Sigaba 53
Sembulo lesaniketwa ngaJoseph Smith umPhrofethi ku-Algernon Sidney Gilbert, eKirtland, e-Ohio, mhlaka 8 iNhlaba, 1831. Ngenca yesicelo saSidney Gilbert, umPhrofethi wabuta iNkhosi ngemsebenti weMzalwane Gilbert nekubekwa kwakhe ebandleni.
1–3, Lubito nekukhetfwa kwaSidney Gilbert eBandleni kubekwa kutsi abe ngumbonisi; 4–7, Utawuphindze asebente njengesitfunywa sembhishobhi.
1 Buka, ngitsi kuwe, nceku yami Sidney Gilbert, ngiyivile imithandazo yakho, futsi ungicelile kutsi watiswe, yiNkhosi Nkulunkulu wakho, mayelana nelubito nekukhetfwa kwakho ebandleni, mine, iNkhosi, lengilisungulile kuleti tikhatsi tekugcina.
2 Buka, mine, iNkhosi, leyabetselwa ngenca yetono temhlaba, ngikuniketa umyaleto wekutsi uyawushiya umhlaba.
3 Yemukela lubito lengikugcobele kulo, nalolo lwekuba ngumbonisi, kushumayela kukholwa nekuphendvuka nekutsetselelwa kwetono, ngekwelivi lami, nekwemukela Moya loNgcwele ngekubekwa tandla.
4 Uphindze ube sitfunywa kulelibandla endzaweni leyawukhetfwa ngumbhishobhi, ngekwemiyaleto leyawuniketwa emvakwaloku.
5 Ngetulu kwaloko, ngicinisile ngitsi kuwe, uyawutsatsa luhambo lwakho netinceku tami Joseph Smith, lomNcane, naSidney Rigdon.
6 Buka, leti timiso tekucala lotawutitfola; letinye titawukwatiswa ngesikhatsi lesitako, njengekusebenta kwakho esivinini sami.
7 Ngetulu kwaloko, ngifuna ufundze kutsi nguloyo kuphela losidziswako loyawubeketela kute kube sekugcineni, Kunjalo nje. Amen.