Sigaba 81
Sembulo lesaniketwa ngaJoseph Smith umPhrofethi, eHiram, e-Ohio, mhlaka 15 iNdlovulenkhulu, 1832. Frederick G. Williams ubitwa kutsi abe ngumphristi lomkhulu nemeluleki kuBumengameli bebuPhristi lobuKhulu. Imibhalo yemlandvo ikhombisa kutsi ngesikhatsi lesi sembulo sitfolakala ngeNdlovulenkhulu 1832, sabita Jesse Gause esikhundleni sekuba ngumeluleki waJoseph Smith kuBumengameli. Kodvwa, kwatsi uma ehluleka kuchubeka ngendlela lehambisana naloku kubekwa, lolubito lwabese lwendluliselwa kuFrederick G. Williams. Lesembulo (sangeNdlovulenkhulu 1832) kufanele sitsatfwe njengesinyatselo sekuhlelwa ngalokusemtsetfweni kweBumengameli bekuCala, ngenca yekutsi sibita sikhundla semelukeli kulelo licembu futsi sicacisa ngesitfunti salesi sikhundla. Umzalwane Gause wasebenta kwesikhashane kodvwa wacoshwa eBandleni ngeNgongoni 1832. Umzalwane Williams wabekwa kulesi sikhundla mhlaka 18 iNdlovulenkhulu 1833.
1–2, Tikhiya tembuso tihlala njalo tiphetfwe Bumengameli bekuCala; 3–7, Uma Frederick G. Williams etsembekile ebufundisini bakhe, utawutfola kuphila lokuphakadze.
1 Ngicinisile, ngicinisile, ngitsi kuwe nceku yami Frederick G. Williams: Vani livi laloyo lokhulumako, livi leNkhosi Nkulunkulu wakho, futsi ulalele lubito lobitelwe kulo, ngisho nekuba ngumphristi lomkhulu ebandleni lami, nemeluleki encekwini yami Joseph Smith, lomNcane.
2 Kuye lengimnike tikhiya tembuso, letihlala njalo titeBumengameli bebuPhristi lubuKhulu;
3 Ngako-ke, ngicinisile ngiyamati futsi ngitawumbusisa, kanjalo nawe, nangabe wetsembekile ekubeni ngumeluleki, esikhundleni lengikubeke kuso, ekuthandazeni njalo, ngekuvakala nangenhlitiyo, phambi kwebantfu nangasense, nasebufundisini bakho ekushumayeleni livangeli eveni lalabaphilako, nasemkhatsini wabomnakenu.
4 Ngekwenta leti tintfo utawukwenta lokuhle kakhulu kubantfu bakini, futsi utawuchubekisa nenkhatimulo yakhe loyiNkhosi yakho.
5 Ngaloko-ke, tsembeka; mani esikhundleni lengikubeke kuso; sita lababutsakatsaka, phakamisa tandla takho letibutsakatsaka, futsi ucinise nemadvolo lacekako.
6 Futsi uma wetsembekile kute kube sekugcineni uyawetfweswa umchele wekungabhubhi, nekuphila lokuphakadze etindlini lengitilungisile ekhaya laBabe.
7 Buka, ubone, lawa ngemavi a-Alfa na-Omega, ngisho Jesu Khristu. Amen.