Sigaba 7
Sembulo lesaniketwa Joseph Smith umPhrofethi na-Oliver Cowdery, eHarmony, ePennsylvania, kuMabasa 1829, ngesikhatsi babuta nge-Urimu neThumimu kutsi Johane, umfundzi lotsandzekako, ngabe wachubeka nekuphila enyameni yini noma wafa. Lesembulo siyinchazelo lehunyushiwe yembhalo lowentiwa esikhumbeni sesilwane nguJohane futsi safihlwa nguye lucobo.
1–3, Johane lotsandzekako utawuphila kute kubuye iNkhosi; 4–8, Phetro, Jakobe, naJohane banetikhiya telivangeli.
1 Futsi iNkhosi yatsi kimi: Johane, lotsandzekako wami, yini loyilangatelelako na? Ngoba uma ucela lokufisako, utawunikwa kona.
2 Ngabese ngitsi kuyo: Nkhosi, nginike emandla etikwekufa, kute ngiphile futsi ngiletse bantfu baphendvukele kuwe.
3 INkhosi yase itsi kimi: Ngicinisile, ngicinisile, ngitsi kuwe, ngoba ulangatelela loku uyawuchubeka nekuphila ngite ngibuye ngisenkhatimulweni yami, futsi uyawuphrofetha ngaphambi kwetive, tihlobo, tilimi nakubantfu.
4 Ngenca yaloku iNkhosi yatsi kuPhetro: Uma ngivuma kutsi achubeke nekuphila enyameni ngite ngibuye, kuyini loko kuwe na? Ngoba ulangatelela kuletsa bantfu kute baphendvukele kimi, kodvwa wena ulangatelela kutsi ute ufike kimi ngekushesha embusweni wami.
5 Ngitsi kuwe, Phetro, bekusifiso lesihle lesi; kodvwa lotsandzekako wami ufise kutsi ente lokungetulu, noma umsebenti lomkhulu futsi emkhatsini webantfu kunaloko lasekakwentile phambilini.
6 Yebo, sewutsetse umsebenti lomkhulu kakhulu; ngako-ke ngiyawumenta abe ngumlilo lonelilangabi kanye nengilosi letfunywako; uyawusebentela labo labayawuba tindlalifa tensindziso labahlala emhlabeni.
7 Ngitawukwenta wena umsebentele kanye nemnakenu Jakobe; futsi kini nobatsatfu ngitawuninika lamandla netikhiya talobu bufundisi ngite ngibuye.
8 Ngicinisile ngitsi kini, nobabili niyawuzuza ngekwetifiso tenu, ngoba nobabili niyakujabulela loko lenikufisile.