Sigaba 8
Sembulo lesaniketwa ngaJoseph Smith umPhrofethi ku-Oliver Cowdery, eHarmony, ePennsylvania, kuMabasa 1829. Ngesikhatsi kuhunyushwa iNcwadzi yaMormon, Oliver, lobekasasebenta njengembhali, abhala lobekushiwo ngumPhrofethi, wafisa kutsi aphiwe sipho sekuhumusha. INkhosi yakuphendvula kucela kwakhe ngekutitfoba ngekunika lesembulo.
1–5, Sembulo sifika ngemandla aMoya loNgcwele; 6–12, Lwati lwetimfihlakalo taNkulunkulu nemandla ekuhumusha imibhalo yakadzeni kufika ngelukholo.
1 Oliver Cowdery, ngicinisile, ngicinisile, ngitsi kuwe, ngempela njengoba iNkhosi iphila, lenguNkulunkulu kanye neMhlengi wakho, noma kanjani uyawutfola lwati lwanoma ngutiphi tintfo loyawuticela ngekukholwa, ngenhlitiyo lecotfo, ukholwa kutsi uyawulutfola lwati loluphatselene naloko lokucoshwe emibhalweni lemidzala, yakadzeni, lecuketse leto tincenye temibhalo yami lengcwele lokukhulunywe ngako ngekubonakaliswa ngaMoya wami.
2 Yebo, buka, ngitawukutjela engcondvweni nasenhlitiyweni yakho, ngaMoya loNgcwele, loyawukuta kuwe futsi loyawuhlala enhlitiyweni yakho.
3 Manje, buka, lona ngumoya wesembulo; buka, lona ngumoya Mosi lahola ngawo sive sema-Israyeli ekhatsi eLwandle loluBovu emhlabatsini lowomile.
4 Ngako-ke lesi sipho sakho, sisebentise, futsi ubusisiwe, ngoba siyawukukhulula etandleni tetitsa takho, kantsi, uma bekungasinjalo, bebayawukubulala baholele nemoya wakho ekubhujisweni
5 Awu, khumbula lawa mavi, ugcine imiyaleto yami. Khumbula, sipho sakho lesi.
6 Manje akusiso lesi kuphela sipho sakho; ngoba unaso lesinye sipho, lokusipho sa-Aroni; buka, sikutjele tintfo letiningi;
7 Buka, kute lamanye emandla, ngaphandle kwemandla aNkulunkulu, langenta lesipho sa-Aroni sibe kuwe.
8 Ngako-ke, ungangabati, ngoba sipho lesivela kuNkulunkulu, futsi uyawusibamba ngetandla takho, wente imisebenti lemangalisako; futsi kute emandla layawukwati kusitsatsa etandleni takho, ngoba kungumsebenti waNkulunkulu.
9 Ngako-ke, noma ngayini loyawuyicela kimi kutsi ngikutjele yona ngaso, loko ngitawukunika kona, futsi uyawuba nelwati mayelana naloko.
10 Khumbula kutsi ngaphandle kwelukholo angeke wente lutfo; ngako-ke cela ngekukholwa. Ungadlali ngaleti tintfo; ungaceli loko longakafaneli kukucela.
11 Cela kutsi wati ngetimfihlakalo taNkulunkulu, nekutsi uhumushe uphindze utfole lwati kuyo yonkhe imibhalo yakadzeni lebeyifihliwe, lengcwele; futsi ngelukholo lwakho uyawukwentelwa kona.
12 Buka, ngimi lokhuluma loku; futsi kusengimi lowakhuluma kuwe kusukela ekucaleni. Amen.