Miqachap li salsookil b’e

Xb’aan laj Elder Claudio D. Zivic

Reheb’ laj Setenta

Nintijok re naq ink’a’ taqasach li b’e, re naq junelik chapchooqo rik’in li choxa.

Jun li ch’ina al yoo xtoch’b’al li wajb’, ut jun aj k’ay, naq kiril sa’ li rilob’aal och’och’, kixpatz’ re: “Ma wan laa na’?”

Ut li ch’ina al kixsume: “Ut … laa’at chan ru nakawil!”

Eb’ li qa’oob’ raarookil qalal neke’xtoch’ li wajb’, ninb’antioxi re li wixaqil li naxyal xq’e naq te’tzoloq. Naq li tzolonel naawulaq sa’ qoch’och’, li qalal laj Adrian na’alinak chixmuqb’al rib’ re naq ink’a’ tixk’ul lix tzol. A’b’an sa’ jun kutan, jun sachb’a-ch’oolej kinume’!: Ki’ok chixraab’al li wajb’anb’il son toj reetal naq xjunes yoo chi k’anjelak rajlal.

Wi naq yooko xjalb’al qach’ool tooruq raj chi wulaq tz’aqal aran, chaq’alaq raj ru. K’a’jo’ xchina’usal raj yu’aminkil lix taqlahom chi ma’ani’aq yoq xjultikankil qe rajlal naq taqab’aanu; ut xb’aanunkil chi anchal qach’ool, rik’in jun xaqxookil xtiikilal qach’ool naq yooko xk’amb’al li chab’il b’e taqak’ul li q’ajkamunk ke’xyeechi’i chaq qe sa’ li Loq’laj Hu.

Naab’al chihab’ ak xnume, rik’in li wixaqil, li qako’ lix Evelin ut jun ramiiw re li qajunkab’al, xooko’o sa’ jun na’ajej re hilank, Parque Nacional de los Arcos xk’ab’a’ (wan aran sa’ li ch’och’ Utah, EE. UU). Sa’ jun lix okeb’aal pek naab’aleb’ neke’xnaw ru li na’ajej ut lix k’ab’a’ a’an li Q’unil Okeb’aal Pek. Xqak’e qach’ool chi b’eek wiib’ kilometro sa’ xsutam, kootaqe’q li tzuul re naq toowulaq toj aran.

Koo’ok chi b’eek rik’in naab’al sahil qach’ool, ab’an naq koob’eek b’ayaq ke’raj hilanq. Ut laa’in xb’aan naq nawaj chi wulak kink’e inch’ool chi xik injunes. Ink’a’ xink’e reetal li b’e kink’am, kintaaqe jun winq yoo chi xik chi uub’ej, ut laa’in nink’oxla naq yoo chi xik sa’ xyaalal. Li b’e nawil naq yoo chi ch’a’ajko’k. Aajel ru naq tinpisk’oq sa’ xb’eeneb’ li junjunq chi pek. Ut xb’aan naq xuwajel li b’e kinnaw chi yaal naq a’aneb’ ink’a’ te’ruuq chi wulak. Tojo’ naq kinwil li Q’unil Okeb’aal Pek, a’b’an kisach inch’ool naq kiwil naq wan sa’ jun na’ajej b’ar wi’ ink’a’ tinruuq chi wulak.

Rik’in naab’al xrahil inch’ool xink’e inch’ool chi sutq’iik. Ut ink’a’ chik ninkuy chiroyb’eninkileb’ toj xqak’ul qib’ wi’chik. Lin patz’om sa’ junpaat a’in: “ma’ xexwulak toj sa’ li Q’unil Okeb’aal Pek?” ut a’aneb’ rik’in xsahil li xch’ool ke’xye we naq ke’wulak. Ke’xch’olob’ we naq ke’xtaaqe li eetalil wan sa’ li b’e, ut timil timil ut rik’in yalok q’e, ke’wulak sa’ li na’ajej ke’raj.

Kiraho’ inch’ool xb’aan naq kinsach li b’e. K’ajo’ xnimal lin tzolom kink’ul sa’ li kutan a’an!

Jarub’ sut naqasach li chaab’il b’e, naq naqakanab’ qib’ xb’aan li k’a’ru na’xyeechi’i li ruchich’och’? Kok’aj xsa’ taqapatz’ qe wi yooko xb’aanunkil li k’a’ru naxye raatin li Jesukristo.

Sa’ lix hu laj Jwan, wan jun sachol ch’oolej k’utum:

“Kanaaqex wik’in, ut laa’in tinkanaaq eerik’in. Jo’ li ruq’ che’ ink’a’ naru na’uuchink xjunes rib’ wi ink’a’ xtz’ejwalihom rib’ rik’in li xtoonal, jo’kan ajwi’ laa’ex wi ink’a’ nekexkanaak wik’in.

“Laa’in li xtoonal li uub’; laa’ex li ruq’. Ani nakanaak wik’in ut laa’in rik’in, a’an q’axal na’uuchink, xb’aan naq wi jachjooqex wik’in maak’a’ naru teeb’aanu” (Laj Jwan 15:4–5).

Rik’in li juntaq’eetink a’in nokoru rilb’al lix junajil jwal nach ut jwal nim ru li wan rik’in li Jesukristo ut laa’o, ut li xnimal ru naxq’e choq’ qe qajunjunqal. A’an lix xe’hil ut xtoonal li nak’amok re li ha’ re yu’am, lix kik’el to’xtenq’a chi tzekank re naq tooruq chi uuchinq naab’al. Li Jesukristo ko’xtzol re naq jo’ li ruq’ che’, chapchooko rik’in, maajun wa taqatz’eqtaana li xtz’aq li xk’utum.

Wan li sachok na’leb’ naru naq nim xrahilal, ut wi ink’a’ naqatuqub’ sa’ junpaat, naru naq toxjalb’ehi chi junajwa chiru li chaab’il b’e. Wi naqajal li qak’a’uxl ut naqakulub’a li q’use’k, li k’a’ru naqanumsi toxtenq’a chixtuulanob’resinkil qib’, xjalb’al li qab’aanuhom ut xnach’ob’resinkil qib’ wi’chik rik’in li qaChoxahil Yuwa’.

Nawaj raj xk’eeb’al jo’ jun eetalil chirix a’in, ninaatinak chirix li k’a’ru nimla xuwajel kixnumsi chaq li Profeet aj Jose Smith. Xb’aan li k’a’ru xk’ul, li Kolonel kixkanab’ choq’ qe lix k’utum k’ajo’ xnimal xtzaq chirixeb’ li xb’eenileb’ na’leb’ li tento taawanq chiqu sa’ li qayu’am. Xk’ulmank naq laj Martin Harris kixsach li 116 perel aj jalb’il ru sa’ jalan aatinob’aal re li xb’eenil raqal lix Hu laj Mormon.

Chirix naq xjal xk’a’uxl xb’aan naq inqa xb’aanu jo’ xk’ute’ chiru li Dios, li Profeet kixk’ul li k’utb’esinb’il na’leb’ li wan sa’ li tasal 3 re Li Tzol’leb’ ut Sumwank. (chi’ilmanq Eb’ li xk’utum li Awa’b’ejil re li Iglees: Jose Smith, 2007, perel 73–76). Li k’a’ru tz’ib’anb’il saheb’ lix raqal 1 toj sa’ li 10, nawaj xyeeb’al wi’chik li oxib xb’eenileb’ na’leb’ taqajultika junelik:

Lix k’anjel ut li rajom li Dios ink’a’ naru nasache’.
Moko taqaxuwaheb’ ru li winq sa’xb’een li Dios.
Li aajelil chirix li jalb’a k’a’uxlej rajlal.

Sa’ li raqal 13, li Qaawa’ naxk’ut qe kaahib’ b’aanuhom naq majun sut taqab’aanu:

Xtz’eqtaanankil li na’leb’ naxk’e li Dios.
Xq’etb’al li tz’aqal loq’laj yeechi’ihom li xqab’aanu chiru li Dios.
Xkanab’ankil qib’ chiru li qaraqb’a-aatin.
Xnimankil qib’ xb’aan li qachaab’ilal na’leb’.

Nintijok re naq ink’a’ taqasach li b’e, re naq junelik chapchooqo rik’in li choxa; re naq majun wa toxkelo li k’a’aq re ru wan sa’ li ruchich’och’.

Wi wan sa’ eeyanq junaq li tixkanab’ li xb’e li Qaawa’, sa’ jun na’ajej li b’e a’an, rik’in nimla yot’b’a-ch’oolej, teerek’a lix k’ahil li yot’e’k xb’aan naq ke’xtz’eqtaana li na’leb’ k’eeb’il xb’aan li Dios, malaj xq’etb’al li q’axal loq’ li kixyeechi’i chaq chiru li Dios, malaj xb’aan naq xwan chi chapcho chiru tz’aqal lix k’oxlahom, malaj xnima rib’ rik’in tz’aqal lix na’leb’.

Wi’ a’in laa numik, nintz’aama eere naq teejal lee k’a’uxl ut texsutq’iiq sa’ li chaab’il b’e.

Sa’ jun kutan jun imamb’ej kixb’oq li xyuwa’chin re’xk’eeb’al xsahil xch’ool sa’ lix kutankil. Kixpatz’ re jarub’ chihab’ wan re. Ut kixsume re naq xwulaq sa’ 70 (lajeeb’ xkaak’aal) chihab’. Lix imamb’ej kikana chixk’oxlankil ut chirix a’an kixpatz’ re: “yuwa’chin, ma la’at xatik’ib’chaq toj sa’ li jun chihab’?”

Naq toj kach’ino chaq ut sa’ li qach’ajomil naqak’oxla naq maajun wa toowulaq chi tiix; maajo’q’e naqak’oxla chirix li kamk. A’an choq’ reheb’ li tenamit jwal cheekeb’. Re naq toowulaq aran toj wan jun junelik q’e kutan. Moqon, li po ut eb’ li q’ehil neke’nume’, toj na’ok chi k’utunk li xtz’uumal sa’ lix naq ru, nakub’e lix metz’ew, li rajb’al-u chixsik’b’al rajlal laj b’anonel, ut naab’al chik.

Taawulaq li kutan naq taqataw qib’ wi’chik rik’in laj Tojol qix ut Kolonel Jesukristo. Nintz’aama naq sa’ li loq’laj ut chaq’al ru kutan tooruuq xnawb’al ru xb’aan naq wan li qanawom chirix a’an, ut xb’aan naq xqapaab’ lix k’utum. Tixk’ut chiqu li xk’ob’olal li klawx sa’ ruq’ ut sa’ roq, ut taqaq’alu qib’ chi maak’a’q xraqik, tooyaab’aq xb’aan lix sahil qach’ool xb’aan naq xqataaqe lix b’e.

Ninch’olob’ xyaalal sa’ xkaaxukuutil li ruchich’och’ naq li Jesukristo yo’yo. A’an koxtz’aama: “… Chex’ab’inq, ex tenamit re li ruchich’och’, ut ab’ihomaq li raatin li Dios a’an li kiyiib’ank eere! (Tz. ut S. 43:23). Taawanq taraj qaseeb’al re xtawb’al ru, chi’ab’inq, xtawb’al xyaalal ut xk’utb’al xyaalalil chi us li raatin li “Dios li kixyo’ob’tesi qe” re naq ink’a’ taqajal lix b’e, nintz’aama; sa’ xk’ab’a’ li Jesukristo. Amen.