Adzesũadze fi Bura no ho.

Susan H. Porter ne Kasae

Ɔpamfo a Odzi Kan wɔ Wiadze Mfɛndzanan Primary Presidency mu

Yebotum afa dɛ yɛbɛdan akɔ Agyenkwa no hɔ akɛgye ahoɔdezn na ayarsã a ɔbɛma yeetum ahyɛ dza wɔsomaa hɛn dɛ yɛmbɛyɛ no wɔ ha nyinaramã.

Ebɛn enyigye na ɔyɛ dɛ menye hom mu kor biara yɛaboa hɛn ano wɔ wiadze mfɛndzanan mbaa nhyiamu ha!

Minyinii wɔ New York atɔe na nna mokɔ asɔr wɔ Asɔr ne nkorbata kakraba bi mu bɛyɛ akwansin 20 (32 km) fi hɛn fie. Ber a nna menye me nyɛnko Patti Jo wɔ Kwesida Skuul wɔ hɛn chapel dadaw a ɔwɔ dan bi n’ase a wotua ho kaw mu no, menntum ennsusu da dɛ mebɛkã wiadze mfendzanan mbaa ɔpepem nkyerɛbaa kuw ho.

Mfe enum a abasen kɔ no, mo kun, Bruce, yaree dzendzenndzen mber a nna yɛnye Ahotseweefo a woetu hɔnho esi hɔ rosom wɔ Europe Boka Apaamu hɔ. Yɛsaan hɛn ekyir kɔr fie na adapɛn kakra ekyir no owui. M’abrabɔ sesãa amon mu. Midzii yaw na meyɛɛ mberɛw na me hawee. Mototɔe serɛɛ Ewuradze dɛ ɔnkyerɛ mo kwan: “Ebɛnadze na Ipɛ dɛ meyɛ?’’

Adapɛn kakra ekyir no, nna morohwehwɛ me krataa mu ber a m’enyiwa bɔɔ mfonyin ketseketse bi do wɔ catalog mu. Ber a megyen m’enyiwa hwɛɛ no, muhun dɛ ɔyɛ adrɔnyi bi no mfonyin wɔ Samarinyi ɔbaa no a ɔnye Jesus wɔ bura no ho no. Ber kor no, Sunsum no kãsaa pefee kyerɛ me dɛ: “Dɛm na ɔwɔ dɛ eyɛ.’’ Nna Ɔsor Egya dɔfo roto nsa afrɛ me dɛ me mbra Agyenkwa no hɔ na mo mbosũa.

Mebɛpɛ dɛ menye hom kyɛ adzesũadze ebiasa a meesũa ber a mokɔ do nom nsu fi No “nkwa nsu’’ bura no mu.¹

Odzi kan: Hɛn Gyinabew horow Ndɛ na dza Etwa mu Kɔ no, Nnkyerɛ Hɛn Ndaamba

Nkyerɛbaa, minyim dɛ hom mu pii tse dɛ mbrɛ nna metse, wonnhu mbrɛ wobesi ehyia ɔhaw a ɔyɛ dzen na dza wɔayew—dza wɔayew osiandɛ hom abrabɔ ronnkɔ do wɔ kwan a hom enyi daa do no, hom bɔɔ ho mpaa, anaa hom yɛɛ ho hyehyɛɛ.

Mbrɛ hɛn gyinabew tse biara no, hɛn abrabɔ yɛ krɔnkrɔn na ɔwɔ mfaso na botae. Hɛn mu kor biara yɛ Nyankopɔn ne babaa dɔfo, a wɔwoo hɛn a krɔnkrɔnyɛ wɔ hɛn akra mu.

Hɛn Agyenkwa, Jesus Christ, ɔnam No werdam afɔrbɔ do no, yɛe ma wotum wɔtsew hɛnho na wɔsa hɛn yarba, a ɔmaa hɛn tum ma yɛhyɛ hɛn botae mã wɔ asaase do a ebusuafo hɔn adwenpɔw, hɛn awarsɛm, honandua anaa adwen mu apɔwmutse, anaa gyinabew biara mmfa ho.

Susu ɔbaa no a ɔwɔ bura no ho no. Nna n’abrabɔ tse dɛn? Jesus hun dɛ nna oenya nkunom beenum na banyin a ɔnye no tse sesei no nnwar no. Naaso, n’abrabɔ mu nkõdzen horow nyina ekyir no, Agyenkwa no bagua mu mpaamukã a odzi kan dɛ Ɔno nye Messiah no Ɔkãa kyerɛɛ no. Ɔkãa dɛ, “Emi a menye wo rekasa yi, emi nye no.”²

Ɔbɛyɛɛ dasefo a ɔyɛ ndam, ɔpaa mu kãe kyerɛɛ hɔn a wɔwɔ no kuropɔn no mu no dɛ Jesus nye Christ no. “Na Samariafo a wɔwɔ kurow yi mu dodowara gyee no dzii wɔ ɔbaa no a ɔgyee dase no.’’³

Ne gyinabew horow ndɛ na dza etwa mu kɔ no annkyerɛ ne ndaamba. Tse dɛ ɔno no, yebotum afa dɛ yɛbɛdan akɔ Agyenkwa no hɔ ndɛ akɛgye ahoɔdzen na ayarsã a ɔbɛma yeetum ahyɛ dza wɔsomaa hɛn dɛ yɛmbɛyɛ no wɔ ha nyinara mã.

Otsĩa ebien: “Tum No wɔ Hɛn mu’’

Nyiyimu a ɔayɛ atsenkã wɔ Nkyerɛkyerɛ na Ahyɛmudzi mu no, Ewuradze hyɛ mbaa na mbanyin nkuran dɛ wɔmfa “enyimpi [n]yɛ adzepa, na wɔmmfa hɔnankasa hɔn pɛ [n]yɛ ndzɛmba pii, ama woeetum ada ndzeyɛtsenenee pii edzi; osiandɛ tum no wɔ hɔn mu⁴

Nkyerɛbaa, tum no wɔ hɛn mu dɛ yɛbɛda ndzeyɛtsenenee edzi!

President Russell M. Nelson kyerɛkyerɛɛ hɛn dɛ, “Ɔbaa biara na barimba biara a ɔnye Nyame dzi ahyɛmu na osie dɛm ahyɛmudzi no, na ɔdze noho hyɛ asɔfodzi ayɛdze emudzi mu no, wɔ kwan tɔɔtsen wɔ Nyankopɔn no tum no ho.’’⁵

Meebohu dɛ ber a yɛper dzi ahyɛmudzi krɔnkrɔn horow a yɛyɛɛ no wɔ enuma na wɔ temple krɔnkrɔn mu nyi no, Ewuradze “dze N’ayarsã, ahoɔdzen tum’’ na ɔnye “sunsum mu nhumu na nkenyan a [yennyaa] bi da behyira hɛn.’’⁶

Otsĩa ebiasa: “Na Ndzɛmba Nkakraba mu Na Dza Ɔyɛ Akɛse Fi Mu Ba’’⁷

Bepɔw do Nkyerɛkyerɛ mu no, Jesus kyerɛkyerɛɛ N’esũafo dɛ, “Hom nye asaase no do nkyen”⁸ na “Hom nye wiadze ne kan”⁹ Ekyir no Ɔdze ɔsor ahenman ne nyin totoo mbɔrkaw ho, “a ɔbaa bi fae, na ɔdze sumaa edziban mu, kɛpem dɛ ne nyina yɛɛ mbɔr’’¹⁰ ho

Nkyen
Mbɔrkaw
Kan

Ne nketsenketse no mpo no, kor biara wɔ nsuansuando wɔ dza woetwa ehyia ho no. Agyenkwa no to nsa frɛ hɛn dɛ yɛmfa No tum ndzi dwuma ma yɛayɛ dɛ nkyen, mbɔrkaw, na kan.

Nkyen

Ana ɔnnyɛ ahobow wɔ nsonsonee a nkyen ketsekeste a wɔdze petse edziban a yedzi mu no si yɛ wɔ ne dɛw mu. Naaso nkyen nye adze kor a ɔda famu na no bo nnyɛ dzen koraa wɔdze yɛ edziban.

2 Ahemfo nwoma mu no, yɛkenkan “abaawa kakraba bi,’’¹¹ a Syriafo faa no ndɔmmum na ɔsom Naaman, Syria nsordaafo ɔsahen, ne yer, no ho asɛm. Nna ɔtse dɛ nkyen; nna osuar. a no ho nnhia ma wiadze, na nna n’abrabɔ dɛ ndɔmmumnyi wɔ ananabea no da edzi pefee dɛ ɔnnyɛ dza nna n’enyiwa da do nye yi.

Naaso, ɔdze Nyankopɔn no tum kãa nsɛntɔw ebien, a ɔdze gyee dase kyerɛɛ Naaman ne yer: “Kɛtseankyɛ mo wura wɔ nkɔnhyɛnyi a ɔwɔ Samaria no nkyɛn! ɔno nkyɛ ɔbɛsa no kwata ma no.’’¹²

Wɔdze ne gyedzi nsɛm no kɛmaa Naaman, a ɔdze ne nsɛm no dzii dwuma, ɔmaa no kwan ma ɔsaa no honandua na sunsum mu yarba ebien no.

Yɛtaa tsim wɔ mbaawa no a ɔmaa Naaman gyee too mu dɛ oboguar wɔ Jordan esutsen no mu no do, dɛ mbrɛ nkɔnhyɛnyi Elisha kyerɛe no, mbom nnkyɛ Naaman ronnkɔ Elisha n’abow ano a “abaawa kakraba bi’’ nnka ho.

Ebia isuar anaa itse dɛ wo ho nnhia, naaso ibotum ayɛ dɛ nkyen wɔ w’ebusua, wɔ skuul, na wɔ wo sɔn mu.

Mbɔrkaw

Ana edzi paanoo a onntu da a? Ibesi dɛn akã ho asɛm? pitsii dudur dzendzen Idze mbɔrkaw ketseketse no, paanoo no tu, ɔma no ho do yɛ harhar na ɔgow.

Sɛ yɛdze Nyankopɔn no tum kã hɛn abrabɔ ho a, yebotum dze nkenyan nhumu a opegya binom na kwan ma wɔsa akoma yarba no hyɛ “awerɛhow sunsum ananmu.’’¹³

Ɔnnkyɛree na borɔnya anapa bi, na me nyɛnko bi da mpa mu a awerɛhow ahyɛ no do. Ne mba paa no kyɛw dɛ ɔnsoɛr, naaso nna n’awargyae a ɔsensen hɔ no dze yaw ahyɛ no mã. Ɔda mpa mu rusũ no, ɔdze ne kra nyina bɔɔ mpaa ma no Ɔsor Egya, a ɔkãa n’abagura kyerɛɛ No.

Mber a owie ne mpaa bɔ no, Sunsum no wɔsae kyerɛɛ no dɛ Nyankopɔn nyim ne yaw. N’ayamuhyehye atsenkã maa no no hyɛɛ no mã. Sũahu krɔnkrɔn yi maa ne nkã-tse dzii mu na ɔmaa no enyidado dɛ nnyɛ ɔno nko na oridzi awerɛhow. Ɔsoɛree, kɔr abowano na ɔnye ne mba no si esukwankyɛaba nyimpa, a ɔdze serew na enyigye hyɛɛ anapa n’awerɛhow ananmu.

Kan

Kan dodow ahen na yehia dze edua sum mu wɔ dan mu? Nsensanee ketseketse kor. Na dɛm kan nsensanee wɔ bea a ɔyɛ sum no botum efi Nyankopɔn no tum a ɔwɔ wo mu no aba.

Kaansa ebɛtse ankonamyɛ ber a abrabɔ n’ehum ruhur mu mpo a, ibotum ahyerɛn kan wɔ menntse moho ase, basabasayɛ, na ekyingye sum mu. Wo gyedzi ne kan wɔ Christ mu botum egyina na ɔayɛ pefee, a obegya hɔn a woetwa ehyia woho no akɔ dwudwoodwo na asomdwee mu.

Nkyerɛbaa, akoma botum asakyer na abrabɔ ayɛ nhyira ber a yɛma nkyen kakra, mbɔrkaw atser mã na kan nsensenee.

Megye dase dɛ Agyenkwa no nye nkyen wɔ hɛn abrabɔ mu, a ɔto nsa frɛ hɛn dɛ yɛnsɔ N’enyigye na ɔdɔ nhwɛ.¹⁴ Ɔyɛ Ɔno na ɔyɛ mbɔrkaw no ber a hɛn abrabɔ yɛ dzen, ɔdze enyidado brɛ hɛn¹⁵ na oyi hɛn adzesoadze fi hɔ a¹⁶ ɔnam No tum na ɔpon ɔdɔ a onnyi kãbea do.¹⁷Ɔno nye hɛn kan,¹⁸ a ɔhyerɛn hɛn anamɔn kwan mu san kɔ fie.

Meserɛ dɛ yebotum aba Agyenkwa hɔ, tse dɛ ɔbaa no a ɔwɔ bura no ho no, na yɛnnom No nkwa nsu no. Yɛnye Samaria nkorɔfo no, afei yebotum apaamu akã dɛ, “Afei yɛgye dzi, … nnyɛ w’asɛm ntsi na yɛgye dzi, na hɛn ankasa yɛatse, na yenyim dɛ oyi nye Wiadze Agyenkwa.’’¹⁹ Jesus Christ ne dzin mu, amen.