Sigaba 52
Sembulo lesaniketwa ngaJoseph Smith umPhrofethi kubabonisi belibandla, eKirtland, e-Ohio, mhlaka 6 iNhlaba 1831. Umhlangano lomkhulu bewubanjwe eKirtland, wawucale mhlaka 3 waphela mhlaka 6 iNhlaba. Kulona mhlangano kwentiwa kugcotjwa kwekucala lokwehlukile esikhundleni sebuphristi lobukhulu, futsi kubonakaliswa lokutsite kwemimoya yemanga nalekhohlisako kwehlukaniseka kwaphindze kwekhutwa.
1–2, Umhlangano lomkhulu lolandzelako umiselwe kutsi utawubanjelwa eMissouri; 3–8, Kukhetfwa kwebabonisi labatsite kutsi bahambe kanyekanye kuyahlelwa; 9–11, Babonisi kumele bafundzise loko baphostoli nebaphrofethi labakubhalile; 12–21, Labo labakhanyiselwe nguMoya baletsa titselo tekudvumisa netekuhlakanipha; 22–44, Babonisi labahlukahlukene bakhetfwa kutsi bahambe bashumayele livangeli basahamba baya eMissouri emhlanganweni lomkhulu.
1 Bukani, naku lokushiwo yiNkhosi kubabonisi leyibabitile naleyibakhetsile kuleti tinsuku tekugcina, ngelivi laMoya wayo—
2 Itsi: Mine, iNkhosi, ngitawunatisa kutsi yini lengifuna niyente kusukela ngalesi sikhatsi kute kube ngumhlangano lomkhulu lolandzelako, lotawubanjelwa eMissouri, eveni lengitawulingcwelisela bantfu bami, labayinsali yaJakobe, nalabo labatindlalifa ngekwesivumelwano.
3 Ngaloko-ke, ngicinisile ngitsi kini, tinceku tami Joseph Smith, lomNcane, naSidney Rigdon atitsatse luhambo lwato ngekushesha nje lapho sekwentiwe emalungiselelo ekushiya emakhaya ato, tihambe tiye eveni laseMissouri.
4 Futsi nangabe betsembekile kimi, bayawukwatiswa loko lokumele bakwente;
5 Bayawuphindze, nangabe betsembekile, batiswe live lelilifa lenu.
6 Futsi nangabe abaketsembeki, bayawususwa, ngekubona kwami, nangekutsandza kwami.
7 Ngetulu kwaloko, ngicinisile ngitsi kini, inceku yami Lyman Wight nenceku yami John Corrill abatsatse luhambo lwabo ngekushesha;
8 Nenceku yami John Murdock, nenceku yami Hyrum Smith, abatsatse luhambo lwabo baye endzaweni lefanako ngendlela yaseDetroit.
9 Futsi abahambe kusukela kuleyo ndawo bashumayele livi endleleni, bangasho lutfo lolunye ngaphandle kwaloko baphrofethi nebaphostoli labakubhalile, naloko labakufundziswe kona nguMdvudvuti ngemthandazo wekukholwa.
10 Abahambe ngababili, bashumayele ngaleyo ndlela endleleni kulo lonkhe libandla, babhabhatise ngemanti, ngekubabeka tandla ngaselusentseni lwemanti.
11 Ngoba naku lokushiwo yiNkhosi, ngitawunciphisa umsebenti wami ngekulunga, ngoba tikhatsi tiyeta lapho ngitawutfumela khona kwehlulela kube kuncoba.
12 Futsi inceku yami Lyman Wight ayicaphele, ngoba Sathane ufisa kuyihlunga njengemakhoba.
13 Bukani, loyo lowetsembekile uyawukwentiwa umbusi etikwetintfo letiningi.
14 Ngetulu kwaloko, ngitawuninika sibonelo kuto tonkhe tintfo, kute ningakhohliswa; ngoba Sathane ukhona ndzawo tonkhe, futsi uhamba akhohlisa tive—
15 Ngaloko-ke loyo lothandazako, lonemoya lodzabukile, nguye loyo lowemukelekile kimi uma atfobela timiso tami.
16 Loyo lokhulumako, lonemoya lodzabukile, lonelulwimi lolumnene futsi lolwakhako, nguye loyo lowaNkulunkulu uma atfobela timiso tami.
17 Ngetulu kwaloko, loyo lochachatelako ngenca yekwesaba emandla ami uyawukwentiwa acine, futsi uyawuletsa titselo tekudvumisa netekuhlakanipha, ngekwetembulo nemaciniso lengininikete wona.
18 Ngetulu kwaloko, loyo loncotjwako nalongaletsi titselo, ngisho nangekwalesi sibonelo, akasiye wami.
19 Ngaloko-ke, ngalesi sibonelo niyawuyati imimoya kuto tonkhe timo letingephansi kwemazulu onkhe.
20 Netikhatsi setifikile; lapho ngekwelukholo lwebantfu kuyawukwentiwa kubo.
21 Bukani, lomlayeto uniketwa kubo bonkhe babonisi lengibakhetsile.
22 Ngetulu kwaloko, ngicinisile ngitsi kini, inceku yami Thomas B. Marsh nenceku yami Ezra Thayre atitsatse luhambo lwato nato, tishumayele livi endleleni leya kulelive.
23 Ngetulu kwaloko, inceku yami Isaac Morley nenceku yami Ezra Booth abatsatse luhambo lwabo, nabo bashumayele livi endleleni leya kuleli live.
24 Ngetulu kwaloko, tinceku tami Edward Partrigde naMartin Harris atitsatse luhambo lwato netinceku tami Sidney Rigdon naJoseph Smith, lomNcane.
25 Tinceku tami David Whitmer naHarvey Whitlock atitsatse luhambo lwato nato, tishumayele endleleni leya kulelive.
26 Futsi netinceku tami Parley P. Pratt na-Orson Pratt atitsatse luhambo lwato, tishumayele endleleni, ngisho nakulelive.
27 Netinceku tami Solomon Hancock naSimeon Carter nato atitsatse luhambo lwato tiye kulelive, tishumayele endleleni.
28 Tinceku tami Edson Fuller naJacob Scott nato atitsatse luhambo lwato.
29 Tinceku tami Levi W. Hancock naZebedee Coltrin nato atitsatse luhambo lwato.
30 Tinceku tami Reynolds Cahoon naSamuel H. Smith nato atitsatse luhambo lwato.
31 Tinceku tami Wheeler Baldwin naWilliam Carter nato atitsatse luhambo lwato.
32 Futsi netinceku tami Newel Knight naSelah J. Griffin totimbili atibekwe, nato titsatse luhambo lwato.
33 Yebo, ngicinisile ngitsi, bonkhe laba abatsatse luhambo baye endzaweni yinye, etindleleni tabo letehlukene, futsi umuntfu munye angakheli etikwesisekelo salomunye, noma ahambe endleleni yalomunye.
34 Loyo lowetsembekile, lonjalo uyawugcinwa aphindze abusiswe ngetitselo letiningi.
35 Ngetulu kwaloko, ngitsi kini tinceku tami Joseph Wakefield naSolomon Humphrey atitsatse luhambo lwato tiye emaveni langasemphumalanga;
36 Abasebente nemindeni yabo, bangasho lutfo ngaphandle kwaloko baphrofethi nebaphostoli labakukhulumile, loko labakubonile nalabakuvile nalabakukholwa ngekweliciniso, kute tiphrofetho tigcwaliseke.
37 Ngenca yesiphambeko, loko lokwaniketwa Heman Basset akutsatfwe kuye, kuniketwe Simonds Ryder.
38 Ngetulu kwaloko, ngicinisile ngitsi kini, Jared Carter akabekwe abe ngumphritsi, naGeorge James naye akabekwe abe ngumphristi.
39 Labasele bebabonisi abagadze emabandla, bamemetele livi etifundzeni letisedvute nabo; futsi abasebente ngetandla tabo kute kube bete kukhonta tithico nebubi lobentiwako.
40 Futsi khumbulani etintfweni tonkhe labamphofu nalabeswele, labagulako nalabaselusizini, ngoba loyo longatenti leti tintfo, nguye loyo longasiye umfundzi wami.
41 Ngetulu kwaloko, tinceku tami Joseph Smith, lomNcane, naSidney Rigdon na-Edward Partridge atitsatse incwadzi yesincomo ebandleni. Futsi akutfolakale lenye yenceku yami Oliver Cowdery.
42 Ngaleyo ndlela, njengoba sengishito, uma netsembekile niyawubutsana ndzawonye kute nijabule eveni laseMissouri, lekulive lelifa lenu, lekulive manje letitsa tenu.
43 Kodvwa, bukani, mine, iNkhosi, ngitawukusheshisa kwakhiwa kwalelidolobha ngesikhatsi salo, futsi ngitawubetfwesa umchele labetsembekile ngentfokoto nangekujabula.
44 Bukani, nginguJesu Khristu, iNdvodzana yaNkulunkulu, futsi ngitawubaphakamisa ngelilanga lekugcina. Kunjalo nje. Amen.