ការទទួលបានទីបន្ទាល់នៃពន្លឺ និង សេចក្ដីពិត
ប្រធាន ឌៀថើរ អេស្វ អុជដូហ្វ
ទីប្រឹក្សាទីពីរក្នុងគណៈប្រធានទីមួយ
ទីបន្ទាល់នៃពន្លឺ និងសេចក្ដីពិតផ្ទាល់ខ្លួនរបស់បងប្អូននឹងពុំគ្រាន់តែប្រទានពរដល់បងប្អូន និងពូជពង្សបងប្អូននោះទេ ប៉ុន្តែវាក៏នឹងនៅជាមួយបងប្អូនរហូតដល់អស់កល្បផងដែរ។
ក្នុងនាមជាអ្នកបើកយន្តហោះ ខ្ញុំបានមានបទពិសោធន៍បើករយៈពេលច្រើនម៉ោងឆ្លងកាត់ទ្វីប និងមហាសមុទ្រក្នុងស្បៃអន្ធកាលនាពេលរាត្រី ។ ពេលសម្លឹងទៅវេហាអាកាសពេលរាត្រីតាមបង្អួចនៃការប៊ីនអ្នកបើកយន្តហោះ ជាពិសេសកាឡាក់ស៊ី មីលគី វេយ៍ តែងធ្វើឲ្យខ្ញុំស្ញើចចំពោះភាពមហាសាល និងស៊ីជម្រៅនៃការបង្កើតរបស់ព្រះ—គឺអ្វីដែលព្រះគម្ពីរពិពណ៌នាថាជា «ពិភពលោកដ៏ច្រើនឥតគណនា» ។1
ជិតមួយសតវត្សហើយដែលតារាវិទូភាគច្រើនសន្មត់ថា កាឡាក់ស៊ី មីលគី វេយ៍ គឺជាកាឡាស៊ីតែមួយក្នុងពិភពចក្រវាឡ ។2 ពួកគេសន្មត់ថាអ្វីផ្សេងក្រៅកាឡាក់ស៊ីយើងនេះ គឺជាធាតុឥតរូបរាងច្រើនសន្ធឹក ជាលំហគ្មានទីបញ្ចប់—ទទេស្អាត ត្រជាក់ គ្មានតារា ពន្លឺ និងជីវិតឡើយ ។
ពេលកែវយឺតកាន់តែវិវឌ្ឍន៍ទៅ—រួមទាំងកែវយឺតដែលអាចមើលទៅក្នុងលំហបាន—នោះតារាវិទូចាប់ផ្ដើមដឹងពីសេចក្ដីពិតដ៏អស្ចារ្យ ស្ទើរតែមិនអាចយល់បានថា ៖ ពិភពចក្រវាឡនេះគឺមហាសាលជាងអ្វីដែលមនុស្សសន្មត់ទៅទៀត ហើយស្ថានសួគ៌ពេញទៅដោយកាឡាក់ស៊ីច្រើនឥតគណនា មិនអាចគិតស្មានដល់ថានៅសែនឆ្ងាយពីយើង កាឡាក់ស៊ីនីមួយៗមានតារារាប់រយកោដិ ។3
ក្នុងរយៈពេលដ៏ខ្លី ការយល់ដឹងរបស់យើងពីចក្រវាឡបានផ្លាស់ប្ដូរជារៀងរហូត ។
សព្វថ្ងៃ យើងអាចមើលឃើញកាឡាក់ស៊ីឆ្ងាយៗទាំងនេះខ្លះ ។4
យើងដឹងថាពួកវាស្ថិតនៅទីនោះ ។
ពួកវាស្ថិតនៅទីនោះយូរយារណាស់មកហើយ ។
ប៉ុន្តែមុនពេលមនុស្សរកឃើញឧបករណ៍ទំនើបដើម្បីមើលឃើញពន្លឺនភាល័យ និងកាឡាក់ស៊ីទាំងនេះ យើងមិនជឿថារឿងដូចនេះអាចទៅរួចនោះទេ ។
ភាពមហាសាលនៃចក្រវាឡពុំផ្លាស់ប្ដូរឡើយ គឺសមត្ថភាពយើងដើម្បីមើលឃើញ ហើយយល់ដឹងពីសេចក្ដីពិតទៅវិញទេដែលផ្លាស់ប្ដូរជានិច្ចនោះ ។ ដោយនូវចំណេះដឹងនោះហើយ ទើបមនុស្សត្រូវបាននាំឲ្យស្គាល់ទិដ្ឋភាពដ៏រុងរឿង ដែលយើងគិតស្មានមិនដល់ ។
វាពិបាកដើម្បីជឿលើអ្វីដែលយើងមិនអាចមើលឃើញ ។
ឧបមាថាបងប្អូនអាចបង្វិលពេលវេលាថយក្រោយ ហើយសន្ទនាជាមួយមនុស្សដែលបានរស់កាលពីមួយពាន់ ឬរាប់រយឆ្នាំមុន ។ ស្រមៃថាបងប្អូនព្យាយាមប្រាប់ពួកគាត់ពីបច្ចេកវិទ្យាទំនើបមួយចំនួនដែលបងប្អូន និងខ្ញុំគិតថាជារឿងធម្មតាសព្វថ្ងៃនេះ ។ ឧទាហរណ៍ តើពួកគាត់អាចគិតដូចម្ដេចបើយើងប្រាប់ពីរឿងយន្តហោះ ចាំបូ ជែតស៍ ម៉ាស៊ីនកំដៅម្ហូប ឧបករណ៍កាន់នឹងដៃដែលមានបណ្ណាល័យឌីជីថលដ៏ធំ និងវីដេអូដែលចៅៗយើងចែកចាយជាមួយមនុស្សរាប់លាននាក់ទូទាំងពិភពលោកនោះ ?
អ្នកខ្លះអាចជឿយើង ។ មនុស្សភាគច្រើនអាចចំអក ទំទាស់ ឬទំនងជាព្យាយាមបញ្ឈប់ ឬធ្វើទុក្ខទោសដល់យើងផង ។ អ្នកខ្លះអាចលើកឡើងពីភាពសមហេតុផល សេចក្ដីសំអាង និងដំណើរដើមទងដោយដឹងថាវានឹងបង្ហាញថាយើងគឺជាអ្នកមានគំនិតខុសឆ្គង លីលា ឬគ្រោះថ្នាក់ទៀតផង ។ ពួកគេអាចផ្ដន្ទាទោសយើងកុំឲ្យនាំអ្នកដទៃទៀតឲ្យវង្វេង ។
ប៉ុន្តែប្រាកដណាស់ មនុស្សទាំងនេះពិតជាយល់ខុសហើយ ។ ពួកគេអាចមានចិត្តចង់ជួយ ហើយស្មោះត្រង់ ។ ពួកគេអាចគិតការយល់ឃើញគេគឺត្រឹមត្រូវ ។ តែគេពុំអាចមើលឃើញយ៉ាងជាក់ច្បាស់ទេ ព្រោះគេពុំទាន់ទទួលបានពន្លឺកាន់តែពេញលេញនៃសេចក្ដីពិត នៅឡើយ ។
ការសន្យានៃពន្លឺ
វាហាក់ដូចជានិស្ស័យមួយនៃមនុស្សដើម្បីសន្មត់ថាយើងធ្វើត្រូវទោះជាពេលយើងធ្វើខុសក៏ដោយ ។ ហើយបើនោះជាការពិត តើសេចក្ដីសង្ឃឹមបែបណាទៅដែលមានសម្រាប់យើង ? តើយើងកំណត់ជោគវាសនាខ្លួនឲ្យរអិលធ្លាក់ចូលទៅក្នុងសមុទ្រនៃគំនិតឈ្លោះប្រកែករស់ដោយពុំដឹងការពិត ហើយគ្រាន់តែប្រមូលគំនិតនេះបន្តិច គំនិតនោះបន្តិចដាក់ចូលគ្នា តាមអ្វីដែលអ្នកឃើញប្រចាំថ្ងៃឬ ?
តើវាទៅរួចទេដើម្បីរកឲ្យឃើញសេចក្ដីពិត?
គោលបំណងនៃសុន្ទរកថាខ្ញុំគឺដើម្បីប្រកាសពីសារលិខិតដ៏មានអំណរថាព្រះទ្រង់ផ្ទាល់—ជាព្រះអម្ចាស់នៃពួកពលបរិវារ ដែលជ្រាបពីសេចក្ដីពិតគ្រប់យ៉ាង—បានប្រទានដល់បុត្រាបុត្រីទ្រង់នូវការសន្យាដែលគេអាចស្គាល់សេចក្ដីពិតដោយខ្លួនឯងបាន ។
សូមពិចារណាពីសារៈសំខាន់នៃការសន្យានេះថា ៖
ព្រះដ៏អស់កល្ប និងមានគ្រប់ព្រះចេស្ដា ជាអង្គបង្កបង្កើតនៃពិភពចក្រក្រវាឡដ៏មហាសាលនេះ នឹងមានបន្ទូលទៅកាន់អ្នកដែលទៅរកទ្រង់ដោយមានចិត្តស្មោះសរ និងស្មោះអស់ពីចិត្ត ។
ទ្រង់នឹងមានបន្ទូលទៅកាន់គេក្នុងសុបិន ទស្សនៈនិមិត្ត គំនិត និងអារម្មណ៍ ។
ទ្រង់នឹងមានបន្ទូលទៅកាន់គេតាមរបៀបឥតខ្ចោះ ហើយដែលពង្រីកដល់បទពិសោធន៍មនុស្សលោក ។ ទ្រង់នឹងប្រទានដល់គេនូវការណែនាំ និងចម្លើយដ៏ទេវភាពសម្រាប់ជីវិតផ្ទាល់ខ្លួនគេ ។
ពិតណាស់ នឹងមានអ្នកដែលចំអក ហើយពោលថារឿងដូចនេះពុំអាចទៅរួចឡើយ បើមានព្រះមែន ទ្រង់នឹងមានរឿងប្រសើរជាងនេះដើម្បីធ្វើជាងការព្រះសណ្ដាប់ ហើយឆ្លើយតបរាល់ការអធិស្ឋានរបស់មនុស្ស ។
តែខ្ញុំសូមប្រាប់បងប្អូនថា ៖ ព្រះពិតជាខ្វាយខ្វល់ពីបងប្អូន ។ ទ្រង់នឹងព្រះសណ្ដាប់ ហើយឆ្លើយតបរាល់សំណួរបងប្អូន ។ ចម្លើយចំពោះការអធិស្ឋាននឹងប្រទានឲ្យស្របតាមវេលារបស់ទ្រង់ និងតាមផ្លូវរបស់ទ្រង់ ដូច្នេះបងប្អូនត្រូវរៀនស្ដាប់ព្រះសូរសៀងទ្រង់ ។ ព្រះមានព្រះទ័យឲ្យបងប្អូនស្វែងរកមាគ៌ាត្រឡប់ទៅរកទ្រង់វិញ ហើយព្រះអង្គសង្គ្រោះគឺជាមាគ៌ានោះឯង ។5 ព្រះមានព្រះទ័យឲ្យបងប្អូនរៀនពីបុត្រាទ្រង់ គឺព្រះយេស៊ូវគ្រីស្ទ ហើយដកពិសោធន៍នៃភាពសុខសាន្ត និងសេចក្ដីអំណរដ៏ជ្រាលជ្រៅដែលបានមកពីការដើរតាមមាគ៌ានៃភាពជាសិស្សរបស់ព្រះ ។
មិត្តជាទីស្រឡាញ់ខ្ញុំអើយ នេះជាការដកពិសោធន៍ងាយយល់ដ៏ស្មើភាពមួយដោយមានការអះអាងពីព្រះ ដែលចែងក្នុងព្រះគម្ពីរពីបុរាណមានសម្រាប់គ្រប់បុរស ស្ត្រី និងកុមារដែលចង់សាកល្បងវា ។
ទីមួយ បងប្អូនត្រូវស្វែងយល់ពីព្រះបន្ទូលព្រះ ។ នោះមានន័យថាត្រូវអានព្រះគម្ពីរ ហើយសិក្សាប្រសាសន៍ពួកព្យាការីបុរាណ និងសម័យទំនើបអំពីដំណឹងល្អនៃព្រះយេស៊ូវគ្រីស្ទដែលបានស្ដារឡើងវិញ—ពុំមែនដោយចេតនាសង្ស័យ ឬទិតៀនឡើយ តែដោយបំណងស្មោះក្នុងស្វែងរកសេចក្ដីពិត ។ សូមគិតពីអ្វីដែលមានក្នុងអារម្មណ៍ ហើយត្រៀមខ្លួនទទួលយកសេចក្ដីពិត ។6 «បើសិនជាអ្នករាល់គ្នាពុំអាចធ្វើអ្វីក៏ដោយក្រៅពីការចង់ជឿ នោះសូមឲ្យចំណង់នេះមាននៅក្នុងខ្លួនអ្នក… ដល់អ្នកអាចទុកកន្លែងមួយសម្រាប់ [ព្រះបន្ទូលព្រះ] មួយភាគចុះ» ។7
ទីពីរ បងប្អូនត្រូវពិចារណា រិះគិត ខិតខំជឿដោយពុំមានការភិតភ័យ8 ហើយមានអំណរគុណពីសេចក្ដីមេត្តាដែលព្រះអម្ចាស់មានសម្រាប់បុត្រាបុត្រីទ្រង់ពីជំនាន់អ័ដាមដល់សព្វថ្ងៃ ដោយប្រទានពួកព្យាការី អ្នកមើលឆុត និងអ្នកទទួលវិវរណៈ ដើម្បីដឹកនាំសាសនាចក្រទ្រង់ ហើយជួយយើងឲ្យស្វែងរកមាគ៌ាត្រឡប់ទៅរកទ្រង់វិញ ។
ទីបី បងប្អូនត្រូវទូលសូមព្រះវរបិតាសួគ៌ ដោយនូវព្រះនាមបុត្រាទ្រង់ គឺព្រះយេស៊ូវគ្រីស្ទ ឲ្យទ្រង់សម្ដែងសេចក្ដីពិតពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយដល់បងប្អូន ។ សូមសួរដោយមានចិត្តស្មោះសរ និងស្មោះអស់ពីចិត្ត ដោយមានសេចក្ដីជំនឿលើព្រះគ្រីស្ទ ។9
ក៏មានជំហានទីបួន ដែលប្រទានដល់យើងដោយព្រះអង្គសង្គ្រោះដែរគឺ ៖ «បើអ្នកណាចង់ធ្វើតាម [ព្រះហឫទ័យ] ទ្រង់ នោះនឹងបានដឹងជាសេចក្ដីបង្រៀននេះមកពីព្រះ ឬជាខ្ញុំនិយាយដោយអាងខ្លួនខ្ញុំ» ។10 អាចនិយាយបានថា ពេលបងប្អូនព្យាយាមបង្ហាញជំនឿលើសេចក្ដីពិតនៃគោលការណ៍ដំណឹងល្អ បងប្អូនត្រូវរស់តាមវាជាមុនសិន ។ សូមដាក់គោលលទ្ធិនៃដំណឹងល្អ និងការបង្រៀនទាំងឡាយក្នុងសាសនាចក្រជាការសាកល្បងក្នុងជីវិតបងប្អូន ។ សូមធ្វើវាដោយស្មោះអស់ពីចិត្ត ហើយកាន់ខ្ជាប់សេចក្ដីជំនឿលើព្រះ ។
បើបងប្អូនប្រព្រឹត្តតាមការណ៍ទាំងនេះ បងប្អូននឹងបានការសន្យាពីព្រះ—ជាអង្គដែលរក្សាសន្យា11—ថាទ្រង់នឹងសម្ដែងសេចក្ដីពិតដល់បងប្អូនដោយព្រះចេស្ដានៃព្រះវិញ្ញាណបរិសុទ្ធ ។ ទ្រង់នឹងប្រទានដល់បងប្អូននូវពន្លឺបំភ្លឺផ្លូវឲ្យបងប្អូនដើរឆ្លងកាត់ភាពងងឹត ហើយឃើញនូវទិដ្ឋភាពរុងរឿងដោយគិតស្មានមិនដល់ដែលចក្ខុវិស័យនៃជីវិតរមែងស្លាប់មិនអាចយល់បាន ។
អ្នកខ្លះអាចពោលថាជំហានទាំងនោះពិបាកពេក ឬថាវាគ្មានតម្លៃក្នុងការប្រឹងប្រែងនោះទេ ។ តែខ្ញុំសូមណែនាំថាទីបន្ទាល់ផ្ទាល់ខ្លួនពីដំណឹងល្អ និងសាសនាចក្រនេះ គឺជារឿងដ៏ចាំបាច់បំផុតដែលបងប្អូនអាចមានក្នុងជីវិតនេះ ។ វាពុំគ្រាន់តែប្រទានពរ ហើយដឹកនាំបងប្អូនក្នុងជីវិតនេះប៉ុណ្ណោះទេ ប៉ុន្តែវានឹងមានឥទ្ធិពលដោយផ្ទាល់ទៅលើជីវិតបងប្អូនរហូតដល់ភាពអស់កល្បផងដែរ ។
កិច្ចការនៃព្រះវិញ្ញាណអាចយល់បានតែតាមរយៈព្រះវិញ្ញាណប៉ុណ្ណោះ
ពួកអ្នកវិទ្យាសាស្ត្រមិនបានយល់ពីទំហំនៃចក្រវាឡឡើយ រហូតដល់ឧបករណ៍នានាកាន់តែវិវឌ្ឍន៍ល្មមគ្រប់គ្រាន់ដើម្បីទទួលបានចំណេះកាន់តែច្រើន ទើបពួកគេអាចយល់សេចក្ដីពិតពេញលេញកាន់តែប្រសើរ ។
សាវក ប៉ុល បានបង្រៀនគោលការណ៍ស្រដៀងគ្នាមួយស្ដីពីចំណេះដឹងខាងវិញ្ញាណ ។ លោកបានសរសរទៅកាន់ពួកកូរិនថូសថា «មនុស្សខាងសាច់ឈាមគេមិនទទួលសេចក្ដីខាងឯព្រះវិញ្ញាណនៃព្រះទេ ពីព្រោះជាសេចក្ដីល្ងង់ល្ងើដល់គេ ៖ ក៏រកស្គាល់មិនបានដែរ ដ្បិតត្រង់ឯសេចក្ដីទាំងនោះ ត្រូវពិចារណាយល់ខាងវិញ្ញាណវិញ» ។12
ម្យ៉ាងទៀតបើបងប្អូនចង់ស្គាល់សេចក្ដីពិតខាងវិញ្ញាណ បងប្អូនត្រូវប្រើរបៀបដ៏ត្រឹមត្រូវ ។ បងប្អូនពុំអាចបង្កើនការយល់ពីសេចក្ដីពិតខាងវិញ្ញាណដោយរបៀបដែលពុំអាចរកឃើញភស្ដុតាងបាននោះទេ ។
ព្រះអង្គសង្គ្រោះបានបង្រៀនយើងក្នុងសម័យនេះថា ៖ «អ្វីដែលមកពីព្រះ ជាពន្លឺ ហើយអ្នកណាដែលទទួលពន្លឺ ហើយនៅជាប់ក្នុងព្រះ នោះទទួលពន្លឺថែមទៀត ហើយពន្លឺនោះភ្លឺកាន់តែខ្លាំងឡើងៗរហូតដល់ថ្ងៃបានល្អឥតខ្ចោះ » ។13
បើយើងកាន់តែបង្វែរចិត្ត និងគំនិតយើងទៅរកទ្រង់ នោះពន្លឺនៃសា្ថនសួគ៌នឹងបំភ្លឺដល់ព្រលឹងយើង ។ ហើយរាល់ពេលដែលយើងស្វែងរកពន្លឺដោយពេញចិត្ត និងស្មោះត្រង់ នោះយើងបង្ហាញដល់ព្រះពីភាពរួចរាល់ដើម្បីទទួលបានពន្លឺបន្ថែមទៀត ។ បន្តិចម្ដងៗ រឿងដែលពីមុនហាក់ដូចជាស្រពិចស្រពិល ងងឹតស្លុង ដាច់សង្វែង នឹងប្រែជាភ្លឺចំពោះយើង ។
តាមរបៀបដូចគ្នាដែរ បើយើងដកខ្លួនចេញពីពន្លឺនៃដំណឹងល្អ ពន្លឺផ្ទាល់ខ្លួនយើងនឹងចាប់ផ្ដើមស្រអាប់—ពុំមែនតែមួយថ្ងៃ ឬមួយសប្ដាហ៍នោះទេ គឺបន្តិចម្ដង—រហូតដល់យើងក្រឡេកមើលក្រោយ ហើយពុំអាចយល់ថាហេតុអ្វីបានជាយើងជឿថាដំណឹងល្អពិតនោះឡើយ ។ ចំណេះដឹងពីមុនរបស់យើងអាចមើលទៅដូចជាលីលា ព្រោះវាធ្លាប់ច្បាស់លាស់ម្ដង ហើយបែរជាស្រអាប់ ស្រពិចស្រពិល និងដាច់សង្វែងទៅវិញ ។
នេះជាមូលហេតុដែល ប៉ុល ម៉ឺងម៉ាត់ក្នុងសារលិខិតលោកពីដំណឹងល្អថាជាសេចក្ដីចម្កួតដល់អស់អ្នកដែលកំពុងតែវិនាស «តែជាព្រះចេស្ដានៃព្រះដល់ [ជនដែល] កំពុងបានសង្គ្រោះវិញ» ។14
គ្មានការសាកល្បងខាងការវិនិច្ឆ័យឡើយ
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺជាកន្លែងឲ្យមនុស្សមានទីបន្ទាល់គ្រប់ប្រភេទ ។ មានសមាជិកខ្លះមានទីបន្ទាល់ដែលរឹងមាំ ហើយជះរស្មីត្រចះត្រចង់យ៉ាងខ្លាំង ។ សមាជិកខ្លះទៀតនៅតែព្យាយាមស្គាល់ដោយខ្លួនឯង ។ សាសនាចក្រគឺជាគេហដ្ឋានសម្រាប់មនុស្សទាំងអស់មិនថាទីបន្ទាល់គេរឹងមាំ ឬអត់នោះទេ ។ សាលាប្រជុំយើងពុំមានបិទផ្លាកថា «ទីបន្ទាល់បងប្អូនត្រូវតែរឹងមាំកម្រិតនេះទើបអាចចូលរួមបាន» នោះទេ ។
សាសនាចក្រពុំមែនសម្រាប់តែមនុស្សគ្រប់លក្ខណ៍នោះទេ តែគឺវាសម្រាប់មនុស្សទាំងអស់ « មករកព្រះគ្រីស្ទ ហើយឲ្យបានល្អឥតខ្ចោះក្នុងទ្រង់» ។15 សាសនាចក្រគឺសម្រាប់មនុស្សដូចជាបងប្អូន និងខ្ញុំ ។ សាសនាចក្រជាកន្លែងនៃការស្វាគមន៍ និងចិញ្ចឹមបីបាច់ មិនមែនសម្រាប់បែងចែកបក្ខពួក ឬទិតៀនគ្នានោះទេ ។ វាជាកន្លែងដើម្បីឈោងទៅលើកទឹកចិត្ត លើកតម្កើង ហើយគាំទ្រគ្នាទៅវិញទៅមកទន្ទឹមនឹងពេលយើងស្វែងរកសេចក្ដីពិតដ៏ទេវភាពផ្ទាល់ខ្លួននោះ ។
ទីបំផុតយើងគឺជាអ្នកដំណើរស្វែងរកពន្លឺនៃព្រះពេលយើងធ្វើដំណើរស្ថិតនៅលើមាគ៌ានៃភាពជាសិស្ស ។ យើងពុំដាក់ទោសអ្នកដទៃចំពោះកម្រិតពន្លឺដែលគេអាចមាន ឬគ្មាននោះទេ តែយើងចិញ្ចឹមបីបាច់ ហើយលើកទឹកចិត្តឲ្យមានពន្លឺដរាបវាភ្លឺឡើងច្បាស់ ត្រចះត្រចង់ ហើយពិតប្រាកដ ។
ការសន្យាសម្រាប់មនុស្សគ្រប់រូប
សូមឲ្យយើងទទួលស្គាល់ថាភាគច្រើនការទទួលបានទីបន្ទាល់មួយពុំមែនជាកិច្ចការមួយនាទី មួយម៉ោង ឬមួយថ្ងៃនោះទេ ។ វាពុំមែនកិច្ចការធ្វើម្ដងហើយចប់នោះឡើយ ។ ដំណើរការនៃការស្វែងរកពន្លឺខាងវិញ្ញាណប្រព្រឹត្តទៅពេញមួយជីវិត ។
ទីបន្ទាល់របស់បងប្អូនអំពីបុត្រានៃព្រះដ៏មានព្រះជន្មរស់ និងសាសនាចក្រទ្រង់ដែលបានស្ដារឡើងវិញ ជាសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ពុំអាចកើតមានភ្លាមៗដូចជាបងប្អូនចង់បាននោះទេ តែខ្ញុំសន្យានឹងបងប្អូនថា ៖ បើបងប្អូនធ្វើចំណែករបស់បងប្អូន វានឹងកើតមាន ។
ហើយវានឹងមានភាពរុងរឿងត្រចះត្រចង់ ។
ខ្ញុំសូមធ្វើសាក្សីដល់បងប្អូនថា សេចក្តីពិតខាងវិញ្ញាណនឹងបំពេញដួងចិត្ត ហើយនាំយកពន្លឺទៅកាន់វិញ្ញាណបងប្អូន ។ វានឹងបើកសម្ដែងដល់បងប្អូននូវបញ្ញាដ៏សុទ្ធសាធជាមួយនឹងសេចក្ដីអំណរធំធេង និងសន្តិភាពនៃស្ថានសួគ៌ ។ ខ្ញុំបានដកពិសោធន៍ការណ៍ដោយផ្ទាល់តាមរយៈព្រះចេស្ដានៃព្រះវិញ្ញាណបរិសុទ្ធ ។
ដូចការសន្យាក្នុងព្រះគម្ពីរពីបូរាណ នោះវត្តមានដែលមិនអាចថ្លែងបាននៃព្រះវិញ្ញាណនៃព្រះនឹងបណ្ដាលឲ្យបងប្អូនច្រៀងចម្រៀងនៃសេចក្ដីស្រឡាញ់ដែលប្រោសលោះ16 ធ្វើឲ្យបងប្អូនសម្លឹងទៅស្ថានសួគ៌ ស្រែកសរសើរតម្កើងដល់ព្រះដ៏ខ្ពស់បំផុត ដែលជាទីជម្រក សេចក្ដីសង្ឃឹម អាណាព្យាបាល និងព្រះបិតារបស់បងប្អូន ។ ព្រះអង្គសង្គ្រោះបានសន្យាថាបើបងប្អូនស្វែងរក បងប្អូននឹងរកឃើញ ។17
ខ្ញុំសូមថ្លែងទីបន្ទាល់ថា រឿងនេះជាការពិត ។ បើបងប្អូនស្វែងរកសេចក្ដីពិតនៃព្រះ ដែលពេលនេះអាចស្រអាប់ ពុំមានការចាប់អារម្មណ៍ និងដាច់សង្វែងនឹងបើកសម្ដែង បញ្ជាក់បន្តិចម្ដងៗ ហើយចូលទៅក្នុងដួងចិត្តបងប្អូនដោយពន្លឺព្រះគុណនៃព្រះ ។ ទិដ្ឋភាពខាងវិញ្ញាណដ៏រុងរឿង ដែលពុំអាចមើលឃើញដោយភ្នែកមនុស្ស នឹងត្រូវបើកសម្ដែងដល់បងប្អូន ។
វាជាទីបន្ទាល់ខ្ញុំថា ពន្លឺខាងវិញ្ញាណមានសម្រាប់បុត្រាបុត្រីព្រះគ្រប់រូប ។ វានឹងបំភ្លឺគំនិត ផ្សះរបួសដួងចិត្ត ហើយនាំសេចក្ដីអំណរដល់ជីវិតបងប្អូន ។ មិត្តជាទីស្រឡាញ់ សូមកុំពន្យារពេលព្យាយាម និងពង្រឹងទីបន្ទាល់ផ្ទាល់ខ្លួនពីកិច្ចការដ៏ទេវភាពនៃព្រះឡើយ រួមទាំងកិច្ចការនៃពន្លឺ និងសេចក្ដីពិតផងដែរ ។
ទីបន្ទាល់នៃពន្លឺ និងសេចក្ដីពិតផ្ទាល់ខ្លួនរបស់បងប្អូននឹងពុំគ្រាន់តែប្រទានពរដល់បងប្អូន និងពូជពង្សបងប្អូននោះទេ ប៉ុន្តែវាក៏នឹងនៅជាមួយបងប្អូនរហូតដល់អស់កល្បក្នុងពិភពទាំងឡាយដ៏គ្មានទីបញ្ចប់ផងដែរ ។ ខ្ញុំសូមអធិស្ឋានពីការណ៍នេះ ហើយបន្សល់ទុកពរជ័យខ្ញុំនឹងបងប្អូនក្នុងព្រះនាមនៃព្រះយេស៊ូវគ្រីស្ទ អាម៉ែន។