“Wi nikineera, paab’omaq lin taqlahom”

Xb’aan laj Elder Robert D. Hales

Re lix Molameb’ li Kab’laju chi Apostol

Roksinkil li xtaql qach’ool re naq to’ab’inq, naraj xyeeb’al: “xb’aanunkil li k’a’ru us [ut xkanab’ankil] naq te’wulaq li k’a’ru nachal chirix a’an”

Ex was wiitz’in, chiru chixjunil li k’a’ru naqatzol rik’in lix yu’am li Kolonel, maajun taqataw jwal saqen ru ut nim xwankil jo’ li naxk’ut qe chirix li paab’ank.

Li kixk’ut chiqu li Kolonel

Sa’ li ch’utam re li choxa naq toj maji’ nokoyo’la, laj Lucifer xpo’resi xch’ool chirix li k’uub’anb’il na’leb’ re li qaChoxahil Yuwa’. Li ke’xtaaqe laj Lucifer ke’xraq chi chaab’ilo’k chi junelik—teeril eerib’ ani neketaaqe!

Jo’kan naq li Jesus kixye naq xaqab’anb’il sa’xb’een chi paab’ank, naq kixye: “At inYuwa’, chi’uxq laa wajom, ut aawehaq taxaq li loq’alil chi junelik”¹. Chirix chixjunil lix k’anjel sa’ li paab’aal, A’an “Kixnumsi li aaleek, a’ut maajun wa kixkanab’ rib’ re”². Jo’kan naq, “…kixtzol paab’ank rik’in li rahilal kixk’ul”³.

Xb’aan naq li qaKolonel kipaab’ank, a’an xtoj qamaak, xb’aan A’an naq tooruuq chi wakliik chi yo’yo ut xkawresi li b’e re naq toosutq’iq rik’in li qaChoxahil Yuwa’, li naxnaw naq taqasach qana’leb’ naq yooko chixtzolb’al chirix li ab’ink sa’ li yu’am wan wi’ li kamk. Naq noko’ab’ink, naqak’ulub’a li mayejak kixb’aanu, xb’aan naq “laaʼo naqapaabʼ naq saʼ xkʼabʼaʼ lix tojbʼal rix li maak xbʼaan li [Jesukristo], chixjunilebʼ li winq nekeʼru chi koleʼk, rikʼin abʼink chiru li chaqʼrabʼ ut kʼojobʼanbʼil kʼanjel re li Evangelio”⁴.

Li Jesus kixk’ut qe chi ab’ink rik’in ch’olch’ookil ru aatin ut ch’olch’o xtawb’al ru: “Wi nikineera, teepaab’ lin chaq’rab’ ”⁵, toja’ naq “tatchalq ut tinaataaqe”⁶.

Naq naqakub’si li qaha’, “[naqak’ul] sa’ [qab’een] lix k’ab’a’ li Kristo” ut naqab’aanu “li sumwank rik’in li qaDios re naq [too’ab’ink] chiru chixjunil li rela’ li [qakutan]”⁷. Rajlal domingo naqa’ak’ob’resi li sumwank re li kub’iha’ naq noqotz’aqonk rik’in li Loq’laj Wa’ak ut naqach’olob’ xyaalal naq wan qach’ool chixpaab’ankil lix taqlahom li Dios. Naqasik’ naq tixkuy qamaak re chixjunil li qak’a’uxl, li qeek’ahom malaj qab’aanuhom li moko wan ta jo’ lix taqlahom li qaChoxahil Yuwa’. Naqajal qak’a’uxl, naq naqakanab’ li maa’us aj na’leb’ ut noko’ok chi ab’ink wi’chik, kama’an naqak’ut qarahom choq’ Re.

Chanru li ab’ink

Naq naqapaab’ li Evangelio, nokochaab’ilo’ chixtawb’al ru li ab’ink. Wan naq maare wank li aaleek re’xb’aanunkil li ninye re “li ab’ink re li ruchich’och’il winq”, ut naqatz’eqtaana lix chaq’rab’ li Dios ut naqak’e chi uub’ej lix nawom li winq ut li qajom. Xb’aan naq naab’aleb’ li winqilal neke’xb’aanu a’in sa’ k’iila na’ajej, naq naqajal ru li k’a’ru naraj xyeeb’al chi yaal li ab’ink naxkub’si li xnimal ru li k’utb’il na’leb’ re li Dios sa’ li qatenamit ut li qachaq’rab’.

Wan naq li komon neke’okenk sa’ jun “sik’b’il ab’ink”, ut neke’xye naq neke’xra ut neke’xloq’oni li Dios naq toj neke’xsik’ k’a’ru chi taqlahom ut k’utum—ut k’a’ru xk’utum ut k’eeb’il na’leb’ xb’aaneb’ li profeet—te’xpaab’ chi tz’aqal.

Junjunq chi komon, chi sik’b’il neke’paab’ank xb’aan naq ink’a’ neke’xtaw ru li rajom li junjunq chi xtaqlahom li Dios, jo’ kama’aneb’ li kok’al naq moko junelik ta te’xtaw li rajom li junjunq chi k’utb’il na’leb’ reheb’ lix yuwa’eb’. A’b’anan, junelik naqanaw k’a’ut naq naqataaqeheb’ li profeet, xb’aan naq a’in lix Iglees li Jesukristo, ut a’an li Kolonel li naxb’eresiheb’ lix profeet sa’ chixjunileb’ xk’ojlajikeb’ li Evangelio.

Jo’ chan ru naq taachamo’q chixtawb’al ru li ab’ink, taqataw ru chi tz’aqal re ru lix k’anjel li xtaql qach’ool. Naq li Jesus wan chaq sa’ li awimq re Getsemani, kitijok oxib’ sut chiru lix Choxahil Yuwa’ ut kixye: “At inYuwa’, wi truuq, chinume’q li sek’ a’in sa’ inb’een; ab’an moko jo’ ta li nawaj laa’in, jo’aq b’an li nakawaj laa’at”⁸. Li Dios moko tarisi ta li xtaql xch’ool li Kolonel, a’b’anan, sa’ li ruxtaan kixtaqla jun li anjel re xkawresinkil li Ralal raaro xb’aan.

Li Kolonel kixnumsi jun chik yale’k rix sa’ li Golgota, b’ar wi’ naru naq tixb’oqeb’ naab’aleb’ li anjel re naq te’xkub’si chiru li krus, a’b’an a’an ak xk’e xch’ool chi xkuyb’al toj sa’ roso’jik li ab’ink ut xtz’aqob’resinkil lix mayej re xtojb’al rix li maak, us ta a’an jun nimla mayej ut li kamk.

Li ab’ink naq naq’ano’ sa’ musiq’ej a’an “li ab’ink re li Kolonel”, na’eek’asink li qach’ool xb’aan li rahok chi yaal chirix li qaChoxahil Yuwa’ ut li Ralal. Naq naqapaab’ chi sa li qach’ool jo kixb’aanu chaq li qaKolonel, naqak’e xtz’aq li raatin li qaChoxahil Yuwa’: “A’an a’in li walal raaro inb’aan; rik’in a’in nasaho’k inch’ool”⁹; ut, naq too’ok’ sa rilob’aal li qaChoxahil Yuwa’, naqayo’oni rik’in qatawom rab’inkil: “Us, chaab’il aj k’anjelat ut tiik aach’ool!... Tattz’aqonq sa’ xsahilal xch’ool laj eechal aawe”¹⁰.

Roksinkil li xtaql qach’ool re paab’ank naraj xyeeb’al naq xqasik’ “xb’aanunkil li k’a’ru us [ut xkanab’ankil] naq taawulaq li k’a’ru taa’uxq”¹¹. A’an ajb’il ru naq taqab’eresi qib’ qajunes ut taqakuy li k’a’ru ink’a’ us, ut kama’in nak’ojla qach’ool, li sahil ch’oolejil chi junelik ut naqeek’a naq nak’ojob’a qach’ool ut xb’aan li qab’aanuhom chiruheb’ li wankeb’ qik’in a’aneb’ ajwi’ neke’tz’aqonk; ut naraj xyeeb’al naq teneb’anb’il sa’ qab’een chixxaqab’ankil li neke’jolomin sa’ li tijonelil ut xpaab’ankil li xk’utum ut k’ehok na’leb’.

Li taa’uxq xb’aan a’an

Li k’a’ru taqab’aanu wi nokopaab’ank, junelik chaab’il naq nanaq qach’ool li taa’uxq xb’aan li k’a’ru xqab’aanu chaq. Ma neke’xtaw ru laj Lucifer ut eb’ lix taaqenel li k’a’ru taa’uxq naq ke’xsik’ xtz’eqtaanankil li k’uub’anb’il na’leb’ re li qaChoxahil Yuwa’? Wi kama’an, k’a’ut naq ke’xk’e xch’ool chirix li xuwajel? Naru ajwi’ naq taqapatz’ qe: k’a’ut naq anihaq li qakomon naraj xq’etb’al lix taqlahom li Dios wi naqataw ru li k’a’ru naxk’am chaq chi junelik li maak? Eb’ li Loq’laj Hu nokoxsume: lix yaalalil k’a’ut naq laj Kain ut junjunq lix ralal laj Adan ut lix Eva ke’raj xq’etb’al lix taqlahom li Dios xb’aan naq “[ke’xra] laj Satanas chiru li Dios”¹².

Li qarahom chiru li Kolonel a’an lix lawil re naq tooruuq chi paab’ank jo’ naraj li Kolonel. Naq naqayal qaq’e chi paab’ank sa’ li ruchich’och anajwan, naqak’ut li qarahom ut oxloq’ chiruheb’ chixjunileb’ li ralal li qaChoxahil Yuwa’. A’b’anan, moko truuq ta naq li rahok a’an chiruheb’ li qas qiitz’in tixjal lix taqlahom li Dios, li ke’xk’e qe re li qachaab’ilal! Jo’ jun eetalil, li taqlahom “ink’a’ tatkamsinq, chi moko taab’aanu k’a’ruhaq chik xkomon a’an”¹³ naxxaqab’ rib’ sa’ li chaq’rab’ sa’ musiq’ej li naxkol chixjunileb’ lix ralal li Dios, us ta maji’ neke’yo’la. Naab’al li na’leb’ ke’xtaw rik’in li k’a’ru ke’xk’ul junxil, naxk’ut qe naq wi ink’a’ naqapaab’ li chaq’rab’ a’an, li k’a’ru naqak’ul k’a’jo’ xrahil. A’b’anan, naab’aleb’ neke’xk’oxla naq naru xkamsinkil jun li k’uula’al li toj maji’ nayo’la xb’aan naq ink’a’ nek’eraj naq taayo’laq malaj moko us ta choq’ reheb’.

Li xk’eeb’al li maa’us na’leb’choq’ chaab’il, moko naxjal ta li musiq’ejil chaq’rab’ ut li k’a’ru taak’ulmanq, a’b’an nokoxk’am chixsachb’al qana’leb’, li ch’a’ajkilal, li xjalb’esinkil qib’ sa’ ruq’ b’e ink’a’ naqanaweb’ ru ut li rahilal. Jo’ xtzolom li Kristo, wan jun loq’laj teneb’anb’il sa’ qab’een re xaqab’ankil li chaq’rab’ ut lix taqlahom li Dios, ut eb’ li sumwank xqab’aanu chaq.

Sa’ li po diciembre re li chihab’ 1831, ke’xpatz’ reheb’ laj jolomil aj b’eresinel naq te’tenqanq re xtuqub’ankil li ra ki’eek’aman chirix li Iglees. Chiru li profeet laj Jose Smith, li Qaawa’ kixye li k’aru te’xb’aanu jo’ maajun wa ke’xk’oxla chixb’aanunkil ut jo’kan ajwi’ kisach xch’ooleb’:

Jo’kan ut, chesacheb’ xna’leb’ li xik’ neke’ilok eere; b’oqomaqeb’ chaq chek’ulb’al chi k’utk’u jo’ ajwi’ eejunes…

“Jo’kan ut, che’xk’am chaq xkawil lix jitomeb’ chiru li Qaawa’.

“…Maajun k’anjeleb’aal wan li yiib’anb’il re eepleetinkil li taa’usaaq;

“Ut wi ani junaq chi winq tixtaqsi lix yaab’ xkux re eejitb’al, a’an taasache’q xna’leb’ sa’ li kutan k’oxlanb’il inb’aan.

“Jo’kan ut, chepaab’eb’ lin taqlahom; yaaleb’ a’an, ut paab’ajel”¹⁴.

Tzol’leb’ li wan sa’eb’ li Loq’laj Hu

Sa’ li Loq’laj Hu wan naab’al chi eetalil reheb’ li profeet li ke’xtaw lix tzolb’aleb’ re li paab’aank rik’in li k’a’ru ke’xk’ul chaq.

Kixk’ute’ re laj Jose Smith chirix li k’a’ru taa’uxmanq wi tixkanab’ rib’ rik’in li k’a’ru naxpatz’ re li natenqank re, lix ramiiw ut lix tz’iib’anel, laj Martin Harris. Li k’a’ru xsume chaq chirix li naxtz’aama laj Martin, laj Jose kixpatz’ liseens re li Qaawa’ re naq tixto’oni lix b’eenil 116 perel hu tz’iib’anb’il re Lix Hu laj Mormon re naq laj Martin tixk’ut reheb’ lix junkab’al, a’b’an li Qaawa’ kixye re laj Jose naq ink’a’ taaruq. Laj Martin kixtz’aama re laj Jose naq tixpatz’ wi’chik re li Qaawa’. Chirix lix roxil patz’om re laj Jose, li Qaawa’ kixk’e lix liseens re naq oob’ chi komon ak sikb’ileb’ ru te’xtz’il rix li hu tz’iib’anb’il. “Sa’ jun sumwank jwal loq’, laj Martin kixyeechi’i xb’aanunkil li sumwank a’an. A’b’an, Naq xwulak sa’ li rochoch, ke’ok chixch’i’ch’i’inkil, ut xsach chiru li loq’laj sumwank kixb’aanu chaq ut xkanab’ naq jalaneb’ chik te’ril li hu tz’iib’anb’il, ut kama’in rik’in li b’alaq’il na’leb’ kixsach reechanihom sa’xb’een li hu tz’iib’anb’il”¹⁵. Li taa’uxq xb’aan a’an, li Qaawa’ kixq’us laj Jose ut ink’a’ xk’e xliseens re taa’oq wi’chik chixjaltesikil ru Lix Hu laj Mormon. Laj Jose kixyot’ xch’ool ut xjal xk’a’uxl chirix li q’etok aatin naq xkanab’ rib’ rik’ineb’ jalaneb’ li komon. Chirix jarub’aq kutan, kiruhan wi’chik laj Jose chi k’anjelak re jaltesink ru aatin. Laj Jose kixtzol jun n’aleb’ nim xtz’aq re ab’ink ut kik’anjelak re toj sa’ xrosi’jik lix yu’am!

Li profeet aj Moises a’an jun chik eetalil choq’ qe. Naq laj Moises ki’ab’ink ut kixk’am choq’ rixaqil jun li ixq aj Etiope, lix Maria ut laj Aaron ke’ok xwech’inkil rix. A’b’an li Qaawa’ kixch’iilaheb’, ut kixye: “Rik’in a’an [laj Moises] ninaatinak chi naqaka’ya qib’ ”¹⁶. Li Qaawa’ narok’si jun na’leb’ re naq taqataw ru laa’o aj komon sa’ li Iglees sa’ li k’ojlajik a’in. Sa’ li chihab’ 1830, laj Hiram Page kixye naq yoo chixk’ulb’al li na’leb’ chi k’utb’esinb’il choq’ re li Iglees. Li Qaawa’ kixq’us ut kixk’ut reheb’ laj Santil Paab’anel: “Ut laa’at tat-ab’inq chiru li k’a’aq re ru nink’e re a’an [laj Jose], jo’ chanru ajwi’ laj Aaron”¹⁷, “…xb’aan naq a’an naxk’ul jo’ chanru laj Moises”¹⁸.

Li ab’ink naxk’am chaq li osob’tesihom, “Ut naq naqak’ul junaq osob’tesink rik’in li Dios, a’an xb’aan ab’ink chiru li jun chaq’rab’ a’an li nak’eeman wi’ ”¹⁹.

Li ab’ink naak’utman rik’in li li k’a’ru xex’ile’ chixb’aanunkil. Jo’ chanru naqab’eresi li qayu’am, naqak’ut re li qalal: “…ut chatzol chaab’il na’leb’ sa’ aasaajil; relik chi yaal, tzol sa’ aasaajil xpaab’ankil lix taqlahom li Dios²⁰.

Li ab’ink nokoxkawresi timil timil, tooruq xkuyb’al chi tiik qach’ool li yalok-ix ut li rahilal naq taachalq. Li ab’ink sa’ li Getsemani kixkawresi li Kolonel chi ab’ink ut chi kuyuk toj sa’ roso’jik sa’ li Golgota.

Ex was wiitz’in raarookex inb’aan, li raatin laj Alma naxye lix reek’ahom lin ch’ool:

“Ut anajwan ex was wiitzʼin raarookex inbʼaan, xinye eere li kʼaʼaq re ru aʼin re naq taaruuq tinwajsi eeru chireekʼankil li tenebʼanbʼil saʼ eebʼeen chiru li Dios, re taaruuq texbʼeeq chiru chi maakʼaʼ eejitbʼal…

“Ut anajwan nawaj raj naq tuulanaq eechʼool, ut kubʼenaqaq eeratawom ut qʼunaq eechʼool… cheyalaq eeqʼe chixpaabʼankil lix taqlahom li Dios rajlal”²¹.

Ninkanab’ lix nawom inch’ool jwal loq’ naq li qaKolonel yo’yo. Xb’aan naq a’an ki’ab’ink, “li junjunq chi xb’een aqej taab’ase’q, ut li junjunq chi ru’uj aq’ej taach’olob’anq chiru a’an… naq a’an li [qaKolonel]”²². Nintz’aama naq taqara chi anchal qach’ool ut q’axal wi’chik taqapaab’ re ut jo’kan ajwi’ too’ab’ink, taqapaab’ lix taqlahom re naq toowanq wi’chik rik’in chi junelik sa’ li rawa’b’ejihom li qaDios, a’an li wahom. Sa’ xk’ab’a’ li Jesukristo. Amen.