ການເປີດເຜີຍສຳລັບສາດສະໜາຈັກ, ການເປີດເຜີຍສຳລັບຊີວິດຂອງເຮົາ
ໃນອະນາຄົດ, ມັນເປັນໄປບໍ່ໄດ້ ທີ່ເຮົາຈະປອດໄພທາງວິນຍານ ຖ້າປາດສະຈາກການນຳພາ, ການຊີ້ນຳ, ການປອບໂຍນ, ແລະ ອິດທິພົນທີ່ບໍ່ເຄີຍຂາດຂອງພຣະວິນຍານບໍລິສຸດ.
ຊ່າງເປັນສິດທິພິເສດທີ່ດີເລີດແທ້ໆ ທີ່ໄດ້ສະເຫລີມສະຫລອງວັນອິດສະເຕີ ກັບທ່ານ ໃນເຊົ້າວັນອາທິດມື້ນີ້ ຂອງກອງປະຊຸມໃຫຍ່ສາມັນ! ບໍ່ມີສິ່ງໃດ ເໝາະສົມຫລາຍກວ່າການສະເຫລີມສະຫລອງ ເຫດການທີ່ສຳຄັນທີ່ສຸດ ທີ່ເຄີຍເກີດຂຶ້ນຢູ່ໃນໂລກ ໂດຍການນະມັດສະການຜູ້ທີ່ສຳຄັນທີ່ສຸດ ທີ່ໄດ້ມາເກີດຢູ່ໃນໂລກນີ້. ຢູ່ໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍນີ້, ພວກເຮົານະມັດສະການພຣະອົງ ຜູ້ໄດ້ເລີ່ມຕົ້ນການຊົດໃຊ້ອັນເປັນນິດຂອງພຣະອົງ ຢູ່ໃນສວນເຄັດເຊມາເນ. ພຣະອົງໄດ້ເຕັມພຣະໄທ ທີ່ຈະຮັບທຸກທໍລະມານ ເພື່ອບາບ ແລະ ຄວາມອ່ອນແອຂອງເຮົາແຕ່ລະຄົນ, ຊຶ່ງການຮັບທຸກທໍລະມານນັ້ນ ໄດ້ເຮັດ“ໃຫ້ໂລຫິດໄຫລອອກຈາກທຸກຂຸມຂົນ.”1 ພຣະອົງໄດ້ຖືກຄຶງຢູ່ເທິງໄມ້ກາງແຂນ ຢູ່ພູຫົວກະໂຫລກ2 ແລະ ໄດ້ຟື້ນຄືນພຣະຊົນ ໃນມື້ທີສາມ ຊຶ່ງເປັນການຟື້ນຄືນຊີວິດເທື່ອທຳອິດ ຂອງລູກໆຂອງພຣະບິດາເທິງສະຫວັນ. ຂ້າພະເຈົ້າຮັກພຣະອົງ ແລະ ເປັນພະຍານວ່າ ພຣະອົງຊົງພຣະຊົນຢູ່! ແມ່ນພຣະອົງທີ່ນຳພາ ແລະ ຊີ້ນຳສາດສະໜາຈັກຂອງພຣະອົງ.
ປາດສະຈາກການຊົດໃຊ້ອັນເປັນນິດຂອງພຣະຜູ້ໄຖ່ຂອງເຮົາ, ຈະບໍ່ມີຄົນໃດໃນພວກເຮົາ ທີ່ສາມາດກັບຄືນໄປຫາພຣະບິດາເທິງສະຫວັນຂອງເຮົາໄດ້. ປາດສະຈາກການຟື້ນຄືນພຣະຊົນຂອງພຣະອົງ, ຄວາມຕາຍຄົງເປັນທີ່ສຸດ. ການຊົດໃຊ້ຂອງພຣະຜູ້ຊ່ວຍໃຫ້ລອດຂອງເຮົາ ໄດ້ເຮັດໃຫ້ຊີວິດນິລັນດອນ ເປັນໄປໄດ້ ແລະ ອະມະຕະ ເປັນສິ່ງທີ່ແນ່ນອນ ສຳລັບທຸກຄົນ.
ເພາະພາລະກິດທີ່ຍອດຢ້ຽມຂອງພຣະອົງ ແລະ ເພາະສັນຕິສຸກທີ່ພຣະອົງໄດ້ປະທານໃຫ້ ຜູ້ຕິດຕາມພຣະອົງ, ເວັນດີ ພັນລະຍາຂອງຂ້າພະເຈົ້າ, ແລະ ຂ້າພະເຈົ້າຈຶ່ງຮູ້ສຶກໄດ້ຮັບການປອບໂຍນ ໃນວັນທີ 2 ເດືອນມັງກອນ, ປີ 2018, ເມື່ອໂທລະສັບໄດ້ປຸກພວກເຮົາໃຫ້ຕື່ນ ແລ້ວໄດ້ຍິນວ່າ ປະທານທອມມັສ ແອັສ ມອນສັນ ໄດ້ຂ້າມໄປຟາກມ່ານ ເບື້ອງນັ້ນແລ້ວ.
ພວກເຮົາກໍຄິດຮອດປະທານມອນສັນຫລາຍ! ພວກເຮົາໃຫ້ກຽດຊີວິດ ແລະ ມໍລະດົກຂອງເພິ່ນ. ວິລະບຸລຸດທີ່ດີເດັ່ນ, ໄດ້ປະຮອຍທີ່ບໍ່ສາມາດລຶບໄດ້ ໄວ້ກັບເຮົາທຸກຄົນ ຜູ້ຮູ້ຈັກເພິ່ນ ແລະ ປະໄວ້ກັບສາດສະໜາຈັກທີ່ເພິ່ນຮັກ.
ໃນວັນອາທິດ, ວັນທີ 14 ເດືອນມັງກອນ, 2018, ຢູ່ໃນຫ້ອງຊັ້ນເທິງຂອງພຣະວິຫານເຊົາເລັກ, ຝ່າຍປະທານສູງສຸດ ໄດ້ຖືກຈັດຕັ້ງ ໃນແບບແຜນທີ່ລຽບງ່າຍ ແຕ່ສັກສິດ ຊຶ່ງພຣະຜູ້ເປັນເຈົ້າໄດ້ສະຖາປະນາໄວ້. ແລ້ວ, ຢູ່ໃນການຊຸມນຸມທີ່ສັກສິດ ມື້ເຊົ້າວານນີ້, ສະມາຊິກຂອງສາດສະໜາຈັກ ຕະຫລອດທົ່ວໂລກ ກໍໄດ້ຍົກມືຢືນຢັນ ດັ່ງທີ່ອັກຄະສາວົກໄດ້ເຮັດກ່ອນແລ້ວ. ຂ້າພະເຈົ້າມີຄວາມກະຕັນຍູຢ່າງລົ້ນເຫລືອ ສຳລັບການສະໜັບສະໜັບຂອງທ່ານ.
ຂ້າພະເຈົ້າກໍມີຄວາມກະຕັນຍູຫລາຍ ຕໍ່ຜູ້ທີ່ໄດ້ຮັບຕຳແໜ່ງນີ້ກ່ອນຂ້າພະເຈົ້າ. ມັນເປັນສິດທິພິເສດທີ່ຂ້າພະເຈົ້າໄດ້ຮັບໃຊ້ ໃນກຸ່ມອັກຄະສາວົກສິບສອງ ມາເປັນເວລາ 34 ປີ ແລະ ຮູ້ຈັກ ປະທານຂອງສາດສະໜາຈັກ 10 ຄົນ ໃນຈຳນວນ 16 ຄົນ ທີ່ຜ່ານມາ. ຂ້າພະເຈົ້າໄດ້ຮຽນຮູ້ຢ່າງຫລວງຫລາຍຈາກພວກເພິ່ນ.
ຂ້າພະເຈົ້າກໍເປັນໜີ້ບຸນຄຸນຕໍ່ບັນພະບຸລຸດຂອງຂ້າພະເຈົ້າຫລາຍຄືກັນ. ພໍ່ຕູ້ແມ່ຕູ້ທວດ ທັງແປດຄົນ ຂອງຂ້າພະເຈົ້າ ໄດ້ເຂົ້າຮ່ວມສາດສະໜາຈັກ ໃນເອີຣົບ. ພວກເພິ່ນແຕ່ລະຄົນ ໄດ້ເສຍສະລະທຸກສິ່ງ ເພື່ອມາຫາຊີໂອນ. ເຖິງຢ່າງໃດກໍຕາມ, ໃນລຸ້ນລູກຫລານຕໍ່ມາ, ບໍ່ແມ່ນທຸກຄົນ ໃນບັນດາ ບັນພະບຸລຸດຂອງຂ້າພະເຈົ້າ ທີ່ເຂັ້ມແຂງ. ເມື່ອເປັນແນວນັ້ນ, ຂ້າພະເຈົ້າກໍເລີຍເຕີບໃຫຍ່ຂຶ້ນ ຢູ່ໃນຄອບຄົວທີ່ບໍ່ມີພຣະກິດຕິຄຸນເປັນຫລັກ.
ຂ້າພະເຈົ້າຮັກພໍ່ແມ່ຂອງຂ້າພະເຈົ້າຫລາຍທີ່ສຸດ. ພວກເພິ່ນເປັນທຸກສິ່ງທຸກຢ່າງສຳລັບຂ້າພະເຈົ້າ ແລະ ໄດ້ສອນບົດຮຽນທີ່ສຳຄັນໃຫ້ຂ້າພະເຈົ້າ. ຂ້າພະເຈົ້າຂໍຂອບໃຈພວກເພິ່ນ ສຳລັບຄອບຄົວທີ່ມີຄວາມສຸກ ທີ່ພວກເພິ່ນໄດ້ສ້າງສຳລັບຂ້າພະເຈົ້າ ແລະ ເອື້ອຍນ້ອງຂອງຂ້າພະເຈົ້າ. ເຖິງແມ່ນເປັນແນວນັ້ນ, ແຕ່ຕອນຍັງນ້ອຍ, ຂ້າພະເຈົ້າຍັງຮູ້ສຶກວ່າ ຂ້າພະເຈົ້າຂາດບາງສິ່ງ. ມື້ໜຶ່ງ ຂ້າພະເຈົ້າໄດ້ຂຶ້ນລົດໄປຫາຮ້ານຂາຍປຶ້ມ LDS ແລະ ຊອກຫາປຶ້ມກ່ຽວກັບສາດສະໜາຈັກ. ຂ້າພະເຈົ້າມັກຮຽນເລື່ອງພຣະກິດຕິຄຸນ.
ເມື່ອຂ້າພະເຈົ້າຮູ້ຈັກກ່ຽວກັບພຣະວາຈາແຫ່ງປັນຍາ, ຂ້າພະເຈົ້າກໍຢາກໃຫ້ພໍ່ແມ່ຂອງຂ້າພະເຈົ້າ ດຳລົງຊີວິດຕາມນັ້ນ. ສະນັ້ນ, ມື້ໜຶ່ງ ຕອນຂ້າພະເຈົ້າຍັງນ້ອຍ, ຂ້າພະເຈົ້າໄດ້ລົງໄປຫ້ອງໃຕ້ດິນ ແລະ ໄດ້ທຸບແກ້ວເຫລົ້າທຸກຂວດ ໃສ່ພື້ນສີມັງຖິ້ມໝົດ! ຂ້າພະເຈົ້າຄິດວ່າ ພໍ່ຂອງຂ້າພະເຈົ້າຊິລົງໂທດຂ້າພະເຈົ້າ, ແຕ່ເພິ່ນບໍ່ໄດ້ເວົ້າຈັກຄຳ.
ເມື່ອຂ້າພະເຈົ້າໃຫຍ່ຂຶ້ນ ແລະ ເຂົ້າໃຈເຖິງຄວາມຍິ່ງໃຫຍ່ຂອງແຜນຂອງພຣະບິດາເທິງສະຫວັນ, ຂ້າພະເຈົ້າໄດ້ເວົ້າກັບຕົວເອງ ເລື້ອຍໆວ່າ, “ເຮົາບໍ່ຢາກໄດ້ຂອງຂວັນຄຣິດສະມັດອີກ! ແຕ່ເຮົາຢາກຜະນຶກເຂົ້າກັບພໍ່ແມ່ຂອງເຮົາ.” ສິ່ງທີ່ຂ້າພະເຈົ້າຄອຍຖ້າ ບໍ່ໄດ້ມາເຖິງຢ່າງໄວ ຈົນກວ່າຫລັງຈາກພໍ່ແມ່ຂອງຂ້າພະເຈົ້າ ມີອາຍຸຫລາຍກວ່າ 80 ປີ, ແລະ ແລ້ວມັນກໍໄດ້ເກີດເປັນຈິງ. ຂ້າພະເຈົ້າບໍ່ສາມາດສະແດງຄວາມຊື່ນຊົມທັງໝົດ ທີ່ຂ້າພະເຈົ້າຮູ້ສຶກໃນມື້ນັ້ນອອກມາໄດ້,3 ແລະ ແຕ່ລະມື້ ຂ້າພະເຈົ້າຮູ້ສຶກເຖິງຄວາມຊື່ນຊົມນັ້ນ ທີ່ພວກເພິ່ນໄດ້ຜະນຶກເຂົ້າກັນ ແລະ ຂ້າພະເຈົ້າໄດ້ຜະນຶກເຂົ້າກັບພວກເພິ່ນ.
ໃນປີ 1945, ຕອນຂ້າພະເຈົ້າຮຽນເປັນໝໍ, ຂ້າພະເຈົ້າໄດ້ແຕ່ງງານກັບນາງ ແດນໂຊ ໄວ້ ຢູ່ໃນພຣະວິຫານເຊົາເລັກ. ນາງ ກັບ ຂ້າພະເຈົ້າ ໄດ້ຮັບພອນ ທີ່ມີລູກສາວທີ່ສວຍງາມ ເກົ້າຄົນ ແລະ ມີລູກຊາຍທີ່ລ້ຳຄ່າ ໜຶ່ງຄົນ. ທຸກວັນນີ້ ຄອບຄົວທີ່ໃຫຍ່ໂຕຂອງຂ້າພະເຈົ້າ ໄດ້ນຳຄວາມສຸກຢ່າງລົ້ນເຫລືອ ມາໃຫ້ຂ້າພະເຈົ້າ.
ໃນປີ 2005, ຫລັງຈາກໄດ້ແຕ່ງງານເກືອບເຖິງ 60 ປີ, ນາງແດນໂຊ ທີ່ຮັກຂອງຂ້າພະເຈົ້າ ໄດ້ຖືກເອີ້ນໃຫ້ກັບບ້ານຢ່າງກະທັນຫັນ. ຂ້າພະເຈົ້າມີຄວາມໂສກເສົ້າຫລາຍທີ່ສຸດ. ແຕ່ຂ່າວສານຂອງວັນອິດສະເຕີ ແລະ ຄຳສັນຍາແຫ່ງການຟື້ນຄືນຊີວິດ ໄດ້ປອບໃຈຂ້າພະເຈົ້າ.
ແລ້ວພຣະຜູ້ເປັນເຈົ້າໄດ້ພານາງເວັນດີ ວັດສັນ ມາຢູ່ຄຽງຂ້າງຂ້າພະເຈົ້າ. ພວກເຮົາໄດ້ຜະນຶກເຂົ້າກັນຢູ່ໃນພຣະວິຫານເຊົາເລັກ ໃນວັນທີ 6 ເດືອນເມສາ, ປີ 2006. ຂ້າພະເຈົ້າກໍຮັກນາງຫລາຍ! ນາງເປັນຍິງທີ່ດີເດັ່ນ—ເປັນພອນທີ່ຍິ່ງໃຫຍ່ຕໍ່ຂ້າພະເຈົ້າ, ຕໍ່ຄອບຄົວ, ແລະ ຕໍ່ສາດສະໜາຈັກທັງໝົດ.
ພອນແຕ່ລະຢ່າງເຫລົ່ານີ້ ໄດ້ມາເຖິງເພາະການສະແຫວງຫາ ແລະ ການເຊື່ອຟັງຕໍ່ການກະຕຸ້ນຈາກພຣະວິນຍານບໍລິສຸດ. ປະທານໂລເຣັນໂຊ ສະໂນ ໄດ້ກ່າວວ່າ, “ນີ້ແມ່ນສິດທິພິເສດທີ່ຍິ່ງໃຫຍ່ ຂອງໄພ່ພົນຍຸກສຸດທ້າຍທຸກຄົນ … ນັ້ນແມ່ນສິດຂອງເຮົາ ທີ່ຈະໄດ້ຮັບການສະແດງໃຫ້ປະຈັກຂອງພຣະວິນຍານ ໃນທຸກວັນຂອງຊີວິດເຮົາ.”4
ສິ່ງໜຶ່ງທີ່ພຣະວິນຍານໄດ້ກ່າວກັບຄວາມຄິດຂອງຂ້າພະເຈົ້າ ນັບຕັ້ງແຕ່ຂ້າພະເຈົ້າໄດ້ຮັບການເອີ້ນໃໝ່ ເປັນປະທານຂອງສາດສະໜາຈັກ ແມ່ນພຣະຜູ້ເປັນເຈົ້າເຕັມພຣະໄທ ທີ່ຈະເປີດເຜີຍພຣະດຳລັດ ແລະ ພຣະປະສົງຂອງພຣະອົງ. ສິດທິພິເສດທີ່ຈະໄດ້ຮັບການເປີດເຜີຍ ເປັນຂອງປະທານທີ່ຍິ່ງໃຫຍ່ທີ່ສຸດຂອງພຣະເຈົ້າ ຕໍ່ລູກໆຂອງພຣະອົງ.
ຜ່ານທາງການສະແດງໃຫ້ປະຈັກຂອງພຣະວິນຍານບໍລິສຸດ, ພຣະຜູ້ເປັນເຈົ້າຈະຊ່ວຍເຮົາ ໃນການສະແຫວງຫາທີ່ຊອບທຳທັງໝົດຂອງເຮົາ. ຂ້າພະເຈົ້າຈື່ໄດ້ ຕອນຢູ່ໃນຫ້ອງຜ່າຕັດ, ຂ້າພະເຈົ້າໄດ້ຢືນຢູ່ນຳຄົນໄຂ້—ບໍ່ແນ່ໃຈວ່າ ຈະເຮັດແນວໃດ ກັບວິທີທີ່ບໍ່ເຄີຍເຮັດມາກ່ອນ—ແລ້ວພຣະວິນຍານບໍລິສຸດ ຜູ້ມີປະສົບການຫລາຍ ໄດ້ເປີດເຜີຍວິທີຢູ່ໃນຄວາມຄິດຂອງຂ້າພະເຈົ້າ.5
ເພື່ອໃຫ້ຖ້ອຍຄຳຂອງຂ້າພະເຈົ້າມີນ້ຳໜັກ ຕອນຂໍນາງເວັນດີ ແຕ່ງງານ, ຂ້າພະເຈົ້າໄດ້ເວົ້າວ່າ, “ອ້າຍຮູ້ຈັກການເປີດເຜີຍ ແລະ ຮູ້ວິທີທີ່ຈະຮັບເອົາມັນ.” ສົມແລ້ວທີ່ນາງຄວນຖືກຍ້ອງຍໍ—ແລະ, ຂ້າພະເຈົ້າໄດ້ຮຽນຮູ້, ກ່ຽວກັບບຸກຄະລິກລັກສະນະຂອງນາງ—ນາງໄດ້ທູນຖາມ ແລະ ໄດ້ຮັບການເປີດເຜີຍແລ້ວ ກ່ຽວກັບພວກເຮົາ, ຊຶ່ງຊ່ວຍນາງໃຫ້ກ້າທີ່ຈະເວົ້າວ່າ ແຕ່ງກໍແຕ່ງ.
ໃນຖານະທີ່ເປັນສະມາຊິກ ໃນກຸ່ມອັກຄະສາວົກສິບສອງ, ຂ້າພະເຈົ້າໄດ້ອະທິຖານທຸກວັນຂໍການເປີດເຜີຍ ແລະ ໄດ້ຂອບພຣະໄທພຣະຜູ້ເປັນເຈົ້າ ທຸກເທື່ອທີ່ພຣະອົງໄດ້ກ່າວແກ່ໃຈ ແລະ ຄວາມຄິດຂອງຂ້າພະເຈົ້າ.
ຊ່າງເປັນສິ່ງມະຫັດສະຈັນແທ້ໆ! ບໍ່ວ່າການເອີ້ນຂອງເຮົາໃນສາດສະໜາຈັກຈະເປັນສິ່ງໃດ, ເຮົາສາມາດອະທິຖານຫາພຣະບິດາເທິງສະຫວັນ ແລະ ຮັບການນຳພາ ແລະ ການຊີ້ນຳ, ຮັບການເຕືອນກ່ຽວກັບສິ່ງອັນຕະລາຍ ແລະ ສິ່ງລົບກວນ, ແລະ ຊ່ວຍເຮົາໃຫ້ບັນລຸສິ່ງທີ່ເຮົາບໍ່ສາມາດເຮັດໄດ້ ດ້ວຍຕົວເອງ. ຖ້າຫາກເຮົາໄດ້ຮັບເອົາພຣະວິນຍານບໍລິສຸດແທ້ໆ ແລະ ຮຽນຮູ້ທີ່ຈະເບິ່ງອອກ ແລະ ເຂົ້າໃຈການກະຕຸ້ນຂອງພຣະອົງ, ແລ້ວເຮົາຈະໄດ້ຮັບການນຳພາ ໃນເລື່ອງທີ່ໃຫຍ່ໂຕ ແລະ ເລັກນ້ອຍ.
ຕອນຂ້າພະເຈົ້າຕ້ອງໄດ້ເລືອກເອົາທີ່ປຶກສາສອງທ່ານ, ຂ້າພະເຈົ້າບໍ່ຮູ້ວ່າ ຂ້າພະເຈົ້າຈະເລືອກເອົາແຕ່ສອງຄົນໄດ້ແນວໃດ ຈາກຊາຍສິບສອງຄົນ ຜູ້ຂ້າພະເຈົ້າຮັກ ແລະ ນັບຖື.
ເພາະຂ້າພະເຈົ້າຮູ້ວ່າ ການດົນໃຈທີ່ດີ ແມ່ນອີງຕາມຂໍ້ມູນທີ່ດີ, ສະນັ້ນ ຂ້າພະເຈົ້າຈຶ່ງໄດ້ພົບກັບອັກຄະສາວົກແຕ່ລະຄົນ ເປັນສ່ວນຕົວ.6 ແລ້ວ ຂ້າພະເຈົ້າຈຶ່ງໄດ້ໄປຫາອີກຫ້ອງໜຶ່ງ ຢູ່ໃນພຣະວິຫານ ເພື່ອຢາກຮູ້ພຣະປະສົງຂອງພຣະຜູ້ເປັນເຈົ້າ. ຂ້າພະເຈົ້າເປັນພະຍານໄດ້ວ່າ ພຣະຜູ້ເປັນເຈົ້າໄດ້ແນະນຳຂ້າພະເຈົ້າໃຫ້ເລືອກ ປະທານດາລິນ ເອັຈ ໂອກສ໌ ແລະ ປະທານເຮັນຣີ ບີ ໄອຣິງ ໃຫ້ຮັບໃຊ້ໃນຝ່າຍປະທານສູງສຸດ.
ໃນແບບດຽວກັນນັ້ນ, ຂ້າພະເຈົ້າເປັນພະຍານໄດ້ວ່າ ພຣະຜູ້ເປັນເຈົ້າໄດ້ດົນໃຈໃຫ້ເອີ້ນ ແອວເດີ ແກຣິດ ດັບເບິນຢູ ກອງ ແລະ ແອວເດີ ຢູລິດຊິສ໌ ໂຊອາເຣສ໌ ໃຫ້ຖືກແຕ່ງຕັ້ງເປັນອັກຄະສາວົກຂອງພຣະອົງ. ຂ້າພະເຈົ້າແລະ ພວກເຮົາຂໍຕ້ອນຮັບພວກເພິ່ນ ສູ່ກຸ່ມອ້າຍນ້ອງທີ່ດີເລີດ ແຫ່ງການຮັບໃຊ້.
ເມື່ອພວກເຮົາເຕົ້າໂຮມກັນເປັນສະພາຂອງຝ່າຍປະທານສູງສຸດ ແລະ ກຸ່ມອັກຄະສາວົກສິບສອງ, ຫ້ອງປະຊຸມຂອງພວກເຮົາ ກາຍເປັນຫ້ອງແຫ່ງການເປີດເຜີຍ. ເຫັນໄດ້ຢ່າງແຈ່ມແຈ້ງວ່າ ພຣະວິນຍານສະຖິດຢູ່ນຳ. ເມື່ອພວກເຮົາພະຍາຍາມພິຈາລະນາເລື່ອງທີ່ຫຍຸ້ງຍາກ, ຂັ້ນຕອນທີ່ໜ້າຕື່ນເຕັ້ນໄດ້ເກີດຂຶ້ນ ເມື່ອອັກຄະສາວົກ ແຕ່ລະຄົນໄດ້ອອກຄວາມຄິດຄວາມເຫັນຢ່າງເປັນກັນເອງ. ເຖິງແມ່ນທັດສະນະໃນຕອນຕົ້ນຂອງພວກເຮົາອາດແຕກຕ່າງກັນ, ແຕ່ຄວາມຮັກທີ່ພວກເຮົາຮູ້ສຶກຕໍ່ກັນ ແມ່ນບໍ່ປ່ຽນແປງ. ຄວາມເປັນນ້ຳໜຶ່ງໃຈດຽວກັນຂອງພວກເຮົາ ຊ່ວຍພວກເຮົາໃຫ້ຮູ້ຈັກເຖິງພຣະປະສົງຂອງພຣະຜູ້ເປັນເຈົ້າ ສຳລັບສາດສະໜາຈັກຂອງພຣະອົງ.
ໃນການປະຊຸມຂອງພວກເຮົາ, ມັນບໍ່ຂຶ້ນກັບຈຳນວນຄະແນນສຽງທີ່ຫລາຍກວ່າ! ພວກເຮົາຮັບຟັງກັນແລະກັນ ດ້ວຍການອະທິຖານ ແລະ ປຶກສາຫາລືນຳກັນ ຈົນກວ່າພວກເຮົາເປັນນ້ຳໜຶ່ງໃຈດຽວກັນ. ແລ້ວ ເມື່ອພວກເຮົາເຫັນພ້ອມນຳກັນແລ້ວ, ອິດທິພົນແຫ່ງຄວາມເປັນໜຶ່ງຂອງພຣະວິນຍານບໍລິສຸດ ຈະເຮັດໃຫ້ພວກເຮົາມີຄວາມຕື່ນເຕັ້ນທີ່ສຸດ! ພວກເຮົາໄດ້ປະສົບກັບສິ່ງທີ່ສາດສະດາ ໂຈເຊັບ ສະມິດ ຮູ້ຈັກ ຕອນເພິ່ນໄດ້ສອນວ່າ, “ໂດຍຄວາມຮູ້ສຶກທີ່ເປັນໜຶ່ງ ພວກເຮົາໄດ້ຮັບອຳນາດນຳພຣະເຈົ້າ.”7 ບໍ່ມີສະມາຊິກຄົນໃດໃນຝ່າຍປະທານສູງສຸດ ຫລື ຄົນໃດໃນກຸ່ມອັກຄະສາວົກ ຈະຕັດສິນໃຈເຮັດພາລະກິດຂອງສາດສະໜາຈັກຂອງພຣະຜູ້ເປັນເຈົ້າ ດ້ວຍຕົວເອງ!
ອ້າຍເອື້ອຍນ້ອງທັງຫລາຍ, ເຮົາຈະກາຍເປັນຊາຍ ແລະ ຍິງ—ເປັນຜູ້ຮັບໃຊ້ທີ່ເໝືອນດັ່ງພຣະຄຣິດ—ດັ່ງທີ່ພຣະຜູ້ເປັນເຈົ້າປະສົງໃຫ້ເຮົາເປັນ ໄດ້ແນວໃດ? ເຮົາຈະພົບເຫັນຄຳຕອບຕໍ່ຄຳຖາມທີ່ສັບສົນໄດ້ແນວໃດ? ຖ້າຫາກປະສົບການທີ່ຍອດຢ້ຽມຂອງໂຈເຊັບ ສະມິດ ຢູ່ໃນປ່າສັກສິດ ສິດສອນເຮົາກ່ຽວກັບສິ່ງໃດ, ມັນກໍຄົງເປັນວ່າ ສະຫວັນໄດ້ເປີດອອກ ແລະ ວ່າພຣະເຈົ້າໄດ້ກ່າວກັບລູກໆຂອງພຣະອົງ.
ສາດສະດາໂຈເຊັບ ສະມິດ ໄດ້ສ້າງແບບແຜນໄວ້ໃຫ້ເຮົາ ເພື່ອເຮັດຕາມ ໃນການຊອກຫາຄຳຕອບ ໃຫ້ແກ່ຄຳຖາມຂອງເຮົາ. ຄຳສັນຍາຂອງຢາໂກໂບແມ່ນ ຖ້າຫາກເຮົາຂາດສະຕິປັນຍາ ໃຫ້ເຮົາທູນຂໍຈາກພຣະເຈົ້າ,8 ຊາຍໜຸ່ມໂຈເຊັບ ຈຶ່ງໄດ້ນຳເອົາຄຳຖາມຂອງເພິ່ນ ໄປທູນຖາມພຣະບິດາເທິງສະຫວັນເອງ. ເພິ່ນໄດ້ສະແຫວງຫາການເປີດເຜີຍສ່ວນຕົວ, ແລະ ການສະແຫວງຫາຂອງເພິ່ນ ໄດ້ເປີດຍຸກສະໄໝໃໝ່ນີ້.
ໃນແບບດຽວກັນນັ້ນ, ການສະແຫວງຫາຂອງທ່ານ ໄດ້ເປີດຫຍັງແດ່ສຳລັບທ່ານ? ທ່ານຂາດສະຕິປັນຍາໃນເລື່ອງອັນໃດ? ທ່ານຢາກຮູ້ ຫລື ເຂົ້າໃຈສິ່ງໃດແດ່ໄວໆ? ໃຫ້ເຮັດຕາມຕົວຢ່າງຂອງສາດສະດາໂຈເຊັບ. ໃຫ້ຊອກຫາບ່ອນທີ່ງຽບໆ ທີ່ທ່ານສາມາດໄປຫາໄດ້ເປັນປະຈຳ. ໃຫ້ຖ່ອມຕົວລົງຢູ່ຕໍ່ພຣະພັກຂອງພຣະເຈົ້າ. ໃຫ້ເປີດໃຈຕໍ່ພຣະບິດາເທິງສະຫວັນຂອງທ່ານ. ໃຫ້ຫັນໄປຫາພຣະອົງ ເພື່ອຄຳຕອບ ແລະ ການປອບໂຍນ.
ຈົ່ງອະທິຖານໃນພຣະນາມຂອງພຣະເຢຊູຄຣິດ ກ່ຽວກັບບັນຫາ, ຄວາມຢ້ານກົວ, ແລະ ຄວາມອ່ອນແອຂອງທ່ານ—ແມ່ນແລ້ວ, ກ່ຽວກັບຄວາມປາດຖະໜາຂອງໃຈທ່ານ. ແລ້ວໃຫ້ຮັບຟັງ! ໃຫ້ຂຽນແນວຄິດທີ່ມາສູ່ຈິດໃຈຂອງທ່ານໄວ້. ບັນທຶກຄວາມຮູ້ສຶກຂອງທ່ານ ແລະ ເຮັດຕາມການກະຕຸ້ນທີ່ທ່ານໄດ້ຮັບ. ເມື່ອທ່ານເຮັດຕາມຂັ້ນຕອນນີ້ທຸກມື້, ທຸກເດືອນ, ທຸກປີ, ແລ້ວທ່ານຈະ “ເຕີບໂຕຢູ່ໃນຫລັກທຳແຫ່ງການເປີດເຜີຍ.”9
ພຣະເຈົ້າ ຢາກ ກ່າວກັບທ່ານແທ້ໆບໍ? ແມ່ນແລ້ວ! ດັ່ງມະນຸດຈະເດ່ແຂນອັນບອບບາງຂອງເຂົາອອກໄປຢຸດແມ່ນ້ຳມີເຊີຣີ ບໍ່ໃຫ້ໄຫລໄປຕາມທິດທາງຂອງມັນບໍ່ໄດ້ສັນໃດ … ກໍຈະບໍ່ສາມາດຂັດຂວາງພຣະຜູ້ຊົງລິດອຳນາດຍິ່ງໃຫຍ່ ໃຫ້ຖອກເທຄວາມຮູ້ຈາກສະຫວັນລົງມາເທິງຫົວຂອງໄພ່ພົນຍຸກສຸດທ້າຍບໍ່ໄດ້ສັນນັ້ນ.”10
ທ່ານບໍ່ຈຳເປັນຕ້ອງສົງໄສກ່ຽວກັບຄວາມຈິງ.11 ທ່ານບໍ່ຈຳເປັນຕ້ອງສົງໄສວ່າ ທ່ານຄວນໄວ້ວາງໃຈຜູ້ໃດ. ຜ່ານທາງການເປີດເຜີຍສ່ວນຕົວ, ທ່ານສາມາດໄດ້ຮັບການເປັນພະຍານ ດ້ວຍຕົວເອງ ວ່າພຣະຄຳພີມໍມອນ ເປັນພຣະຄຳຂອງພຣະເຈົ້າ, ວ່າໂຈເຊັບ ສະມິດ ເປັນສາດສະດາ, ແລະ ວ່ານີ້ແມ່ນສາດສະໜາຈັກຂອງພຣະຜູ້ເປັນເຈົ້າ. ບໍ່ວ່າໃຜຈະເວົ້າຫຍັງ ຫລື ເຮັດຫຍັງ, ບໍ່ມີໃຜສາມາດເອົາປະຈັກພະຍານທີ່ກ່າວແກ່ໃຈທ່ານ ກ່ຽວກັບສິ່ງໃດທີ່ເປັນຄວາມຈິງ ໄປຈາກທ່ານໄດ້.
ຂ້າພະເຈົ້າຂໍໃຫ້ທ່ານຈົ່ງເອື້ອມອອກໄປ ໃຫ້ໄກກວ່າຄວາມສາມາດທາງວິນຍານຂອງທ່ານຈະເຮັດໄດ້ ເພື່ອຮັບເອົາການເປີດເຜີຍສ່ວນຕົວ, ເພາະພຣະຜູ້ເປັນເຈົ້າໄດ້ສັນຍາວ່າ ຖ້າຫາກເຮົາຈະສະແຫວງຫາ, ເຮົາຈະໄດ້ຮັບການເປີດເຜີຍຕື່ມໃສ່ການເປີດເຜີຍ, ຄວາມຮູ້ຕື່ມໃສ່ຄວາມຮູ້, ເພື່ອວ່າເຮົາຈະຮູ້ຄວາມລຶກລັບ ແລະ ສິ່ງທີ່ເປັນສັນຕິສຸກ—ສິ່ງຊຶ່ງນຳຄວາມຊື່ນຊົມມາໃຫ້, ສິ່ງຊຶ່ງນຳຊີວິດນິລັນດອນມາໃຫ້.12
ໂອ້, ມັນມີຫລາຍສິ່ງຫລາຍຢ່າງທີ່ພຣະບິດາຜູ້ສະຖິດຢູ່ໃນສະຫວັນ ຢາກໃຫ້ທ່ານຮູ້ຈັກ. ດັ່ງທີ່ແອວເດີ ນຽວ ເອ ແມ໊ກສະແວວ ໄດ້ສອນວ່າ, “ຕໍ່ຜູ້ທີ່ມີຕາ ທີ່ສາມາດຫລຽວເຫັນ ແລະ ມີຫູ ທີ່ສາມາດໄດ້ຍິນ, ມັນແຈ່ມແຈ້ງທີ່ວ່າ ພຣະບິດາ ແລະ ພຣະບຸດ ໄດ້ເປີດເຜີຍຄວາມລຶກລັບແຫ່ງຈັກກະວານແລ້ວ!”13
ບໍ່ມີສິ່ງໃດ ສາມາດເປີດສະຫວັນ ໄດ້ດີໄປກວ່າ ຄວາມບໍລິສຸດ, ການເຊື່ອຟັງແທ້ໆ, ການສະແຫວງຫາຢ່າງພາກພຽນ, ການຊື່ນຊົມຢູ່ກັບພຣະຄຳຂອງພຣະຄຣິດ ໃນພຣະຄຳພີມໍມອນ,14 ແລະ ຄວາມຕັ້ງໃຈທີ່ຈະໄປພຣະວິຫານ ແລະ ເຮັດວຽກງານການສືບປະຫວັດຄອບຄົວ ເປັນປະຈຳ.
ແນ່ນອນ, ມັນຈະມີເວລາທີ່ທ່ານຮູ້ສຶກວ່າ ສະຫວັນປິດຢູ່. ແຕ່ຂ້າພະເຈົ້າສັນຍາວ່າ ເມື່ອທ່ານເຊື່ອຟັງຕໍ່ໄປ, ສະແດງຄວາມກະຕັນຍູສຳລັບພອນທຸກປະການ ທີ່ພຣະຜູ້ເປັນເຈົ້າໄດ້ມອບໃຫ້ທ່ານ, ແລະ ເມື່ອທ່ານໃຫ້ກຽດແກ່ເວລາຂອງພຣະຜູ້ເປັນເຈົ້າ, ແລ້ວທ່ານຈະໄດ້ຮັບຄວາມຮູ້ ແລະ ຄວາມເຂົ້າໃຈ ທີ່ທ່ານສະແຫວງຫາ. ພອນທຸກປະການທີ່ພຣະຜູ້ເປັນເຈົ້າມີສຳລັບທ່ານ—ການມະຫັດສະຈັນທຸກຢ່າງ—ຈະຕິດຕາມມາ. ນີ້ຄືສິ່ງທີ່ການເປີດເຜີຍສ່ວນຕົວ ຈະເຮັດເພື່ອທ່ານ.
ຂ້າພະເຈົ້າຄິດໃນແງ່ດີ ກ່ຽວກັບອະນາຄົດ. ມັນຈະເຕັມໄປດ້ວຍໂອກາດສຳລັບເຮົາທຸກຄົນ ທີ່ຈະກ້າວໜ້າ, ມີສ່ວນຊ່ວຍສົມທົບ, ແລະ ນຳເອົາພຣະກິດຕິຄຸນໄປສູ່ທຸກມຸມຂອງໂລກ. ແຕ່ຂ້າພະເຈົ້າກໍຮູ້ດີ ກ່ຽວກັບວັນເວລາຂ້າງໜ້າ. ເຮົາມີຊີວິດຢູ່ໃນໂລກ ທີ່ຊັບຊ້ອນ ແລະ ມີຄວາມຂັດແຍ້ງກັນຫລາຍ. ສື່ສານມວນຊົນກໍມີບໍລິການຕະຫລອດ 24 ຊົ່ວໂມງ, ບຸກລຸກເຮົາດ້ວຍຂ່າວສານ ຢ່າງບໍ່ເຫືອດຫາຍ. ຖ້າເຮົາຍັງມີຫວັງທີ່ຈະສາມາດໃຈ້ແຍກສຽງ ແລະ ທິດສະດີຂອງມະນຸດ ທີ່ໂຈມຕີຄວາມຈິງ, ແລ້ວເຮົາຕ້ອງຮຽນຮູ້ວິທີທີ່ຈະໄດ້ຮັບການເປີດເຜີຍ.
ພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ, ພຣະເຢຊູຄຣິດ, ຈະສະແດງວຽກງານທີ່ຍິ່ງໃຫຍ່ທີ່ສຸດຂອງພຣະອົງ ນັບຈາກເວລານີ້ໄປ ຈົນເຖິງເວລາທີ່ພຣະອົງສະເດັດມາອີກ. ເຮົາຈະໄດ້ເຫັນການມະຫັດສະຈັນ ທີ່ບົ່ງບອກວ່າ ພຣະເຈົ້າ ອົງເປັນພຣະບິດາ ແລະ ພຣະບຸດຂອງພຣະອົງ, ພຣະເຢຊູຄຣິດ, ຄວບຄຸມສາດສະໜາຈັກນີ້ ໃນຄວາມສະຫງ່າລາສີ ແລະ ດ້ວຍລັດສະໝີພາບ. ແຕ່ໃນອະນາຄົດ, ມັນເປັນໄປບໍ່ໄດ້ ທີ່ເຮົາຈະປອດໄພທາງວິນຍານ ຖ້າປາດສະຈາກການນຳພາ, ການຊີ້ນຳ, ແລະ ອິດທິພົນທີ່ປອບໂຍນ ຂອງພຣະວິນຍານບໍລິສຸດ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າຂໍໃຫ້ທ່ານຈົ່ງຂະຫຍາຍຄວາມສາມາດທາງວິນຍານຂອງທ່ານ ເພື່ອຈະໄດ້ຮັບການເປີດເຜີຍ. ຂໍໃຫ້ວັນອິດສະເຕີນີ້ ເປັນເວລາແຫ່ງການຫລໍ່ຫລອມ ໃນຊີວິດຂອງທ່ານ. ໃນການເລືອກທີ່ຈະເຮັດສິ່ງທີ່ເປັນທາງວິນຍານ ທ່ານຈະຊື່ນຊົມກັບຂອງປະທານແຫ່ງພຣະວິນຍານບໍລິສຸດ ແລະ ໄດ້ຍິນສຸລະສຽງຂອງພຣະວິນຍານຫລາຍກວ່າເກົ່າ ແລະ ແຈ່ມແຈ້ງກວ່າເກົ່າ.
ຂ້າພະເຈົ້າຂໍແນະນຳທ່ານ ຮ່ວມກັບໂມໂຣໄນ ໃນວັນຊະບາໂຕ ບຸນອິດສະເຕີມື້ນີ້ ວ່າ “ໃຫ້ມາຫາພຣະຄຣິດ, ແລະ ຍຶດຖືຂອງປະທານທີ່ດີໄວ້ທຸກຢ່າງ,”15 ເລີ່ມຕົ້ນດ້ວຍຂອງປະທານແຫ່ງພຣະວິນຍານບໍລິສຸດ, ຊຶ່ງຂອງປະທານນີ້ ສາມາດປ່ຽນຊີວິດຂອງທ່ານໄດ້.
ເຮົາເປັນຜູ້ຕິດຕາມພຣະເຢຊູຄຣິດ. ຄວາມຈິງທີ່ສຳຄັນທີ່ສຸດ ທີ່ພຣະວິນຍານບໍລິສຸດ ຈະເປັນພະຍານຕໍ່ທ່ານ ແມ່ນພຣະເຢຊູ ຄື ພຣະຄຣິດ, ພຣະບຸດຂອງພຣະເຈົ້າ ທີ່ຊົງພຣະຊົນຢູ່. ພຣະອົງຊົງພຣະຊົນ! ພຣະອົງເປັນຜູ້ວິງວອນແທນນຳພຣະບິດາ, ເປັນຕົວຢ່າງ, ແລະ ເປັນພຣະຜູ້ໄຖ່ຂອງເຮົາ. ໃນວັນອາທິດບຸນອິດສະເຕີນີ້, ເຮົາສະເຫລີມສະຫລອງການເສຍສະລະຊົດໃຊ້ຂອງພຣະອົງ, ການຟື້ນຄືນພຣະຊົນແທ້ໆຂອງພຣະອົງ, ແລະ ການເປັນພຣະເຈົ້າຂອງພຣະອົງ.
ນີ້ແມ່ນສາດສະໜາຈັກຂອງພຣະອົງ, ໄດ້ຖືກຟື້ນຟູຜ່ານທາງສາດສະດາໂຈເຊັບ ສະມິດ. ຂ້າພະເຈົ້າເປັນພະຍານ, ດ້ວຍການສະແດງຄວາມຮັກຕໍ່ທ່ານທັງຫລາຍ, ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.