Asɛmpakã Som Ehyira M’Abrabɔ Afebɔɔ
Mobɔ mpaa dɛ mberantsɛ na nkataasia na hom awofo bohu na wɔatse ase dɛ asɛmpakã som behyira hom abrabɔ.
President Nelson, meda wo ase, dɛ akyɛ dɛm afotu no a ɔfa asɛmpakã som ho no bio.
Enuanom na nkyerɛbaa, mfe pii a abɛsen no, ber a merekasa wɔ wiadze mfɛndzanan ehyiadzi, mpofirmu ara yarba kãa m’enyiwa bankum, a ɔkɔr do kɛpem dɛ munntum nnhu adze papa biara wɔ dɛm enyiwa no mu.
Ber a medze dɛm haw yi ridzi esi no, ndaase mu ara muhu adze binom so, a dza abɛsen nhumu kã ho. Ber a mahwɛ m’abrabɔ do akɔ ekyir no, metum ehu sũahu binom a wɔayɛ soronko tsitsir. Dɛm sũahu no mu kor nye mbrɛ m’etuhoakyɛ asɛmpasomafo som dɛ aberantsɛba wɔ Ngyiresi Aborɔkyir man mu no ehyira m’abrabɔ na wɔawen mo sunsum mu nkrabea.
Madwen sikasɛm ho ɔhaw a ofi afe 1930 Ahokyer Kɛse no mu a ɔmaa m’awofo na hɛn ebusua abrabɔ sesãa koraa ho. M’egya dze n’ahom nyina kɛhyɛɛ dɛ ɔbɛgye ne kaar-tɔn edwumadze na ɔama hɛn ebusua abamba ahokyer ber yi mu ara no maa m’awofo gyaa asɔr ba.
Yɛannkɔ asɔr dɛ ebusua dze, naaso ɔno ennsiw me kwan dɛ dakor dakor menye m’anyɛnkofo bɔkɔ.
Dɛm mber no mu no, nna asɛmpakã dwuma nkɔree no da m’etsikɔr, naaso nna ɔnnyɛ dza menye m’awofo dzi ho nkɔmbɔ.
Ber a mowɔ esũapɔn no, emi na anyɛnkofo dodowara bɔɔ adwenpɔw dɛ yɛbɔkɔ asɛmpakã som. Menye me bishop hyiae no, meyɛɛ m’asɛmpasomafo nkɔree ho nkrataa ber a nna m’awofo etu kwan. Ber a m’awofo sanee baa no, medze amandzɛɛ dɛ wɔafrɛ me dɛ monkosom wɔ Ngyiresi Aborɔkyir hyiaa hɔn. Ɔyɛ me enyisɔ dɛ wɔdze enyigye fuaa adwenpɔwbɔ yi, na anyɛnkofo pa a wɔboaa me ma misii m’adwen pi dɛ mobɔsom.
M’asɛmpakã som yɛɛ me ahoboa dɛ mebɛyɛ kun pa na egya pa na m’edwumadze bɔkɔ do yie. Ɔyɛɛ me ahoboa so maa m’abrabɔ nyina a medze som Ewuradze wɔ N’Asɔr mu.
Ebɔbira afe 1985 mu no, wɔmaa me dwumadzi dɛ menkasa wɔ asɔfodzi nhyiamu no ase. Mekãa me nsɛm no kyerɛɛ mberantsɛmba no. Mekasaa faa ereyɛ ahoboa akɔsom dɛ asɛmpasomafo. Mekãa dɛ, “Ntsetsee nyinara a menya wɔ me Asɔr dwumadzi mu no, no mu kor mpo nnhia me kɛse nnsen ntsetsee a menyae dɛ mfe-duakron elder a ɔrosom etuhoakyɛ asɛmpakã dwuma no.”1
“Ewuradze nyim hom. Sɛ erosom asɛmpakã a, ibenya sũahu horow a ɔbɔboa wo ma ehu No yie. Ibenyin sunsum mu ber a erosom No no. Ne dzin mu no, wɔbɔsoma wo wɔ akwan a ebɔsom binom. Ɔdze Sunsum Krɔnkrɔn no bɛma wo nkenyan sũahu ahorow. Ewuradze bɛma wo tumdzi a edze bɛkyerɛkyerɛ wɔ Ne dzin mu. Ibotum akyerɛ No dɛ Obotum enya awerɛhyɛmu wɔ wo mu na Oetum atwer wo.
Ndaansa yi abosoom enum a abasen yi, Elder Jeffrey R. Holland na Elder Quentin L. Cook, a hɔn so wɔsoom dɛ asɛmpasomafo wɔ Ngyiresi Aborɔkyir no, kãa moho ma yɛkɛseraa asɔrmba na asɛmpasomafo a wɔwɔ dɛm asaase fɛɛfɛw no do no. Yɛwɔ hɔ no, modwendwen mo sũahu ho dɛ asɛmpasomafo aberantsɛba. Megye dase dɛ m’asɛmpakã dwuma ber mu na mebaa bohun dɛ mo Sor Egya na m’Agyenkwa, Jesus Christ wonyim me na wɔdɔ me.
Ɔyɛɛ me adom dɛ menyaa asɛmpakã dwuma presidentfo nwanwafo beenu, Selvoy J. Boyer na Stayner Richards, nye hɔn ahokãfo Gladys Boyer na Jane Richards a woetu hɔnho esi hɔ. Morohwɛ ekyir a, mutum hu no yie dɛ wonyaa awerɛhyɛmu wɔ mo mu na wɔdɔɔ me. Wɔkyerɛkyerɛɛ me asɛmpa no. Nna hɔn enyi da kɛse do fi mo hɔ. Wɔmaa me dwumadzi a ɔgyee taferbanyinmbɔmu na baanodzi asodzi ahorow dze boaa mo mpontu na ahoboaboa ma ɔsom abrabɔ.
Madwendwen ɔfrɛ so a President Spencer W. Kimball dze frɛɛ me dɛ menye me yer dɔfo, Barbara, a hɛn mbofra kã hɛnho, dɛ yɛnkɔhwɛ Canada Toronto Asɛmpakã Dwuma no do. Mber tsiabaa ekyir a President Kimball maa ne nkenyan asɛmpakã amandzɛɛbɔ a ne tsir nye “When the World Will Be Converted” no ɔfrɛɛ hɛn dɛ yɛnsom wɔ Ebɔbira 1974 mu.2 Asɛm no mu no President Kimball kyerɛkyerɛɛ n’enyido-adzehu mu wɔ mbrɛ asɛmpa no wɔdze bɔkɔ wiadze nyina mu. Ɔserɛɛ asɛmpasomafo pii dɛ wonfi wiadze nyina mu mbra kan. Ɔkaa hɛn Ewuradze n’enyida kwan “dɛ banyin biara ɔma kɔkɔbɔ ndze do mbɔ dawur nkyerɛ nyimpa a wɔwɔ asaase do.”3 President Kimball ne nkyerɛkyerɛ a ɔfa enyida kwan dɛ aberantsɛba bɔsom asɛmpakã no bɛyɛɛ nkɔmbɔdzi nsɛngyinado wɔ efiefi mu wɔ wiadze nyina mu. Dɛm enyida kwan no nsesãe. Ɔyɛ me enyisɔ dɛ President Russel M. Nelson so esido akã Ewuradze n’enyida kwan ho nsɛm anapa yi.
Bɛyɛ mfe 10 nye yi na President Thomas S. Monson dze asɛmpasomafo hɔn afe a wɔatsew do no ma mberantsɛ na nkataasia no too gua.4 Madwen mu no, botae tsitsir a wɔyɛɛ nsesã yi nye dɛ ɔbɛma hɛn mbabun dodowara abrabɔ nsakyeree kwan dɛ wɔbɔsom dɛ asɛmpasomafo.
Dɛ meyɛ Ewuradze Jesus Christ no Somafo no, afei mefrɛ mberantsɛ—na nkataasia a wɔpɛ dɛ wɔsom asɛmpakã no—dɛ wɔnhyɛ ase seseiara nye hɔn awofo nkasa mfa wɔrokɔsom asɛmpakã. Moto nsa frɛ hom so dɛ hom nye hom anyɛnkofo nkasa mfa wɔrosom asɛmpakã ho, sɛ hom anyɛnkofo binom hɔn adwen yɛ hɔn kunsaa fa wɔrosom ho a, hom nhyɛ hɔn nkuran ma wɔnye hɔn bishop nkɛkasa.
Hom nsi no enyimpi mma hom ho na hom Ɔsor Egya dɛ hom bɔsom asɛmpakã dwuma na dɛ ofi ber yi dze kɔ kan no hom bɔbɔ hom mbɔdzen esie hom akoma, nsa, na adwen ahotsew na yeedzi mu. Moto nsa frɛ hom dɛ hom benya Jesus Christ asɛmpa a wɔdze asan ananmu aba no ho dasegye a otsim ara yie.
Mbabun nwanwafo yinom hɔn egyanom na enãnom, hom wɔ asɛdze tsitsir wɔ ahoboaboa kwan yi do. Hom nhyɛ ase nye hom mba nkã asɛmpakã som ho asɛm. Yenyim dɛ ebusua no nye nhyɛdo kɛse papaapa a ɔboa hɛn mberantsɛmba na nkataasia yɛ ahoboa.
Sɛ ida ho wɔ mfe a wɔdze som asɛmpakã a na nnyae nnsomee a ɔnam wiadze nsan yarba anaa siantsir binom so a, moto nsa frɛ wo dɛ som sesei. Enye wo bishop nkasa, na yɛ ahoboa dɛ ibɔsom Ewuradze.
Hom bishopfo, mehyɛ hom nkuran dɛ hom mboa mberantsɛ na nkataasia no a wɔabɛn asɛmpasomafo afe no dɛ wɔnyɛ ahoboa nkɔsom, na mehyɛ hom bishopfo so nkuran dɛ hom nhwehwɛ hɔn a hɔn mfe no aso na mbom wɔnnsomee no. Hom nto nsa mfrɛ aberantsɛba biara ma ɔnbɛyɛ asɛmpasomafo, nye akataasiaba biara dɛ onya pɛ dɛ ɔbɔsom.
Asɛmpasomafo a hom rosom sesei no, yɛda hom ase. Hom asɛmpakã som ayɛ wɔ wiadze nsan yarba ber mu. Ɔnam dɛm ntsi, hom asɛmpakã sũahu annyɛ tse dɛ m’asɛmpakã sũahu no anaa asɛmpasomafo biara a wɔsomee ansaana afe 2020 no. Minyim dɛ wɔannyɛ mberɛw. Naaso nkõdzen mber yinom mpo, Ewuradze enya edwuma ama hom dɛ hom nyɛ, na hom ayɛ no fɛɛfɛɛfɛ. Mfatoho, hom dze abaɛfo mfir afa kwan afofor do ahwehwɛ hɔn a wɔayɛ krado dɛ wobosũa Jesus Christ asɛmpa Nsan-ananmu no. Hom asom enyiber do na dɛ mbrɛ hom botum ara yie no, minyim dɛ Ewuradze n’enyi sɔ hom mbɔdzembɔ. Minyim dɛ hom som behyira hom abrabɔ.
Sɛ wosian hom fi asɛmpakã dwuma a, hom nkaa dɛ wonnsian hom mmfii Asɔr dwumadzi mu. Hom ntow wɔ su pa do a, hom esũa wɔ hom asɛmpakã dwuma mu, hom nkɔ do nhyɛ hom dasegye dzen, hom nyɛ edwuma dzen, mbɔ mpaa, na hom nyɛ setsie mma Ewuradze. Hom ndzi ahyɛmudzi a hom ayɛ no nyi. Hom nkɔ do nhyira nkaafo na hom nsom hɔn.
Mobɔ mpaa dɛ mberantsɛ na nkataasia na hom awofo bohu na wɔatse ase dɛ asɛmpakã som behyira hom abrabɔ. Nkyɛ hom ehu wɔ hom adwen mu na hom enya atsenkã wɔ hom akoma mu Ewuradze ne nsato mu tum no a ɔdze maa Mosiah ne mbabanyin asɛmpasomafo ekunyin no. Ɔsee dɛ, “Hom nkɔ … na hom mfa m’asɛm nkɔbɔ adze; na hom nya abotar wɔ penkyɛr mu na wɔ [hom] amandzehu mu, ama hom aakyerɛ su pa a ɔwɔ mo mu akyerɛ hɔn, na mebɛyɛ hom edwindadze wɔ me nsamu dze ama akra pii enya nkwagye.”5
Nyankopɔn nhyira Asɔr mu mbabun ma wonya pɛ nyɛ ahoboaboa na wɔnsom No nye m’ahobrɛadze mpaabɔ, a mobɔ no anapa yi wɔ Ewuradze Jesus Christ ne dzin krɔnkrɔn no mu, amen.