ຄຳປາໄສທີ່ເປັນການແນະນຳ

ໂດຍ ປະທານຣະໂຊ ເອັມ ແນວສັນ

ພວກເຮົາຈະໄດ້ປະກາດເຖິງການດັດແປງທີ່ສຳຄັນ ໃນກຸ່ມຖານະປະໂລຫິດແຫ່ງເມນຄີເສເດັກ ເພື່ອເຮັດວຽກງານຂອງພຣະຜູ້ເປັນເຈົ້າ ໃຫ້ມີປະສິດທິພາບຫລາຍຂຶ້ນ.

ຂອບໃຈຫລາຍໆ, ບຣາເດີ ໂຮມສ໌, ສຳລັບຂ່າວສານທີ່ສຳຄັນຂອງທ່ານ.

ອ້າຍນ້ອງທັງຫລາຍ, ພວກເຮົາຄິດຮອດປະທານທອມມັສ ແອັສ ມອນສັນ ແລະ ແອວເດີ ຣໍເບີດ ດີ ແຮວສ໌ ຫລາຍ. ແຕ່ພວກເຮົາ“ທຸກຄົນກໍຕ້ອງດຳເນີນໄປໜ້າ ເຮັດວຽກງານຂອງພຣະຜູ້ເປັນເຈົ້າ.”¹

ຂ້າພະເຈົ້າມີຄວາມກະຕັນຍູຫລາຍ ສຳລັບຜູ້ຊາຍແຕ່ລະຄົນ ຜູ້ດຳລົງຖານະປະໂລຫິດທີ່ສັກສິດ. ທ່ານເປັນຄວາມຫວັງຂອງພຣະຜູ້ໄຖ່ຂອງເຮົາ, ທີ່ປະສົງໃຫ້ທຸກໆຄົນ ກ່າວໃນພຣະນາມຂອງພຣະເຈົ້າ ອົງເປັນພຣະຜູ້ເປັນເຈົ້າ, ແມ່ນແຕ່ພຣະຜູ້ຊ່ວຍໃຫ້ລອດຂອງໂລກ.² ພຣະອົງປະສົງໃຫ້ບຸດ ທຸກຄົນ ທີ່ໄດ້ຮັບການແຕ່ງຕັ້ງ ເປັນຕົວແທນຂອງພຣະອົງ, ເພື່ອກ່າວແທນພຣະອົງ, ເພື່ອກະທຳແທນພຣະອົງ, ແລະ ເພື່ອເປັນພອນໃຫ້ແກ່ຊີວິດຂອງລູກໆຂອງພຣະເຈົ້າ ຕະຫລອດທົ່ວໂລກ ຈົນເຖິງທີ່ສຸດ ເພື່ອສັດທາຈະໄດ້ເພີ່ມທະວີຂຶ້ນ ຕະຫລອດທົ່ວແຜ່ນດິນໂລກ.³

ພວກທ່ານບາງຄົນ ໄດ້ຮັບໃຊ້ຢູ່ໃນບ່ອນທີ່ໜ່ວຍຂອງສາດສະໜາຈັກ ໄດ້ຖືກຈັດຕັ້ງຂຶ້ນ ມາຫລາຍຊົ່ວລຸ້ນຄົນແລ້ວ. ບາງຄົນໄດ້ຮັບໃຊ້ຢູ່ໃນບ່ອນທີ່ໜ່ວຍຂອງສາດສະໜາຈັກ ຫາກໍໄດ້ຖືກຈັດຕັ້ງຂຶ້ນ. ສຳລັບບາງຄົນ, ຫວອດຂອງທ່ານແມ່ນໃຫຍ່ໂຕ. ສ່ວນອີກບາງຄົນ, ສາຂາຂອງທ່ານອາດນ້ອຍໆ ແລະ ຕັ້ງຢູ່ໄກ. ບໍ່ວ່າສະພາບການຂອງທ່ານຈະເປັນແບບໃດກໍຕາມ, ທ່ານແຕ່ລະຄົນ ກໍເປັນສະມາຊິກຢູ່ໃນກຸ່ມຖານະປະໂລຫິດ ຊຶ່ງມີພຣະບັນຊາຈາກສະຫວັນ ໃຫ້ຮຽນຮູ້ ແລະ ສິດສອນ, ໃຫ້ຮັກ ແລະ ຮັບໃຊ້ຄົນອື່ນ.

ຄ່ຳຄືນນີ້, ພວກເຮົາຈະໄດ້ປະກາດເຖິງການດັດແປງທີ່ສຳຄັນ ໃນກຸ່ມຖານະປະໂລຫິດແຫ່ງເມນຄີເສເດັກ ເພື່ອເຮັດວຽກງານຂອງພຣະຜູ້ເປັນເຈົ້າ ໃຫ້ມີປະສິດທິພາບຫລາຍຂຶ້ນ. ນັບຈາກນີ້ໄປ, ໃນແຕ່ລະຫວອດ, ມະຫາປະໂລຫິດ ແລະ ແອວເດີ ຈະລວມເຂົ້າກັນ ເປັນກຸ່ມແອວເດີກຸ່ມດຽວ. ການດັດແປງດັ່ງກ່າວ ຈະສົ່ງເສີມຄວາມສາມາດຢ່າງຫລວງຫລາຍ ຂອງຜູ້ຊາຍທີ່ດຳລົງຖານະປະໂລຫິດ ທີ່ຈະຮັບໃຊ້ຄົນອື່ນ. ຜູ້ທີ່ສາມາດກາຍເປັນແອວເດີໄດ້ ຈະຖືກຕ້ອນຮັບໂດຍກຸ່ມນີ້. ໃນແຕ່ລະສະເຕກ, ຝ່າຍປະທານສະເຕກ ຈະສືບຕໍ່ຄວບຄຸມກຸ່ມມະຫາປະໂລຫິດລະດັບສະເຕກ. ແຕ່ສ່ວນປະກອບຂອງກຸ່ມນີ້ ຈະອີງຕາມການເອີ້ນຂອງຖານະປະໂລຫິດ ໃນ ປະຈຸບັນ, ຊຶ່ງຈະອະທິບາຍຕໍ່ທ່ານໃນພາຍໜ້າ.

ບັດນີ້ ແອວເດີ ດີ ທອດ ຄຣິສໂຕເຟີສັນ ແລະ ແອວເດີ ຣອນໂນ ເອ ແຣັສ໌ແບນ ແຫ່ງກຸ່ມອັກຄະສາວົກສິບສອງ ຈະສິດສອນເຮົາເພີ່ມເຕີມ ກ່ຽວກັບການດັດແປງທີ່ສຳຄັນເຫລົ່ານີ້.

ການດັດແປງດັ່ງກ່າວ ໄດ້ຖືກພິຈາລະນາ ມາໄດ້ຫລາຍເດືອນແລ້ວ. ພວກເຮົາຮູ້ສຶກວ່າ ມັນຈຳເປັນທີ່ຈະພັດທະນາ ໃນວິທີທີ່ເຮົາເປັນຫ່ວງເປັນໃຍຕໍ່ສະມາຊິກຂອງເຮົາ ແລະ ລາຍງານການຕິດຕໍ່ຂອງເຮົານຳເຂົາເຈົ້າ. ໃນການເຮັດສິ່ງນີ້ໃຫ້ດີກວ່າເກົ່າ, ເຮົາຕ້ອງເພີ່ມຄວາມເຂັ້ມແຂງໃຫ້ແກ່ກຸ່ມຖານະປະໂລຫິດຂອງເຮົາ, ຕ້ອງໃຫ້ການຊີ້ນຳທີ່ດີກວ່າ ໃນການປະຕິບັດສາດສະໜາກິດ ດ້ວຍຄວາມຮັກ ແລະ ດ້ວຍການຊຸກຍູ້ ທີ່ພຣະຜູ້ເປັນເຈົ້າປະສົງສຳລັບໄພ່ພົນຂອງພຣະອົງ.

ການດັດແປງເຫລົ່ານີ້ ໄດ້ຮັບການດົນໃຈຈາກພຣະຜູ້ເປັນເຈົ້າ. ເມື່ອເຮົາປະຕິບັດຕາມ, ເຮົາຈະມີປະສິດທິພາບຫລາຍກວ່າທີ່ຜ່ານມາ.

ເຮົາມີສ່ວນຮ່ວມໃນວຽກງານຂອງພຣະເຈົ້າອົງຊົງລິດອຳນາດຍິ່ງໃຫຍ່. ພຣະເຢຊູຄື ພຣະຄຣິດ! ເຮົາແມ່ນຜູ້ຮັບໃຊ້ທີ່ຖ່ອມຕົວຂອງພຣະອົງ! ຂໍໃຫ້ພຣະເຈົ້າຈົ່ງອວຍພອນທ່ານ, ອ້າຍນ້ອງທັງຫລາຍ, ເມື່ອເຮົາຮຽນຮູ້ທີ່ຈະເຮັດໜ້າທີ່ຂອງເຮົາ, ຂ້າພະເຈົ້າອະທິຖານໃນພຣະນາມຂອງພຣະເຢຊູຄຣິດ, ອາແມນ.