley, kuyawushumayela livangeli kubo.
4 Futsi inceku yami Leman uyawubekelwa lomsebenti, kute akhulume nabo, hhayi ngaloko lakutfole kubo, kodvwa ngaloko latawufundziswa kona ngini tinceku tami; ngekwentanjalo ngitawumbusisa, nakungenjalo angeke aphumelele.
5 Naku lokushiwo yiNkhosi; ngoba nginguNkulunkulu, futsi ngitfumele iNdvodzana yami Letelwe Yodvwa emhlabeni kutawuhlenga umhlaba, futsi ngimemetele kutsi loyemukelako uyawusindziswa, kantsi loyo longayemukeli uyawuba ngaphansi kwemandla aSathane—
6 Futsi bente kuyo iNdvodzana yeMuntfu labakutsandzako; sewutsetse emandla akhe esandleni sangesekudla senkhatimulo yakhe, manje ubusa emazulwini, futsi utawubusa ate ehlele emhlabeni kutawubeka tonkhe titsa takhe ngaphansi kwetinyawo takhe, lokusikhatsi lesesisedvute—
7 Mine, iNkhosi Nkulunkulu, sengikukhulumile, kodvwa lihora nelilanga kute umuntfu lolatiko, ngisho tingilosi ezulwini, angeke tati ate abuye.
8 Ngaloko-ke, ngifisa kutsi wonkhe umuntfu aphendvuke, ngoba bonkhe bangephansi kwesono, ngaphandle kwalabo lengitigcinele bona, bantfu labangcwele leningati ngabo.
9 Ngaloko-ke, ngitsi kini ngitfumele kini sivumelwano sami saphakadze, ngisho loko lokwakukhona kusukela ekucaleni.
10 Futsi loko lengikutsembisile ngikufezile, netive temhlaba tiyawukukhotsamela; futsi, uma tingakukhotsameli ngekutsandza kwato, titawutfotjiswa, ngoba loko lokutiphakamisile kutawukwehliswa ngemandla.
11 Ngaloko-ke, ngininiketa umyaleto wekutsi niye emkhatsini walabantfu, nitsi kubo, njengemphostoli wami wakadzeni, libito lakhe lebekunguPhetro:
12 Kholwani egameni leNkhosi Jesu, lobekasemhlabeni, nalotako, sicalo nesiphetfo;
13 Phendvukani nibhajatiswe egameni laJesu Khristu, ngekwemiyaleto lengcwele, kute nitfole kutsetselelwa kwetono;
14 Futsi loyo lowenta loku uyawutfola sipho saMoya loNgcwele, ngekubekwa tandla babonisi belibandla.
15 Ngetulu kwaloko, ngicinisile ngitsi kini, loyo lovimbela kushada akabekwa ngalokukwaNkulunkulu, ngoba umshado ubekelwe bantfu nguNkulunkulu.
16 Ngaloko-ke, kusemtsetfweni kutsi abe nemfati munye, futsi bobabili bayawuba nyamanye, konkhe loku kute umhlaba ugcwalise inhloso yendalo yawo;
17 Kute ugcwaliswe ngesibalo sebantfu, ngekwendalo yakhe ngaphambi kwekudalwa kwemhlaba.
18 Futsi loyo lovimbela kutsi kudliwe inyama, kutsi umuntfu angakudli loko, akabekwa ngalokukwakaNkulunkulu;
19 Ngoba, bukani, tilwane tesiganga netinyoni telizulu, naloko lokuphuma emhlabatsini, kubekelwe kusetjentiswa ngumuntfu kutsi adle nekutsi embatse, kute abe nalokuningi.
20 Kodvwa akukavunyelwa kutsi umuntfu munye abe naloko lokungetulu kwalomunye; ngaloko-ke umhlaba uhleti esonweni.
21 Futsi maye kumuntfu locitsa ingati noma lomosa inyama angenasidzingo.
22 Ngetulu kwaloko ngitsi kini, iNdvodzana yeMuntfu ayiti ngesimo sewesifazane, noma sendvodza lehamba emhlabeni.
23 Ngaloko-ke, ningadukiswa, kodvwa chubekani nicine, nibuke phambili kutsi emazulu atonyakatiswa, nemhlaba utotamatama uphindze udzayitele uye lena nalena njengesidzakwa, netigodzi tiphakanyiswe, netintsaba tehliswe, netigodzigodzi tibe ngematsafa—konkhe loku ngesikhatsi ingilosi iyawushaya licilongo layo.
24 Kodvwa ngaphambi kwekufika kwelilanga leNkhosi, Jakobe uyawuphumelela ehlane, nemaLamani ayawuchakaza njengembali.
25 ISiyoni iyawuphumelela etikwemagcuma ijabule etikwetintsaba, futsi iyawubutsana ndzawonye endzaweni lengiyikhetsile.
26 Bukani, ngitsi kini, hambani njengoba nginiyaletile; phendvukani etonweni tenu; celani nitawuphiwa; nconcotsani nitawuvulelwa.
27 Bukani, ngitawuhamba phambi kwenu ngibe ngumvikeli wenu wangasemuva; futsi ngiyawuba semkhatsini wenu; angeke nivinjelwe.
28 Bukani, nginguJesu Khristu, futsi ngiyabuya masinyane. Kunjalo nje. Amen.