ສິ່ງທີ່ຜູ້ດຳລົງຖານະປະໂລຫິດແຫ່ງອາໂຣນທຸກຄົນ ຄວນເຂົ້າໃຈ

ໂດຍ ດັກລັສ ດີ ໂຮມສ໌

ທີ່ປຶກສາທີໜຶ່ງໃນຝ່າຍອົງການຊາຍໜຸ່ມສາມັນ

ການແຕ່ງຕັ້ງສູ່ຖານະປະໂລຫິດແຫ່ງອາໂຣນຂອງພວກເຈົ້າ ເປັນສິ່ງສຳຄັນໃນການຊ່ວຍລູກໆຂອງພຣະເຈົ້າ ໃຫ້ໄດ້ຮັບພະລັງແຫ່ງການຊົດໃຊ້ຂອງພຣະຄຣິດ.

ອ້າຍນ້ອງທັງຫລາຍ, ມັນແມ່ນສິດທິພິເສດຂອງຂ້າພະເຈົ້າ ທີ່ໄດ້ມາຢູ່ກັບທ່ານ ໃນກອງປະຊຸມແຫ່ງປະຫວັດສາດນີ້. ຕອນຂ້າພະເຈົ້າໄດ້ເປັນປະທານເຜີຍແຜ່ໃໝ່ໆ, ຂ້າພະເຈົ້າມີຄວາມຕື່ນເຕັ້ນຫລາຍ ທີ່ໄດ້ຮັບກຸ່ມຜູ້ສອນສາດສະໜາ ກຸ່ມທຳອິດ. ຜູ້ສອນສາດສະໜາສອງສາມຄົນ ທີ່ມີປະສົບການ ກຳລັງຕຽມຕົວທີ່ຈະເຂົ້າຮ່ວມການປະຊຸມກັບເຂົາເຈົ້າບຶດໜຶ່ງ. ຂ້າພະເຈົ້າໄດ້ສັງເກດເຫັນວ່າ ເຂົາເຈົ້າໄດ້ຈັດຕັ່ງເດັກນ້ອຍລຽນກັນເປັນເຄິ່ງວົງລ້ອມ.

“ຊິໃຊ້ຕັ່ງເດັກນ້ອຍເຫລົ່ານັ້ນເຮັດຫຍັງນໍ?” ຂ້າພະເຈົ້າໄດ້ຖາມ.

ຜູ້ສອນສາດສະໜາໄດ້ຕອບແບບອາຍໆວ່າ, “ສຳລັບຜູ້ສອນສາດສະໜາຄົນໃໝ່.”

ຂ້າພະເຈົ້າເຊື່ອວ່າ ສິ່ງທີ່ເຮົາຄິດກ່ຽວກັບຄົນອື່ນ ມີຜົນສະທ້ອນອັນໃຫຍ່ຫລວງຕໍ່ຄວາມເຂົ້າໃຈຂອງຄົນ ທີ່ຄິດວ່າເຂົາເປັນໃຜ ແລະ ເຂົາສາມາດກາຍເປັນຄົນແບບໃດ.¹ ຜູ້ສອນສາດສະໜາຄົນໃໝ່ຂອງພວກເຮົາ ໄດ້ນັ່ງຢູ່ຕັ່ງຜູ້ໃຫຍ່ ໃນມື້ນັ້ນ.

ບາງເທື່ອ, ຂ້າພະເຈົ້າຢ້ານວ່າ ເຮົາໃຫ້ກຸ່ມຊາຍໜຸ່ມຖານະປະໂລຫິດແຫ່ງອາໂຣນ ນັ່ງຢູ່ຕັ່ງເດັກນ້ອຍ ແທນທີ່ຈະຊ່ວຍເຂົາເຈົ້າໃຫ້ເຫັນວ່າ ພຣະເຈົ້າໄດ້ມອບຄວາມໄວ້ວາງໃຈ ທີ່ສັກສິດໃຫ້ເຂົາເຈົ້າ ແລະ ມີວຽກງານທີ່ສຳຄັນໃຫ້ເຂົາເຈົ້າເຮັດ.

ປະທານທອມມັສ ແອັສ ມອນສັນ ໄດ້ແນະນຳເຮົາວ່າ ກຸ່ມຊາຍໜຸ່ມຕ້ອງເຂົ້າໃຈວ່າ “ການເປັນຜູ້ດຳລົງ … ຖານະປະໂລຫິດຂອງພຣະເຈົ້າ ໝາຍຄວາມວ່າແນວໃດ. ເຂົາເຈົ້າຕ້ອງໄດ້ຮັບການນຳພາທາງວິນຍານ ໃຫ້ຮູ້ຈັກເຖິງຄວາມສັກສິດ ຂອງການເອີ້ນທີ່ເຂົາເຈົ້າໄດ້ຮັບ.”²

ມື້ນີ້ ຂ້າພະເຈົ້າອະທິຖານວ່າ ພຣະວິນຍານບໍລິສຸດ ຈະນຳພາເຮົາ ໃຫ້ໄດ້ຮັບຄວາມເຂົ້າໃຈຫລາຍຂຶ້ນ ເຖິງອຳນາດ ແລະ ຄວາມສັກສິດ ຂອງຖານະປະໂລຫິດແຫ່ງອາໂຣນ ແລະ ດົນໃຈເຮົາໃຫ້ເອົາໃຈໃສ່ຕໍ່ໜ້າທີ່ຖານະປະໂລຫິດຂອງເຮົາ ຢ່າງພາກພຽນ. ຂ່າວສານຂອງຂ້າພະເຈົ້າ ແມ່ນສຳລັບຜູ້ດຳລົງຖານະປະໂລຫິດແຫ່ງອາໂຣນທຸກຄົນ, ຮ່ວມທັງຜູ້ທີ່ດຳລົງຖານະປະໂລຫິດແຫ່ງເມນຄີເສເດັກນຳອີກ.

ແອວເດີ ແດວ ຈີ ເຣັນລັນ ໄດ້ສອນວ່າ ຈຸດປະສົງຂອງຖານະປະໂລຫິດ ແມ່ນເພື່ອໃຫ້ລູກໆຂອງພຣະເຈົ້າ ສາມາດເຂົ້າເຖິງພະລັງແຫ່ງການຊົດໃຊ້ຂອງພຣະເຢຊູຄຣິດ.³ ກ່ອນຈະໄດ້ຮັບພະລັງແຫ່ງການຊົດໃຊ້ຂອງພຣະຄຣິດ ໃນຊີວິດຂອງເຮົາໄດ້ນັ້ນ, ເຮົາຕ້ອງເຊື່ອໃນພຣະອົງ, ກັບໃຈຈາກບາບຂອງເຮົາ, ເຮັດ ແລະ ຮັກສາພັນທະສັນຍາທີ່ສັກສິດ ຜ່ານທາງພິທີການ, ແລະ ຮັບເອົາພຣະວິນຍານບໍລິສຸດ.⁴ ນີ້ບໍ່ແມ່ນຫລັກທຳທີ່ເຮົາຈະມີສ່ວນຮ່ວມພຽງແຕ່ເທື່ອດຽວ; ແຕ່ມັນທຳງານດ້ວຍກັນ ເພື່ອຄ້ຳຈູນ ແລະ ເສີມສ້າງກັນແລະກັນ ໃນຂັ້ນຕອນທີ່ກ້າວໄປໜ້າ ເພື່ອ “ມາຫາພຣະຄຣິດ, ແລະ ຖືກເຮັດໃຫ້ດີພ້ອມໃນພຣະອົງ.”⁵

ສະນັ້ນ, ແມ່ນຫຍັງຄືບົດບາດຂອງຖານະປະໂລຫິດແຫ່ງອາໂຣນ? ມັນຊ່ວຍເຮົາໃຫ້ເຂົ້າເຖິງພະລັງແຫ່ງການຊົດໃຊ້ຂອງພຣະຄຣິດ ໄດ້ແນວໃດ? ຂ້າພະເຈົ້າເຊື່ອວ່າ ຄຳຕອບມີຢູ່ໃນຂໍກະແຈຂອງຖານະປະໂລຫິດແຫ່ງອາໂຣນ—ເປັນຂໍກະແຈແຫ່ງການປະຕິບັດຂອງເຫລົ່າທູດ ແລະ ຂອງພຣະກິດຕິຄຸນຂັ້ນຕຽມ.⁶

ການປະຕິບັດຂອງເຫລົ່າທູດ

ໃຫ້ເຮົາມາເລີ່ມຕົ້ນດ້ວຍພາກສ່ວນໜຶ່ງຂອງການປະຕິບັດຂອງເຫລົ່າທູດ. ກ່ອນລູກໆຂອງພຣະເຈົ້າສາມາດມີສັດທາໃນພຣະເຢຊູຄຣິດໄດ້, ເຂົາເຈົ້າຕ້ອງຮູ້ຈັກພຣະອົງ ແລະ ໄດ້ຮັບການສິດສອນເຖິງພຣະກິດຕິຄຸນຂອງພຣະອົງເສຍກ່ອນ. ດັ່ງທີ່ອັກຄະສາວົກໂປໂລ ໄດ້ກ່າວວ່າ:

“ຜູ້ທີ່ຍັງບໍ່ໄດ້ຍິນເລື່ອງຂອງພຣະອົງນັ້ນ ຈະເຊື່ອໃນພຣະອົງໄດ້ຢ່າງໃດ? ແລະ ເມື່ອບໍ່ມີຜູ້ໃດປະກາດໃຫ້ພວກເຂົາຟັງ ພວກເຂົາຈະໄດ້ຍິນເຖິງເລື່ອງພຣະອົງໄດ້ຢ່າງໃດ?

“ແລະ ຖ້າບໍ່ມີຜູ້ໃດໃຊ້ພວກເຂົາໄປ, ພວກເຂົາຈະໄປປະກາດໄດ້ຢ່າງໃດ? …

“ດັ່ງນັ້ນ ສັດທາເກີດຂຶ້ນໄດ້ກໍເພາະການໄດ້ຍິນ ແລະ ການໄດ້ຍິນເກີດຂຶ້ນ ກໍເພາະການປະກາດເລື່ອງພຣະຄຣິດ.”⁷

ຕັ້ງແຕ່ຕົ້ນຂອງເວລາ, ພຣະເຈົ້າ “ໄດ້ສົ່ງເຫລົ່າທູດມາປະຕິບັດສາດສະໜາກິດແກ່ລູກຫລານມະນຸດ, ເພື່ອສະແດງໃຫ້ປະຈັກ … ເຖິງການສະເດັດມາຂອງພຣະຄຣິດ.”⁸ ເຫລົ່າທູດເປັນຜູ້ທີ່ມາຈາກສະຫວັນ ເພື່ອນຳຂ່າວສານຂອງພຣະເຈົ້າມາໃຫ້.⁹ ໃນພາສາເຮັບເຣີ ແລະ ພາສາກຣີກ, ສັບຫລັກຂອງຄຳວ່າ ທູດ ໝາຍເຖິງ “ຜູ້ສົ່ງຂ່າວສານ.”¹⁰

ໃນວິທີ ທີ່ຄືກັນກັບເຫລົ່າທູດ ຜູ້ສົ່ງຂ່າວຢ່າງຖືກຕ້ອງ ໄດ້ຖືກສົ່ງມາຈາກພຣະເຈົ້າ ເພື່ອປະກາດພຣະຄຳຂອງພຣະອົງ ແລະ ດ້ວຍວິທີນັ້ນ ໄດ້ສ້າງສັດທາ, ເຮົາຜູ້ດຳລົງຖານະປະໂລຫິດແຫ່ງອາໂຣນ ກໍເໝືອນກັນ ໄດ້ຖືກແຕ່ງຕັ້ງໃຫ້ “ສິດສອນ, ແລະ ເຊື້ອເຊີນທຸກຄົນ ໃຫ້ມາຫາພຣະຄຣິດ.”¹¹ ການສັ່ງສອນພຣະກິດຕິຄຸນ ແມ່ນໜ້າທີ່ຂອງຖານະປະໂລຫິດ. ແລະ ອຳນາດທີ່ກ່ຽວຂ້ອງກັບໜ້າທີ່ນີ້ ບໍ່ແມ່ນສຳລັບພຽງແຕ່ສາດສະດາ ຫລື ຜູ້ສອນສາດສະໜາເທົ່ານັ້ນ. ມັນແມ່ນສຳລັບທ່ານທັງຫລາຍ!¹²

ສະນັ້ນ ເຮົາຈະໄດ້ຮັບອຳນາດນີ້ ໄດ້ແນວໃດ? ມັກຄະນາຍົກ ອາຍຸ 12 ປີ—ຫລື ພວກເຮົາທຸກຄົນ—ຈະນຳສັດທາໃນພຣະຄຣິດ ເຂົ້າສູ່ໃຈຂອງລູກໆຂອງພຣະເຈົ້າ ໄດ້ແນວໃດ? ເຮົາເລີ່ມຕົ້ນດ້ວຍການທະນຸຖະໜອມພຣະຄຳຂອງພຣະອົງ ເພື່ອວ່າພະລັງຂອງມັນ ຈະຢູ່ໃນຕົວເຮົາ.¹³ ພຣະອົງໄດ້ສັນຍາວ່າ ຖ້າຫາກເຮົາເຮັດແນວນັ້ນ, ເຮົາຈະມີອຳນາດຂອງພຣະເຈົ້າ ໃນການໃຫ້ມະນຸດຍອມຮັບ.¹⁴ ມັນອາດເປັນໂອກາດທີ່ຈະສິດສອນ ຢູ່ໃນການປະຊຸມກຸ່ມ ຫລື ຕອນໄປຢ້ຽມຢາມບ້ານເຮືອນຂອງສະມາຊິກ. ມັນອາດເປັນບາງສິ່ງທີ່ເປັນແບບກັນເອງ, ເຊັ່ນການສົນທະນາກັບໝູ່ເພື່ອນ ຫລື ສະມາຊິກຄອບຄົວ. ໃນສະຖານທີ່ເຫລົ່ານີ້, ຖ້າຫາກເຮົາຕຽມພ້ອມ, ເຮົາຈະສາມາດສິດສອນພຣະກິດຕິຄຸນ ໃນວິທີທີ່ເຫລົ່າທູດກະທຳ: ໂດຍອຳນາດຂອງພຣະວິນຍານບໍລິສຸດ.¹⁵

ເມື່ອບໍ່ດົນມານີ້ ຂ້າພະເຈົ້າໄດ້ຍິນ ທ້າວເຈກັບ, ຜູ້ດຳລົງຖານະປະໂລຫິດແຫ່ງອາໂຣນ ຢູ່ປະເທດ ປາປູອາ ນູ ກີນີ, ກ່າວເປັນພະຍານເຖິງພະລັງຂອງພຣະຄຳພີມໍມອນ ແລະ ວິທີທີ່ມັນໄດ້ຊ່ວຍລາວ ຕ້ານທານກັບຄວາມຊົ່ວຮ້າຍ ແລະ ໄດ້ເຮັດຕາມພຣະວິຍານ. ຄຳເວົ້າຂອງລາວໄດ້ເພີ່ມຄວາມເຂັ້ມແຂງໃຫ້ແກ່ສັດທາຂອງຂ້າພະເຈົ້າ ແລະ ຂອງຄົນອື່ນໆ. ສັດທາຂອງຂ້າພະເຈົ້າກໍເຕີບໂຕ ໃນຂະນະທີ່ຂ້າພະເຈົ້າໄດ້ຍິນຜູ້ດຳລົງຖານະປະໂລຫິດແຫ່ງອາໂຣນ ສິດສອນ ແລະ ເປັນພະຍານຢູ່ໃນການປະຊຸມກຸ່ມນຳອີກ.

ຊາຍໜຸ່ມທັງຫລາຍ, ພວກເຈົ້າເປັນຜູ້ສົ່ງຂ່າວຢ່າງຖືກຕ້ອງ. ຜ່ານທາງຄຳວາຈາ ແລະ ການກະທຳຂອງພວກເຈົ້າ, ພວກເຈົ້າສາມາດນຳສັດທາໃນພຣະຄຣິດ ມາສູ່ຈິດໃຈຂອງລູກໆຂອງພຣະເຈົ້າ.¹⁶ ປະທານຣະໂຊ ເອັມ ແນວສັນ ໄດ້ກ່າວ່າ, “ພວກເຈົ້າຈະເປັນເໝືອນທູດທີ່ປະຕິບັດສາດສະໜາກິດແກ່ເຂົາເຈົ້າ.”¹⁷

ພຣະກິດຕິຄຸນຂັ້ນຕຽມ

ການເພີ່ມສັດທາໃນພຣະຄຣິດ ຈະນຳພາໄປສູ່ຄວາມປາດຖະໜາ ທີ່ຈະປ່ຽນແປງ ແລະ ກັບໃຈສະເໝີ.¹⁸ ສະນັ້ນ ມັນຈຶ່ງມີເຫດຜົນ ທີ່ຂໍກະແຈແຫ່ງການປະຕິບັດຂອງເຫລົ່າທູດ ຈະມາພ້ອມກັບຂໍກະແຈແຫ່ງພຣະກິດຕິຄຸນຂັ້ນຕຽມ ນັ້ນຄື, ພຣະກິດຕິຄຸນແຫ່ງການກັບໃຈ ແລະ ການບັບຕິສະມາ, ແລະ ການປົດບາບ.¹⁹

ເມື່ອພວກເຈົ້າສຶກສາໜ້າທີ່ຂອງຖານະປະໂລຫິດແຫ່ງອາໂຣນ, ພວກເຈົ້າຈະເຫັນຢ່າງແຈ່ມແຈ້ງ ທີ່ຈະເຊື້ອເຊີນຄົນອື່ນ ໃຫ້ກັບໃຈ ແລະ ພັດທະນາຕົນ.²⁰ ນັ້ນບໍ່ໄດ້ໝາຍຄວາມວ່າ ເຮົາຈະຢືນຢູ່ຂ້າງຖະໜົນ ແລະ ຮ້ອງວ່າ, “ໃຫ້ກັບໃຈເດີ້!” ສ່ວນຫລາຍແລ້ວ, ມັນໝາຍຄວາມວ່າ ເຮົາ ກັບໃຈ, ເຮົາໃຫ້ອະໄພ, ແລະ ເມື່ອເຮົາປະຕິບັດສາດສະໜາກິດຕໍ່ຄົນອື່ນ, ເຮົາໄດ້ສະເໜີໃຫ້ຄວາມຫວັງ ແລະ ຄວາມສະຫງົບ ທີ່ການກັບໃຈນຳມາໃຫ້—ເພາະເຮົາໄດ້ປະສົບກັບມັນແລ້ວ ດ້ວຍຕົວເອງ.

ຂ້າພະເຈົ້າເຄີຍໄດ້ຢູ່ກັບຜູ້ດຳລົງຖານະປະໂລຫິດແຫ່ງອາໂຣນ ຕອນເຂົາເຈົ້າໄດ້ໄປຢ້ຽມຢາມເພື່ອນຢູ່ໃນກຸ່ມຂອງເຂົາເຈົ້າ. ຂ້າພະເຈົ້າໄດ້ເປັນພະຍານເຖິງໃຈທີ່ອ່ອນນ້ອມດ້ວຍຄວາມເປັນຫ່ວງເປັນໃຍຂອງເຂົາເຈົ້າ ແລະ ຊ່ວຍອ້າຍນ້ອງຂອງເຂົາເຈົ້າ ໃຫ້ຮູ້ສຶກເຖິງຄວາມຮັກຂອງພຣະເຈົ້າ. ຂ້າພະເຈົ້າໄດ້ຍິນຊາຍໜຸ່ມຄົນໜຶ່ງ ສະແດງປະຈັກພະຍານຕໍ່ໝູ່ເພື່ອນ ເຖິງພະລັງແຫ່ງການກັບໃຈ. ໃນຂະນະທີ່ລາວກ່າວປະຈັກພະຍານ, ໃຈຂອງຂ້າພະເຈົ້າໄດ້ອ່ອນລົງ, ມີຄວາມຕັ້ງໃຈຫລາຍຂຶ້ນ, ແລະ ຮູ້ສຶກເຖິງພະລັງແຫ່ງການປິ່ນປົວຂອງພຣະຄຣິດ.

ປະທານກໍດອນ ບີ ຮິງລີ ໄດ້ສອນວ່າ: “ການກັບໃຈກໍເປັນສິ່ງໜຶ່ງ. ການໄດ້ຮັບການປົດບາບ ຫລື ການໄດ້ຮັບການໃຫ້ອະໄພ ກໍເປັນ ອີກສິ່ງໜຶ່ງ. ພະລັງທີ່ຈະນຳສິ່ງນີ້ມາ ແມ່ນພົບເຫັນຢູ່ໃນຖານະປະໂລຫິດແຫ່ງອາໂຣນ.”²¹ ພິທີການຂອງຖານະປະໂລຫິດແຫ່ງອາໂຣນ ຂອງການບັບຕິສະມາ ແລະ ສິນລະລຶກ ເປັນພະຍານ ແລະ ເຮັດໃຫ້ການກັບໃຈສຳລັບການປົດບາບຂອງເຮົາ ສຳເລັດຄົບຖ້ວນ.²² ປະທານດາລິນ ເອັຈ ໂອກສ໌ ໄດ້ອະທິບາຍມັນ ໃນວິທີນີ້: “ເຮົາໄດ້ຖືກບັນຊາ ໃຫ້ກັບໃຈຈາກບາບຂອງເຮົາ ແລະ ມາຫາພຣະຜູ້ເປັນເຈົ້າ ດ້ວຍໃຈທີ່ຊອກຊ້ຳ ແລະ ວິນຍານທີ່ສຳນຶກຜິດ ແລະ ຮັບສ່ວນສິນລະລຶກ. … ເມື່ອເຮົາຕໍ່ພັນທະສັນຍາແຫ່ງການຮັບບັບຕິສະມາຂອງເຮົາ ໃນທາງນີ້, ພຣະຜູ້ເປັນເຈົ້າຈະຕໍ່ຜົນສະທ້ອນທີ່ຊຳລະລ້າງຂອງການຮັບບັບຕິສະມາຂອງເຮົາ.”²³

ອ້າຍນ້ອງທັງຫລາຍ, ມັນເປັນສິດທິພິເສດທີ່ສັກສິດ ທີ່ຈະປະຕິບັດພິທີການ ທີ່ຊ່ວຍນຳການປົດບາບ ມາສູ່ຫົວໃຈທີ່ກັບໃຈ ຜ່ານທາງອຳນາດແຫ່ງການຊົດໃຊ້ຂອງພຣະຜູ້ຊ່ວຍໃຫ້ລອດ.²⁴

ເມື່ອບໍ່ດົນມານີ້ ຂ້າພະເຈົ້າໄດ້ຍິນກ່ຽວກັບປະໂລຫິດຄົນໜຶ່ງ ຜູ້ມີບັນຫາເລື່ອງການສະແດງຄວາມຮູ້ສຶກຕົວເອງ ຜູ້ໄດ້ໃຫ້ພອນສິນລະລຶກ ເປັນເທື່ອທຳອິດ. ໃນຂະນະທີ່ລາວກ່າວ, ວິນຍານທີ່ມີພະລັງໄດ້ມາສູ່ລາວ ແລະ ຜູ້ມາຮ່ວມກອງປະຊຸມ. ຈາກນັ້ນ ໃນລະຫວ່າງກອງປະຊຸມ, ລາວໄດ້ກ່າວປະຈັກພະຍານທີ່ສັ້ນໆ ແຕ່ແຈ່ມແຈ້ງ ເຖິງອຳນາດຂອງພຣະເຈົ້າ ທີ່ລາວໄດ້ຮູ້ສຶກ ລະຫວ່າງການເຮັດພິທີສິນລະລຶກ.

ໃນເມືອງຊິດນີ, ປະເທດ ອົດສະຕາລີ, ສະມາຊິກສີ່ຄົນຂອງກຸ່ມປະໂລຫິດ ໄດ້ໃຫ້ບັບຕິສະມາແກ່ສະມາຊິກຂອງຄອບຄົວບູລອງໂກ. ແມ່ຂອງປະໂລຫິດຄົນໜຶ່ງເຫລົ່ານັ້ນ ໄດ້ບອກຂ້າພະເຈົ້າເຖິງປະສົບການທີ່ມີພະລັງຕໍ່ລູກຊາຍຂອງນາງ. ປະໂລຫິດເຫລົ່ານັ້ນ ໄດ້ເຂົ້າໃຈຄວາມໝາຍຂອງຄຳວ່າ “ໂດຍໄດ້ຮັບມອບໝາຍຈາກພຣະເຢຊູຄຣິດ.”²⁵

ດັ່ງທີ່ທ່ານຮູ້, ບັດນີ້ ປະໂລຫິດສາມາດເປັນຜູ້ໃຫ້ບັບຕິສະມາ ຢູ່ໃນພຣະວິຫານໄດ້. ລູກຊາຍຂອງຂ້າພະເຈົ້າອາຍຸ 17 ປີ ໄດ້ໃຫ້ບັບຕິສະມາແກ່ຂ້າພະເຈົ້າ ສຳລັບບັນພະບຸລຸດຂອງພວກເຮົາ. ພວກເຮົາໄດ້ຮູ້ສຶກເຖິງຄວາມກະຕັນຍູສຳລັບຖານະປະໂລຫິດ ແລະ ສິດທິພິເສດ ທີ່ໄດ້ກະທຳເພື່ອຄວາມລອດ ຂອງລູກໆຂອງພຣະເຈົ້າ.

ຊາຍໜຸ່ມທັງຫລາຍ, ເມື່ອພວກເຈົ້າມີສ່ວນຮ່ວມໃນໜ້າທີ່ຂອງຖານະປະໂລຫິດຂອງພວກເຈົ້າ ຢ່າງພາກພຽນ, ພວກເຈົ້າກໍມີສ່ວນຮ່ວມ ໃນວຽກງານຂອງພຣະເຈົ້າ ໃນການກໍ່ໃຫ້ເກີດຄວາມເປັນອະມະຕະ ແລະ ຊີວິດນິລັນດອນຂອງມະນຸດ.²⁶ ປະສົບການແບບນີ້ ຈະເພີ່ມຄວາມປາດຖະໜາ ແລະ ຕຽມພວກເຈົ້າ ທີ່ຈະສິດສອນເລື່ອງການກັບໃຈ ແລະ ໃຫ້ບັບຕິສະມາແກ່ຜູ້ປ່ຽນໃຈເຫລື້ອມໃສ ຕອນພວກເຈົ້າເປັນຜູ້ສອນສາດສະໜາ. ມັນຍັງຕຽມພວກເຈົ້າສຳລັບການຮັບໃຊ້ຕະຫລອດຊີວິດນຳອີກ ໃນຖານະປະໂລຫິດແຫ່ງເມນຄີເສເດັກ.

ໂຢຮັນບັບຕິສະໂຕ, ຕົວຢ່າງຂອງເຮົາ

ຜູ້ດຳລົງຖານະປະໂລຫິດແຫ່ງອາໂຣນທັງຫລາຍ, ເຮົາມີສິດທິພິເສດ ແລະ ໜ້າທີ່ ທີ່ຈະເປັນເພື່ອນຮັບໃຊ້ ດັ່ງທີ່ໂຢຮັນບັບຕິສະໂຕໄດ້ເປັນ. ໂຢຮັນໄດ້ຖືກສົ່ງໄປເປັນຜູ້ສົ່ງຂ່າວທີ່ມີສິດອຳນາດ ເພື່ອເປັນພະຍານເຖິງພຣະຄຣິດ ແລະ ເຊື້ອເຊີນທຸກຄົນ ໃຫ້ກັບໃຈ ແລະ ຮັບບັບຕິສະມາ—ນັ້ນຄື, ເພິ່ນໄດ້ໃຊ້ຂໍກະແຈຂອງຖານະປະໂລຫິດແຫ່ງອາໂຣນ ທີ່ຂ້າພະເຈົ້າໄດ້ກ່າວມານັ້ນ. ແລ້ວໂຢຮັນ ໄດ້ປະກາດວ່າ, “ຂ້າພະເຈົ້າໃຫ້ບັບຕິສະມາພວກເຈົ້າດ້ວຍນ້ຳ ໝາຍເຖິງການຖິ້ມໃຈເກົ່າເອົາໃຈໃໝ່ກໍແມ່ນ, ແຕ່ຜູ້ທີ່ຈະມາພາຍຫລັງຂ້າພະເຈົ້າ ກໍມີອຳນາດຫລາຍກວ່າຂ້າພະເຈົ້າ … : ເພິ່ນຈະໃຫ້ພວກເຈົ້າຮັບບັບຕິສະມາດ້ວຍພຣະວິນຍານບໍລິສຸດ, ແລະ ດ້ວຍໄຟ.”²⁷

ດັ່ງນັ້ນ, ຖານະປະໂລຫິດແຫ່ງອາໂຣນ, ພ້ອມດ້ວຍຂໍກະແຈຂອງການປະຕິບັດຂອງເຫລົ່າທູດ ແລະ ພຣະກິດຕິຄຸນຂັ້ນຕຽມ, ຈະຕຽມທາງສຳລັບລູກໆຂອງພຣະເຈົ້າ, ຜ່ານທາງຖານະປະໂລຫິດແຫ່ງເມນຄີເສເດັກ, ເພື່ອຈະໄດ້ຮັບຂອງປະທານແຫ່ງພຣະວິນຍານບໍລິສຸດ, ຂອງປະທານທີ່ຍິ່ງໃຫຍ່ທີ່ສຸດ ທີ່ເຮົາສາມາດໄດ້ຮັບ ໃນຊີວິດນີ້.²⁸

ຊ່າງເປັນໜ້າທີ່ຮັບຜິດຊອບທີ່ເລິກຊຶ້ງແທ້ໆ ທີ່ພຣະເຈົ້າໄດ້ມອບໃຫ້ແກ່ຜູ້ດຳລົງຖານະປະໂລຫິດແຫ່ງອາໂຣນ!

ການເຊື້ອເຊີນ ແລະ ຄຳສັນຍາ

ພໍ່ແມ່ ແລະ ຜູ້ນຳຖານະປະໂລຫິດທັງຫລາຍ, ທ່ານສາມາດຮູ້ສຶກເຖິງຄວາມສຳຄັນ ຂອງຄຳແນະນຳຂອງປະທານມອນສັນ ເພື່ອໃຫ້ຊ່ວຍກຸ່ມຊາຍໜຸ່ມ ໃຫ້ເຂົ້າໃຈ “ຄວາມໝາຍຂອງການ … ເປັນຜູ້ດຳລົງຖານະປະໂລຫິດຂອງພຣະເຈົ້າ”?²⁹ ການເຂົ້າໃຈ ແລະ ການຂະຫຍາຍຖານະປະໂລຫິດແຫ່ງອາໂຣນ ຈະຕຽມເຂົາເຈົ້າໃຫ້ເປັນຜູ້ດຳລົງຖານະປະໂລຫິດແຫ່ງເມນຄີເສເດັກທີ່ຊື່ສັດ, ເປັນຜູ້ສອນສາດສະໜາທີ່ເຕັມໄປດ້ວຍພະລັງ, ແລະ ເປັນສາມີ ແລະ ເປັນພໍ່ທີ່ຊອບທຳ. ຜ່ານທາງການຮັບໃຊ້ຂອງເຂົາເຈົ້າ, ເຂົາເຈົ້າຈະເຂົ້າໃຈ ແລະ ຮູ້ສຶກເຖິງຄວາມເປັນຈິງຂອງອຳນາດຂອງຖານະປະໂລຫິດ, ອຳນາດທີ່ຈະກະທຳ ໃນພຣະນາມຂອງພຣະຄຣິດ ສຳລັບຄວາມລອດຂອງລູກໆຂອງພຣະເຈົ້າ.

ຊາຍໜຸ່ມທັງຫລາຍ, ພຣະເຈົ້າມີວຽກງານ ທີ່ຈະໃຫ້ພວກເຈົ້າເຮັດ.³⁰ ການແຕ່ງຕັ້ງສູ່ຖານະປະໂລຫິດແຫ່ງອາໂຣນຂອງພວກເຈົ້າ ເປັນສິ່ງສຳຄັນໃນການຊ່ວຍລູກໆຂອງພຣະອົງ ໃຫ້ໄດ້ຮັບພະລັງແຫ່ງການຊົດໃຊ້ຂອງພຣະຄຣິດ. ຂ້າພະເຈົ້າສັນຍາວ່າ ເມື່ອພວກເຈົ້າເຮັດໃຫ້ໜ້າທີ່ເຫລົ່ານີ້ເປັນສິ່ງສຳຄັນໃນຊີວິດຂອງພວກເຈົ້າ, ພວກເຈົ້າຈະຮູ້ສຶກເຖິງອຳນາດຂອງພຣະເຈົ້າ ດັ່ງທີ່ບໍ່ເຄີຍເປັນມາກ່ອນ. ພວກເຈົ້າຈະເຂົ້າໃຈເອກະລັກຂອງພວກເຈົ້າ ໃນຖານະທີ່ເປັນບຸດຂອງພຣະເຈົ້າ, ຜູ້ໄດ້ຖືກເອີ້ນດ້ວຍການເອີ້ນທີ່ສັກສິດ ໃຫ້ເຮັດວຽກງານຂອງພຣະອົງ. ແລະ ຄືກັນກັບໂຢຮັນບັບຕິສະໂຕ, ພວກເຈົ້າຈະຊ່ວຍຕຽມທາງ ສຳລັບການສະເດັດມາຂອງພຣະບຸດຂອງພຣະອົງ. ຂ້າພະເຈົ້າເປັນພະຍານເຖິງຄວາມຈິງເຫລົ່ານີ້ ໃນພຣະນາມຂອງພຣະເຢຊູຄຣິດ, ອາແມນ.