ການປະຕິບັດສາດສະໜາກິດ

ໂດຍ ປະທານຣະໂຊ ເອັມ ແນວສັນ

ພວກເຮົາຈະປະຕິບັດຕາມແບບແຜນທີ່ໃໝ່ກວ່າ ແລະ ສັກສິດກວ່າ ໃນການດູແລ ແລະ ປະຕິບັດສາດສະໜາກິດຕໍ່ຄົນອື່ນ.

ຂໍຂອບໃຈແອວເດີ ກອງ ແລະ ແອວເດີ ໂຊອາເຣສ໌, ສຳລັບຖ້ອຍຄຳ ດ້ວຍສັດທາທີ່ຈິງໃຈຂອງພວກທ່ານ. ພວກເຮົາມີຄວາມກະຕັນຍູຫລາຍສຳລັບພວກທ່ານ ແລະ ຄູ່ຄອງຂອງພວກທ່ານ.

ອ້າຍເອື້ອຍນ້ອງທີ່ຮັກແພງ, ພວກເຮົາບໍ່ເຄີຍຢຸດທີ່ຈະສະແຫວງຫາການຊີ້ນຳຈາກພຣະຜູ້ເປັນເຈົ້າ ກ່ຽວກັບວິທີທີ່ພວກເຮົາຈະສາມາດຊ່ວຍເຫລືອສະມາຊິກຂອງພວກເຮົາ ໃນການຮັກສາພຣະບັນຍັດຂອງພຣະເຈົ້າ, ໂດຍສະເພາະພຣະບັນຍັດສອງຂໍ້ໃຫຍ່ນັ້ນ ເພື່ອໃຫ້ຮັກພຣະເຈົ້າ ແລະ ຮັກເພື່ອນບ້ານຂອງເຮົາ.¹

ເປັນເວລາຫລາຍເດືອນທີ່ພວກເຮົາໄດ້ ຊອກຫາວິທີທີ່ຈະປະຕິບັດສາດສະໜາກິດ ຕໍ່ຄວາມຕ້ອງການທາງວິນຍານ ແລະ ທາງໂລກ ຂອງຜູ້ຄົນຂອງພວກເຮົາ ໃນວິທີຂອງພຣະຜູ້ຊ່ວຍໃຫ້ລອດ.

ພວກເຮົາໄດ້ຕັດສິນໃຈ ທີ່ຈະເຊົາຈາກການສອນປະຈຳບ້ານ ແລະ ການຢ້ຽມສອນ ດັ່ງທີ່ພວກເຮົາເຄີຍເຮັດມາ. ແຕ່ພວກເຮົາຈະປະຕິບັດຕາມແບບແຜນທີ່ໃໝ່ກວ່າ ແລະ ສັກສິດກວ່າ ໃນການດູແລ ແລະ ປະຕິບັດສາດສະໜາກິດຕໍ່ຄົນອື່ນ. ພວກເຮົາຈະກ່າວເຖິງແບບແຜນໃໝ່ນີ້ວ່າ “ການປະຕິບັດສາດສະໜາກິດ.”

ການປະຕິບັດສາດສະໜາກິດທີ່ມີປະສິດທິພາບ ຈະເກີດຈາກຂອງປະທານທີ່ມີຢູ່ໃນຕົວຂອງບັນດາເອື້ອຍນ້ອງ ແລະ ໂດຍອຳນາດອັນຫາທີ່ປຽບບໍ່ໄດ້ຂອງຖານະປະໂລຫິດ. ພວກເຮົາທຸກຄົນຕ້ອງການ ການປົກປ້ອງເຊັ່ນນັ້ນ ຈາກກົນອຸບາຍທີ່ສະຫລາດແກມໂກງຂອງຜູ້ປໍລະປັກ.

ແອວເດີ ແຈັບຟະຣີ ອາ ຮໍແລນ ແຫ່ງກຸ່ມອັກຄະສາວົກສິບສອງ ແລະ ຊິດສະເຕີ ຈີນ ບີ ບິງກຳ, ປະທານສະມາຄົມສະຕີສົງເຄາະສາມັນ, ຈະອະທິບາຍເຖິງວິທີທີ່ອ້າຍນ້ອງ ແຫ່ງຖານະປະໂລຫິດ ຜູ້ໄດ້ຮັບມອບໝາຍ ແລະ ເອື້ອຍນ້ອງຂອງສະມາຄົມສະຕີສົງເຄາະ ແລະ ກຸ່ມຍິງໜຸ່ມ ຜູ້ໄດ້ຮັບມອບໝາຍ ຈະປະຕິບັດໜ້າທີ່ນັບຈາກນີ້ໄປ ໃນການຮັບໃຊ້ ແລະ ດູແລສະມາຊິກຂອງສາດສະໜາຈັກ ຕະຫລອດທົ່ວໂລກໃນວິທີໃດ.

ຝ່າຍປະທານສູງສຸດ ແລະ ອັກຄະສາວົກສິບສອງ ໄດ້ເປັນອັນໜຶ່ງອັນດຽວກັນ ແລະ ເຫັນດ້ວຍກັບຂ່າວສານຂອງພວກເພິ່ນ. ພວກເຮົາໄດ້ເປີດພາກໃໝ່ ໃນປະຫວັດສາດຂອງສາດສະໜາຈັກ ດ້ວຍຄວາມກະຕັນຍູ ແລະ ດ້ວຍການອະທິຖານ. ໃນພຣະນາມຂອງພຣະເຢຊູຄຣິດ, ອາແມນ.