Ma W’Akoma Do na Dzi Dɛw
Wɔwoo hɛn mber yi mu wɔ botae krɔnkrɔn bi ntsi, Israel hɔn mboano ho.
Ɔrekasa kyerɛ Thomas B. Marsh, nsakyereenyi a ɔnnkyɛree no, Ewuradze kãa no nkuranhyɛ mu ara dɛ, “Ma w’akoma do na dzi dɛw, osiandɛ w’asɛmpakã dwuma no dɔn no asõ’’ (Nkyerɛkyerɛ na Ahyɛmudzi 31:3).
Megye dzi dɛ ɔfrɛ yi botum ayɛ nkenyan ama Asɔr mu asɔrmba nyina. No korakoraa no, hɛn mu kor biara enya Israel mboano ho dwuma wɔ ntwamutam n’afã ebien no efi hɛn Ɔsor Egya hɔ.
President Russell M. Nelson akã dɛ, “Dɛm mboano,’’ no “nye adze a ohia dodow a ɔrokɔ do wɔ asaase do ndɛ. Adze biara nnsõ nnkyɛn ne kɛseyɛ, adze biara nnhia nnkyɛn no, adze biara so nnkyɛn n’enyimnyam.’’1
Nokwar, ndzɛmba a mfaso wɔ ho pii wɔ wiadze mu. Wonnkotum abobɔ hɔn nyina edzin. Naaso ana mmpɛ dɛ edze woho bɛhyɛ adze kɛse a wo nsa bɛkã mu a wo ntoboa dze nsesã a ohia ba a? Mboano no yɛ onnyiewiei nsesã dze ma hɛn nyina. Mbofra na mpanyin nyina botum dze hɔnho ahyɛ mu a hɔn gyinabew horow na bea a wɔtsetse mmfa ho. Adze biara nnyi wiadze mu a ofua obiara kyɛn iyi.
Ɔrekasa tsitsir ara rekyerɛ mbabun no, President Nelson kãa dɛ: “hɛn Ɔsor Egya dze No sunsum mu enyimnyamfo mu dodow esie—ebia… No kuw papaapa no—ama dzibew a odzi ewiei yi. Sunsum mu enyimnyamfo no—akansifo mu akɔbran, ekunyin no—nye hom!’’2
Nyew, woesiesie hom ana abrabɔ yi rehyɛ ase, na wɔawo hom sesei dɛ hom mbɛkã Israel mboano edwuma kɛse no ho wɔ ntwamutam afã ebien no ho wɔ nda a odzi ekyir yinom mu (hwɛ Nkyerɛkyerɛ na Ahyɛmudzi 138:53–56).
Ebɛnadze ntsi na edwuma yi hia dodow? Osiandɛ “akra som bo kɛse wɔ Nyame enyim’’ (Nkyerɛkyerɛ na Ahyɛmudzi 18:10). Na osiandɛ “obiara a ɔgye [Jesus Christ] dzi, na wonuma no no, wɔbɛgye no nkwa; na … wobenya Nyankopɔn n’ahenman no ayɛ hɔndze’’ (3 Nephi 11:33). Ɔkã bio dɛ, “dza Egya wɔ [no] nyinara wɔdze bɛma’’ hɔn a wɔgye N’ayɛdze horow na wosie N’ahyɛmudzi horow (Nkyerɛkyerɛ na Ahyɛmudzi 84:38). Dza ɔkã ho no, “edwumayɛfo no dze wosuar’’ (Luke 10:2
Jesus Christ N’Asɔr a ɔwɔ hɔ ma Nda a Odzi Ekyir Ahotseweefo mu nko na yehu tum no, etumdzi no, na kwan a yɛdze nhyira a ɔtse dɛm bɛma binom, sɛ wɔtse ase anaa woewu.
Dɛ mbrɛ President Nelson kãa dɛ: “Ber biara a yɛbɛyɛ biribiara a ɔboa obi—wɔ ntwamutam n’afã biara no—ma wɔnye Nyankopɔn edzi ahyɛmu na wɔagye hɔn enuma na ayɛdze horow etsitsir no, nna yɛroboa ma wɔaboa Israel ano. Ɔnnyɛ dzen koraa.’’3
Ber a akwan horow pii wɔ hɔ a yɛbɔboa wɔ mboano no mu no, mebɛpɛ dɛ mekã kor tsitsir bi ho asɛm: erosom dɛ etuhoakyɛ asɛmpasomafo. Hom mu beberee dze, iyi kyerɛ dɛ wɔbɛyɛ asɛmpasomafo a wɔkyerɛkyerɛ. Nkaafo mu beberee dze, iyi kyerɛ dɛ wɔbɛyɛ asɛmpasomafo a wɔsom. Mbom wiadze no bɔ mbɔdzen dɛ ɔbɛdan mbabun no enyi efi asodzi krɔnkrɔn dodow yi ho a ɔdze suro na asomdwee ho dadwen.
Ndanenyi bi so botum ayɛ worinya wiadze nsan yarba, worifi edwuma papa mu, worisianka nwomasũa, anaa hɔn enyiwa gye obi ho a wɔpɛ awar no. Obiara benya nankasa no nsɔhwɛ. Ndanenyi horow a ɔtsetse dɛm no botum aba mber pɔtsee a erokɔ Ewuradze no som mu, na nsanmuyi ahorow a ɔda edzi pefeee ekyir no, nntaa nnyɛ mberɛw wɔ aber no mu.
Minyim fi me sũahu mu dɛ aberantsɛba bi a ɔtse dɛm a nna ɔrehaw. Ber a nna mereyɛ ahoboa maakɔ m’asɛmpakã dwuma no, ahobow nhyɛ binom peer dɛ wobogura m’abaw. Nna kor nye me sẽ datser. Mber a ohun dɛ mereba no hɔ ama meetum ayɛ asɛmpasomafo no, ɔbɔɔ mbɔdzen dɛ ɔbɛdaadaa me ma mannkɔ som. Nna minnyim hwee koraa wɔ ho dɛ me sẽ datser no tsia Asɔr no.
Nna me nwomasũa ne nntwitwa ananmu so yɛ hwuenyann. Mber a meserɛɛ kwan dɛ mebegya mfe ebien efi mo sũapɔn nhyehyɛɛ ho no, wɔsee me dɛ ɔnnkɛyɛ yie. Sɛ afe kor ekyir na mannsan ammba a wɔnnkɛfa me wɔ sũapɔn hɔ. Brazil hɔ dze, nna iyi yɛ adze kortsee a ɔbɛma ɔagye wo wɔ sũapɔn adzesũa mu no yɛ akansi nsɔhwɛ dzendzenndzen bi.
Mehyɛɛ do sii do ara ekyir no, wɔdze ahotwetwe see me dɛ minnyi hɔ afe kor no, mubotum akyerɛw dze enya kwan soronko bi. Wobotum agye ato mu anaa wɔnnkɛyɛ. Mosuroi wɔ adwen no ho dɛ merebɛkyerɛw dɛm nsɔhwɛ dzendzen no a edze nya kwan wɔ m’adzesũa a megyaa too hɔ mfe ebien n’ekyir no.
Nna tsitsir ara m’enyi so san gye akataasia bi ho. Nna m’anyɛnkofo beberee so hɔn enyi gye no ho Modwendwen ho dɛ, sɛ mokɔ asɛmpakã dwuma a, obi bɛgye no efi me nsa mu.’’
Naaso nna Ewuradze Jesus Christ yɛ me nkenyan kɛse dɛ mma munnsuro ndaamba ber a meper dɛ medze m’akoma nyina bɔsom No.
Nna Ɔno so wɔ dwuma a ɔwɔ dɛ ɔhyɛ no mã. Ɔnoara Ne nsɛm mu no, Ɔkyerɛkyerɛɛ mu dɛ, “Osiandɛ mifi sor misianee mebae, nnyɛ dɛ merebɛyɛ mankasa me pɛ, na mbom nyia a ɔsomaa me no ne pɛ’’ (John 6:38). Na nna N’edwuma no yɛ mberɛw? Ɔnnyɛ nokwar. N’amandzehu a nna ɔyɛ N’edwuma n’afã tsitsir bi, maa Ɔno, “a meyɛ Nyame a mo sõ sen obiara mpo no, moho popoe osian yaw ntsi, na bɔgya fii mo honandua enyi nyina kyĩi, na muhun amandze wɔ honam nye sunsum mu—na mepɛɛ dɛ nkyɛ [Ɔno] monnkɔnom kuraba wenwen no ano na mawodow—
“Naaso, enyimnyam nkã Egya no, na [Mo] nomee na [Mu] wiee mo mboaboaho biara yɛ dze maa adasamba.”Nkyerɛkyerɛ na Ahyɛmudzi 19:18–19).
Erosom etuhoakyɛ asɛmpakã dwuma bɛyɛ dɛ ɔyɛ dzen ma hɛn. Ebia a obehia dɛ yegyae ndzɛmba a ohia mu mber kakra. Nokwar ara Ewuradze nyim iyi, na Ɔbɔwɔ hɛn afã aber nyina.
Nokwar, wɔ hɔn nsɛm mu dze ma asɛmpasomafo no wɔ Preach My Gospel mu no, President a Odzi Kan na N’apamfo bɔ anohoba dɛ, “Ewuradze botua hom kaw na oehyira hom ara yie ber a ahobrɛadze na mpaabɔ mu ara hom som No.’’4 Kwan bi mu no ɔyɛ nokwar dɛ oehyira Nyankopɔn ne mba nyina, na mbom nsonsonee da worihyira wo na worihyira wo yie wɔ No som mu ntamu.
Hom kaa nsɔhwɛ horow a modween dɛ mihyiae ansaana m’asɛmpakã dwuma no? Me sẽ datser? Menyaa fofor bi. Mo sũapɔn? Wɔyɛɛ no soronko maa me. Hom kaa dɛm akataasia no? Ɔwaar m’anyɛnkofo brɛbo mu kor.
Naaso nokwar ara Nyankopɔn hyiraa me yie. Na musũae dɛ Ewuradze ne nhyira botum efi akwanhorow soronko mu aba efi mbrɛ hɛn enyi si da ho kwan no. Ne nyina no, nnyɛ N’adwen nye hɛn adwen (hwɛ Isaiah 55:8–9).
Nhyira beberee a Ɔdze ama me no mu kor dɛ mosom No dɛ etuhoakyɛ asɛmpasomafo nye gyedzi kɛsenara wɔ Jesus Christ na No Werdambɔ no mu na nyimdzee na dase a ɔyɛ dzen yie wɔ Ne nkyerɛkyerɛ ho, dɛm ntsi ɔyɛ dzen dɛ “nkyerɛkyerɛ mframa biara’’ behimhim me. (Ephesusfo 4:14). Suro dɛ mebɛkyerɛ adze fii hɔ. M’ahom dɛ medze awerɛhyɛmu behyia nsɔhwɛ tuu mpon. Sɛ mohwɛ ankorankor na ebusua ebusua a mihyae anaa mekyerɛkyerɛ hɔn adze ber a meyɛ asɛmpasomafo a, musũae dɛ Nyankopɔn ne nkyerɛkyerɛ yɛ nokwar sɛ Ɔkã dɛ bɔn mmfa nokwar enyigye mba na dɛ setsie ma Nyankopɔn ne mbrasɛm boa hɛn ma yɛyɛ prɔmprɔm wɔ honandua na sunsum mu mu nyina (hwɛ Mosiah 2:41; Alma 41:10). Na musũae maa moho dɛ Nyankopɔn yɛ anwanwadze Nyankopɔn (hwɛ Mormon 9).
Ndzɛmba yinom nyina dzii akõtsen wɔ me mpanyinyɛ ahoboa mu, a awar na baatanyɛ a ɔba mu, Asɔr som, na edwumayɛ na sɔn mu abrabɔ kã ho.
M’asɛmpakã ekyir no, minyaa mfaso fi m’akokodur mpontu mu dɛ medze moho bɛma dɛ Jesus Christ na N’Asɔr ne kadofo wɔ gyinabew horow nyina mu na ma nyimpa nyina, mpo menye ɔbaa ahoɔfɛwnyi bi a ɔbɛyɛɛ me ɔbrapa, nyansafo, enyigye, na onnyiewei adamfo, m’abrabɔ mu ewia ne kan kyɛɛ asɛmpa no.
Nyew, Nyankopɔn ehyira me ara yie, ɔbor dza mususui no, dɛmara na Obehyira hɔn a “ahobrɛadze na mpaabɔ mu ara wɔsom No’’ nyina. Me ndaase ma Nyankopɔn wɔ Ne papayɛ ho yɛ onnyiewiei.
M’asɛmpakã dwuma sesãa m’abrabɔ koraa. Musũae dɛ ɔyɛ mfasodze dɛ ibenya awerɛhyɛmu wɔ Nyankopɔn mu, ibenya awerɛhyɛmu wɔ Ne nyansaa na ehumbɔbɔr na wɔ N’anohoba horow mu. Ne nyina no, Ɔyɛ hɛn Egya, na ekyingye biara nnyi hɔ dɛ, Ɔpɛ papa dze ma hɛn.
Mbabun adɔfo wɔ wiadze nyina mu, metsen ɔfrɛ kor noara a hɛn nkɔnhyɛnyi President Nelson, dze ama hom nyina no, “dɛ hom mbɛkã Ewuradze ne mbabun nsordaafo no ho mfa mboa Israel mboano.’’ President Nelson kãa dɛ:
“Biribiara nnyi nsunsuando kɛse nkyɛn iyi Nokwar ara dɛ biribiara
“Ɔwɔ dɛ mboano yi yɛ wo adzehia. Iyi nye edwuma a wɔsomaa wo asaase do dɛ bɛyɛ.’’5
Wɔwoo hɛn mber yi mu wɔ botae krɔnkrɔn bi ntsi, Israel hɔn mboano ho. Sɛ yɛsom dɛ etuhoakyɛ asɛmpasomafo a, mber bi mu no yebenya nsɔhwɛ, naaso Ewuradze Nankasa nye hɛn fasusu kɛse na akwankyerɛ wɔ gyinabew horow a ɔtsetse dɛm mu. Ɔtse ma asɛmpakã ne dzendzen yɛ ase. Yɛdze No mboa no, yebotum ayɛ ndzɛmba a ɔyɛ dzen. Ɔbɔwɔ hɛn afã (hwɛ Nkyerɛkyerɛ na Ahyɛmudzi 84:88), na Obehyira hɛn kɛsenara ber a ahobrɛadze mu ara yɛsom No.
Siantsir yinom nyina ntsi, ɔnnyɛ me ahobow dɛ Ewuradze kãe kyerɛɛ Thomas B. Marsh na ma hɛn nyina dɛ, “Ma w’akoma do na dzi dɛw, osiandɛ w’asɛmpakã dwuma no dɔn no asõ.’’ Jesus Christ ne dzin mu, amen.