Jun eechanihom re yo’onink
Li Awa’b’ej Henry B. Eyring
Xb’een tenq’ aj k’ehol na’leb’ sa’ li Xb’eenil Awa’b’ejil
Rik’in xyeeb’al ma taapaab’ malaj ma tat-ok sa’ jun sumwank rik’in li Dios, yookat chixyeeb’al ma takanab’ jun eechanihom re yo’onink choq’ reheb’ li ani maare te’xtaaqe ta laa b’aanuhom.
Ex was wiitz’in, wankex li xexb’oqe’ sa’ li ch’utam a’in xb’aaneb’ li misioneer re Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Maare li misioneer a’an ak xate’xb’oq chixyeeb’al ma tat-ok sa’ sumwank rik’in li Dios rik’in xk’ulb’al li kub’iha’.
Wankex ajwi’ li yookex chi ab’ink xb’aan naq xek’ulub’a xb’oqom jun na’b’ej yuwa’b’ej, ixaqilb’ej, malaj ut ajwi’ jun li kok’al, li te’raj naq taak’eheb’ wi’chik li sumwank a’an li ak xat-ok wi’ toj sa’ xyi laa yu’am. Wankex ajwi’ li ak xeeye naq teraj tex’ok wi’chik chixtaaqenkil li Kolonel ut yookex chireek’ankil anajwan xchaab’ilal li k’ule’k xb’aan.
Maak’a’ naxye anihat chi moko b’ar wankat, ak nakak’am chawuq xsahileb’ xch’ool k’iila aamej li ink’a’ tatruuq xnawb’al anajwan jo’ k’ihaleb’. Wulaj wulaj, sa’ li junq hoonal, naru taaye ma taapaab’ malaj ma tat-ok sa’ jun li sumwank rik’in li Dios.
Maak’a’ naxye b’ar wankat sa’ li b’e nawulak sa’ reechaninkil li junelik yu’am, naru chawu xk’utb’al chiruheb’ jalan li b’e naxik sa’ xnimal chik li sahil ch’oolejil. Rik’in xyeeb’al ma taapaab’ malaj ma tat-ok sa’ jun sumwank rik’in li Dios, yookat chixyeeb’al ma takanab’ jun eechanihom re yo’onink choq’ reheb’ li ani maare te’xtaaqe ta laa b’aanuhom.
Laa’at ut laa’in ak xoo’osob’tesiik rik’in li eechanink a’an ak yeechi’inb’il choq’ qe. Ninb’antioxi lix k’iihal xsahil inch’ool sa’ lin yu’am re jun li winq li maajun sut xinnaw ru. A’an jun kok’al xe’kam xna’ xyuwa’, li xwulak chi wank choq’ jun reheb’ lin yuwa’chin. Kixkanab’ choq’ we jun weechanihom re yo’onink. Inyehaq eere b’ayaq chirix lix k’anjel a’an sa’ xyiib’ankil li eechanihom a’an choq’ we.
A’an laj Heinrich Eyring xk’ab’a’. Kiyo’la sa’ jun li junkab’al jwal b’ihom. Lix yuwa’, laj Edward, kiwan nimla rochoch sa’ Coburg, a’an li Alemania nak’ab’a’in anajwan. Lix na’ a’an li Vizcondesa xCharlotte Von Blomberg. Lix yuwa’ wan xk’anjel jo’ aj ilol xch’och’ li rey aj Prusia.
Laj Heinrich a’an xb’een ralal li xCharlotte ut laj Edward. Li xCharlotte kikam naq junlaju ka’k’aal chihab’ wan re, chirix xyo’lajik rox lix k’uula’al. Toja’ naq laj Edward kikam ajwi’, chirix naq kisach chaq chixjunil xb’ihomal. Ka’k’aal chihab’ ajwi’ wan re. Kixkanab’ oxib’ lix kok’al sa’ neb’a’il.
Laj Heinrich, xyuwa’ lin yuwa’chin, ak kisach xna’ xyuwa’ ut jun li nimla eechanihom re li ruchich’och’ a’in. Maak’a’ xtumin. Kixtz’iib’a sa’ xdiario naq kixk’oxla xtawb’al xkolb’al rib’ sa’ Amerika. Us ta maak’a’eb’ xkomon aran, kireek’a’ xyo’onihom chirix li na’ajej a’an. Xb’eenil kiwulak sa’ Nueva York. Moqon kiq’axon toj sa’ San Louis, Missouri.
Sa’ San Louis, jun reheb’ li reech aj trab’aaj a’an jun laj Santil Paab’anel sa’ Roso’jikeb’ li Kutan. Rik’in a’an kixk’ul xcopia jun ch’ina hu tz’iib’anb’il xb’aan li Elder Parley P. Pratt. Kiril xsa’ ut kixtz’il rix chixjunil li esilal kiru chixtawb’al chirixeb’ laj Santil Paab’anel sa’ Roso’jikeb’ li Kutan. Kitijok re tixnaw ma yaal naq wankeb’ li anjel li neke’xk’ut rib’ chiruheb’ li winq, ma wan ta jun li yo’yookil profeet, ut ma ak xtaw ta jun li paab’aal tz’aqal yaal ut k’utb’esinb’il chaq sa’ choxa.
Chirix xnumik wiib’ po sa’ tzolok ut tijok, laj Heinrich kixmat’k’i naq xyehe’ re naq tixk’ul li kub’iha’. Jun winq li nakana xk’ab’a’ ut xtijonelil sa’ li loq’laj xk’oxlahom inch’ool, li Elder William Brown, a’anaq li tixb’aanu li k’anjel a’an. Laj Heinrich kikub’e xha’ sa’ pumpuukil hab’ sa’ xjunlaju xb’e li po Marzo, 1855, sa’ 7:30 eq’la.
Ninpaab’ laa’in naq laj Heinrich Eyring ak kixnaw aran naq tz’aqal yaal li k’a’ru yookin chixk’utb’al cheru anajwan. Kixnaw naq li sahil ch’oolejil ut li junelik yu’am nachal rik’in xb’ak’leb’ li junkab’al li nakana chi junelik. Us ta toj ak’ sa’ xtawb’al xk’anjel li Qaawa’ choq’ re li sahil ch’oolejil, ak kixnaw naq lix sahil xch’ool naraj naq jalaneb’ te’xsik’ ru xtaaqenkil xb’aanuhom. Lix yo’onihom a’an choq’ re li sahil ch’oolejil toj naroyb’eni chaq xb’aanuhomeb’ li maji’ neke’yo’la chaq.
Jo’ jun xraqalil li eechanohom re yo’onink sa’ qajunkab’al, a’an kixkanab’ jun tz’iib’anb’il esil choq’ reheb’ li riyajil.
Sa’ li esil a’an nawil lix rahom a’an choq’ qe laa’o li toj toochalq chirix. Sa’ li raatin naweek’a xyo’onihom naq li riyajil maare te’xsik’ ru xtaaqenkil chaq sa’ li b’e chi sutq’iik sa’ qachoxahil na’aj. Kixnaw a’an naq moko taawanq ta rik’in junaq nimla xtaqlajik qach’ool, a’b’an rik’in k’iila kok’ xtaqlil. Kixye:
“Toj chalen chaq xb’een sut naq kiwab’i chi aatinak li Elder Andrus ... rajlalin chaq sa’ xch’utameb’ lj Santil Paab’anel ut yal ch’ina jo’q’ehaq naq ink’a’ ninwulak, chi teneb’anb’ilin ajwi’ chi jo’kan.
Nintz’iib’a a’in sa’ wesilal re naq li wiyajil naru te’xtaaqe lin b’aanuhom, ut maajo’q’e te’xkanab’ li teneb’ank a’in re [kultik] rik’ineb’ laj Santil Paab’anel.”1
Laj Heinrich naxnaw naq sa’ xch’utam li loq’laj wa’ak naru taqa’ak’ob’resi qayeechi’ihom chixk’oxlankil junelik li Kolonel ut xk’ulb’al xMusiq’ chi wank qik’in.
A’an li Musiq’ej a’an li kixtenq’a sa’ li mision kib’oqe’ wi’ yal wiib’ oxib’ po chirix xk’ulb’al li sumwank re kub’iha’. Jo’ jun xpatz’b’al, kixpaab’ lix mision li kiwan waqib’ chihab’ sa’ li na’ajej neke’xye re Territorio Indio junxil. Re xk’ulb’al xkoqb’al sa’ li k’anjel, kib’eek chalen Oklahoma toj sa’ Lago Salado, a’an junaq 1,100 millas xnajtil (770 kilómetros).
Moqon kib’oqe’ xb’aan xprofeet li Dios chi q’axonk toj sa’ sur Utah. Aran kixsume jun chik xb’oqb’al naq tixb’aanu jun xmision sa’ tz’aqal xtenamit, li Alemania. Chirix a’an kixk’ul xb’oqb’al xb’aan jun lix Apostol li Qaawa’ Jesukristo chixtenq’ankil li k’anjel re xkab’lankileb’ li colonia reheb’ laj Santil Paab’anel sa’ Mexico. Aran kib’oqe’ chi k’anjelak sa’ la Ciudad de Mexico jo’ misioneer wi’chik. Kixpaab’ li wiib’ xb’oqb’al a’an. Wan xmuqleb’aal anajwan sa’ jun li ch’ina cementerio sa’ Colonia Juárez, Chihuahua, Mexico.
Ink’a’ ninye resil a’an re xxokb’al xnimankil laj Heinrich chi moko xnimankil xb’aanuhom choq’ reheb’ li riyajil. Ninye b’an re naq tinwoxloq’i laj Heinrich sa’ xk’ab’a’ li paab’aal ut li yo’onink li kiwan sa’ xch’ool.
Kixb’aanuheb’ lix b’oqb’al a’an xb’aan naq kiwan xpaab’aal naq li Kristo, chi waklijenaq chi yo’yo, rochb’een li qaChoxahil Yuwa’ ke’xk’utb’esi rib’ chiru laj Jose Smith sa’ jun ch’ina k’iche’ sa’ Nueva York. Kixb’aanu xb’oqb’al xb’aan naq kiwan xpaab’aal naq li law re tijonelil sa’ lix Iglees li Qaawa’ ak ke’k’ojob’aak wi’chik rik’in xwankil chixtz’apb’al sa’ junajil li junkab’al chi junelik, ka’ajwi’ wi ta tz’aqaleb’ xpaab’aal re xpaab’ankileb’ lix sumwank.
Jo’ chanru laj Heinrich Eyring, jun lin xe’toon, maare laa’at ajwi’ li xb’een sa’ laa junkab’al li tixk’ut li b’e toj sa’ li junelik yu’am wan wi’ li ok sa’ sumwank ut xpaab’ankil rik’in paab’aal ut xyalb’al qaq’e. Li junjunq chi sumwank naxk’am li teneb’ank ut k’a’ru yeechi’inb’il. Choq’ qe laa’o chiqajunil, jo’ choq’ re ajwi’ laj Heinrich, wan naq li teneb’ank a’an ink’a’ cha’a’j xtawb’al ru us ta ch’a’aj xb’aanunkil. A’b’anan chijultiko’q aawe naq wan naq tento ch’a’ajkoq li teneb’ank, xb’aan naq wan xk’anjel re qatikisinkil sa’ li b’e li toxk’am chi wank junelik rik’in qaChoxahil Yuwa’ ut lix Raarookil Alal, li Jesukristo, chi ch’utch’uuko sa’ junkab’alej.
Nanaq sa’ laa ch’ool li aatin sa’ lix hu laj Abraham:
“Ut kiwan jun chi xaqxo sa’ xyanqeb’ li chanchan li Dios, ut kixye reheb’ li ani wankeb’ rik’in: Tookub’eeq, xb’aan naq wan li na’ajej aran, ut taqachap xkomon li k’a’aq re ru a’in, ut taqayiib’ jun ruchich’och’ sa’ li te’ruuq wi’ chi wankeb’ a’in;
“Ut taqayaleb’ rix rik’in a’in, re taqil ma te’xb’aanu chixjunil li k’a’aq re ru li b’arwan tixtaqlaheb’ wi’ li Qaawa’ lix Dios;
“Ut eb’ li neke’paab’ank re li xb’een xwanjikeb’, wan li taatiqmanq sa’ xb’eeneb’; ut eb’ li ink’a’ neke’paab’ank re li xb’een xwanjikeb’ moko te’wanq ta xloq’al sa’ li awa’b’ejihom a’an rik’ineb’ li ani ke’paab’ank re li xb’een xwanjikeb’; ut eb’ li neke’paab’ank re li xkab’ xwanjikeb’ taatiqmanq loq’alil sa’ xb’eeneb’ xjolom chi junelik q’e kutan.”2
Re xpaab’ankil xkab’ li qawanjik na’ajman naq too’ok sa’eb’ li sumwank rik’in li Dios ut naq taqab’aanu rajlal li k’anjel neke’xteneb’a qik’in. Na’ajman xpaab’ankil li Jesukristo jo’ aj Kolol qe re xpaab’ankileb’ li loq’laj sumwank chiru chixjunil qayu’am.
Rik’in naq laj Adan ut li xEve ke’t’ane’ chi yaal, naqak’ul li aaleek, li yale’k ix, ut li kamk jo’ qeechanihom chiqajunil. A’b’anan, li qaChoxahil Yuwa’ aj rahonel kixk’e qe li maatan re lix Raarookil Alal, li Jesukristo, jo’ aj Kolol qe. Li nimajwal maatan ut osob’tesink re lix tojb’al rix li maak xb’aan li Jesukristo naxk’e jun li qeechanihom chiqajunil. A’an lix yeechi’inkil choq’ qe li wakliik wi’chik chi yo’yo ut k’a’ru te’ruuq raj wi’ chixjunileb’ li yo’lajenaqeb’ chixk’ulb’al li junelik yu’am.
Li q’axal nim re chixjunil li osob’tesink xb’aan li Dios, a’an li junelik yu’am, ut taawulaq qik’in ka’ajwi’ wi noko’ok sa’eb’ li sumwank k’eeb’il sa’ tz’aqal lix Iglees li Jesukristo xb’aaneb’ lix moos k’eeb’ileb’ xwankil. Xmaak li t’ane’k, chiqajunilo naqaj ru ch’aje’k sa’ li kub’iha’ ut xk’eeb’al li uq’ej choq’ re xk’ulb’al li maatan re li Santil Musiq’ej. Tento te’k’anjelaaq li k’anjel a’in xb’aaneb’ a’an li neke’k’amok re xwankilal li tijonelil. Aran ut, chi tenq’anb’il xb’aan lix Saqen li Kristo ut li Santil Musiq’ej, naru taqapaab’eb’ chixjunil li sumwank noko’ok ta wi’, ut mas wi’chik sa’ li xoo’ok chaq wi’ sa’ lix santil ochoch. Ka’ajwi’ chi jo’kan, ut rik’in li tenq’ank a’an, naq taaruuq junaq chixk’ulb’al lix k’ulub’ejil eechanihom jo’ jun ralal li Dios sa’ jun li junkab’al chi junelik.
Choq’eb’ re junjunqaq li yookeb’ chiwab’inkil anajwan, maare a’an anchal jun matk’ li ink’a’ naru chi uxq.
Aawilom li na’b’ej yuwa’b’ej aj paab’anel li neke’raho’ sa’ xk’ab’a’ ralal xk’ajol li neke’xtz’eqtana malaj neke’xq’et lix sumwank rik’in li Dios. A’ut eb’ li na’b’ej yuwa’b’ej a’an naru te’xwaklesi xch’ool rik’in rilb’al k’a’ru ke’xk’ul jalaneb’ chik li na’b’ej yuwa’b’ej.
Li ralal laj Alma ut eb’ li ralal laj Mosiah ke’el chaq sa’ josq’il po’resink ch’oolej chirixeb’ lix sumwank ut lix taqlahom li Dios. Laj Alma alalb’ej kiril li ralal laj Korianton chixjalb’al xnimla maak re naq tixb’aanu chaab’il k’anjel. Lix Hu laj Mormon naxk’uula ajwi’ resil li sachb’a-ch’oolej naq eb’ laj Lamanita ke’xkanab’ li na’leb’ kaynaqeb’ wi’ re xik’ rilb’al li tiikilal, ut ke’ok sa’ jun sumwank naq te’kamq raj re xkolb’al rix li tuqtuukilal.
Jun li anjel kitaqlaak chaq rik’in li saaj aj Alma ut eb’ li ralal laj Mosiah. Li anjel kichal xb’aan lix paab’al ut lix tijeb’ lix yuwa’ ut lix tenamit li Dios. Rik’in rilb’al li eetalil a’in chirix lix wankilal lix tojb’al rix li maak chi k’anjelak sa’ xch’ooleb’ li winq, naru taak’ul xkawilal ut xk’ojob’ankil aach’ool.
Li Qaawa’ ak xk’e k’a’ru taqataw wi’ qayo’onihom naq yooko chixyalb’al qaq’e chixtenq’ankileb’ li ani neke’qara chixk’ulub’ankil li reechanihom re junelik. Naq nokok’anjelak chixxokb’aleb’ li kristian choq’ re, A’an ak naxk’e xyeechi’ihom qe, us ta neke’xtz’eqtana xb’oqom. Li tz’eqtanank xb’aaneb’ naxrahob’tesi xch’ool li Qaawa’, a’b’an A’an ink’a’ naxkanab’ xk’anjel, ut laa’o ajwi’ ink’a’ raj taqakanab’. Tz’aqal naxk’ut chiqu chanru xb’aanunkil rik’in lix rahom li rajlal nak’anjelak: “Ut jo’kan wi’chik, k’a’jo’ naq kok’ aj xsa’ kexinch’utub’ raj jo’ jun xan kaxlan naxch’utub’eb’ lix kok’ kaxlan rub’el xxik’, relik chi yaal, ex tenamit re lix junkab’al laj Israel, li kext’ane’; relik chi yaal, ex tenamit re lix junkab’al laj Israel, laa’ex li nekexwan chaq Jerusalen, jo’ ajwi’ laa’ex li t’anenaqex; relik chi yaal, k’a’jo’ naq kok’ aj xsa’ kexinch’utub’ raj jo’ jun xan kaxlan naxch’utub’eb’ lix kok’ kaxlan, ut ink’a’ keraj.”3
Naru took’anjelaq sa’ xk’ab’a’ naq li Kolonel junelik taaraj xk’amb’aleb’ wi’chik chixjunil li musiq’ejil ralal xk’ajol li qaChoxahil Yuwa’ rik’in. Chixjunileb’ li na’b’ej yuwa’b’ej, ut li na’ch’inb’ej yuwa’ch’inb’ej, neke’raj ajwi’ a’an. Li qaChoxahil Yuwa’ ut li Kolonel, A’aneb’ tz’aqal li eetalil choq’ qe li taqanaw wi’ k’a’ru taqab’aanu. Maajo’q’e neke’xk’e tiikilal chi minb’il ru, xb’aan naq li tiikilal tento sik’b’ilaq ru. Neke’xk’e naq taaruuq xtiib’al ru li tiikilal, ut nokohe’xkanab’ chixk’eeb’al reetal naq sa na’el li ru.
Chixjunileb’ li ani neke’yola sa’ ruchich’och’ neke’xk’ul lix saqen li Kristo, li nokoxtenq’a chirilb’al ut chireek’ankil b’ar wan li k’a’ru tiik ut li k’a’ru ink’a’ us. Li Dios ak xtaqlaheb’ lix moos tiikeb’ xch’ool li te’ruuq, rik’in xwankil li Santil Musiq’ej, chiqatenq’ankil sa’ xnawb’al k’a’ru taaraj taqab’aanu li Dios, jo’ wi’ li k’a’ru naxye naq ink’a’ taab’aanumanq. Li Dios naxk’e chixk’ulb’al qu li us rik’in qakanab’akil chireek’ankil k’a’ru na’el chiru qab’aanuhom. Wi naqasik’ ru li us, taqataw li sahil ch’oolejil—sa’ tz’aqal xhoonalil. Wi naqasik’ ru li maa’us, taachalq rahil ch’oolejil—sa’ tz’aqal xhoonalil. Ch’olch’o taa’uxq chi jo’kan. A’b’anan wan naq na’ajman naq taab’ayq chaq. Wi ta xchal li osob’tesink chi junpaat, lix sik’b’al ru li us ink’a’ raj tixkawresi li paab’aal. Ut rik’in naq naru taab’ayq ajwi’ li rahil ch’oolejil, na’ajman li paab’aal re reek’ankil rajb’al ru li xkuyb’al maak chi junpaat, ink’a’ moqon toj chirix naq ak xqeek’a li rahilal nachal xb’aan.
Li Yuwa’b’ej Lehi kiraho’ xch’ool xb’aan k’a’ru ke’xsik’ ru xb’aanunkil junjunqeb’ li ralal rochb’eeneb’ xjunkab’al. A’an jun li xnimal ru winq ut chaab’il—jun li profeet re li Dios. Kok’ aj xsa’ kixch’olob’ xyaalal laj Kolol qe, li Jesukristo, chiruheb’. Naqil rik’in laj Lehi jun eetalil re paab’ank ut k’anjelak naq kixk’ul xb’oqb’al rik’in li Qaawa’ chixkanab’ankil chixjunil li k’a’ru wan re sa’ ruchich’och’ re naq tixkol lix junkab’al chiru li sache’k. Sa’ xraqik lix yu’am, toj yoo chaq chixch’olob’ankil xyaalal li Kolonel chiruheb’ li ralal xk’ajol. Chanchan li Kolonel—ut us ta wan xwankil chixtz’ilb’al rix lix ch’ooleb’ ut chirilb’al k’a’ru toj chalel, li rahilal jo’ wi’ li k’a’ru chaqal ru—laj Lehi toj naxye’ chaq li ruq’ re xxokb’al xjunkab’al choq’ re li kolb’a-ib’.
Anajwan k’iila millon reheb’ li riyajil li Yuwa’b’ej Lehi ak yookeb’ chixtz’aqob’resinkil ru li royb’enihom chaq choq’ reheb’.
K’a’ru tooruuq chixb’aanunkil re xtawb’al qana’leb’ rik’in rilb’al reetalil laj Lehi? Naru taqataw qana’leb’ rik’in a’an sa’ xtzolb’al li loq’laj hu rik’in tijok ut rik’in xtz’ilb’al rix li k’a’aq re ru nak’ulman.
Ninye laa’in naq us raj naq tat-iloq chi nach’ jo’ ajwi’ chi najt sa’ xyalb’al aaq’e chixk’eeb’al li eechanihom re yo’onink re laa junkab’aal. Sa’ li k’a’ru toj nach’ wan, taawanq ch’a’ajkilal ut laj Satanas taachoqinq. Ut wan ajwi’ k’a’ru naraj royb’eninkil sa’ kuyuk, sa’ paab’aal, rik’in xnawb’al naq li Qaawa’ nak’anjelak sa’ li kutan tixk’oxla a’an ut chi uxb’il jo’ tixk’oxla a’an.
Wan k’a’ru naru taab’aanu sa’ xtiklajik, naq toj saajeb’ li ani raarookeb’ aab’aan. Chijultiko’q eere naq xb’aanunkil wulaj wulaj li tijok sa’ junkab’al, rilb’al li loq’laj hu sa’ junkab’al, ut xwotzb’al xnawom qach’ool sa’ xch’utam li loq’laj wa’ak, kosb’il ru xch’a’ajkil ut nim wi’chik xwankil naq toj saajeb’ li qalal qak’ajol. Kok’ aj xsa’ naq eb’ li kok’al neke’reek’a li Musiq’ej chi ink’a’ k’eeb’il reetal qab’aan.
Chirix naq ak xe’ninqan, te’naq sa’ xch’ool li b’ich ke’xb’icha chaq aawik’in. Ut mas wi’chik chiru xnaqik li b’ich, te’naq sa’ xch’ool li aatin re loq’laj hu ut xnawom li ch’oolej. Li Santil Musiq’ej naru tixk’e chixjunil li k’a’aq re ru chi naqk sa’ xch’ool, a’b’an li aatin re loq’laj hu ut re li b’ich te’kanaaq toj q’axal najt. Xnaqik a’an sa’ xch’ool te’xb’aanu jun li kelosink li naru xk’amb’aleb’ chaq wi’chik, chirix naq xe’sach xb’e, maare chirix k’iila chihab’, rik’in li b’e naxik sa’ junelik yu’am.
Ta’ajmanq li ilok chi najt naq li ani neke’qara neke’xk’ul xkelosinkil rik’in li ruchich’och’, ut li choql re wiib’ank ch’oolej anchal nanumta sa’ xb’eeneb’ xpaab’aal. Wan qe li paab’aal, li yo’onink, ut li tz’aqal rahok re toxb’eresi laa’o ut re xtenq’ankileb’ a’an.
Ak wilom a’an sa’ lin k’anjel jo’ jun tenq’ aj k’ehol na’leb’ chiru wiib’eb’ lix yo’yookil profeet li Dios. A’aneb’ wiib’ li winq moko junaqikeb’ ta xna’leb’. A’ut anchal sa’ wiib’al wankeb’ xyo’onihom rajlal. Naq wan ani li naxwaklesi jun li k’a’uxl chirix k’a’ruhaq sa’ li Iglees, li aatin kok’ aj xsa’ neke’xsume wi’, a’an “Ah, toj usaq taa’elq.” Wan ajwi’ naq nimeb’ wi’chik xnawom chirix li k’a’uxl a’an chiru li ani yookeb’ chixwaklesinkil resil.
Neke’xnaw ajwi’ chanru nak’anjelak li Qaawa’, jo’kan naq junelik wankeb’ xyo’onihom choq’ re lix awa’b’ejihom. Neke’xnaw naq wan A’an sa’ xjolomil. Chixjunil li wankilal wan re ut A’an nokoril. Wi nakakanab’ A’an chi wank choq’ aj k’amol xb’e laa junkab’aal, toj usaq te’elq li k’a’aq re ru.
Wankeb’ sa’ xyanq riyajil laj Heinrich li anchal ke’sach xb’e. A’b’anan naab’al reheb’ li ri neke’wulak sa’ xsantil ochoch li Dios sa’ 6:00 eq’la chixb’aanunkil li k’ojob’anb’il k’anjel choq’ reheb’ lix xe’toon toj maajun sut xe’xnaweb’ ru. Neke’wulak aran xb’aan li eechanihom re yo’onink li kixkanab’ chaq laj Heinrich. Kixkanab’ jun li eechanihom li yoo chi k’ule’k xb’aan naab’al reheb’ li riyajil.
Chirix xb’aanunkil jo’ k’iihal naru chiqu rik’in paab’aal, li Qaawa’ tixtz’aqob’resi ru qayo’onihom choq’ re xnimal chik li rosob’tesinkil qajunkab’al, li ink’a’ naru taqanaw jo’ nimal anajwan. A’an naraj li q’axal us choq’ reheb’ ut choq’ qe laa’o, li ralal xk’ajol.
Chiqajunilo ralal xk’ajol jun li yo’yookil Dios. Li Jesus aj Nazaret, A’an lix Raarookil Alal ut laj Kolol qe waklijenaq wi’chik. A’an a’in lix Iglees. Sa’ a’an wankeb’ xlawil li tijonelil, jo’kan naq li junkab’aal naru te’wanq chi junelik. A’an a’in li qeechanihom re yo’onink. Ninch’olob’ naq yaal a’an sa’ xk’ab’a’ li Qaawa’ Jesukristo, amen.