Sesei Nye Dɔn no
Sesei nye dɔn no a yebotum dze esũa adze. Sesei nye dɔn no a yebotum dze enu hɛnho. Sesei nye dɔn no a yebotum dze ayɛ binom adom.
Mo nuanom na nkyerɛbaa adɔfo, ehyiadzi yi ayɛ nkaadze wɔ akwan pii mu. Mpaabɔ, amandzɛɛbɔ nsɛm, na ndwom horow no ayɛ hɛn adom. Ewuradze n’asomfo ekenyan hɛn.
Yenya ndaamba ho kwankyerɛ a ohia kɛse. Me mpaabɔ nye dɛ Sunsum no nye hom akasa akɔtsen wɔ ndzɛmba ahorow a Ewuradze bɛpɛ dɛ hom yɛ.
Yennyim dza ɔbɛba ndaamba no nyina. Wimu sesã. Wonnkotum akyerɛ mbrɛ sikasɛm ho nhyehyɛɛ bɛyɛ. Esian, akõkoekõ, na yarba horow botum asesã abrabɔ ntsɛmara. Ndzeyɛɛ yinom bor hɛn nhyɛdo do. Naaso ndzɛmba binom wɔ hɔ a yebotum ahyɛ do, a mbrɛ yesi hwer hɛn mber dabiara kã ho.
Mepɛ Henry Van Dyke n’awensɛm yi a, wɔdze faam Wells Esuapɔn wɔ New York ne ewia watse kɛse no do. Ɔkenkan dɛ:
Me nsatseaba no sunsuma ogya no
Kyɛ ndaamba fi dza wɔabɛsen kɔ mu:
Dza odzi ne kan, dɔn a ɔmmbae no
Ɔwɔ sum mu, na onnyi wo tum ase:
N’ekyir nsensanee no,
Dɔn no a woetwa mu no, ɔnnyɛ wo dze bio:
Dɔn kor pɛr na ɔkã wo nsa,—
SESEI no a sunsuma gyina do no.1
Nyew, ɔsɛ dɛ yesũa dza abɛsen, na nyew, ɔsɛ dɛ yɛyɛ ahoboa ma ndaamba. Mbom sesei pɛ na yebotum ayɛ. Sesei nye dɔn no a yebotum dze esũa adze. Sesei nye dɔn no a yebotum dze enu hɛnho. Sesei nye dɔn no a yebotum dze ayɛ binom adom na “[yɛa]ma abaw a ɔsensɛnee famu do.”2 Dɛ ma Mormon tuu ne babanyin Moroni fo no “Ma yɛnyɛ edwuma enyiberdo; na … yɛwɔ edwuma yɛ wɔ ber a yɛwɔ dɛm dɛtsedan yi mu yi, ama yeedzi tseneneeyɛ nyina ne tamfo no do konyim, na hɛn akra ahom wɔ Nyankopɔn n’ahenman no mu.”3
Otsĩafo no nnda dabiarada. Nokwar benya tsiafo aber nyina. Misi mo ntotɔserɛ anapa yi do dɛ hom nyɛ dɛm ndzɛmba no a ɔbɛma hom sunsum mu ahoɔhar pa ayɛ kɛse, dɛm mma do no a Elder Dieter F. Uchtdorf rekã ho asɛm no, a ɔbɛma hom akɔ do akɔ kan dze edua ɔhaw na kwan biara ɔbɛba mu.
Sunsum mu ahoɔhar pa yɛ kɛse ber a yɛsɔr wɔ temple mu na hɛn ntseasee wɔ nhyira horow no a yenya no hɔ no ne tɛtɛr na no bun ho ntseasee nyin wɔ hɛn mu. Mototɔ serɛ hom dɛ hom ntsim wɔ temple onnyiewiei nhyira horow no do mfa nsiw wiadze akwan horow no. Hom mber wɔ hɔ no dze daapem nhyira ba.
Asɔr no renyin no, yɛbɔ mbɔdzen dɛ yebesisi temple dodow a so ɔbɔsõ. Temple afofor eduonan anan na mber yi wogu do risi. Worisiesie dodowara so. Mobɔ mpaa ma nkorɔfo a wɔawea a wɔyɛ dɛm edwuma no wɔ wiadze nyina mu.
Sunsum mu enyisɔ mu no, ɔyɛ me enyigye dɛ medze hɛn nhyehyɛɛ dɛ yebesi temple afofor kor wɔ mbea yinom a odzi do yinom: Wellington, New Zealand; Brazzaville, Republic of the Congo; Barcelona, Spain; Birmingham, United Kingdom; Cusco, Peru; Maceió, Brazil; Santos, Brazil; San Luis Potosí, Mexico; Mexico City Benemérito, Mexico; Tampa, Florida; Knoxville, Tennessee; Cleveland, Ohio; Wichita, Kansas; Austin, Texas; Missoula, Montana; Montpelier, Idaho; na Modesto, California.
Temple duesuon yinom behyira ɔdodow hɔn nkwa a wɔwɔ ntwamutam n’afã ebien nyina no. Modɔ hom, mo nuanom na nkyerɛbaa adɔfo. Tsitsir ara no, Ewuradze dɔ hom. Ɔno nye hom Agyenkwa, na hom Pomfo. Odzi N’Asɔr ne kan na Ɔma kwankyerɛ. Nkyɛ yɛayɛ nkorɔfo a yɛbɛfata Ewuradze a, Ɔsee dɛ, “Hom bɛyɛ me man, na emi so mayɛ hom Nyankopɔn.’’4
Iyi ho na mobɔ mpaa wɔ Jesus Christ ne dzin krɔnkrɔn no mu, amen.