Sigaba 6
Sembulo lesaniketwa Joseph Smith umPhrofethi na-Oliver Cowdery, ePennsylvania, kuMabasa 1829. Oliver Cowdery wacala imisebenti yakhe njengembhali ekuhunyushweni kweNcwadzi yaMormon, ngamhlaka 7 kuMabasa 1829. Besekakutfolile kubonakaliswa lokuvela kuNkulunkulu bekutsi buliciniso bufakazi bemPhrofethi mayelana nabongcwengcwe lobekucoshwe kubo umbhalo weNcwadzi yaMormon. UmPhrofethi wabuta iNkhosi nge-Urimu neThumimu wase uyayitfola imphendvulo.
1–6, Tisebenti ensimini yeNkhosi titfola insindziso; 7–13, Kute sipho lesikhulu kwengca sipho sensindziso; 14–27, Bufakazi beliciniso bufika ngemandla aMoya; 28–37, Buka kuKhristu, wente lokuhle njalo.
1 Umsebenti lomkhulu nalomangalisako sewutawucala emkhatsini webantfwana bebantfu.
2 Bukani, nginguNkulunkulu; linakeni livi lami, leliphilile futsi lelinemandla, lelikhalipha kwengca inkemba lesika ngetinhlangotsi totimbili, lisika lidzimate lehlukanise emalunga nemnkantja; ngako-ke wanakeni emavi ami.
3 Bukani, insimu seyimhlophe seyilungele kuvunwa; ngako-ke, noma ngubani lonesifiso sekuvuna, akajikijele lisikela lakhe ngemandla, avune kusesemini, kute abekele umphefumulo wakhe insindziso yaphakadze embusweni waNkulunkulu.
4 Yebo, noma ngubani lotawujikijela lisikela lakhe avune, nguye loyo lobitwe nguNkulunkulu.
5 Ngako-ke, uma nitawucela kimi nitawutfola; uma nitawunconcotsa nitawuvulelwa.
6 Manje, njengoba nicelile, buka, ngitsi kini, gcinani imiyaleto yami, nifune kuletsa niphindze nicinisekise inhloso yeSiyoni.
7 Ningafuni umcebo kodvwa funani inhlakanipho, bukani, timfihlakalo taNkulunkulu tiyawukwembulwa kini, bese emvakwaloko niyawukwentiwa ninotse. Buka, loyo lonekuphila lokuphakadze unotsile.
8 Ngicinisile, ngicinisile, ngitsi kuwe, njengoba ufisa lokuvela kimi kuyawuba njalo kuwe; futsi uma ufisa, uyawuba nguloyawuletsa lokuhle kulesitukulwane.
9 Ungashumayeli lutfo kulesitukulwane ngaphandle kwekuphendvuka; gcina imiyaleto yami, ulekelele ekuletseni umsebenti wami, ngekwemiyaleto yami, uyawubusiswa.
10 Buka unesipho, futsi ubusisiwe ngenca yesipho sakho. Khumbula kutsi singcwele futsi sivela ezulwini—
11 Uma utawubuta, uyawukwati timfihlakalo letinkhulu naletimangalisako; ngako-ke uyawusebentisa sipho sakho kute utfole timfihlakalo, kute ukwati kuletsa labaningi ekwatini liciniso, yebo, ubente babone tindlela tabo letiphambukile.
12 Ungenti sipho sakho satiwe noma ngubani ngaphandle kwalabo lababenkholo yakho. Ungadlali ngetintfo letingcwele.
13 Uma utawukwenta lokuhle, yebo uchubeke nekwetsembeka kute kube sekugcineni, uyawusindziswa embusweni waNkulunkulu, losipho lesikhulu kunato tonkhe tipho taNkulunkulu, ngoba kute sipho lesikhulu kwengca sipho sensindziso.
14 Ngicinisile, ngicinisile, ngitsi kuwe, ubusisiwe ngaloko lokwentile; ngoba ubutile kimi, futsi buka, njengoba ujwayele kubuta utfole kukhanyiseleka ngaMoya wami. Uma bekungasiko njalo, bewungeke ute kulendzawo lowukuyo ngalesi sikhatsi.
15 Buka, uyati kutsi ubutile kimi futsi ngakukhanyisela ingcondvo yakho; manje ngikutjela leti tintfo kute wati kutsi ukhanyiselwe nguMoya weliciniso;
16 Yebo, ngiyakutjela, kute wati kutsi kute umuntfu lowati imicabango yakho netinhloso tenhlitiyo yakho ngaphandle kwaNkulunkulu.
17 Ngikutjela leti tintfo kute kube bufakazi kuwe—kutsi emavi nemsebenti lobewusolo uwubhala uliciniso.
18 Ngako-ke khutsala; mani edvute nenceku yami Joseph, ngekwetsembeka, kunoma ngubuphi bumatima langaba kubo ngenca yelivi.
19 Muyale emaphutseni akhe, nawe wemukele kuyalwa nguye. Beketela, ube nesizotsa, utitsibe; ube nekubeketela, lukholo, litsemba kanye nelutsandvo.
20 Buka, ungu-Oliver, futsi ngikhulume kuwe ngenca yetifiso takho; ngako-ke londvolota lamavi enhlitiyweni yakho. Tsembeka uphindze ukhutsale ekugcineni imiyaleto yaNkulunkulu, ngitawukuhaca etandleni telutsandvo lwami.
21 Buka, nginguJesu Khristu, iNdvodzana yaNkulunkulu. Nginguye loyo lowafika kubami, futsi bami bangangemukeli. Ngikukhanya lokukhanya ebumnyameni, nebumnyama bangakucondzi.
22 Ngicinisile, ngicinisile, ngitsi kuwe, uma ufisa lobunye bufakazi, khumbula lobo busuku mhla ukhala kimi enhlitiyweni yakho, kute wati mayelana neliciniso laleti tintfo.
23 Angikunikanga yini kuthula engcodvweni yakho mayelana naloludzaba na? Ngubuphi bufakazi lobukhulu longaba nabo kwengca lobu lobuvela kuNkulunkulu na?
24 Manje, buka, sewutfole bufakazi; ngoba uma ngikutjele tintfo letingatiwa ngumuntfu awukabutfoli yini bufakazi na?
25 Buka, ngikunika sipho, uma ufisa kimi, kute uhumushe, njengenceku yami Joseph.
26 Ngicinisile, ngicinisile, ngitsi kuwe, kunemibhalo lecuketse lokuningi kwelivangeli lami, legodliwe ngenca yebubi bebantfu.
27 Manje ngiyakuyaleta, kutsi uma unetifiso letinhle—sifiso sekutibekela umcebo ezulwini—ngaleyondlela utawubese sewuyasita ekuletseni ekukhanyeni, ngesipho sakho, leto tincenye temibhalo lengcwele yami lebetifihlekile ngenca yebubi.
28 Manje, buka, nginika wena, kanye nenceku yami Joseph, tikhiya talesi sipho, letitawuletsa ekukhanyeni lobu bufundisi; futsi ngemilomo yabofakazi lababili noma labatsatfu emavi onkhe ayawucinisekiswa.
29 Ngicinisile, ngicinisile, ngitsi kini, uma balahla emavi ami, kanye nalencenye yelivangeli lami nebufundisi, nibusisiwe, ngoba ngeke bente kini lokungetulu kwaloko labakwenta kimi.
30 Futsi ngisho bangenta kini njengoba benta kimi, nibusisiwe, ngoba niyawuhlala nami enkhatimulweni.
31 Kodvwa uma bangawalahli emavi ami, layawucinisekiswa ngebufakazi lobuyawuniketwa, babusisiwe, ngaleyo ndlela niyawuba nekutfokota ngetitselo temisebenti yenu.
32 Ngicinisile, ngicinisile, ngitsi kini, njengoba ngasho kubafundzi bami, lapho kuhlangene lababili noma labatsatfu egameni lami, mayelana neludzaba lolutsite, bukani, ngitawuba khona emkhatsini wabo—njengoba ngikhona emkhatsini wenu.
33 Ningesabi kwenta lokuhle, madvodzana ami, ngoba noma ngayini leniyihlanyelako, nitaphindze niyivune; ngako-ke, uma nihlanyela lokuhle niyawuvuna lokuhle kube ngumvuzo wenu.
34 Ngako-ke, ningesabi, mhlambi lomncane; yentani lokuhle; vumelani umhlaba nesihogo kuhlangane kumelane nani, ngoba uma nakhele edvwaleni lami, angeke bancobe.
35 Bukani, anginilahli, hambani ningabe nisona; yentani ngesizotsa umsebenti lenginiyalete wona.
36 Bukani kimi ngayo yonkhe imicabango yenu, ningangabati, ningesabi.
37 Bukani emanceba lahlaba emhlubulweni, kanye nemanceba etipikili etandleni nasetinyaweni tami; tsembekani, nigcine imiyaleto yami, niyawukudla lifa lembuso wasezulwini. Amen.