Yɛnye Nyankopɔn Ahyɛmudzi Hyɛ Hɛn Dzen, Ma Hɛn Bambɔ, na Osiesie Hɛn ma Onnyiewiei Enyimnyam
Sɛ yɛsan mu yi dɛ yɛnye Ɔsor Egya bedzi ahyɛmu na yeesie a, wɔdze enyigye mbordo behyira hɛn wɔ abrabɔ yi mu na onnyiewiei enyimnyam nkwa wɔ wiadze a ɔbɛba no mu akyɛn dza yebotum esusu ho sesei.
Nkyerɛbaa, ebɛn enyigye na ɔyɛ dɛ yɛaboa ano wɔ wiadze mfɛndzanan nkyerɛbaa kuw ase. Dɛ mbaa a yɛnye Nyankopɔn dzi ahyɛmu na yesie no, yɛwɔ sunsum mu nkitahodzi a ɔboa hɛn ma yɛsɔw hɛn ndɛ mu nsɔhwɛ na osiesie hɛn ma Jesus Christ ne Mbae a Otsĩa Ebien no. Na yerisie ahyɛmudzi horow no ma hɛn kwan ma yɛyɛ mbaa a yɛwɔ nhyɛdo a yebotum atwe binom aba Agyenkwa no hɔ.
Hɔn a woenuma hɔn no dzii ahyɛmu wɔ da a hɔn werɛ nnkefir no da no dɛ wɔdze Jesus Christ ne dzin bɔto hɔn do, wɔbɛkaa No aber nyina, wobesie Ne mbrasɛm, na wɔbɔsom No akɔ ewiei. Sɛ yɛyɛ ndzɛmba yinom a, Ɔsor Egya bɔ anohoba dɛ ɔdze hɛn bɔn bɛkyɛ hɛn na ɔbɛma hɛn Sunsum Krɔnkrɔn n’anyɛnkoyɛ no. Nhyira yinom hyɛ ase wɔ anamɔn kwan no do dɛ, sɛ yɛkɔ do per kɔ kan na yɛsɔw kodu eiwei a, ɔbɛma hɛn kwan ma yɛnye Ɔno na Ne Ba atsena ase wɔ celestial ahenman no mu. Nyimpa biara a oenuma no wɔ ndzinoa horow yinom ho anohoba sɛ wosie ahyɛmudzi a wɔyɛɛ no dɛm da tsitsir no a.
Hɔn a wɔkɔ do dzi ahyɛmu horow wɔ temple no nya anohoba horow a tum wɔ mu a ankorankor nokwardzi bata ho. Yɛbɔ anohoba awɔse mu dɛ yebedzi Nyankopɔn ne mbrasɛm do, yɛdze Jesus Christ n’asɛmpa no bɔbɔ bra, hɛn suban bɛyɛ krɔngyenn, na yebotu hɛn mber na talent horow ama dze Ewuradze. Dza yenya no, Nyankopɔn bɔ nhyira wɔ abrabɔ yi mu na kwan dɛ yɛnye No akɛtsena ho anohoba.1 Dɛm kwan mu no, wɔdze tum anaa wɔdze adom akyɛdze ma hɛn a, yebotum dze ehu nsonsonee a ɔda nokwar na mfom ntamu, papa na bɔn ntamu, ma hɛn, wɔ ndze horow basabasa na bɔn ho a wɔyɛ dɛ wɔtotow dze tsĩa hɛn no. Ebɛn akyɛdze a tum wɔ mu nye yi!
M’ahoboaboa a odzi kan a medze kɔr temple no, me maame na Relief Society nkyerɛbaa a wɔawea boaa me ma miyiyii ndzɛmba a mebehia, a guado adzeyɛ efuradze fɛfɛɛfɛw kã ho. Mbom ahoboaboa a ohia dodow no bae ansaana muruhu dza mebɛhyɛ. Me bishop yɛɛ me kokoa mu mpɛnsapɛnsamu wiei dze hwɛe sɛ nna me fata a, ɔkyerɛkyerɛɛ ahyɛmudzi horow a mebedzi mu no mu. Ne nkyerɛkyerɛmu ahwɛyie mu ara no maa mo kwan ma modwen ho na meyɛɛ krado dɛ mibedzi ahyɛmudzi horow no.
Da no sõe no, medze moho hyɛɛ mu wɔ obu mapã mu a nna ndaase na asomdwee nkãtse ka ho. Kaansa manntse ahyɛmudzi horow etsitsir a midzii no nyina ase mpo a, nna minyim dɛ ɔnam ahyɛmudzi horow no do no medze moho kyekyeer Nyankopɔn na wɔdze nhyira a sɛ midzi ahyɛmudzi horow no do a mubotum atse ase yie bɔɔ me anohoba. Ofitsi dɛm sũahu a odzi kan no, maakɔdo enya awerɛhyɛmu dɛ yeresie ahyɛmu a yɛnye Nyankopɔn dzi no ma hɛn kwan ma yɛtwe Agyenkwa no tum no, a ɔma hɛn ahoɔdzen wɔ hɛn nsɔhwɛ a obesi no ho, ɔma hɛn bambɔ fi ɔsɛefo ne nhyɛdo ho, na osiesie hɛn ma onnyiewiei enyimnyam.
Abrabɔ no sũahu botum efi ɔserew mu akɔ yaayaw mu, fi ma ɔyɛ dzen akɔ enyimnyam mu. Sũahu kor biara boa hɛn ma yɛtse hɛn Egya no dɔ a otwa hyia na dɛ ɔnam Agyenkwa n’adom akyɛdze do na yetum sakyer. Yeridzi hɛn ahyɛmudzi do no ma Agyenkwa no tum no kwan ma ɔtsew hɛn ho ber a yɛnam sũahu do sũa adze—sɛ ɔyɛ atsɛnkyew kakraba bi anaa nkõgu kɛse bi do o. Hɛn Pomfo wɔ hɔ dɛ sɛ yɛbɔ famu a Ɔbɔsɔw hɛn sɛ yɛdan ba No hɔ a.
Ana egyina afowee tsentsen bi do a w’anansɔba gyina n’ano na w’ekyir dzi mona dɔnkuronn wɔ ase no do da? Edze ntampee ahoma dze w’ekyir resiansian bepɔw afowee no, sɛ wɔakyekyer wo dzendzen aka ntampee ahoma na ndzɛmba adzendzen ho a wobotum agye wo dwudwoodwo mpo a, igyina n’ano no da ho yɛ akomatu. Eresan w’ekyir efi afowee no do na erotow wo ho esian no hia awerɛhyɛmu wɔ sekyɛ bi a, wɔakyerkyer no dzendzen afam biribi a onnhinhim ho no. Ohia awerɛhyɛmu wɔ nyimpa a ɔbɛma ntampee ahoma no ayɛ dzendzen ber a isian no. Na kaansa ndzɛmba no ma wo ahoɔdzen ma ehwɛ wo nsianee no a, otwar dɛ enya awerɛhyɛmu dɛ nyimpa a ɔkã woho no remma kwan ma nnhwe famu.
Mekãe pefee dɛ menye young womenfo bi dze hɛn ekyir kesiansiaan bepɔw afowee. Emi na midzii kan wɔ hɔn mu kɔree. Ber a mutuu anamɔn baa ekyir wɔ afowee no ho no, mehyɛɛ ase dɛ morobɔ famu a mefi nsa. Ndaase mu ara, ntampee ahoma no twee ntsɛm na ogyinaa me nsianee haahaahar dodow no. Ber a nna mesensɛn afowee tsentsen n’enyim mboba no, mobɔ mpaa dzendzenndzen maa nyia no anaa adzebiara a nna orisw mo kwan ma monnkɔhwe abotan no do no.
Ekyir no, muhun dɛ nna wɔnnkyekyer sekyɛ no krɔkrɔw no dzendzen yie, na mifii n’ano hɔ no, ɔtwee nyimpa a nna ɔkã moho wɔ n’ekyir na ɔtwee no kɔr afowee no n’ano. Ɔyɛ dɛ biribi, ɔdze n’anansɔba twer abotan bi. Ogyina pintsinn wɔ dɛm gyinabew mu no, ɔberɛ mu ara otumii, sii me famu a nsa da nsa do a, ɔdze ntampee no. Nna munnhu no dze, naaso nna minyim dɛ ɔdze n’ahoɔdzen nyina reyɛ edwuma dze agye me. Nna nyɛnko kor bi so wɔ afowee n’ase hɔ, a nna ɔayɛ krado dɛ sɛ ntampee ahoma no tsew a ɔbɔsɔw me. Ber a mebɛɛn no no, osuoo m’ahyehyɛdze no mu na ɔbrɛɛ me ase dze kesi daadze.
Dɛ Jesus Christ nye hɛn sekyɛ na nyɛnko pa no, Ɔama hɛn No dɔ ho awerɛhyɛmu wɔ nsɔhwɛ mu na no korakoraa no ɔgye a ɔnam No do. Dɛ mbrɛ President M. Russell Ballard kyerɛkyerɛɛ dɛ: “Gyedzi wɔ Nyankopɔn mu na wɔ ne Ba, Ewuradze Jesus Christ mu, nye … sekyɛ a otwar dɛ yenya wɔ hɛn abrabɔ mu ma oesuo hɛn mu dzen wɔ afɛfɛdze begyabegya na emumuyɛ ber mu. … Hɛn gyedzi … otwar dɛ otsim wɔ Jesus Christ mu, n’abrabɔ na no werdambɔ, na wɔ n’asɛmpa a wɔdze asanananmu no mu.”2
Sunsum mu ndzɛmba a ɔbɔ hɛn ho ban ma yɛmmbubu wɔ atseetsee abotan do nye hɛn dasee wɔ Jesus Christ mu na ahyɛmudzi horow a yedzi no. Yebotum atwer mboa yinom ma wɔaweɔn hɛn na wɔdze hɛn ekodu dwudwoodwo. Dɛ hɛn adamfo ɔpɛ mu ara no, Agyenkwa no remma kwan ma yɛnhwe ase a Onnkotum asɔw hɛn. Mpo wɔ hɛn amandzehu na awerɛhow ber mu no, Ɔwɔ hɔ dɛ Obepegya na Ɔahyɛ nkuran. No tum boa hɛn ma hɛnho san fi binom hɔn nsanmu yi horow no ɔsɛe nsunsuando no mu. Naaso, otwar dɛ hɛn mu kor biara hyɛ n’ahyehyɛdze na ɔhwɛ no pefee dɛ ɔakyekyer apɔw no dzendzen. Otwar dɛ yɛsan mu yi dɛ yɛ bɔtow hɛn sekyɛ wɔ Agyenkwa no do, yɛdze hɛn ahyɛmudzi horow bɛkyekyer no afam hɛnho.3
Yesi dɛn hyɛ dɛm sekyɛ no dzen? Yɛdze ahobrɛadze akoma bɔ mpaa no, yesũa na yɛdwendwen kyerɛwsɛm no ho, yɛdze nnuhu na obu mapã sunsum dzi sacrament no, yɛper dzi mbrasɛm no do, na yedzi nkɔnhyɛnyi n’afotu do. Na hɛn dabiara edwuma no a yɛyɛ wɔ akwanhorow a “ɔkrɔn na krɔnkrɔn’’4 na yie mu no, yɛbɛka Agyenkwa no ho yie, na ber kor noara, yɛaboa binom ma wɔba No hɔ.
Kwan a “ɔkrɔn na krɔnkrɔn yie’’ no tse dɛn?. Yɛbɔ mbɔdzen dze asɛmpa no bɔbra wɔ hɛn nkitahodzi nyinara mu. Yɛhwɛ hɔn a wɔwɔ hia mu ber a nokwar mu ara yɛsom hɔn, a yedua ɔsom a ɔda famu do kyerɛ hɛn dɔ. Yɛnye hɔn a wohia asomdwee na ahoɔdzen na “wonnyim bea a wobohu no wɔ’’ kyɛ asɛmpa n’asɛm dɛw no.5 Yɛyɛ edwuma ka ebusua ebusua bɔ mu mfesantsen mu wɔ ntwamutam n’afã ebien no. Na hɔn a woedzi ahyɛmu wɔ Ewuradze ne fie no, dɛ mbrɛ President Russell M. Nelson kyerɛkyerɛɛ mu no, “Temple edwumayɛnyi panyin biara bɛhyɛ asɔfodzi egudontar krɔnkrɔn no, [a] … ɔkaa hɛn dɛ … dɛ dabiara yɛnnantsew ahyɛmu anamɔn kwan no do wɔ kwan a ɔkrɔn na ɔyɛ krɔnkrɔn yie mu.’’6 Ndzeyɛe yinom nnyɛ afehyia dze mbom wohia tsitsir ma hɛn daa daa enyigye—na onnyiewiei dɛwdzi.
Biribiara nnyi hɔ a ohia dodow ma hɛn onnyieiwei kankɔ kyɛn yeriridzi hɛn ahyɛmudzi do ma Nyankopɔn. Sɛ hɛn temple ahyɛmudzi horow no reyɛ ewduma a, yebotum enya awerɛhyɛmu wɔ dɛwdzi nkabɔmu a yɛnye hɛn adɔfo benya wɔ ntwamutam n’afã no ho no. Dɛm abofra, ɔwofo, kun anaa ɔyer a oewu no dze n’akoma nyina wɔ enyidado dɛ yebedzi nokwar ama hɛn ahyɛmu a ɔkyekyer wo bɔ mu no. Sɛ yebu hɛn ahyɛmudzi a yɛnye Nyankopɔn edzi no tootooba anaa yenndzi no nyi a, nna yɛdze onnyieiwei nkabɔmu no rotu mbusu mu. Sesei nye mber a ɔwɔ dɛ yenu hɛnho, yesiesie na yɛbɔ mbɔdzen bio.
Sɛ yɛsesa onnyiewiei dɛwdzi ho nhyira dze gye ahotɔ a ɔnnkyɛr a enyigye no yɛ adze pan. Hɛn mfe mmfa ho no, ɔno nye nokwar koraa: adze tsitsir a ɔma mfesantsen enyigye nye yɛdze Jesus Christ n’asɛmpa no robɔ bra, na yerisie ahyɛmudzi a yeedzi no. Hɛn nkɔnhyɛnyi, President Nelson, esi no tadua dɛ “hɛn asomdwee korakoraa na hɛn enyigye a ɔbɛkyɛr nko no gyina dɛ yebosuo Jesus Christ n’asɛmpa a wɔdze asanananmu no ne dadze poma no mu, emu a n’ahyɛmudzi na ayɛdze horow kã ho. Sɛ yɛyɛ dɛm a, yebotum eduadua esu basabasa mu dwudwoodwo, osiandɛ yɛwɔ Nyankopɔn no tum ho kwan.’’7
Hɛn mu dodow nenam esu basabasa mu. Ber a atseetsee n’asorɛkye totoow hɛn na ɔtɔfabi a enyinsuwa ne kyirididi a ɔba wɔ nkõdzen ber mu fura hɛn enyiwa no, annyɛ a yennkohu bea a yɛbɔkwan hɛn abrabɔ ne hɛmba afa. Ebia yennkotum adwen dɛ yɛwɔ ahoɔdzen a yɛdze bodwir mpoano. Erekaa wo nyia a eyɛ no—Nyankopɔn ne ba dɔfo—siantsir a ewɔ asaase do, na wo botae dɛ enye Nyankopɔn na w’adɔfo bɛtsena ase no botum ama w’enyido-adzehu ayɛ pefee na ɔakyerɛ wo kwan a ɔtsen. Ehum dzendzen ne finimfin mu no mpo, kan a ɔhyerɛn wɔ hɔ a ɔkyerɛ hɛn kwan. Jesus paa mu kãe dɛ, “Emi nye kan no mehyerɛn wɔ sum mu no.’’8 Wɔma hɛn bambɔ dwudwoo ho awerɛhyɛmu sɛ yɛhwɛ kan no na yɛma hɛn ahyɛmudzi no nokwar no tsim a.
Ɔayɛ adom ma meehyia mbaa a wogu mfe ahorow a wɔtsetse gyinabew ahorow mu a worisie hɔn ahyɛmudzi horow. Dabiara no, wɔhwɛ Ewuradze na No nkɔnhyɛnyi gye akwankyerɛ, kyɛn dza ayɛ atsenkã wɔ dawurbɔ mu. Hɔn ankorankor tafɛrbanyimbɔmu na wiadze mu abor nyansakyerɛ a ɔbɔ mbɔdzen daadaa hɔn ma wonnkesie hɔn ahyɛmudzi no, woesipi dɛ wɔbɛka anamɔn kwan no do. Wɔdan “dza Egya [no] wɔ nyina,’’ anohoba no do.9 Na ma wo mfe tse biara no, mbaa hom mu kor biara a ɔnye Nyankopɔn edzi ahyɛmu no wɔ ahoɔdzen dɛ obosuo Ewuradze ne kan no mu wɔ sor na hom edzi binom kan.10 Ɔnam hom risie ahyɛmudzi do no, Ɔdze N’asɔfodzi tum no behyira hom na hom enya tum ma hom enya nhyɛdo papaapa wɔ hɔn a wɔnye hɔn nya nkitahodzi nyinara do. Dɛ mbrɛ President Nelson paa mu kãa dɛ, hom nye mbaa no a hom bɛhyɛ nkɔnhyɛsɛm a woedzi kan ahyɛ no mã!11
Nkyerɛbaa adɔfo, dza ɔbor ne nyinara do no, hom nkã ahyɛmu anamɔn kwan kɔ Jesus Christ hɔ no do! Woehyira hɛn ma yɛaba asaase do wɔ mber a temple wɔ wiadze mfɛndzanan beebiara. Yɛreyɛ na yeridzi temple ahyɛmudzi horow do no wɔ hɔ ma Asɔrba biara a ɔfata. Young Adultfo, mma hom ntweɔn awar anaa asɛmpakã dwuma ana hom edzi ahyɛmudzi krɔnkrɔn horow no. Ibotum ayɛ ahoboa dɛ young woman dze enya enya bambɔ na ahoɔdzen a temple ahyɛmudzi dze ma wɔ mfe 18 ntsɛmara no, ber a ayɛ krado na enya pɛ dɛ ibedzi temple ahyɛmudzi no nyi no.12 Hom a hom agye temple nhyira dada no, mma hom mma ndanenyifo anaa ndanenyi nntwe hom mmfi onnyieiwei nokwar ho. Sũa na bisa fi nokwar fibea ahorow fa nya ahyɛmudzi etsitsir krɔnkrɔn a idzii no ho ntseasee kɛsenara. Kɔ temple ntaataado dɛ mbrɛ ibotum na tsie Sunsum no. Ebenya awerɛhyɛmu dɛɛdɛw dɛ ewɔ Ewuradze n’ananmɔn kwan no do. Ebenya akokodur dɛ kɔdo dɛmara dɛ enye binom nkã woho mbra.
Megye dase dɛ sɛ yɛsan mu yi dɛ yɛnye Ɔsor Egya bedzi ahyɛmu na yeenya Agyenkwa no tum ho kwan dze edzi do a, wɔdze enyigye mbordo behyira hɛn wɔ abrabɔ yi mu na onnyiewiei enyimnyam nkwa wɔ dza ɔbɛba no mu akyɛn dza yebotum esusu ho sesei.13 Jesus Christ ne dzin mu, amen.