សេចក្ដីសង្ឃឹមនៅក្នុងព្រះគ្រីស្ទ
យើងចង់ជួយមនុស្សទាំងអស់ ដែលមានអារម្មណ៍ឯកោ ឬមានអារម្មណ៍ថាពួកគេមិនចុះចំណោម ។ ខ្ញុំសូមលើកឡើងជាពិសេសចំពោះអ្នកដែលនៅលីវនាពេលនេះ ។
បងប្អូនប្រុសស្រី នៅរដូវបុណ្យអ៊ីស្ទើរនេះ យើងផ្ដោតលើការមានព្រះជន្មរស់ឡើងវិញដ៏រុងរឿងរបស់ព្រះអម្ចាស់ និងព្រះអង្គសង្គ្រោះរបស់យើង គឺព្រះយេស៊ូវគ្រីស្ទ ។ យើងចាំពីការអញ្ជើញពេញដោយក្ដីស្រឡាញ់របស់ទ្រង់ថា « អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សម្រាក ។
« ចូរទទួលនឹមខ្ញុំ ហើយរៀននឹងខ្ញុំចុះ ដ្បិតខ្ញុំស្លូត ហើយមានចិត្តសុភាព ៖នោះអ្នករាល់គ្នានឹងបានសម្រាកដល់ព្រលឹង ។
ពីព្រោះនឹមខ្ញុំងាយទេ ហើយបន្ទុកខ្ញុំក៏ស្រាល » ។១
ការអញ្ជើញរបស់ព្រះអង្គសង្គ្រោះឲ្យមករកទ្រង់ គឺជាការអញ្ជើញដល់មនុស្សទាំងអស់ មិនត្រឹមតែឲ្យមករកទ្រង់ប៉ុណ្ណោះទេ ប៉ុន្ដែថែមទាំងឲ្យជាចំណែកកម្មសិទ្ធិក្នុងសាសនាចក្ររបស់ទ្រង់ផងដែរ ។
នៅខមុនការអញ្ជើញដែលពេញដោយក្ដីស្រឡាញ់នេះ ព្រះយេស៊ូវបង្រៀនពីរបៀបធ្វើការណ៍នេះ តាមរយៈការព្យាយាមធ្វើតាមទ្រង់ ។ ទ្រង់បានប្រកាសថា « គ្រប់សេចក្តីទាំងអស់បានប្រគល់មកខ្ញុំពីព្រះវរបិតានៃខ្ញុំ ហើយគ្មានអ្នកណា [ ម្នាក់ ] ស្គាល់ព្រះរាជបុត្រាទេ មានតែព្រះវរបិតាតែ១ ក៏គ្មានអ្នកណា [ ម្នាក់ ] ស្គាល់ព្រះវរបិតាដែរ មានតែព្រះរាជបុត្រា ហើយនិងអ្នកណា [ ម្នាក់ ] ដែលព្រះរាជបុត្រាសព្វព្រះហឫទ័យចង់បើកឲ្យស្គាល់ទ្រង់ផងប៉ុណ្ណោះ » ។២
ព្រះយេស៊ូវសព្វព្រះទ័យឲ្យយើងដឹងថា ព្រះគឺជាព្រះវរបិតាសួគ៌ដែលពេញដោយក្ដីស្រឡាញ់ ។
ការដឹងថា ព្រះវរបិតាសួគ៌របស់យើងស្រឡាញ់យើង នឹងជួយយើងឲ្យដឹងថា យើងជានរណា ហើយដឹងថា យើងជាកម្មសិទ្ធិក្នុងគ្រួសារអស់កល្បជានិច្ចដ៏មហិមារបស់ទ្រង់ ។
គ្លីនិក ម៉ាយ៉ូ បានកត់សម្គាល់នាពេលថ្មីៗនេះថា « ការមានអារម្មណ៍ថាខ្លួនជាចំណែកកម្មសិទ្ធិមួយ មានសារៈសំខាន់ខ្លាំងណាស់ ។ … ស្ទើរតែគ្រប់ផ្នែកទាំងអស់នៃជីវិតយើង ត្រូវបានរៀបចំឡើងជាចំណែកកម្មសិទ្ធិរបស់អ្វីមួយ » ។ របាយការណ៍នេះបានបន្ថែមថា « យើងមិនអាចបំបែកសារៈសំខាន់នៃការមានអារម្មណ៍ជាចំណែកកម្មសិទ្ធិ ពីសុខភាពផ្លូវកាយ និងផ្លូវចិត្តរបស់យើងបានទេ »៣ហើយខ្ញុំសូមបន្ថែមសុខភាពខាងវិញ្ញាណរបស់យើងផងដែរ ។
នៅល្ងាចមុនពេលការរងទុក្ខរបស់ទ្រង់នៅច្បារគែតសេម៉ានី និងការសុគតនៅលើឈើឆ្កាង ព្រះអង្គសង្គ្រោះបានជួបនឹងពួកសិស្សរបស់ទ្រង់នៅអាហារពេលល្ងាចចុងក្រោយ ។ ទ្រង់មានបន្ទូលទៅកាន់ពួកគេថា « នៅលោកីយ៍នេះ នោះអ្នករាល់គ្នាមានសេចក្តីវេទនាមែនប៉ុន្តែ ត្រូវសង្ឃឹមឡើង ដ្បិតខ្ញុំបានឈ្នះលោកីយ៍ហើយ » ។៤ មុនពេលថ្ងៃលិចនៅថ្ងៃបន្ទាប់ ព្រះយេស៊ូវគ្រីស្ទបានរងទុក្ខ ហើយបាន « បានសុគត [ នៅលើឈើឆ្កាង ] ដោយព្រោះបាបរបស់យើងរាល់គ្នា » ។៥
ខ្ញុំឆ្ងល់ថា តើស្ដ្រី និងបុរសដ៏ស្មោះត្រង់ដែលបានដើរតាមទ្រង់នៅក្រុងយេរូសាឡិម មានអារម្មណ៍ឯកោប៉ុណ្ណាទៅ កាលព្រះអាទិត្យអស្ដង្គត ហើយភាពងងឹត និងការភ័យខ្លាចបានហ៊ុមព័ទ្ធពួកគេ ។៦
ដូចជាពួកសិស្សពីបុរាណទាំងនេះកាលពីជិត ២០០០ ឆ្នាំកន្លងទៅដែរ បងប្អូនភាគច្រើនក៏អាចមានអារម្មណ៍ឯកោពេលខ្លះផងដែរ ។ ខ្ញុំមានអារម្មណ៍ឯកោនេះ តាំងពីឧត្តមភរិយារបស់ខ្ញុំ បាបារ៉ា បានលាចាកលោកទៅជាងពីរឆ្នាំកន្លះមកហើយ ។ ខ្ញុំដឹងពីអារម្មណ៍ដែលបានជុំជិតដោយសមាជិកគ្រួសារ មិត្តភក្ដិ និងសហការី ប៉ុន្ដែនៅតែមានអារម្មណ៍ឯកោ—ដោយសារម្ចាស់ជីវិតខ្ញុំលែងនៅក្បែរខ្ញុំទៀតហើយ ។
ជំងឺរាតត្បាត កូវីដ-១៩ នេះបានគូសបញ្ជាក់ពីការមានអារម្មណ៍ឯកឯង និងភាពឯកោសម្រាប់មនុស្សជាច្រើន ។ ទោះយ៉ាងណា ថ្វីបើយើងមានឧបសគ្គក្នុងជីវិតក្ដី ដូចជាព្រឹកបុណ្យអ៊ីស្ទើរទីមួយនោះដែរ យើងអាចចាប់ផ្ដើមជីវិតថ្មីមួយក្នុងព្រះគ្រីស្ទដោយមានលទ្ធភាពថ្មីៗ និងអស្ចារ្យជាច្រើន ព្រមទាំងតថភាពថ្មីៗ កាលយើងងាកទៅរកព្រះអម្ចាស់ដើម្បីបានក្ដីសង្ឃឹម និងចំណែកកម្មសិទ្ធិ ។
ខ្ញុំខ្លួនឯងដឹងពីការឈឺចាប់របស់អស់អ្នកដែលខ្វះអារម្មណ៍មានចំណែកជាកម្មសិទ្ធិ ។ កាលខ្ញុំមើលព័ត៌មានជុំវិញពិភពលោក ខ្ញុំឃើញមនុស្សជាច្រើនដែលហាក់មានភាពឯកោនេះដែរ ។ ហើយខ្ញុំគិតថា សម្រាប់មនុស្សជាច្រើន វាគឺដោយសារពួកគេអាចមិនដឹងថា ព្រះវរបិតាសួគ៌ស្រឡាញ់ពួកគេ ហើយថាយើងទាំងអស់គ្នាជាចំណែកកម្មសិទ្ធិក្នុងគ្រួសារដ៏អស់កល្បរបស់ទ្រង់ ។ ការជឿថាព្រះស្រឡាញ់យើង ហើយថាយើងគឺជាបុត្រាបុត្រីរបស់ទ្រង់ វាលួងលោម និងអះអាងដល់យើង ។
ដោយសារយើងគឺជាកូនវិញ្ញាណរបស់ព្រះ នោះមនុស្សគ្រប់គ្នាមានដើមកំណើត និស្ស័យ និងសក្ដានុពលដ៏ទេវភាព ។ យើងម្នាក់ៗគឺជា « បុត្រា ឬបុត្រីសំណព្វខាងវិញ្ញាណរបស់ព្រះមាតាបិតាសួគ៌ » ។៧ នេះគឺជាអត្តសញ្ញាណរបស់យើង ! នេះគឺពិតជារូបយើងមែន !
អត្តសញ្ញាណខាងវិញ្ញាណរបស់យើងរីកចម្រើន ពេលយើងយល់ពីអត្តសញ្ញាណនៃជីវិតរមែងស្លាប់ជាច្រើនរបស់យើង មានដូចជា កេរ្ដិ៍តំណែលជាតិពន្ធ វប្បធម៌ ឬជាតិសាសន៍ ។
ញ្ញាណនៃអត្តសញ្ញាណខាងវិញ្ញាណ និងខាងវប្បធម៌ នៃសេចក្ដីស្រឡាញ់ និងនៃចំណែកកម្មសិទ្ធិនេះ អាចបំផុសឲ្យមានក្ដីសង្ឃឹម និងក្ដីស្រឡាញ់ចំពោះព្រះយេស៊ូវគ្រីស្ទ ។
ខ្ញុំនិយាយអំពីសេចក្ដីសង្ឃឹមនៅក្នុងព្រះគ្រីស្ទនេះ មិនមែនក្នុងការស្រមើស្រមៃនោះទេ ។ ផ្ទុយទៅវិញ ខ្ញុំនិយាយពីសេចក្ដីសង្ឃឹម ដែលជាការរំពឹងទុកដែលនឹងកើតឡើង ។ សេចក្ដីសង្ឃឹមបែបនោះគឺចាំបាច់ដើម្បីយកឈ្នះលើទុក្ខលំបាក បង្កើតឲ្យមានភាពធន់ និងកម្លាំងខាងវិញ្ញាណ ហើយដឹងថា ព្រះវរបិតាដ៏អស់កល្បរបស់យើងស្រឡាញ់យើង ហើយថាយើងគឺជាបុត្រាបុត្រីរបស់ទ្រង់ ដែលជាចំណែកកម្មសិទ្ធិក្នុងគ្រួសាររបស់ទ្រង់ ។
ពេលយើងមានសេចក្ដីសង្ឃឹមនៅក្នុងព្រះគ្រីស្ទ នោះយើងដឹងថា កាលយើងត្រូវចុះ និងរក្សាសេចក្ដីសញ្ញាដ៏ពិសិដ្ឋ នោះបំណងប្រាថ្នា និងក្ដីស្រមៃដ៏ល្អបំផុតរបស់យើងអាចត្រូវបំពេញបានតាមរយៈទ្រង់ ។
កូរ៉ុមនៃពួកសាវកដប់ពីរនាក់បានធ្វើការប្រឹក្សារួមគ្នាដោយវិញ្ញាណនៃការអធិស្ឋាន និងការចង់យល់ដឹងយ៉ាងខ្លាំងពីរបៀបដើម្បីជួយមនុស្សទាំងអស់ ដែលមានអារម្មណ៍ឯកោ ឬមានអារម្មណ៍ថាពួកគេមិនចូលចំណោមគេ ។ យើងចង់ជួយមនុស្សទាំងអស់ដែលមានអារម្មណ៍បែបនេះ ។ ខ្ញុំសូមលើកឡើងជាពិសេសចំពោះអ្នកដែលនៅលីវនាពេលនេះ ។
បងប្អូនប្រុសស្រីអើយ មជ្ឈិមវ័យក្នុងសាសនាចក្រជាងពាក់កណ្ដាលសព្វថ្ងៃនេះគឺជាស្រ្តីមេម៉ាយ ជាពោះម៉ាយ លែងលះគ្នា ឬមិនទាន់រៀបការ ។ មនុស្សមួយចំនួនឆ្ងល់ពីឱកាស និងទីតាំងរបស់ខ្លួននៅក្នុងផែនការរបស់ព្រះ និងក្នុងសាសនាចក្រនេះ ។ យើងគួរតែយល់ថា ជីវិតដ៏អស់កល្បមិនមែនគ្រាន់តែជាសំណួរមួយអំពីស្ថានភាពអាពាហ៍ពិពាហ៍បច្ចុប្បន្ននោះទេ ប៉ុន្ដែពីភាពជាសិស្ស និងការមានចិត្ត « ក្លាហានក្នុងទីបន្ទាល់ពីព្រះយេស៊ូវ » ។៨ សេចក្ដីសង្ឃឹមរបស់មនុស្សទាំងអស់ដែលនៅលីវ គឺដូចគ្នានឹងសេចក្ដីសង្ឃឹមរបស់សមាជិកទាំងអស់ក្នុងសាសនាចក្រដែលបានស្ដារឡើងវិញរបស់ព្រះអម្ចាស់ដែរ—មានសិទ្ធិទទួលបានព្រះគុណរបស់ព្រះគ្រីស្ទតាមរយៈ « ការគោរពតាមក្រឹត្យវិន័យ និងពិធីបរិសុទ្ធទាំងឡាយនៃដំណឹងល្អ » ។៩
ខ្ញុំសូមផ្ដល់យោបល់ពីគោលការណ៍សំខាន់មួយចំនួនដែលយើងត្រូវយល់ ។
ទីមួយ ព្រះគម្ពីរ និងពួកព្យាការីថ្ងៃចុងក្រោយបញ្ជាក់ថា មនុស្សគ្រប់គ្នាដែលស្មោះត្រង់ក្នុងការរក្សាសេចក្ដីសញ្ញានៃដំណឹងល្អ នឹងមានឱកាសសម្រាប់ភាពលើកតម្កើង ប្រធាន រ័សុល អិម ណិលសុន បានបង្រៀនថា « តាមរបៀប និងពេលវេលារបស់ព្រះអម្ចាស់ផ្ទាល់ នោះពុំមានពរជ័យណាដែលនឹងត្រូវដកចេញពីពួកបរិសុទ្ធដ៏ស្មោះត្រង់របស់ទ្រង់នោះទេ ។ ព្រះអម្ចាស់នឹងកាត់សេចក្ដី ហើយប្រទានរង្វាន់ដល់បុគ្គលម្នាក់ៗ ស្របតាមបំណងប្រាថ្នាដ៏ស្មោះសរ និងទង្វើរបស់គេ » ។១០
ទីពីរ ពេលវេលា និងរបៀបជាក់លាក់ដែលពរជ័យនៃភាពលើកតម្កើងត្រូវបានប្រទានមកនោះ ពុំទាន់បានបើកសម្ដែងអស់នៅឡើយ ប៉ុន្ដែវាត្រូវបានធានា១១ប្រធាន ដាល្លិន អេក អូក បានពន្យល់ថា កាលៈទេសៈមួយចំនួន « ក្នុងជីវិតរមែងស្លាប់នឹងត្រូវដាក់ឲ្យត្រឹមត្រូវនៅគ្រាសហសវត្សរ៍ ដែលជាពេលសម្រាប់ការបំពេញអ្វីទាំងអស់ ដែលមិនពេញលេញក្នុងផែនការនៃសុភមង្គលដ៏អស្ចារ្យ សម្រាប់បុត្រាបុត្រីដ៏ស័ក្ដិសមទាំងអស់របស់ព្រះវរបិតាយើង » ។១២
ការណ៍នោះមិនមែនមានន័យថា ពរជ័យទាំងអស់ត្រូវពន្យារពេលរហូតដល់សហសវត្សរ៍នោះទេ ពរជ័យខ្លះបានទទួលរួចហើយ ហើយពរជ័យផ្សេងទៀតនឹងបន្ដទទួលបានរហូតដល់ថ្ងៃនោះ ។១៣
ទីបី ការរង់ចាំដល់ព្រះអម្ចាស់មានន័យថា ការបន្ដគោរពប្រតិបត្តិ និងរីកចម្រើនខាងវិញ្ញាណឆ្ពោះទៅកាន់ទ្រង់ ការរង់ចាំមិនមែនមានន័យថា ការទន្ទឹងចាំដោយគ្មានសកម្មភាពនោះទេ ។ បងប្អូនមិនគួរមានអារម្មណ៍ថា បងប្អូនស្ថិតក្នុងបន្ទប់ រង់ចាំនោះទេ ។
ការរង់ចាំព្រះអម្ចាស់គឺផ្តោត ពីសកម្មភាព ។ ខ្ញុំបានរៀនជាច្រើនឆ្នាំមកហើយថា សេចក្តីសង្ឃឹមរបស់យើងលើព្រះគ្រីស្ទកើនឡើងនៅពេលយើងបម្រើដល់អ្នកដទៃទៀត ។ ការបម្រើដូចព្រះយេស៊ូវបានបម្រើ នោះយើងបង្កើនសេចក្តីសង្ឃឹមរបស់យើងចំពោះទ្រង់ ។
ការរីកចម្រើនផ្ទាល់ខ្លួនដែលបុគ្គលម្នាក់អាចសម្រេចបាននាពេលនេះ ខណៈរង់ចាំដល់ព្រះអម្ចាស់ និងការសន្យារបស់ទ្រង់ គឺជាធាតុដ៏មានតម្លៃ និងពិសិដ្ឋមួយនៅក្នុងផែនការរបស់ទ្រង់សម្រាប់ពួកយើងម្នាក់ៗ ។ ការរួមចំណែកដ៏សំខាន់បំផុតដែលបុគ្គលម្នាក់អាចធ្វើបាននាពេលនេះ គឺត្រូវជួយស្ថាបនាសាសនាចក្រនៅលើផែនដី និងប្រមូលផ្ដុំអ៊ីស្រាអែល ។ ស្ថានភាពអាពាហ៍ពិពាហ៍ពុំមានអ្វីទាក់ទងនឹងសមត្ថភាពបម្រើរបស់បុគ្គលម្នាក់ឡើយ ។ ព្រះអម្ចាស់សាទរដល់អស់អ្នកដែលបម្រើ ហើយរង់ចាំដល់ទ្រង់ដោយការអត់ធ្មត់ និងសេចក្ដីជំនឿ ។១៤
ទីបួន ព្រះប្រទានជីវិតដ៏អស់កល្បដល់បុត្រាបុត្រីរបស់ទ្រង់ទាំងអស់ មនុស្សទាំងអស់ដែលទទួលយកអំណោយទានដ៏រុងរឿងនៃការប្រែចិត្តរបស់ព្រះអង្គសង្គ្រោះ ហើយរស់នៅតាមបទបញ្ញតិ្តរបស់ទ្រង់ នឹងទទួលបានជីវិតដ៏នៅអស់កល្បជានិច្ច ទោះជាពួកគេមិនទទួលបានលក្ខណៈសម្បត្តិ និងភាពល្អឥតខ្ចោះទាំងអស់ក្នុងជីវិតរមែងស្លាប់នេះក្ដី ។ អស់អ្នកដែលប្រែចិត្តនឹងទទួលបានការត្រៀមជាស្រេចដើម្បីអភ័យទោសរបស់ព្រះអម្ចាស់ ដូចទ្រង់បានធានាអះអាងថា « មែនហើយ ហើយដរាបណារាស្ត្រយើងប្រែចិត្ត យើងនឹងអត់ទោសឲ្យគេចំពោះការរំលងច្បាប់ទាំងឡាយដែលគេបានប្រព្រឹត្តទាស់នឹងយើង » ។១៥
ក្នុងការវិភាគចុងក្រោយនេះ សមត្ថភាព បំណងប្រាថ្នា និងឱកាសរបស់បុគ្គលម្នាក់ទាក់ទងនឹងសិទ្ធិជ្រើសរើស និងការជ្រើសរើស រួមមានភាពស័ក្ដិសមសម្រាប់ពរជ័យដ៏អស់កល្ប គឺជារឿងដែលមានតែព្រះអម្ចាស់ប៉ុណ្ណោះដែលអាចកាត់សេចក្ដីបាន ។
ទីប្រាំ ទំនុកចិត្តរបស់យើងលើការធានាអះអាងទាំងនេះមានឫសគល់ពីសេចក្ដីជំនឿរបស់យើងលើព្រះយេស៊ូវគ្រីស្ទ ដែលតាមរយៈព្រះគុណទ្រង់ នោះគ្រប់ការណ៍ទាំងអស់ទាក់ទងនឹងជីវិតរមែងស្លាប់ នឹងត្រូវបានដាក់ឲ្យត្រឹមត្រូវ១៦តាមរយៈដង្វាយធួនរបស់ទ្រង់ នោះពរជ័យដែលបានសន្យាទាំងអស់កើតឡើងបានតាមរយៈទ្រង់ ព្រោះទ្រង់ « បានយាងចុះក្រោមគ្រប់ទាំងអស់ »១៧ហើយបាន « ឈ្នះលោកីយ៍ហើយ » ។១៨ ទ្រង់ « បានគង់នៅខាងស្ដាំនៃព្រះ ដើម្បីសូមដល់ព្រះវរបិតានូវសិទ្ធិនៃសេចក្ដីមេត្តាករុណារបស់ទ្រង់ចំពោះកូនចៅមនុស្សលោក … ហេតុដូច្នោះហើយ ទ្រង់ជួយតវ៉ា ដើម្បីឧត្ដមគតិរបស់កូនចៅមនុស្ស » ។១៩ នៅទីបញ្ចប់ « ពួកបរិសុទ្ធនឹងត្រូវបានពោរពេញទៅដោយសិរីល្អរបស់ទ្រង់ ហើយទទួលកេរមរតករបស់ខ្លួន »២០ជា « អ្នកគ្រងមរតកនៃព្រះជាមួយនឹងព្រះគ្រីស្ទផង » ។២១
បំណងប្រាថ្នារបស់យើងគឺថា គោលការណ៍ទាំងនេះនឹងជួយមនុស្សទាំងអស់ឲ្យបង្កើនសេចក្ដីសង្ឃឹមនៅក្នុងព្រះគ្រីស្ទ ហើយមានអារម្មណ៍ថាជាចំណែកកម្មសិទ្ធិ ។
សូមកុំភ្លេចថា បងប្អូនគឺជាបុត្ររបស់ព្រះ ជាព្រះវរបិតាដ៏អស់កល្បរបស់យើង នៅពេលនេះ និងជារៀងរហូតតទៅ ។ ទ្រង់ស្រឡាញ់បងប្អូន ហើយសាសនាចក្រនេះចង់បានបងប្អូន និងត្រូវការបងប្អូន ។ មែនហើយ យើងត្រូវការបងប្អូន ! យើងត្រូវការសំឡេង ទេពកោសល្យ ជំនាញ សេចក្ដីល្អ និងភាពសុចរិតរបស់បងប្អូន ។
អស់រយៈពេលជាច្រើនឆ្នាំ យើងបាននិយាយអំពី « យុវមជ្ឈិមវ័យនៅលីវ » « មជ្ឈិមវ័យនៅលីវ » និង « មជ្ឈិមវ័យ » ។ ការជ្រើសរើសជាមុនទាំងនោះអាចមានប្រយោជន៍ខាងរដ្ឋបាលខ្លះដែរ នៅពេលខ្លះប៉ុន្ដែអាចផ្លាស់ប្ដូរដោយចៃដន្យលើរបៀបដែលយើងយល់ពីអ្វីផ្សេង ។
តើមានរបៀបដើម្បីចៀសវាងពីនិន្នាការរបស់មនុស្សនេះ ដែលអាចបំបែកយើងចេញពីគ្នាបានទេ ?
ប្រធានណិលសុនបានសុំឲ្យយើងហៅខ្លួនយើងថាជាសមាជិកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ការណ៍នោះហាក់សំដៅលើយើងទាំងអស់គ្នា មែនទេ ?
ដំណឹងល្អរបស់ព្រះយេស៊ូវគ្រីស្ទមានអំណាចដើម្បីបង្រួបបង្រួមយើង ។ នៅទីបំផុត យើងមានចំណុចដូចគ្នាច្រើនជាងចំណុចខុសគ្នា ។ ក្នុងនាមជាសមាជិកគ្រួសាររបស់ព្រះ យើងគឺជាបងប្អូនប្រុសស្រីនឹងគ្នា ។ ប៉ុលបានថ្លែងថា « [ ព្រះ ] បានបង្កើតមនុស្សគ្រប់សាសន៍ពីឈាមតែ១ ឲ្យបាននៅពេញលើផែនដី ព្រមទាំងសម្រេចកំណត់ពេលវេលា ដែលបានតាំងជាមុន និងព្រំទីលំនៅរបស់គេគ្រប់គ្នា » ។២២
ចំពោះបងប្អូនដែលជាប្រធានស្ដេក ប៊ីស្សព និងថ្នាក់ដឹកនាំកូរ៉ុម និងបងប្អូនស្រីទាំងឡាយ ខ្ញុំសូមឲ្យបងប្អូនគិតដល់សមាជិកគ្រប់រូបក្នុងស្ដេក វួដ កូរ៉ុម ឬអង្គការរបស់បងប្អូន ថាជាសមាជិកដែលអាចរួមចំណែក និងបម្រើក្នុងការហៅនានាបាន ព្រមទាំងចូលរួមតាមរបៀបជាច្រើន ។
សមាជិកគ្រប់រូបក្នុងកូរ៉ុម អង្គការ វួដ និងស្ដេករបស់យើងមានអំណោយទាន និងទេពកោសល្យមកពីព្រះ ដែលអាចជួយស្ថាបនានគររបស់ទ្រង់បាននាពេលនេះ ។
ចូរយើងអំពាវនាវដល់សមាជិករបស់យើងដែលនៅលីវឲ្យបម្រើ លើកស្ទួយ និងបង្រៀន ។ សូមបោះចោលការយល់ឃើញ និងគំនិតចាស់ៗដែលពេលខ្លះបានបង្កើនអារម្មណ៍ឯកោរបស់ពួកគេដោយអចេតនា ដែលថាពួកគេមិនមែនជាចំណែកកម្មសិទ្ធិ ឬមិនអាចបម្រើបាន ។
ខ្ញុំសូមថ្លែងសាក្សីខ្ញុំនៅចុងសប្ដាហ៍បុណ្យអ៊ីស្ទើរនេះ អំពីព្រះអង្គសង្គ្រោះរបស់យើង ព្រះយេស៊ូវគ្រីស្ទ និងសេចក្ដីសង្ឃឹមដ៏អស់កល្បដែលទ្រង់ប្រទានដល់ខ្ញុំ និងមនុស្សទាំងអស់ដែលជឿលើព្រះនាមរបស់ទ្រង់ ។ ហើយខ្ញុំថ្លែងទីបន្ទាល់នេះដោយរាបសារនៅក្នុងព្រះនាមដ៏ពិសិដ្ឋរបស់ទ្រង់ គឺព្រះយេស៊ូវគ្រីស្ទ អាមែន ។