Hɛn Nye Jesus Christ N’Asɔr a ɔwɔ hɔ ma Nda a Odzi Ekyir Ahotseweefo

Reyna I. Aburto ne Kasae

Ɔpamfo a Otsĩa Ebien wɔ Wiadze Mfɛndzanan Relief Society Presidency mu.

Asɔr no bor adan na asɔfodzi nhyehyɛɛ ara; Asɔr no nye hɛn, asɔrmba no, a Christ da ne tsir na nkɔnhyɛnyi no nye Ne ɔkasamafo.

Minyaa nsato dɛ “bra na bɔhwɛ,’’ no¹ mokɔɔr Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo mber a odzi kan a, nna meedzi mfe 26. Nna menye mo kun ntamu tsetsewee nnkyɛree. Nna mowɔ mfe ebiasa babanyin. Nna suro ekitsa me ma munntum koraa. Ba mehɛɛn dan no mu no, ahomkã hyɛɛ me mã ber muhun nkorɔfo a wotwaa moho hyiae no hɔn gyedzi na enyigye. Nokwar ara nna ɔyɛ “guandɔbea fi ehum no mu.’’² Adapɛn ebiasa ekyir no, menye Ɔsor Egya dzii enuma ahyɛmu na mehyɛɛ m’akwantu ase dɛ Christ osũanyi, a kaansa m’abrabɔ nndzi mu mpo wɔ akwantu no mu.

Emi dze dɛ mebenya onnyieiwei nhyira no, ɔwɔ dɛ honandua na sunsum mu ndzɛmba pii deda yie. Wɔdze Jesus Christ n’asɛmpa no asan ananmu aba na wɔrobɔ no dawur; dɛ woesi nhyiamu dan na wɔhwɛ do yie, asɔfodzi nhyehyɛɛ wɔ hɔ, ofi nkɔnhyɛnyi no do kesi apaamu baanodzifo do, na nkorbata a asɔrmba ahyɛmudzifo ahyɛ mu mã ayɛ krado dɛ wɔbɛkã emi na me babanyin efua ber a wɔdze hɛn baa Agyenkwa no hɔ, a wɔdze “Nyankopɔn n’asɛmpa no nyɛɛn,’’³ hɛn na wɔmaa akwan horow a wɔdze som.⁴

Fi ahyɛase no, Nyankopɔn ahwehwɛ dɛ bɔboa Ne mba ano na Ɔahyehyɛ Ne mba⁵ “dɛ Ɔdze [hɛn] bɛkyebo na onnyiewiei nkwa bɔbɔ adze.’’⁶ Dɛm botae no da N’adwen do no, Ɔakyerɛkyerɛ hɛn dɛ yensisi som mbeambea,⁷ bea a yenya nyimdzee na nkwagye na nkwagye ntowdo ayɛdze horow; yɛyɛ na yesie ahyɛmudzi horow a ɔkyekyer hɛn fam Jesus Christ ho;⁸ a wɔdze nyamesu mu tum no ehyira hɛn’’;⁹ na yɛtaa boa ano dze kaa Jesus na yɛhyɛ hɛn mu kor biara dzen wɔ No mu.¹⁰ Asɔr nhyehyɛɛ na n’adan no wɔ hɔ ma hɛn sunsum mu mfaso. “Asɔr no … nye apa a yɛdze kyekyer onnyiewiei ebusua ebusua.’’¹¹

Ber a nna menye nyɛnko bi a nna orudua nkõdzen mber mu ridzi nkɔmbɔ no, mibisaa no mbrɛ sikasɛm esi nye no ridzi esi. N’enyisuwa mu no, obuae dɛ ne bishop dze akɔnkye afɔrbɔ ntoboa roboa no. Ɔdze kãa ho dɛ, “sɛ ɔnnyɛ Asɔr no a nkyɛ minnyim beebi a emi na m’ebusua yɛwɔ.’’ Mubuaa dɛ, “Asɔr no nye asɔrmba no. Hɔn nye hɔn a ɔpɛ na enyigye mu ara wɔma akɔnkye afɔrbɔ dze boa hɛn a yehia. Eregye hɔn gyedzi na enyimpi si ho eduaba dɛ wɔbɛkã Jesus Christ do.’’

Me mfɛfo Christ esũafo, hom mma yemmbu ahobow edwuma a Ewuradze rudua hɛn, N’Asɔr mu reyɛ no tootooba, a hɛn esintɔ biara no. Ɔtɔfabi a yɛyɛ amafo na ɔtɔfabi a yɛyɛ agyefo, mbom hɛn nyina yɛyɛ ebusua kor wɔ Christ mu. N’Asɔr no nye nhyehyɛɛ a Ɔdze ama dɛ akwankyerɛ na onhyira hɛn ber a yɛsɔr No na yɛsom hɛn mu kor biara.

Nkyerɛbaa binom apa me kyɛw a nna wɔdwen dɛ wɔnnyɛ Relief Society mba a wɔbɔhyew osiandɛ wɔrosom wɔ Primary anaa Young Women no ntsi. Nkyerɛbaa yinom kã Relief Society mba a wɔbɔhyew dodow no ho osiandɛ wɔroboa hɛn mbofra na mbabun a wɔsom bo ma wɔahyɛ hɔn gyedzi dzen wɔ Jesus Christ mu.

Relief Society nnyɛ pia wɔ dan mu, Kwesida adzesũa, dwumadzi bi, anaa apaamu anaa wiadze mfɛndzanan presidency bi ara. Relief Society nye Asɔr ne mbaa ahyɛmudzifo; ɔyɛ hɛn—hɛn mu kor biara na hɛn nyinara. Ɔyɛ hɛn “wiadze mfɛndzanan ayamuhyehye na ɔsom kuw.’’¹² Beebiara na bea biara a yɛkɔ no, aber nyina yɛkã Relief Society ho ber a yɛper dɛ yɛbɛhyɛ no botae krɔnkrɔn no mã, a ɔma mbaa yɛ Nyankopɔn n’edwuma wɔ ankorankor mu dɛmara dɛ nkabɔmu akwanhorow mu¹³ ber a yɛma mboa, “ohia ho mboa, yarba ho mboa, ekyingye ho mboa, nnyim hwee ho mboa—mboa fi adzebiara a osiw … enyigye na kankɔ kwan ho mboa.’’¹⁴

Ekã ho a ɔtsɛ dɛm wɔ elderfo quorum na Asɔr ne nhyehyɛɛ ahorow ho ma mfe biara, a hɛn mbofra na mbabun kã ho. Asɔr no bor adan na asɔfodzi nhyehyɛɛ ara; Asɔr no nye hɛn, asɔrmba. Hɛn nye Jesus Christ N’Asɔr a ɔwɔ hɔ ma Nda a Odzi Ekyir Ahotseweefo, a Christ da ne tsir na nkɔnhyɛnyi no dɛ Ne ɔkasamafo. Ewuradze akã dɛ:

“Hwɛ, iyi nye me nkyerɛkyerɛ—obiara a onu noho na ɔba mo hɔ no, onyia no yɛ m’asɔrba. …

“Na … hɔn a wɔkã m’asɔr ho, na wotsim m’asɔr mu kodu ewiei no, na medze hɔn besi me ɔbotan do.’’¹⁵

Nkyerɛbaa na nuambanyin, hom mma yenhu mbrɛ woesi ayɛ hɛn adom dɛ yɛkã Jesus Christ N’Asɔr ho, a yebotum dze hɛn gyedzi, akoma, ahoɔdzen, adwen, na nsa abɔ mu dze ayɛ N’awanwadze akɛse. “Na [Christ N’Asɔr] nyimpadua nnyɛ fafakuwa kor, na pii.’’¹⁶

Aberantsɛ abasirba bi kãe kyerɛɛ ne maame dɛ, “Mber a nna musuar no, ber biara a medze dɔla kor botua ebupɛn du no, nna modwen dɛ medze dɔla kor no wobesi nhyiamu dan mu kor. Ana ɔyɛ nyansadze a?

Ɔtɔɔ no do no, obuaa dɛ, “Ɔyɛ ahomka! Ana ihun no mfonyin wɔ w’adwen mu a?.

Ɔtsẽaa mu dɛ “Nyew!’’ Nna wɔyɛ fɛw, na nna wɔyɛ ɔpepe!’’¹⁷

M’anyɛnkofo adɔfo, hom mma yenya abofra ne gyedzi no bi na yendzi ehurusi a yenyim dɛ hɛn mbɔdzembɔ no mu ketseaba no mpo dze nsonsonee tsitsir bi reba Nyankopɔn n’ahenman mu.

Hɛn botae wɔ N’ahenman mu wɔdɛ ɔyɛ yɛdze hɛn mu kor biara bɛba Christ hɔ. Dɛ mbrɛ yɛkenkan wɔ kyerɛwsɛm mu no, Agyenkwa no tseen nsato yi maa Nephifo no:

“Ana hom wɔ ayarfo bi wɔ hom mu? Hom mfa hɔn mbra. Ana hɔn a … biribi rehaw hɔn? Hom mfa hɔn mbra na mebɛsa hɔn yarba, osiandɛ me yamu hyehye me wɔ hom ho; ehumbɔbɔr ahyɛ m’abadaa mu mã.

“… muhu dɛ hom wɔ gyedzi a ɔsõ dɛ mesa hom yarba.’’¹⁸

Ana hɛn nyinara yennyi ɔhaw a yebotum dze ebogu Agyenkwa n’ananadze? Ber a hɛn mu binom wɔ honandua mu nsɔhwɛ no, dodowara dze nkãtse aperdzi dzi akõ, binom so per dɛ wobenya anyɛnkoyɛ nkitahodzi, na hɛn nyina yɛhwehwɛ ahomgye sɛ hɛn esunsum hyia tafɛrbanyinmbɔmu a. Hɛn nyiara rehaw wɔ biribi mu.

Yɛkenkan dɛ “nyimpadoow no nyina, tuu punkum kɔree kɛfaa hɔn ayarfo nye hɔn nyina woruhu amandze wɔ kwan biara do bae; na ɔsaa obiara a wɔdze no brɛɛ no no yarba.

“Na hɔn nyina, hɔn a wɔasa hɔn yarba nye hɔn a wodzi mu nyina bɔɔ mu twae hwee n’ananadze, na wɔsɔɔr no.’’¹⁹

Fi banyimba kakraba bi a ɔdze gyedzi tua ebupɛn du hɔ kɔ enã sigyanyi a ohia Ewuradze no tum kɔ egya a ɔreper ahwehwɛ bi dze ama n’ebusua kɔ hɛn ewuakɔr a wohia nkwagye na nkwagye ntowdo ayɛdze horow kɔ hɛn mu kor biara a dapɛn biara ɔnye Nyankopɔn dzi ahyɛmu fofor hɔ no, yehia hɛn mu kor biara, na yebotum yɛdze hɛn mu kor biara aba Agyenkwa no no ɔpon ayarsa no ho.

Me nkyerɛbaa na nuambanyin adɔfo, hom mma yendzi Jesus Christ ne nsato ekyir dɛ yɛdze hɛnho na hɛn ɔhaw bɛbrɛ No. Sɛ yɛba No hɔ na yɛdze hɔn a yɛdɔ hɔn brɛ No a, Ohu hɛn gyedzi. Ɔbɛsa hɔn yarba, na Ɔasa hɛn yarba.

Dɛ “hom ka Christ do asomdwee mu,’’²⁰ yɛreper dɛ yɛbɛyɛ “akoma kor na adwen kor’’²¹ na yɛyɛ ahobrɛadze; setsie; botoo; asomberɛw; abotar nye penkyɛr; to hom bo ase wɔ adze nyinara mu; hom mia homho dzi Nyankopɔn ne mbrasɛm do aber nyina; hom nnya gyedzi, enyidado, na ayamuyie; na ndwuma pa bɛhyɛ hom mã daa.²² Yɛreper abɛyɛ tse dɛ Jesus Christ.

Megye dase dɛ yɛyɛ Christ N’Asɔr no, hɛn nye kwan a dɛ mbrɛ President Russell M. Nelson kyerɛkyerɛɛ no ,“hɛn Agyenkwa na Pomfo, Jesus Christ, bodua do ayɛ No ndwuma akɛse no bi wɔ sesei kesi ber a Ɔbɛba bio no.’’²³

Ewuradze akã dɛ:

“Hwɛ, merebɛyɛ m’edwuma ntsɛntsɛm wɔ ne mber mu.

“Na … mbrasɛm a medze ma hom nye dɛ hom nhyia mu, na hom mboaboa hom ho na hom nsiesie homho, na hom ntsew homho; nyew hom ntsew hom akoma mu, na hom ntsew hom nsa na hom anan ho wɔ m’enyim, ama maatsew hom ho.’’²⁴

Hom mma yɛngye nsato krɔnkrɔn yi do na enyigye mu ara yenhyia mu, yɛmboaboa, yensiesie na yɛntsew hɛnho nye m’ahobrɛadze mpaabɔ wɔ Jesus Christ Ne dzin mu, amen.