Sigaba 64
Sembulo lesaniketwa ngaJoseph Smith umPhrofethi kubabonisi beliBandla, e-Ohio, mhlaka 11 iNyoni 1831. UmPhrofethi bekalungiselela kutfutsa aye eHiram, e-Ohio, kute achubeke nemsebenti wakhe wekuhumusha liBhayibheli, lowawumisiwe ngesikhatsi aseMissouri. Licembu lebazalwane besilisa labebayaletwe kutsi bahambe baye eSiyoni (eMissouri) bebamatasatasa ngebucotfo ekwenteni emalungiselelo ekuhamba ngenyanga yeMphala. Ngalesi sikhatsi sekuba matasatasa, lesi sembulo satfolakala.
1–11, LabaNgcwele bayaletwa kutsi batsetselelane, funa bahlale nesono lesikhulu; 12–22, Labangaphendvuki kufanele baletfwe phambi kweliBandla; 23–25, Loyo lokhipha kwelishumi ngeke ashiswe ekubuyeni kweNkhosi; 26–32, LabaNgcwele becwayiswa ngetikweleti; 33–36, Labahlubukako bayawukhishwa eSiyoni; 37–40, LiBandla litawukwehlulela tive; 41–43, ISiyoni itawuphumelela.
1 Bukani, naku lokushiwo yiNkhosi Nkulunkulu kini, Awu nine babonisi belibandla lami, lalelani nive niphindze nemukele intsandvo yami ngalokuphatselene nani.
2 Ngoba ngicinisile ngitsi kini, ngifisa kutsi niwuncobe umhlaba; ngaloko-ke ngitawuba nesihawu kini.
3 Kukhona labo emkhatsini wenu labonile, kodvwa ngicinisile ngitsi, kuloku kuphela, kute ngikhatimuliswe, futsi kute kusindziswe imiphefumulo, nginicolele tono tenu.
4 Ngitawuba nemusa kini, ngoba ngininikile umbuso.
5 Futsi tikhiya tetimfihlakalo tembuso angeke titsatfwe encekwini yami Joseph Smith, lomNcane, ngendlela lengiyibekile, asaphila, nangabe atfobela timiso tami.
6 Kunalabo labafune litfuba lekutfola liphutsa kuye ngaphandle kwesizatfu;
7 Noko, wonile; kodvwa ngicinisile ngitsi kini, mine, iNkhosi, ngitsetselela tono kulabo labativumako tono tabo phambi kwami bacele intsetselelo, labangakoni kute kube sekufeni.
8 Bafundzi bami, etikhatsini takadzeni, bebafuna litfuba lekutfola emaphutsa lomunye kulomunye futsi abatange batsetselelane etinhlitiyweni tabo; ngenca yalobu bubi bahlushwa baphindze bajeziswa kabuhlungu.
9 Ngaloko-ke, ngitsi kini, kufanele nitsetselelane; ngoba loyo longamtsetseleli umnakabo tiphambeko takhe unelicala phambi kweNkhosi; ngoba kusele kuye sono lesikhulu.
10 Mine, iNkhosi, ngitawumtsetselela loyo lengitawumtsetselela, kodvwa kini kubhekekile kutsi nitsetselele wonkhe umuntfu.
11 Futsi kufanele nitsi etinhlitiyweni tenu—Nkulunkulu akehlulele emkhatsini wami nawe, akunike umvuzo ngekwetento takho.
12 Futsi loyo longaphendvuki etonweni takhe, aphindze angativumi, niyawumletsa phambi kwelibandla, nente kuye njengoba imibhalo lengcwele isho kini, ngekwemyaleto noma ngesembulo.
13 Futsi loku niyawukwenta kute Nkulunkulu advunyiswe—hhayi ngoba ningacoleli, nite nebubele, kodvwa kute nibe ngulabangenacala emehlweni emtsetfo, kute ningamoni loyo losishayamtsetfo senu—
14 Ngicinisile ngitsi, ngalesi sizatfu niyawutenta leti tintfo.
15 Bukani, mine, iNkhosi, ngangimtfukutselele loyo lobekayinceku yami Ezra Booth, nenceku yami Isaac Morley, ngoba abawugcinanga umtsetfo, nemyaleto.
16 Bebafuna lokubi etinhlitiyweni tabo, futsi mine, iNkhosi, ngagodla Moya wami. Bagceka bubi entfweni lete bubi; noko ngiyicolele inceku yami Isaac Morley.
17 Nenceku yami Edward Partridge, bukani, yonile, futsi Sathane ufuna kubhubhisa umphefumulo wayo; kodvwa uma leti tintfo setembulwa kubo, baphendvuka nasebubini bayawucolelwa.
18 Manje, ngicinisile ngitsi ngibona kufanele kutsi inceku yami Sidney Gilbert, emvakwemaviki lambalwa, ibuyele emsebentini wayo, nasemsebentini wekuba sitfunywa eveni laseSiyoni;
19 Futsi loko leyikubonile naleyikuvile kungavetwa kubafundzi bami, kute bangabhubhi. Futsi ngalesi sizatfu ngitikhulumile leti tintfo.
20 Ngetulu kwaloko, ngitsi kini, kute inceku yami Isaac Morley ingalingwa ngalokungetulu kwaloko leyingakhona kukumela, ineluleke kabi nite nilimale, nganiketa umyaleto wekutsi lipulazi lakhe kumele litsengiswe.
21 Angifisi kutsi inceku yami Frederick G. Williams ilitsengise lipulazi layo, ngoba, mine, iNkhosi, ngifisa kugcina incaba eveni laseKirtland, sikhatsi lesingangeminyaka lesihlanu, kuyo lengingeke ngibabhubhise lababi, kute ngisindzise labanye.
22 Futsi emvakwalelo langa, mine, iNkhosi, angeke ngibeke muntfu licala loyawuhamba anenhlitiyo levulekile kuya eveni laseSiyoni; ngoba mine, iNkhosi, ngifuna tinhlitiyo tebantfwana bebantfu.
23 Bukani, lesi sikhatsi sibitwa ngekutsi ngunamuhla kute kubuye iNdvodzana yeMuntfu, futsi ngicinisile lilanga lemhlatjelo, nelilanga lekwelishumi lebantfu bami; ngoba loyo lokhipha kwelishumi angeke ashiswe ekubuyeni kwayo.
24 Ngoba emvakwalamuhla kuta kushiswa—loku kukhuluma ngendlela yeNkhosi—ngoba ngicinisile ngitsi, kusasa bonkhe labatikhukhumetako nalabo labenta lokubi bayawuba njengemabibi; futsi ngitawubashisa, ngoba ngiyiNkhosi yemaBandla; futsi angeke ngisindzise muntfu losele eBhabhulona.
25 Ngaloko-ke, uma ningikholwa, nitawusebenta kusatsiwa kunamuhla.
26 Futsi akukafaneli kutsi tinceku tami, Newel K. Whitney naSidney Gilbert, titsengise sitolo sato nalokungekwabo lapha; ngoba loku akusiko kuhlakanipha bate labasele belibandla, labasele kulendzawo, bahambe baye eveni laseSiyoni.
27 Bukani, kushiwo emitsetfweni yami, noma akukavumeleki, kungena etikweletini etitseni tenu;
28 Kodvwa bukani, akukashiwo kutsi iNkhosi ayingatsatsi uma itsandza, futsi ikhokhe njengekutsandza kwayo.
29 Ngaloko-ke, njengoba nititfunywa, nisemsebentini weNkhosi; futsi noma ngayini leniyentako ngentsandvo yeNkhosi kungumsebenti weNkhosi.
30 Futsi unikhetse kutsi ninikete tidzingeko kulabangcwele kuleti tikhatsi tekugcina, kute batfole lifa eveni laseSiyoni.
31 Bukani, mine, iNkhosi, ngikusho kini, nemavi ami angiwo ngekweliciniso futsi angeke ehluleke, kutsi balitfole.
32 Kodvwa tonkhe tintfo kufanele tenteke ngesikhatsi sato.
33 Ngaloko-ke, ningadzinwa kwenta lokuhle, ngoba nibeka sisekelo semsebenti lomkhulu. Futsi etintfweni letincane kuvela loko lokukhulu.
34 Bukani, iNkhosi ifuna inhlitiyo nengcodvo levumako; futsi labavumako nalabalalelako bayawudla sivuno lesihle selive laseSiyoni ngaleti tikhatsi tekugcina.
35 Labo labahlubukako bayawukhishwa eveni laseSiyoni, batfunyelwe khashane, futsi angeke balidle lifa lelive.
36 Ngoba, ngicinisile ngitsi labahlubukako abasibo bengati ya-Efrayimu, ngaloko-ke bayawususwa.
37 Bukani, mine, iNkhosi, ngente libandla lami kuleti tikhatsi tekugcina, njengemehluleli lohleti egcumeni, noma endzaweni lephakeme, kwehlulela tive.
38 Ngoba kuyawukwenteka kutsi bantfu baseSiyoni bayawukwehlulela tonkhe tintfo letiphatselene neSiyoni.
39 Futsi labacala emanga nebatentisi bayawuvivinywa ngibo, nalabo labangasibo baphostoli nebaphrofethi bayawuvetwa.
40 Ngisho nembhishobhi, longumehluleli, nebeluleki bakhe, uma bangaketsembeki ekuphatseni kwabo bayawubekwa licala, bese kutsi labanye bayabekwa etikhundleni tabo.
41 Ngoba bukani, ngitsi kini iSiyoni iyawuphumelela, nenkhatimulo yeNkhosi iyawubasetikwayo.
42 Futsi iyawuba sibonakaliso kubantfu, kuyawuta kuyo bantfu labesuka kuto tonkhe tive ngaphansi kwelizulu.
43 Futsi lilanga liyawufika lapho tive temhlaba tiyawutfutfumela ngenca yayo, futsi tiyawukwesaba ngenca yalabasabekako bayo. INkhosi seyikukhulumile loku. Amen.