Wi junaq eere moko tz’aqal ta xna’leb’

Xb’aan li Elder Marcos A. Aidukaitis

Reheb’ li Setenta

Li Dios tixk’utb’esi li yaal chiruheb’ ani neke’xsik’ jo’ naxye sa’eb’ li loq’laj hu.

Sa’ jun kutan, li walal limwan re laajeb’ chihab’ yoo chaq chi tzolok sa’ li ulul ch’iich’ internet chirix li ulul re li winq xb’aan naq naraj taawulaq choq’ aj b’anonel. Moko cha’a’j ta xnawb’al naq a’an nikinixq’ax rik’in xseeb’al xch’ool.

Sa’ li qochoch nawulak chiqu roksinkil li ulul ch’iich’ internet. Naqoqsi re raatinankil qech alal ut qamiiw. Li walal ink’ajol neke’xb’aanu lix k’anjel li yookeb’ xtzolb’aal sa’ li ulul ch’iich’ internet.

Yalaq k’a’ruhaq li patz’om, wi naqaj xnawb’al chirix, naqasik’ aran ut naqataw naab’al resil sa’ junpaat. K’a’jo’ xchaab’ilal.

Li internet naxk’e qe naab’al chi hoonal b’ar wi tootzoloq. A’b’anan, laj Satanas naraj naq laa’o taawanq li qarahilal ut naxjaltesi lix tz’aqal xyaalalil li k’a’aq re ru. A’an naxchap rib’ rik’in li k’anjeleb’aal a’in re naq taawiib’ank qach’ool ut li qaxiw re sachb’al li paab’aal ut li yo’onink.

Rik’in chixjunil naqataw sa’ li internet, aajel ru naq taqak’oxla b’ar wi’ naqak’e li yalok-q’e. Laj Satanas naru naxk’e chi wanq qalaatz’il, naq taqajal li qak’a’uxl chirix li k’a’ru aajel ru xb’aanunkil ut xk’aytesinkil chixsik’b’al k’a’ruhaq nawom, li naab’al re maare yal tz’aqal mul.

Moko us ta naq toowanq b’ar wan li mul.

Ab’ihomaq li na’leb’ aj k’amol b’e a’in li naxk’e chaq qe li loq’laj hu: “…k’eeb’il lix Musiq’ li Kristo re li junjunq chi winq, re taaruuq tixnaw b’ar wan li us ut li ink’a’ us; jo’kan ut, nink’ut cheru li na’leb’ chanru teetz’il rix; xb’aan naq yalaq k’a’ru nab’oqok chixb’aanunkil li chaab’il, ut chi q’unb’esink ch’oolej re xpaab’ankil li Kristo, a’an taqlanb’il xb’aan lix wankilal ut lix maatan li Kristo; jo’kan naq taaruuq teenaw… naq a’an re li Dios”¹.

Relik chi yaal, wanko ajwi’ rik’in li ch’a’ajkilal jo’ chanru xnumsi chaq laj Jose Smith sa’ lix ch’ajomil. Rajlal maak’a’ qanawom.

Sa’ li rawa’b’ejihom li Dios nak’utun ut nawaklesiman xsik’b’al li yaal, ut maajun wa ramb’il ut taaxuwaaq. Li Qaawa’ a’an ajwi’ naxk’e qana’leb’ chi anchal xch’ool reheb’ li komon sa’ li Iglees naq te’xsik’ xnawom². A’an kixye: “…chexsik’oq chi yalb’il eeq’e … relik chi yaal, sik’omaq chaq sa’eb’ li hu q’axal chaab’il li aatin re chaab’il na’leb’; chesik’ xk’ulb’al eenawom, rik’in li tzolok ut rik’in ajwi’ li paab’aal” ³. A’b’anan, chan ru tooruq xnawb’al li yaal sa’ jun ruchich’och’ li timil timil yoo chixtz’eqtaanankil li k’a’aq re ru re li Dios?

Eb’ li loq’laj hu naxk’ut qe a’in:

Xb’een, naru taqanaw li yaal naq taqil li ruuchinihom.

Naq li Qaawa’ ki’aatinak sa’ xb’een tzuul kixye:

“Jo’kan naq chixjunil li chaab’il che’ chaab’il li ru naxk’e, a’b’an li che’ ink’a’ us ink’a’ ajwi’ us li ru naxk’e …

“Jo’kan utan rik’in li te’ruuchin teenaweb’ ru”⁴.

Li profeet Mormon kixk’ut ajwi’ lix b’eenil na’leb a’in naq kixye: “Rik’in lix k’anjeleb’ teenaweb’ ru; xb’aan naq wi chaab’il lix k’anjeleb’, chaab’ileb’ ajwi’ a’an”⁵.

Naqab’oqeb’ chixjunileb’ chixtz’ilb’al rixeb’ li ru ut lix k’anjel li Iglees a’in.

Aniheb’ nekeraj xtawb’al li yaal, te’xtaw ru lix jalanil ru li Iglees ut eb’ lix komon sa’ lix k’aaleb’al ut b’ar wi’ wankeb’ chaq. Jo’kan ajwi’ te’xtaw ru li chaab’ilob’resink sa’ lix yu’am li ani neke’xtaaqe lix k’utum. Li ani te’xtz’il rixeb’ li ru, te’xtaw ru naq li ru Lix Iglees li Jesukristo reheb’ laj Santil Paab’anel sa’ Roso’jikeb’ li Kutan k’a’jo’ xsahil ut atawal wi’.

Xkab’, naru taqataw li yaal naq naqayal rix rik’in li aatin.

Li profeet laj Alma kixk’ut:

“Anajwan taqajuntaq’eeta li aatin rik’in jun iyaj … wi nekek’e xna’aj re taaruuq chi awmank jun li iyaj sa’ lee ch’ool, k’ehomaq reetal, wi a’an jun iyaj li yaal … wi ink’a’ neketz’eq xb’aan xmaak’a’il lee paab’aal… k’ehomaq reetal, taa’ok chi siipook sa’ lee ch’ool; ut … tex’ok chixyeeb’al sa’ lee ch’ool—Tento naq chaab’ilaq li iyaj a’in ... xb’aan naq na’ok chixnimob’resinkil li waam; relik chi yaal, na’ok chixkutanob’resinkil innawom, relik chi yaal, na’ok chi tamk xsahil choq’ we …

“K’ehomaq ut reetal anajwan, ma ink’a’ tixnimob’resi a’in lee paab’aal? Yaal, tixnimob’resi lee paab’aal …

“Xb’aan naq li junjunq chi iyaj na’uuchin a’ yal k’a’ chi iyajil”⁶.

Q’axal chaab’il lix b’oqb’al jun profeet re li Qaawa’! Naru najuntaq’eetak rib’ jo’ jun yalok-ix aj nimla tzolonel, xb’aan naq nokoxb’ok chi xyalb’al rix li aatin, naxye qe chan ru taqab’aanu ut k’a’ru taak’ulmanq wi taqab’aanu ut taqataaqe chanru xb’aanunkil.

Jo’kan b’i’, li loq’laj hu naxk’ut qe naq tooruuq xnawb’al li yaal naq naqak’e reetal li ruuchinihom, naraj xyeeb’al naq naqayal rix sa’ junjunqal rik’in li aatin, naq naqak’e xna’aj re li aatin sa’ li qach’ool ut wi naqach’olani jo’ jun iyaj.

A’b’anan, wan jun roxil chanru xb’aanunkil re xnawb’al li yaal ut a’an rik’in li k’utb’esinb’il na’leb’ sa’ junjunqal.

Sa’ li chol 8 re li Tzol’leb’ ut Sumwank nak’ute’ naq li k’utb’esinb’il na’leb’ a’an li nawom: “…taqak’ul qanawom chirix k’a’aq re ru [taqapatz’] rik’in paab’aal, chi maak’a’ xb’alaq’il [qach’ool], rik’in xpaab’ankil naq [taqak’ul]”⁷.

Jo’kan ajwi’, li Qaawa’ naxye qe chanru taqak’ul li k’utb’esinb’il na’leb’ a’an: “…tinye aawe sa’ laa k’a’uxl ut sa’ laa ch’ool, rik’in li Santil Musiq’ej, li taachalq sa’ aab’een ut taawanq sa’ aach’ool”⁸.

Jo’kan ut, nak’ute qe naq naru taqak’ul li k’utb’esinb’il na’leb’ wi naqapatz’ rik’in paab’aal, chi anchal qach’ool ut rik’in xpaab’ankil naq taqak’ul.

Chek’ehaq reetal naq li Qaawa’ kixkanab’ chi saqen ru naq kixye: “Chijultiko’q aawe naq chi maak’a’ aapaab’aal, maak’a’ nakatru chixb’aanunkil; jo’kan ut, chatpatz’oq rik’in paab’aal”⁹. Li paab’aal naraj yalok-q’e, jo’ k’oxlankil sa’ li qak’a’uxl, toja’ naq tento taqapatz’ re, rik’in li tij, wi us.

Li Qaawa’ kixye:

“…ut wi us, tink’e chi xamnak lix sa’ aach’ool; chi jo’kan taaweek’a naq us.

“Wi b’an moko us ta maak’a’ xkomon a’an taaweek’a; taawanq b’an xwarjik aak’a’uxl, ut rik’in a’an taasachq sa’ aach’ool li k’a’ru moko us ta”¹⁰.

Li paab’aal, wi maak’a’ xb’aanuhom, relik chi yaal a’an kamenaq¹¹. Jo’kan b’i’, “[teetz’aama] rik’in paab’aal, chi ink’a’ taach’inanq eech’ool”¹².

Wan jun wamiiw maak’a’ xpaab’aal qik’in li kixye we naq a’an moko wan ta rik’in li musiq’ej. Ink’a’ naxtzol li Loq’laj Hu ut ink’a’ natijok xb’aan naq naxye naq ink’a’ naxtaw ru li raatin li Dios, ut nawiib’ank xch’ool chirix lix wanjik. Chan ru naxk’oxla naxch’olob’ k’a’ut naq maak’a’ li musiq’ejil rik’in ut tixk’am sa’ junpak’al li k’utb’esinb’il na’leb’, jo’ chanru kixch’olob’ chaq laj Alma, naq kixye: “Ut chi jo’kan, ani taakawob’resinq re li raam, a’an naxk’ul li jun raqal li aatin li yal k’ach’in”.

A’b’an kixtiq: “…ut ani ink’a’ taakawob’resinq re li raam, re a’an nak’eeman li jun raqal li aatin li q’axal nim wi’chik, toj reetal naq k’eeb’il re xnawb’al lix muqmuukil na’leb’ li Dios toj reetal tixnaw chi tz’aqal”¹³.

Laj Alma ut li ralaleb’ laj Mosiah nekewan jo’ jun reetalil chirix li xb’eenil na’leb’ naq li paab’aal naraj li k’anjelak. Sa’ lix Hu laj Mormon naqil:

“…ke’xtz’ileb’ rix li loq’laj hu chi yalb’ileb’ xq’e, re taaruuq te’xnaw li raatin li Dios.

A’ut moko ka’aj ta wi’ a’in; ke’xk’e rib’ ajb’an wi’ rik’in naab’al li tijok ut li kuyuk sa’, jo’kan naq kiwan rik’ineb’ li musiq’ej re profeetil aatin, ut li musiq’ej re k’utb’esink”¹⁴.

Xpatz’bal rik’in x’anchalil qach’ool a’an juntaq’eet xnimal ru naq yooko xkawresinkil qib’. Wi naqasik’ chi anchal ch’oolejil, taqab’aanu chixjunil li k’a’ru tooruuq xb’aanunkil re xtawb’al, li naraj ajwi’ naq yooko chixtzolb’aaleb’ li loq’laj hu, naq yook chi xik sa’ lix ch’utam li Iglees ut xyalb’al qaq’e chixpaab’ankil lix taqlahom li Dios. Jo’kan ajwi’ naraj xyeeb’al naq wanq qach’ool chixb’aanunkil li rajom li Dios naq taqataw.

Li k’a’ru xb’aanu laj Jose Smith naq yoo xsik’b’al lix chaab’il na’leb’ a’an jun eetalil tz’aqal re ru li k’a’ru naraj xyeeb’al chi anchal xch’ool. A’an kixye naq naraj xnawb’aal b’arwan re chixjunileb’ li jar ch’uut chi paab’aal tz’aqal yaal, re naq “tinnaw b’arwan [tixjunaji wi’ rib’]”¹⁵. Naq toj maji’ natijok, ak kawresinb’il rib’ re tixb’aanu li k’a’ru sumenb’il chaq re.

Tento naq toopatz’oq rik’in paab’aal ut chi anchal qach’ool. A’b’an a’an moko chixjunil ta. Jo’kan ajwi’ wanq qapaab’aal naq taqak’ul li k’utb’esinb’il na’leb’. Tento taqakanab’ qib’ chiru li Qaawa’ chi wanq qayo’onihom chiru lix yeechi’ihom. Chijultik’oq eere li k’a’ru wan chi tz’iib’anb’il: “Wi wank junaq eere yoo chi majelo’k xna’leb’, chixtz’aamaq re li Dios, ut taak’ehe’q re, xb’aan naq li Dios nak’ehok chi anchal xch’ool ut chi chaab’il reheb’ chixjunileb’ ”¹⁶. Q’axal sachol ch’oolej li yeechi’ihom a’in!

Ninb’oq chaq chejunilex laa’ex naq teesik’ li yaal rik’ineb’ li na’leb’ a’in, a’b’an, q’axal wi’chik, rik’in li k’utb’esinb’il na’leb’ sa’ junjunqal re li Dios. A’an tixk’ut li yaal chiruheb’ li neke’sik’ok jo’ nayeeman chaq sa’eb li loq’laj hu. Naraj ajwi’ naq taqayal qaq’e b’ayaq chik chiru yal sik’ok sa’ li internet, a’b’an nim li xtz’aq wi taqab’aanu.

Ninch’olob’ xyaalal naq a’in li tz’aqal yaal Iglees re li Jesukristo. Wilom chaq li ruuchinihom sa’eb’ lix na’aj ut sa’eb’ lix yu’am mil chi komon, jo’kan ajwi’ rik’ineb’ li junkab’al; jo’kan naq, ninnaw naq yaal. Jo’kan ajwi’ xink’e chi yale’k li aatin sa’ lin yu’am chi naab’al chihab’ ut xinweek’a li k’a’ru kixb’aanu sa’ lin waam, jo’kan ut, ninnaw naq yaal. A’b’an li jwal nim ru a’an naq xintaw ru lix yaalalil rik’in li k’utb’esinb’il na’leb’ rik’in li xwankil li Santil Musiq’ej; jo’kan naq, ninnaw naq yaal. Ninb’oqeb’ chejunilex laa’ex chixb’aanunkil jo’ chan ru xinb’aanu chaq laa’in. Sa’ xk’ab’a’ li Jesukristo. Amen.