Sigaba 61
Sembulo lesaniketwa ngaJoseph Smith umPhrofethi, elusentseni lwemfula iMissouri, eJikeni laseMcIlwaine, mhlaka 12 iNgci 1831. Eluhambeni lwabo lwekubuyela eKirtland, umPhrofethi nebabobisi labalishumi bese bahambe behla ngeMfula iMissouri ngetikebhe. Ngelilanga lesitsatfu leluhambo, behlelwa tingoti letiningi. Umbonisi William W. Phelps, embonweni wasemini, wabona umbhubhisi ahamba ngemandla etikwemanti.
1–12, INkhosi seyimemetele imbubhiso leningi etikwemanti; 13–22, Emanti acalekiswa nguJohane, nembhubhisi uhamba etikwebuso bawo; 23–29, Labanye banemandla ekuyaleta emanti; 30–35, Babonisi kufanele bahambe ngababili bashumayele livangeli; 36–39, Kufanele balungiselele kubuya kweNdvodzana yeMuntfu.
1 Bukani, futsi nilalele livi laloyo lonemandla onkhe, losuka phakadze naphakadze, ngisho Alfa na-Omega, sicalo nesiphetfo.
2 Bukani, ngicinisile naku lokushiwo yiNkhosi kini, Awu babonisi belibandla lami, lenibutsene kulendzawo, lenitsetselelwe tono tenu manje, ngoba mine, iNkhosi, ngiyatitsetselela tono, futsi nginemusa kulabo labavuma tono tabo ngenhlitiyo letfobekile;
3 Kodvwa ngicinisile ngitsi kini, akukadzingeki kutsi lonkhe lelicembu lebabonisi bami lihambe ngekushesha etikwalamanti, kungulapho bahlali ngalapha nangalapha babhubha ngekungakholwa.
4 Noko, ngakuvumela kute nifakaze; bukani, tiningi tingoti etikwalamanti, ikakhulukati emvakwaloku;
5 Ngoba mine, iNkhosi, ngimemetele entfukutselweni yami imbubhiso leningi etikwalamanti; yebo, ikakhulukati etikwalawa manti
6 Noko, yonkhe inyama isesandleni sami, futsi loyo lowetsembekile emkhatsini wenu angeke abhubhe ngalamanti.
7 Ngaloko-ke, kufanele kutsi inceku yami Sidney Gilbert nenceku yami William W. Phelps basheshe emsebentini wabo nalabantfunywe kona.
8 Noko, bengingeke ngivume kutsi nihlukane nite nijeziswe ngato tonkhe tono tenu, kute nibe munye, kute ningabhubhi ebubini;
9 Kodvwa manje, ngicinisile ngitsi, kudzingekile kutsi nihlukane. Ngaloko-ke tinceku tami Sidney Gilbert naWilliam W. Phelps atihambe nelicembu lato lakucala, batsatse luhambo lwabo ngekushesha kute bagcwalise labatfunywe kona, futsi ngekukholwa batawuncoba;
10 Nangabe betsembekile batawugcinwa, futsi mine, iNkhosi, ngitawuba nabo.
11 Labasele abatsatse loko labakudzingako kwekwembatsa.
12 Inceku yami Sidney Gilbert ayitsatse loko leyingakudzingi ihambe nako, ngekuvumelana kwenu
13 Manje, bukani, kute nizuze nganinika umyaleto mayelana naletintfo: Futsi mine, iNkhosi, ngitawubonisana nani njengakubantfu etikhatsini tasemandvulo.
14 Bukani, mine, iNkhosi, ekucaleni ngawabusisa lamanti; kodvwa ngemalanga ekugcina, ngemlomo wenceku yami Johane, ngawacalekisa lamanti
15 Ngaloko-ke, tikhatsi titawufika lapho kuyawubate inyama leyiyawusindza etikwalamanti.
16 Futsi kuyawutsiwa etikhatsini letitako kute loyawukwati kuya etulu eveni laseSiyoni etikwalamanti, kodvwa loyo lolungile enhlitiyweni.
17 Futsi, njengoba mine, iNkhosi, ekucaleni ngalicalekisa lelive, kanjalo-ke emalangeni ekugcina ngilibusisile, ngesikhatsi salo, kute lisetjentiswe ngulabangcwele bami, kute badle inala yalo.
18 Manje ngininiketa umyaleto wekutsi lengikusho kumunye ngikusho kubo bonkhe, kute nicwayise bomnakenu mayelana nalamanti, kute bangahambi etikwawo, funa lukholo lwabo lwehluleke babambeke kulolugibe;
19 Mine, iNkhosi, ngincumile, futsi umbhubhisi uhamba etikwawo, futsi angisihocisi lesincumo.
20 Mine, iNkhosi, benginitfukutselele itolo, kodvwa namuhla intfukutselo yami iphelile
21 Ngaloko-ke, labo lengikhulume ngabo, lokufanele batsatse luhambo lwabo ngekushesha—ngiyaphindza ngitsi kini, abatsatse luhambo lwabo ngekushesha.
22 Futsi akusho lutfo kimi, emvakwesikhashana, uma batawukugcwalisa labatfunywe kona, noma bahamba emantini noma emhlabatsini; loko akube njengoba kwembuliwe kubo njengekubona kwabo emvakwalesi sikhatsi.
23 Manje, ngalokuphatselene netinceku tami, Sidney Rigdon, Joseph Smith, lomNcane, na-Oliver Cowdery, atingaphindzi tite kulamanti, ngaphandle kwekutsi kube semseleni, ngesikhatsi tisahamba tiya emakhaya ato; noma ngalamanye emavi angeke bete bahamba kulamanti, ngaphandle kwekutsi kube ngemsele.
24 Bukani, mine, iNkhosi, ngiyikhetsile indlela yekuhamba yalabangcwele bami, futsi bukani, ngiyo lena indlela—kutsi emvakwekushiya umsele kufanele bahambe emhlabatsini, nangabe bayaletiwe kutsi bahambe baye etulu eveni laseSiyoni;
25 Futsi kufanele bente njengebantfwana baka-Israyeli, bamise emathende abo ngendlela.
26 Futsi, bukani, lomyaleto niyawuniketa kubo bonkhe bomnakenu.
27 Noko, loyo loniketwe emandla ekuyaleta emanti, kuye kuniketwe ngaMoya kutsi ati tonkhe tindlela takhe;
28 Ngaloko-ke, akente njengoba Moya waNkulunkulu lophilako amyaletile, noma emhlabatsini noma emantini, njengoba kukimi kwenta emvakwaloku.
29 Futsi kini kuniketwe indlela yalabangcwele, noma indlela yalabangcwele belibandla leNkhosi, kutsi bahambe.
30 Ngetulu kwaloko, ngicinisile ngitsi kini, tinceku tami, Sidney Rigdon, Joseph Smith lomNcane, na-Oliver Cowdery, atiyukuyivula imilomo yato emabandleni alababi tite tifike eCincinnati;
31 Futsi kuleyo ndzawo tiyawuphakamisa emavi ato kuNkulunkulu ngekumelana nalabo bantfu, yebo, kuloyo lulaka lwakhe lokheleke ngekumelana nebubi babo, bantfu cishe lesebalungele kubhujiswa.
32 Kusuka lapho abahambele emabandla abomnakabo, ngoba imisebenti yabo namanje idzingeka kakhulu emkhatsini wabo kunasemkhatsini wemabandla alababi.
33 Manje, ngalokuphatselene nalabasele, abahambe bamemetele livi emkhatsini wemabandla alababi, nangabe bayaletiwe;
34 Nangabe bakwenta loku bayawuba ngulabangenacala, futsi abayuba nacashata phambi kwami.
35 Futsi abahambe kanyekanye, noma ngababili, njengekutsandza kwabo, kuphela nje inceku yami Reynolds Cahoon, nenceku yami Samuel H. Smith, lengitfokota kakhulu ngabo, abangehlukaniswa bate babuyele emakhaya abo, loku kungenhloso lehlakaniphile kimi.
36 Manje, ngicinisile ngitsi kini, lengikusho kumunye ngikusho kubo bonkhe, manini sibindzi, bantfwana labancane; ngoba ngisemkhatsini wenu, futsi angikanilahli;
37 Futsi nangabe nititfobile phambi kwami, tibusiso tembuso ngetenu.
38 Bophani tinkhalo tenu nilindze niphindze nibe nesizotsa, nibuke phambili ekubuyeni kweNdvodzana yeMuntfu, ngoba iyawufika ngesikhatsi leningakasilindzeli.
39 Thandazani njalo kute ningangeni ekulingweni, kute nilimele lilanga lekubuya kwakhe, noma ekuphileni noma ekufeni. Kunjalo nje. Amen.