Naaso Yɛannkasa Hɔn Ho
Hɛn ahyɛmudzi na ayɛdze horow no kyerɛ hɛn na ɔboa hɛn ma daa yɛakaa hɛn nkitahodzi a yɛnye Ewuradze Jesus Christ nya ber yɛkɔ kan wɔ ahyɛmu anamɔn kwan no do.
Me yer, Susan, hɛn mbabanyin baasa na hɔn nyernom, na hɛn mbananom nyina, na Elder Quentin L. Cook, onyia ɔatsena me nkyɛn wɔ Duebien no hɔn Quorum bɛyɛ mfe 15 no, hɔn nyina bɛgye dase ntsɛmara dɛ mo ndwontow nnyɛ dɛw. Naaso sɛ minnyi ndze mpo a, modɔ dɛ motow Nsanananmu asɔr ndwom no. Ndwom no mu nsɛm na mbrɛ wosi tow no boa me ma musũa asɛmpa nkyerɛkyerɛ a ohia tsitsir na okenyan me kra.
Asɔr ndwom kor a ɔayɛ adom wɔ m’abrabɔ mu wɔ akwan nwanwa nye “Hom Mma Yɛnkɔ Do.” Ndaansa yi madwendwen na mesũa afa kasasin pɔkyee bi a ɔwɔ ngyedo no mu ho nsɛm. “Yennketsie dza emumuyɛfo no bɛkã, Ewuradze nko na yebetsie n.”1
Yennketsie.
Sɛ motow “Hom Mma Yɛnkɔ Do” a, metaa dwen nkorɔfo a wɔwɔ Lehi n’enyido-adzehu no mu a wɔreper kɔ kan wɔ anamɔn kwan a ogya kɔ nkwa dua no ho a nna “wɔnndzedze mu ara”2 mbom “wosuoo dadze poma no mu dzendzenndzen, kesii dɛ wɔbaa kan, na wobotwaa hwee famu na wodzii dua no eduaba no bi.”3 Lehi kãa nkorofo pii a wɔkɛhɛɛn dan kɛse pontonn no mu na “wɔtsentseen enyimtsia nsatseaba wɔ [no] do na hɔn a woridzi eduaba no do.”4 No mbuae ma atwetwesi na ahorba hyehyɛ no yɛ nwanwa na nkaadze: “Naaso yɛannkasa hɔn ho.”5
Mobɔ mpaa dɛ Sunsum Krɔnkrɔn no behyira na Oekenyan hɛn mu kor biara ber a yɛbɔmu susu mbrɛ yebotum ahyɛ dzen dɛ “yɛnnkasa” nhyɛdo bɔn na atwetwesi ndze a ɔwɔ ndɛ wiadze a yɛtse mu yi ho.
Mma Nntsie
Kasafua tsie kyerɛ dɛ ihu anaa ikyɛn aso ma obi anaa biribi. Dɛm ntsi, asɔr ndwom “Hom Mma Yɛnkɔ Do” no tu hɛn fo dɛ yɛngye enyim ara dɛ yɛnnketsie dza “emumuyɛfo no bɛkã.” Na Lehi na nkorɔfo a wɔkã no ho a woridzi dua no n’eduaba no bi no ma hɛn fasusu pa a ɔkyerɛ yennketsie atwetwesi na enyimtsiabu a ɔtaa dɛ ofi dan kɛse pontonn mu ba no.
Christ nkyerɛkyerɛ a wɔakyerɛw a “Wɔdze Nyame tseasefo No Sunsum … wɔ nyimpa [hɛn akoma] pon no do”6 no ɔtow hɛn tum mu dɛ “yennketsie” ntõtõ ananmu, ehunahuna, na hɛn wiadze a ɔahwe ase mu ndandan enyi. Mfatoho, gyedzi a otsim Ewuradze Jesus Christ do no dze sunsum mu ahoɔdzen hyɛ hɛn dzen. Gyedzi wɔ Pomfo no mu no yɛ ndzeyɛɛ na tum fapem. Ber a yɛdze N’asɛmpa no nokwar dzi dwuma no, wɔdze sunsum mu tum a yɛdze tum kɔ kan wɔ abrabɔ yi mu ɔhaw mber mu a, yetsim wɔ enyigyedze a Agyenkwa no dze ma hɛn do. Nokwar ara, “sɛ yɛyɛ dza ɔtsen a, ɔnnsɛ dɛ yesuro, na Ewuradze hɛn boafo no, bɛbɛn hɛn daa.”
Ankorankor Nkitahodzi a yedua Ahyɛmudzi mu
Yɛrehɛn ahyɛmudzi krɔnkrɔn mu na yɛregye asɔfodzi ayɛdze emudzi mu no ma yɛnye hɛn Ewuradze Jesus Christ na Ɔsor Egya to kɔndua na ɔkyekyeer hɛn fam Hɔn.8 Iyi n’asekyerɛ ara nye dɛ yenya awerɛhyɛmu wɔ Agyenkwa no mu dɛ hɛn Dzimafo9 na Ntamugyinafo10 na yɛtwer No ndwuma pa, n’ehumbɔbɔr, na n’adom wɔ hɛn abrabɔ akwantu mu. Ber a yegyina pintsinn ba Christ nkyɛn no na yɛnye No to kɔndua no, yɛgye ahotsew, ayarsa, na No Werdambɔ a ɔmmbɔadze da na onnyiewiei mu dzenhyɛ.12
Yɛrodɔ ahyɛmudzi mu pisi na yɛdze robɔ bra no dze Ewuradze mu nkitahodzi ba a ɔyɛ ankorankor mapã na sunsum mu ndamyɛ. Ber a yedzi ahyɛmudzi na ayɛdze krɔnkrɔn ngyinado nyi no, ɔtwe hɛn nkakrankakra bɛn No13 na yenya No krɔnkrɔnyɛ nhyɛdo na dɛ Ɔtse ase ampara wɔ hɛn abrabɔ mu. Nkyii Jesus bor kyerɛwsɛm mu nsɛm nyimpa tsitsir ara; Ne fasusu na nkyerɛkyerɛ nya nhyɛdo wɔ hɛn apɛdze, adwendwen, na ndzeyɛɛ biara do.
Nokwar munnkotum akyerɛkyerɛ mu ara yie hɛn ahyɛmudzi nkitahodzi no tum no su a yɛnye Nyankopɔn Ba tseasefo a Ɔasoɛr efi owu mu no nya. Mbom megye dase dɛ nkitahodzi a yɛnye Ɔno na Ɔsor Egya nya no yɛ nokwar na ɔyɛ awerɛhyɛmu, asomdwee, enyigye na sunsum mu ahoɔdzen ne fibea a ɔkrɔn a ɔma yetum dɛ “[ye]nnsuro atamfo atwetwe si no.”14 Dɛ yɛyɛ Jesus Christ esuafo ahyɛmudzifo na ahyɛmu-siefo no, ɔbɛyɛ hɛn adom dɛ “[yɛ]hyɛ dzen dɛ Ewuradze wɔ hɛn afã”15 na yennketsie nhyɛdo bɔn na wiadze atwetwesi.
Sɛ mekɛsera Asɔrmba a wɔwɔ wiadze aporɔw no a, metaa bisa hɔn asɛmbisa yi: ebɛn adze na ɔboa wo ma “nntsie” wiadze nhyɛdo, atwetwesi, na ahorahora? Hɔn nyiano no yɛ adzesũa ara yie.
Asɔrmba a wɔbɔhyew no taa dɛ wɔda no edzi hia ohia dɛ wodua kyerɛwsɛm adzesũa pa, ntotɔserɛ mpaabɔ, na ahoboaboa yie dze kɔ sacrament ayɛdze dze frɛ Sunsum Krɔnkrɔn no tum no ba hɔn abrabɔ mu. Dza wɔtaa kã so nye sunsum mu abamba a ebusua mu mba nokwafo na anyɛnkofo a wotum twer hɔn dze ma, adzesuadze a ohia a woedua wɔrosom wɔ Ewuradze N’Asɔr a wɔdze asanananmu aba a woesũa, na dɛ wotum hu dɛ adze pan a hwee nnyi mu na ofi dan kɛse pontonn no mu ba.
Mahyehyɛ asɔrba yinom hɔn mbuae wɔ akwan a ohia mapã mu. Odzi kan na dza ohia tsitsir, esuafo yinom wɔ dasegye a otsim wɔ Ɔsor Egya ne enyigye nhyehyɛɛ ho na Jesus Christ ne dzibew dɛ hɛn Pomfo na Agyenkwa. Na otsĩa ebien, hɔn sunsum mu nyimdzee na pisi yɛ ankorankor, hɔnankasa dze, na soronko; a ɔnnyɛ dɔm adze anaa dza onnsi pi. Metsie akra yinom a woetu hɔn ho esi hɔ no rekasa fa ahyɛmudzi a ɔma hɔn ahoɔdzen ma wɔdze dzi otsĩafo do konyim na hɔn nkitahodzi a Ewuradze tseasefo no rema hɔn abamba wɔ mber pa nye ahokyer mber mu. Dɛm nkorɔfo yinom no, Jesus Christ nye hɔn ankorankor Agyenkwa ampaara.
Asɛmpa ahyɛmudzi na ayɛdze horow no dzi dwuma wɔ hɛn abrabɔ tse dɛ kɔmpass ara. Kɔmpass nye edwindze a wɔdze kyerɛ kwankyerɛ etsitsir a ɔyɛ etsifi, anaafo, boka na anee ama woeehu bea a wɔmfa na bea a wɔwɔ. Dɛm kwan noara do no, hɛn ahyɛmudzi na ayɛdze horow no kyerɛ hɛn na ɔboa hɛn ma daa yɛakaa hɛn nkitahodzi a yɛnye Ewuradze Jesus Christ nya ber yɛkɔ kan wɔ ahyɛmu anamɔn kwan no do.
Kwankyerɛ tsitsir no ɔwɔ hɔ ma hɛn nyina wɔ ɔnnkyebo abrabɔ yi mu nye yɛbɛba Christ nkyɛn na yedzi mu wɔ No mu.16 Ahyɛmudzi krɔnkrɔn na ayɛdze horow boa hɛn ma yetsim wɔ Agyenkwa no do na yedua N’adom mu per dɛ,17 yɛbɛyɛ tse dɛ Ɔno ara yie. Yɛwɔ awerɛhyɛmu kɛse dɛ, “tum bi a wonnhu bɔboa emi na ɔwo wɔ enyimnyam nokwardzi.”18
Yerusuo Dadze Poma no mu Dzen
Hɛn ahyɛmu nkitahodzi a yɛnye Nyankopɔn na Jesus Christ nya no nye kwan a yetum dua mu nya ahoɔdzen dɛ “yennketsie.” Na dɛm nkyekyeree yi hyɛ dzen ber a yɛkɔ do ara suo dadze poma no mu dzen. Mbom dɛ mbrɛ Nephi no nuanom no bisaa no, “Dadze poma no a hɛn egya hun … no n’ase nye dɛn … ?
“Na [Nephi] see hɔn dɛ ɔyɛ Nyame n’asɛm; na obiara a obetsie Nyame n’asɛm, na oesuo mu dzen no, ɔnnkɛhera da; na nsɔhwɛ nye abɔnsam n’egyen menaba no runntum nnhyɛ hɔn do mmfura hɔn enyiwa a ɔdze hɔn bɔkɔ ɔsɛɛ mu.”19
Meserɛ, hom nhyɛ no nsew dɛ tum a yɛdze tsia abɔnsam n’egyen menaba no wɔdze bɔ ankorankor no a “wosuo mu dzen” no anohoba nnyɛ hɔn “wɔdzedze” Nyame asɛm no mu ara.
Enyigye mu ara, Ɔsomafo John kãa dɛ Jesus Christ nye Asɛm no.20
“Ahyɛse no na Asɛm no, wɔ hɔ, na Asɛm no nye Nyankopɔn wɔ hɔ, na Asɛm no yɛ Nyame. …
“Wɔnam no do yɛɛ adze nyina na woennkwetsi no annyɛ biribiara a wɔyɛe. …
“Na Asɛm no bɛyɛɛ honam, na ɔbɔsoɛɛ hɛn mu, (na yehun n’enyimnyam, n’enyimnyam dɛ nyia Egya no Woo no Kortoo no a,) adom nye nokwar ahyɛ no mã.”21
Dɛm ntsi, Jesus Christ n’edzin no mu kor nye “Asɛm No.”22
Dza ɔkã ho no, gyedzi ho nsɛmpɔw a otsĩa awɔtwe no kã dɛ, “Yɛgye Bible no dzi dɛ ɔyɛ Nyame n’asɛm wɔ aber a wɔakyerɛ ase yie; yɛgye Mormon Nwoma no so dzi dɛ ɔyɛ Nyame n’asɛm.”23
Ntsi, Agyenkwa ne nkyerɛkyerɛ no, dɛ ma wɔakyerɛw no wɔ kyerɛwsɛm krɔnkrɔn mu no, so yɛ “asɛm no.”
Hom mma munsusu dza ɔwɔ erusuo Nyame n’asɛm mu dzen no mu (1) irudua asɛmpa a wɔdze asan ananmu aba ahyɛmudzi na ayɛdze do dze rekaa, iridzi no nyi, na erehyɛ wo ankorankor nkitahodzi a yɛnye Agyenkwa na N’Egya edzi no dzen na (2) mpaabɔ mu ara, enyiberdo, na aber nyina edze kyerɛwsɛm krɔnkrɔn no na nkɔnhyɛfo atseasefo na asomafo hɔn nkyerɛkyerɛ ridzi dwuma dɛ nokwar a woeyi akyerɛ ne fibea a otsim. Ber a wɔakã hɛn abɔmu na “yesuo Ewuradze mu dzen” na yɛdze Ne nkyerɛkyerɛ bɔ bra dze sakyer no,24 mobɔ anohoba dɛ ankorankor na hɛn nyinara wobehyira hɛn ma “yegyina krɔnkrɔn mbea, na [ye]rinnhihim.”25 Sɛ yɛtsena Christ mu a, nna Ɔbɛtsena hɛn mu na Ɔnye hɛn anantsew.26 Nokwar, “Ɔbɛhyɛ n’Esiarfo dzen, wɔ nsɔhwɛ ber mu, na Ɔbɛma nokwar ayɛ prɔmprɔm.”27
Dasegye
Per Kɔ Kan. Suo mu dzen. Mma nntsie.
Megye dase dɛ Agyenkwa no asɛmpa a wɔdze asanananmu aba mu ahyɛmudzi na ayɛdze ho nokwardzi ma yetum yɛkɔ do wɔ Ewuradze n’edwuma mu, yesuo No mu dzen dɛ Ɔyɛ Nyankopɔn N’asɛm, na yennketsie abɔnsam ne ndaadaa no. Ɔkõ a ɔtsen mu no, hom mma hɛn mu kor biara ntwe nkrantsee, “nokwar tum nkrantsee” no mpo,28 wɔ Jesus Christ ne dzin mu, amen.