លុះត្រាយើងជួបទៀត

ដោយប្រធាន ថូម៉ាស អេស ម៉នសុន

សូមយើងពិចារណាពីសេចក្ដីពិតដែលយើងបានឮ ហើយសូមឲ្យសេចក្ដីទាំងនោះជួយយើងឲ្យក្លាយជាសិស្សកាន់តែអង់អាចជាងមុន ។

បងប្អូនប្រុសស្រី យើងបានមានបទពិសោធន៍ពីរថ្ងៃដ៏រុងរឿងនៃសារលិខិតដ៏បំផុសគំនិត ។ ដួងចិត្តរបស់យើងបានរំជួល ហើយសេចក្ដីជំនឿរបស់យើងបានពង្រឹង ពេលយើងទទួលយកព្រះវិញ្ញាណដែលមានវត្តមានអំឡុងពេលសម័យប្រជុំសន្និសីទទាំងនេះ ។ ចុងបញ្ចប់នេះ យើងសូមថ្លែងអំណរព្រះគុណចំពោះព្រះវរបិតាសួគ៌សម្រាប់ពរជ័យជាច្រើនដែលមានសម្រាប់យើង ។

យើងត្រូវបានស្អាងឡើង ហើយបំផុសគំនិតដោយតន្ត្រីដ៏ពិរោះដែលបានប្រគុំឡើងអំឡុងសម័យប្រជុំទាំងនេះ ។ ការអធិស្ថានដែលបានផ្ដល់ឲ្យបាននាំយើងឲ្យខិតទៅជិតស្ថានសួគ៌ ។

ខ្ញុំសូមថ្លែងអំណរគុណដ៏ស្មោះជំនួសសាសនាចក្រទាំងមូលចំពោះបងប្អូនប្រុសទាំងឡាយដែលបានដោះលែងក្នុងសន្និសីទនេះ ។ យើងនឹងនឹកពួកលោក ។ ការរួមចំណែករបស់ពួកលោកក្នុងកិច្ចការនៃព្រះអម្ចាស់គឺក្រាស់ក្រែល ហើយកូនចៅជំនាន់ក្រោយនឹងមានអំណរគុណ ។

សូមឲ្យយើងត្រឡប់ទៅផ្ទះវិញដោយនាំទៅជាមួយនូវដំណោះស្រាយក្នុងដួងចិត្តដើម្បីមានភាពប្រសើរជាងមុន ។ សូមឲ្យយើងមានសណ្ដានចិត្តល្អ និងចេះគិតគូឲ្យបានដិតដល់ ។ សូមឲ្យយើងជួយទុក្ខធុរៈមិនត្រឹមតែសមាជិកទេ តែដល់ជនទាំងអស់ណាដែលមិនមែនជាសមាជិកផងដែរ ។ ពេលយើងទាក់ទងជាមួយពួកគេ សូមឲ្យយើងផ្ដល់សេចក្ដីគោរពចំពោះពួកគេ ។

មានអ្នកដែលពុះពារជាមួយឧបសគ្គជារៀងរាល់ថ្ងៃ ។ សូមឲ្យយើងបន្តខ្វល់ខ្វាយចំពោះពួកគេ ក៏ដូចជាជួយដល់ពួកគេដែរ ។ ពេលដែលយើងយកចិត្តទុកដាក់ចំពោះគ្នាទៅវិញទៅមក យើងនឹងទទួលបានពរជ័យ ។

សូមយើងចងចាំដល់មនុស្សចាស់ និងអ្នកទាំងឡាយណាដែលមិនអាចចេញពីផ្ទះបាន ។ ពេលយើងចំណាយពេលទៅសួរសុខទុក្ខពួកគាត់ ពួកគាត់នឹងដឹងថាយើងស្រឡាញ់ និងឲ្យតម្លៃពួកគាត់ ។ សូមឲ្យយើងធ្វើតាមបទបញ្ញត្តិដើម្បី «ជួយអ្នកទន់ខ្សោយ លើកដៃដែលរោយ ហើយចំរើនកម្លាំងដល់ក្បាលជង្គង់ដែលញ័រផង» ។¹

សូមឲ្យយើងធ្វើជាមនុស្សស្មោះត្រង់ ហើយសុចរិត ព្យាយាមធ្វើអ្វីដែលត្រូវគ្រប់ពេលវេលា និងគ្រប់កាលៈទេសៈ ។ សូមឲ្យយើងធ្វើជាអ្នកដើរតាមព្រះគ្រីស្ទដោយសេចក្ដីជំនឿ ជាគំរូនៃសេចក្ដីសុចរិត នោះនឹងកា្លយជា «ពន្លឺនៅក្នុងលោក» ។²

បងប្អូនប្រុសស្រីរបស់ខ្ញុំអើយ ខ្ញុំសូមអរគុណសម្រាប់ការអធិស្ថានជំនួសឲ្យខ្ញុំ ។ ការអធិស្ថានរបស់បងប្អូនបានពង្រឹង និងស្អាងខ្ញុំឡើង ពេលដែលខ្ញុំព្យាយាមដោយអស់ពីដួងចិត្ត និងកម្លាំងដើម្បីធ្វើតាមព្រះហឫទ័យព្រះអម្ចាស់ ហើយដើម្បីបម្រើបងប្អូនទាំងអស់គ្នា ។

ពេលយើងចាកចេញពីសន្និសីទនេះទៅ ខ្ញុំសូមអំពាវនាវឲ្យពរជ័យនៃស្ថានសួគ៌បានស្រោចស្រពមកលើបងប្អូនទាំងអស់គ្នា ។ សូមឲ្យអ្នកដែលនៅឆ្ងាយពីផ្ទះ ត្រឡប់ទៅវិញដោយសុវត្ថិភាព ហើយឃើញអ្វីគ្រប់យ៉ាងដំណើការទៅយ៉ាងរលូន ។ សូមឲ្យយើងពិចារណាពីសេចក្ដីពិតដែលយើងបានឮ ហើយសូមឲ្យសេចក្ដីទាំងនោះជួយយើងឲ្យក្លាយជាសិស្សកាន់តែអង់អាចជាងមុនពេលដែលសន្និសីទនេះចាប់ផ្ដើម ។

លុះត្រាយើងជួបទៀតក្នុងរយៈពេលប្រាំមួយខែក្រោយ ខ្ញុំសូមដល់ពរជ័យនៃព្រះអម្ចាស់បានស្រោចមកលើបងប្អូន និងដល់យើងទាំងអស់គ្នាជាប្រាកដ ហើយខ្ញុំសូមធ្វើកិច្ចការទាំងអស់នេះក្នុងព្រះនាមដ៏បរិសុទ្ធនៃទ្រង់—គឺព្រះយេស៊ូវគ្រីស្ទ ជាព្រះអម្ចាស់ និងព្រះអង្គសង្គ្រោះរបស់យើង អាម៉ែន ។