Ana Nhyehyɛɛ no Reyɛ Edwuma?
Megye dase dɛ enyigye ho nhyehyɛɛ no yɛ edwuma. Hom Ɔsor Egya a ɔdɔ hom, na Ɔhyehyɛe.
Ana nhyehyɛɛ no reyɛ edwuma?
Ɔnkyɛree na menye aberantsɛ bi a ɔasom dɛ asɛmpasomafo mfe pii a abasen kɔ na sesei ɔwɔ n’edwuma a ɔawea ho mu nyaa nkitahodzi. Akwan bi mu no, nna n’abrabɔ rokɔ do yie. Mbom nna ne gyedzi rokɔ famu. Nna ɔrodɔ kɔ ekyingye po mu wɔ Agyenkwa no na N’Asɔr ho. Ɔkyerɛ mu dɛ ne nsa nnkã nhyira a nkyɛ n’enyi da kwan dɛ obenya efi asɛmpa nsanananmu no mu. Ɔnntse nkã dɛ enyigye ho nhyehyɛɛ no reyɛ edwuma wɔ n’abrabɔ mu.
M’amandzɛɛbɔ nsɛm ndɛ no kɔ ma hɔn a bia wɔwɔ dɛm atsenkã yi bi. Me kasa kyerɛ hɔn a mber bi mu no “[wɔ]atse nkã dɛ wɔatow ɔpon ho ndwom pɛn” naaso “[wɔnn]tse dɛm nkã no sesei.”1
Hɛn Ɔsor Egya dɔfo esiesie nhyehyɛɛ nwanwa bi ama hɛn onnyiewiei enyigye. Naaso sɛ abrabɔ no anndan ma hɛn enyi da ho kwan a, obotum ayɛ dɛ ma nhyehyɛɛ no rennyɛ edwuma.
Ebia a ɔyɛ a yɛtse nkã dɛ ma Jesus n’esuafo no tsee ber a nna wɔwɔ hɛn bi mu “wɔ po finimfin, na asorɛkye rubu bɔ no: na mframa sii hɔn enyim.”2
Nkyii, anapaatu no:
“[Jesus] nantseew po enyi baa hɔn nkyɛn.
“Na wohun dɛ ɔrenantsew po enyi no, hɔn akoma tui, … na wɔdze hu kekaa mu.
“Na ntsɛmara [Jesus] nye hɔn kasae, na ɔsee hɔn dɛ, Hom nhyɛ dzen; mara a; mma hom nnsuro.
“Na Peter buaa no see dɛ, Ewuradze, sɛ woara a, hyɛ me ma membra wo nkyɛn wɔ nsu no do.
“Na ɔsee dɛ, Bra. Na Peter fii hɛn no mu sii, na ɔnantseew nsu no dɛ ɔrokɔ Jesus nkyɛn.
“Na ohun mframa no, osuroi; na ɔhyɛɛ ase rodɔ no, ɔkaa mu dɛ, Ewuradze, gye me.
“Na ntsɛmara Jesus too ne nsa suoo no mu, na ɔsee no dɛ, Ɔwo a wo gyedzi suar, ɔyɛ dɛn ntsi na egyee kyim?”3
Mubotum menye hom akyɛ fapem ebiasa a musũa fi Peter hɔ? Mobɔ mpaa dɛ dɛm fapem yinom botum aboa obiara a ɔtse nkã dɛ enyigye ho nhyehyɛɛ no rennyɛ edwuma wɔ n’abrabɔ mu.
Odzi kan, fa gyedzi wɔ Jesus Christ mu dzi dwuma.
Peter ne gyedzi no yɛ me ahobow. Jesus frɛɛ no ara dɛ “[ɔm]bra” no, osianee fi ne hɛn a asorɛkye rubu bɔ no no mu. Ɔyɛ dɛ nna onyim dɛ sɛ Jsus Christ to nsa frɛ no dɛ ɔnyɛ biribi a, obotum ayɛ.4 Nna Peter no werɛ twer Agyenkwa no kyɛn ne hɛmba no. Na dɛm gyedzi no maa no tum a wɔdze dzi dwuma akokodur mu wɔ atseetsee, a ɔyɛ hu tsebea mu.
Peter ne gyedzi yi ma mekaa sũahu bi a metsee fii Elder José L. Alonso hɔ. Mber tsĩabaa ekyir a Elder Alonso ne babanyin fii mu a, ogya ebusua a mbofra nkakramba wɔ mu no, Elder Alonso tsee dɛ mbofra no rekasa.
Wobisaa dɛ “Ebɛnadze na yɛbɛyɛ?”
Babaa a oedzi mfe akron buaa dɛ, “Paapa noho ye. Ɔrekyerɛkyerɛ Jesus Christ n’asɛmpa no.”
Tse dɛ Peter no, basiaba kakraba yi hwɛe tra n’aperdzi do na ɔtwer Jesus Christ na No Werdambɔ no. Gyedzi wɔ Agyenkwa no mu no ma asomdwee na ahoɔdzen a wɔdze kɔ kan.
Sɛ itwa w’enyi ekyir hwɛ w’abrabɔ a, me gye dzi dɛ ibohu dɛ edze gyedzi edzi dwuma mpɛn pii. Erodɔm Asɔr no yɛ gyedzi ho dwuma. Enye Ɔsor Egya rekasa wɔ mpaabɔ mu no yɛ gyedzi ho dwuma. Kyerɛwsɛm akenkan yɛ gyedzi ho dwuma. Eretsie m’amandzɛɛbɔ nsɛm a ɔwɔ dɛm wiadze mfɛndzanan ehyiadzi yi mu no yɛ gyedzi ho dwuma. Dɛ mbrɛ President Russell M. Nelson akã dɛ, “Mma nntsew gyedzi no a ewɔ no dada no do.”5
Adzesũadze kor so a musũa fi Peter hɔ nye yi:
Ɔhaw ber mu no, dan kɔ Jesus Christ hɔ ntsɛmara.
Ber a ɔrenantsew bɛn Agyenkwa no, mframa no maa Peter suroi, na ɔhyɛɛ ase dɛ ɔrodɔ. Naaso Peter hun dza orisi no, ɔammper dɛ ɔnoara botwa nsu no anaa ɔbɔbor nsu no asan akɔ hɛn no mu. Nkyɛ obegyaa ne gyedzi wɔ Christ mu hɔ no, mbom osuo mu dzendzenndzen a, okaa mu dɛ, “Ewuradze, gye me.”
“Na ntsɛmara Jesus too ne nsa, suoo no mu.’’6
Hɛn nyina hyia mframa begyabegya a obotum ehihim hɛn gyedzi na ɔama yɛadɔ. Sɛ iyi si a, mesrɛ kaa dɛ Ɔsor Egya ne enyigye ho nhyehyɛɛ no wɔ dzin kor so—ɔpon ho nhyehyɛɛ. Nyhehyɛɛ no nnkyerɛ dɛ yebodua abrabɔ a ɔgow mu ara a, yɛnnkopurow da, yɛnndɔ da, a ɔserew da hɛn enyim daa daa. Nna Nyankopɔn nyim dɛ yebehia dɛ wɔpon hɛn. Iyi ntsi na Osiesie ɔpon ho nhyehyɛɛ no.7 Iyi ntsi na Ɔsomaa Ɔpomfo no. Sɛ yedzi aper—wɔ siantsir bi ntsi a—ɔno nnkyerɛ dɛ nhyehyɛɛ no rennyɛ edwuma. Dɛm aber no na yehia nhyehyɛɛ no ankasa!
Dɛm mber no mu no, dzi Peter ne fasusu do. Dan kɔ Agyenkwa no hɔ ntsɛmara.
“Sesei nye hom mber na hom nkwagye da. … Mma hom nntu hom nnuho da nnhyɛ da fofor.’’8
Ɔmmfa ho beebi a yɛwɔ na beebi a yɛakɔ, nnuho nye kwan a wɔdze kɔ kan. President Nelson akyerɛkyerɛ dɛ:
“Biribiara mma ahotɔ, mma nkamfo, anaa onnhia tsitsir mma hɛn ankorankor mpontu nnkyɛn dɛ daa daa yebesi hɛn adwen pi wɔ nnuho do. …
“Sɛ erenantsew enyimia do wɔ ahyɛmu anamɔn kwan no do o, sɛ apatser o, anaa efi ahyɛmu anamɔn kwan no do o, anaa nntum mpo nnhu bea a ewɔ sesei wɔ kwan no do o, mototɔ serɛ wo dɛ nu woho. Dua ndzeyɛɛ na papayɛ nkakrankakra da kor biara do—fa nya daa daa nnuho ho ahoɔdzen nya tum ho sũahu.”9
Ereba Christ hɔ kyɛn erodwen Noho ara anaa erekasa fa Noho anaa erodɔ No ara. N’asekyerɛ dɛ iridzi N’ekyir. Ɔkyerɛ dɛ yɛrobɔ bra tse dɛ ma Ɔkyerɛ hɛn no. Na ma hɛn nyina no, kyerɛ dɛ yerunu hɛnho a, twentweɔn biara nnyim.
Nna me mbabaa hɔn mu kor yɛ edwuma wɔ asɛmpasomafo ntsetsee bea. Ɔkãa elder bi a ɔkyerɛ no adze a ɔdaa no edzi kyerɛɛ no dɛ ɔnngye ndzi dɛ Mormon Nwoma no yɛ nokwar ho asɛm kyerɛɛ me. Nna ɔabɔ mpaa abɔ mpaa dɛ obenya sunsum mu dase bi, naaso ne nsa annkã nyiano biara.
Me babaa bɔɔ mpaa dɛ obohu dza ɔbɛyɛ dze aboa dɛm asɛmpasomafo yi. Nkenyan a onyae nye dɛ kyerɛwsɛm no wɔammfa amma dɛ yɛnkenkan na yenya dasegye ara nko; wɔdze mae dɛ ɔnkyerɛkyerɛ hɛn ma yendzi Nyame ne mbrasɛm do so. Me babaa no nye asɛmpasomafo no kyɛɛ dɛm adwen yi.
Ekyir no, ohun asɛmpasomafo yi bio, a nna n’enyi agye. Ɔkãa kyerɛɛ no dɛ afei oenya dasegye dɛ Mormon Nwoma no yɛ nokwar. Onyim dɛ dɛm dase yi bae osiandɛ nna ɔrobɔ mbɔdzen kɛse dɛ ɔbɛyɛ dza Mormon Nwoma no kyerɛkyerɛ no.
Hom ma yendzi Peter ne fasusu do dɛ yɛbɛdan akɔ Agyenkwa no hɔ wɔ ɔhaw mber mu. Dzi Jesus Christ n’ekyir kyɛn dɛ ebɔtwer ɔwoara wo nyansaa nye wo ahoɔdzen. Ɔmmfa ho mber dodow a aper dɛ ɔwoara botwa nsu no a Ɔnnka woho, ɔmmpa ho koraa dɛ ebɛba No hɔ. Nhyehyɛɛ no yɛ edwuma!
Fapem a otsia ebiasa a musua fi Peter na no sũahu mu nye yi:
Brɛ woho adze wɔ Ewuradze enyim, na Ɔbɛma wo do ama ndzɛmba akɛse.
Peter akyerɛ ne gyedzi, wɔ ɔrenantsew nsu no do na ɔrefrɛ Agyenkwa no ber a nna ohia mboa. Mpo no, Agyenkwa no hun dza Peter bɛyɛ ma ɔabor do wɔ ne ndaamba mu. Ɔkãe dɛ “Ɔwo a wo gyedzi suar, ɔyɛ dɛn ntsi na egyee kyim?”10
Nkyɛ Peter botum enya ebufuw wɔ dɛm nkãenyim yi ho. Naaso ɔgyee too mu ahobrɛadze mu. Ɔkɔr do hwehwɛɛ gyedzi kɛse wɔ Jesus Christ mu. Odua suahu horow a ɔto gyedzi mu do no—binom yɛ dzendzenndzen ankasa no—Peter ekyir yi bɛyɛɛ kandzifo ɔbotan-tsim a nna Ewuradze hia no dɛ ɔbɛyɛ no. Ɔyɛɛ ndzɛmba akɛse pii wɔ Ewuradze no som mu.
Ebɛn ndzɛmba akɛse na Ewruadze pɛ dɛ eyɛ? N’Asɔr na N’ahenman mu no, kwan pii wɔ hɔ a wɔdze som na wɔdze boa binom tse dɛ ma Agyenkwa no yɛe no. Ɔpɛ dɛ ekã N’edwuma kɛse noho. Enyigye ho nhyehyɛɛ no remmba mu yie mma wo wɔ aber bi mu kyɛn dɛ ber a eroboa binom ma woedzi enyigye ho Nhyehyɛɛ no do.
Mara merekyekyer me gyedzi no, Alma ne nsɛm yi yɛɛ abrabɔ nsakyer maa me: “Nhyira akã hɔn a wɔbrɛ hɔnho adze a nnyɛ dɛ wɔhyɛɛ hɔn ma wɔbrɛɛ hɔnho adze.”11 Ahobrɛadze mu ara hom mma yengyina gyinabew a Jesus Christ botum ama hɛn do, Oedzi hɛn kan na Ɔayɛ hɛn tum horow akɛse.12
Megye dase dɛ enyigye ho nhyehyɛɛ no yɛ edwuma. Hom Ɔsor Egya a ɔdɔ hom, na Ɔhyehyɛɛe. Ɔyɛ edwuma osiandɛ Jesus Christ nam No Werdambɔ do dzii bɔn na owu do konyim Bra Ne nkyɛn, dzi N’ekyir, na “wɔdze ɔpon nhyehyɛɛ kɛse no bɛma hom ntsɛmara.”13 Jesus Christ ne dzin mu, amen.