Li sahil ch’oolejil iiq re wank choq’ tzolom.

Xb’aan laj Elder Ronald A. Rasband

Re lix Awa’b’ejil li Setenta

Lix xaqab’ankileb’ laj Jolominel sa’ li Iglees a’an jun osob’tesihom; nachal rik’in jun teneb’ahom sa’ qab’een re xwotzb’al li riiqeb’ ut re naq toowanq jo’ aj xtzolom li Qaawa’ Jesukristo.

Sa’ li junmay xb’e li po mayo re li chihab’ kinume, jun nimla kaq-sut-iq’ kixjuki chi naab’al li tenamit Oklahoma, aran sa’ xyi Estados Unidos, ut kixkanab’ jun retalil numenaq 1.6 km li ru 27 km li roq. Li kaq-sut-iq’ a’in, kixjal li ch’och’ ut lix yu’am li komon b’ar wi’ kinume.

Yal jun xamaan xnumik li kaq-sut-iq’, kink’ul lin taqlankil re naq tinxik b’ar wi’ li ochoch ut lix reechanihomeb’ kikana chi jek’inb’il chiruheb’ li echkab’aleb’ b’ar wi kinume ut kixkanab’ chi sachenaq.

Naq toj maji’ ninxik, kiwaatina li qaraarokil profeet, li awa’b’ej Thomas S. Monson, li nasaho’ lix ch’ool rik’in li k’anjel a’in re li Qaawa’. Rik’in oxloq’, moko ka’aj ta wi’ xb’aan lix naaj sa’ lix k’anjel, chirix ajb’an lix chaab’ilal, kinpatz’ re: “k’a’ru taawaj naq la’in tinb’anu?, K’a’ru taawaj naq la’in tinye?”.

Rik’in q’unal kixchap li wuq’, jo’ kixb’anu raj rik’ineb’ li ke’xk’ul li rahilal ut li junjunkal li kixtenq’a raj xb’aan li sachenaq, wi’ xru raj chi wank aran, kixye we:

“xb’een wa, yeheb’ re naq ninraaheb’.

“xkab’, yeheb’ re naq yookin chi tijok choq reheb’.

“Rox, b’aanu usilal chixb’antioxinkil li chixjunileb’ li yookeb’ chi tenqank”

Jo’ xkomon li Awa’b’ejil li Setenta, naweek’a li xnimal ru li teneb’anb’il sa’ inb’een rik’in lix raatin li Qaawa’ naq kixraatina laj Moises:

“Ch’utub’eb’ we lajeeb’ xkaak’aal (70) xtiixilaleb’ laj Israel, eb’ li ch’olch’o chawu naq tiixeb’ ut aj tz’iib’eb’ ...

“Ut Laa’in tinkub’eeq chi aatinak aawik’in aran; tink’e reheb’ kach’inaq li musiq’ej wank aawik’in [Moises] re naq tate’xtenq’a chirilb’al li tenamit a’in. Chi jo’kan ink’a’ wanqat aajunes”¹.

A’ineb’ aatin re najter q’e kutan, a’b’an lix na’leb’ li Qaawa’ ink’a najala’.

Anajwan, sa’ li Iglees, li Qaawa’ kixb’ok 317 li Setenta li nekek’anjelak sa’ waqxaqib’ molameb’ re xtenqankileb’ li Kab’laju Apostol re riiqankil li riiq naxk’am lix B’eenil Awa’b’ejil. Rik’in sahil inch’ool, ninweek’a li teneb’anb’il sa’ inb’een toj xchamil lin ch’ool, jo’kaneb’ ajwi’ li jun raqal laj Jolomil aj b’eresinel. A’b’anan, moko yal junes ta laa’o nokok’anjelak sa’ li nim xloq’al k’anjel. Jo’ komon re li Iglees sa’ chixjunil li ruchich’och’, chiqajunilo wan li qasachol ch’oolej chi tz’aqonk re rosob’tesinkil lix yu’am li jun ch’ol chik qakomon.

Kintaw inna’leb’ rik’in li qaprofeet li k’a’ru na’ajman ru rik’ineb’ ke’xnumsi li kaq-sut-iq’: li rahok, li tij ut b’antioxinkileb’ li ruq’eb’ li yookeb’ chi tenq’ank.

Sa’ li ewu a’in, li junjunqalo taqataqsi li quq’ ut taqaxak’ab’eb’ sa’ lix k’anjel li xB’eenil Awa’b’ejil ut laj Molameb’ li Kab’laju chi Apostol jo’ profeet, aj ilol na’leb’ ut aj k’utb’esinel re Lix Iglees li Jesukristo reheb’ las Santil Paab’anel sa’ Roso’jikeb’ li Kutan. A’in moko yal junes ta jun na’leb’, ut moko yal junes ta reheb’ li Jolomil k’anjenel re li Iglees. Lix xaqab’ankileb’ laj Jolominel sa’ li Iglees a’an jun osob’tesihom; nachal rik’in jun teneb’ahom sa’ qab’een re xwotzb’al li riiqeb’ ut re naq toowanq jo’ aj xtzolom li Qaawa’ Jesukristo.

Li awa’b’ej Monson kixye:

Wanko chi sutsu xb’aaneb’ li komon li neke’ajok chirilb’aleb’, chixwaklesinkil xch’ool, xxaqab’ankil xwankil, k’ojob’ank ch’oolej ut chaab’ilal, maare a’aneb’ laa junkab’al, wamiiw, yal naqanaweb’ ru malaj laj jalanil tenamit. Laa’o li ruq’ li Qaawa’ sa’ xb’een li ruchich’och’, rik’in lix taqlahom re tootenqanq ut taqawaklesi li raam lix ralal. A’an naxchap rib’ chiru li junjunq laa’o. …

“jo’ch’inal jo’nimal xeb’aanu chaq reheb’ …, we laa’in xeb’aanu chaq’ [Mateo 25:40]”².

Ma toosumenq rik’in rahok naq wan qahoonal re uulanik, jun li b’oqok, xtz’iib’ankil jun esilal malaj xnumsinkil jun kutan rik’in junaq komon yal re xb’aanunkil jun xraajelil? Malaj taqab’aanu chan ru xb’aanu chaq li saaj winq naq kixye naq naxpaab’ chixjunil lix taqlahom li Dios?

“Chixjunil a’in ak inpaab’ahom. K’a’ru maji’ ninb’aanu?

“Kichaq’ok li Jesus ut kixye: Wi taawaj naq tz’aqalaq aawe aawu, ayu, k’ayi jo’nimal wank aawe ut k’e reheb’ li neb’a’, ut taawanq aab’ihomal sa’ choxa; toja’ naq tatchalq ut tinaataaqe”³.

Li saaj winq yookeb’ xb’oqb’al sa’ jun chik nimla k’anjel chixk’atq li Qaawa’ re xb’aanunkil li k’anjel re ruchich’och’il rawa’b’ejihom li Dios, a’b’an xkoho “xb’aan naq naab’al xb’ihomal”⁴.

Ut k’a’ru naqak’oxla rik’in li qab’ihomal? Naru xrilb’al li k’a’ru naxb’aanu rik’in li qab’ihomal li kaq-sut-iq’ sa’ junpat. Aajel ru naq junjunqalo taqanima li qab’ihomal sa’ li choxa, naq naqak’e li qahoonal, qaseeb’al ut xtaql qach’ool sa’ lix k’anjel li Dios.

Li Jesukrisro toj yo chiqab’oqb’al “tatchalq ut tinaataaqe.”⁵. A’an kib’eek sa’ lix tenamit rik’ineb’ lix taaqenel sa’ tuqtuukil usilal. Ut A’an, toj yoo chi b’eek chiqak’atq, chixxaqab’ankil qawankil ut nokoxb’eresi. Li xb’aanunkil li k’a’ru xb’aanu a’an chi tz’aqal re ru, re naq taqanaw ru ut taqanima rix li Kolonel, naq kixk’am sa’ xb’een chixjunil li qiiq rik’in li xloq’al ut kolojel xtojb’al rix li maak, lix nimal ru k’anjel re tenq’ank. Li k’a’ru naxpatz’qe chi junjunqal re naq chi anchalil li qaam ut wi wan qach’ool chixk’amb’al rik’in sahil ch’oolejil li “teneb’ahom sa’ qab’een” re naq toowanq jo’ jun lix tzolom.

Naq toj wankin chaq Oklahoma kiwan lin hoonal re xnawb’aleb’ ru junjunq chi junkab’al li ke’xk’ul li rahilal xb’aan lix kawilal li kaq-sut-iq’. Naq yookin chi uulanik rik’in li junkab’al Sorrels, kitoch’e’ lin ch’ool chirix li k’a’ru xk’ul lix rab’in, Tori, sa’ li kutan a’an yoo chi tzolok sa’ li ro’ raqal sa’ li tzoleb’aal re kok’al Plaza Towers. A’an ut lix na’ wankeb’ qik’in anajwan.

Lix Tori ut junjunq lix ramiiw xe’xwok’ob’ rib’ b’ar wi’ neke’atin re te’xkol rib’ naq yoo chi numek’ li kaq-sut-iq’ ut yoo chixsachb’al li tzoleb’aal. Abihomaq naq yookin chirilb’al li hu b’ar wi’ wan raatin lix Tori chiru li k’a’ru ke’xk’ul sa’ li kutan a’an:

“Xwab’i naq jun k’aruhaq kit’ane sa’ xb’een li ochoch. Kink’oxla naq a’an li saqb’ach. Ab’an kinumta li choqink. Kintijok re naq li Choxahil Yuwa’ to’xk’uula chiqajunilo ut toowanq chi kolb’il. Tojo’ naq, kiqabi jun kawil yaab’ chanchan jun li ch’iich’ li naxkelo li mul, ut lix b’een li ochoch ki’el ut sach chiqu. Wan naab’al chi iq’ ut naab’al chi ka’aq ru yoo chi purik ut nikinixket chixjunil lin junxaqalil. Naab’al li q’ojyin chirix li kab’l ut na’k’utun naq li choxa q’eq ru, ab’an moko kama’an ta sa’xyi li kaq-sut-iq’. Yal junes xintz’ap li wu chi oyb’enink ut yookin chi tijok re naq taaraqe’q.

“Tojo’ naq maak’a chik ki’eek’ank.

“Naq kintee li wu, kiwil jun eetalil li neke’xk’e sa’ li nimb’e re naq “tooxaqliiq” tz’aqal chiru lix naq wu! Kach’in chi ma naxtoch’ li wu’uj”⁶.

Lix Tori, lix na’, oxib’ li ras ut nab’aleb’ ramiiw li xe’wan sa’ li tzoleb’aal rik’in, ke’ril jun sachb’a-ch’oolejil naq ink’a’ xe’kam sa’ li kaq-sut-iq’; wuqub’ lix komon ink’a’ ke’kole’.

Sa’ lix raqik li xamaan, li komoneb’ winq aj tijonelil, ke’xkanab’ naab’al chi rosob’tesihom sa’ xb’eeneb’ li komon ke’rahob’tesiik xb’aan li kaq-sut-iq’. Kiweek’a naq kinimaak wu naq xwosob’tesi lix Tori. Naq xink’e li wuq’ sa’xb’een lix jolom, jun raqal li loq’laj hu kichal sa’ lin k’a’uxl: “laaʼin tinxik chiru lee rilobʼaal. Tinwanq saʼ lee nim uqʼ ut saʼ lee tzʼe, ut lin Musiqʼ taawanq saʼ lee chʼool, ut ebʼ lin anjel chesutam, re eewaklesinkil”⁷.

Xink’e xna’leb’ lix Tori naq tixk’oxla li kutan naq jun lix moos li Qaawa’ kixk’e li ruq’ sa’ xb’een lix jolom ut kixye re naq kikole’ xb’aaneb’ li anjel naq kinume’ li kaq-sut-iq.

Xyuub’al li wuq’ re naq taqakol qib’ chiqib’il qib’, a’ yal jo’ chan ru wanqex, a’an jun xbisb’al li rahom chi junelik. A’an a’in li li tenq’ li na’ajliik li kiwil aran Oklahoma sa’ li xamaan a’an.

Rajlal, wan li qahoonal re xtenq’ankileb jalan chik komon naq neke’xnumsi li ch’a’ajkilal. Jo’ komon sa’ li Iglees, junjunqo wan jun loq’laj tenab’ank sa’qab’een “chixkʼambʼal eeriiq cheribʼil eeribʼ re naq taaseebʼoʼq”⁸, “xkʼojobʼankilebʼ xchʼool li nekeʼajok kʼojobʼaak xchʼool”⁹, [xtaqsinkil] li uq’ej li nalukta, ut [k’eeb’al xmetz’ew] li xb’een aqej li maak’a’ xmetz’ew”¹⁰.

Ex was wiitz’in, k’ajo’ lix b’antioxihom li Qaawa’ xb’aan eejunjunqalex, chirix li xnaab’alil chi hoonal ut lee b’anuhom chi tenqank, li ninqeb’ jo’ li kachineb’, naq nekeyal eeq’e chi anchal eech’ool chixk’eeb’al k’a’aq re ru re lee komon rajlal kutan.

Li rey Benjamin kixk’ut sa’ lix Hu laj Mormon: “jo’q’e wankex chi k’anjelak chiru lee reech winqilal ka’ajwi’ wankex chi k’anjelak chiru lee Dios”¹¹.

Naq noko’ok chixk’oxlankil chan ru taqatenq’aheb’ li qas qiitz’in naru naq tooxb’eresi chixb’aanunkil li k’a’ru choxahil sa’ li qayu’am arin sa’ li ruchich’och’ ut nokoxkawresi re xk’eeb’al xloq’al ut xraab’al li k’a’ru naxra li Qaawa’. Naq naqab’anu chi kama’an, naqach’olob’ xyaalal rik’in li qayu’am naq laa’o aj paab’anel. Naq nokotz’aqonk sa’ lix k’anjel, naqeek’a qik’in lix musiq’, nokoniman rik’in li qanawom, paab’aal, xkanab’ankil qib’ chiru, ut rahok.

Laa’in ninnaw naq yo’yo lin Qaawa’, li Jesukristo; naq A’an na’aatinak chiru lix profeet, li qaraarookil awa’b’ej Thomas S. Monson, anajwan, sa eb’ li qakutan.

Nintz’ama naq chiqajunilo taqataw li sahil ch’oolej li nachal rik’in li loq’laj tenq’ naq naqak’am lix riiq’eb’ li jun chirib’il qib’, jo’kan ajwi’ li kok’ kach’ineb’; sa’ xk’ab’a’ li Jesukristo. Amen.