“Na Mebɛyɛ ma Ndzɛmba A Ɔyɛ Mberɛw No Ahyɛ Dzen’’
Na sɛ yɛbrɛ hɛnho adze na yenya gyedzi wɔ Jesus Christ mu a, Christ n’adom na Ne daapem werdam afɔrbɔ no ma yetum sakyer.
President Thomas S. Monson mber bi kãa efiadze ɔpanyin Clinton Duffy no ho asɛm. “1940 na 1950 mfe ber mu no, [Warden Duffy] yɛɛ atsenkã wɔ no mbɔdzembɔ ho dɛ ɔbɛma mbanyin a wɔwɔ efiadze no edzi yie. Kasatsianyi bi kãa dɛ, ‘Ɔwɔ dɛ ihu dɛ ɔsebɔ nntum nnsesã hɔn nsisii!’
“Efiadze Ɔpanyin Duffy buae dɛ, ‘Ɔwɔ dɛ ihu dɛ nnyɛ nsebɔ na menye hɔn yɛ edwuma. Menye nyimpa yɛ edwuma, na dabiara nyimpa sakyer.’’1
Satan n’ator kɛsenara mu kor nye dɛ mbanyin na mbaa runntum nnsakyer. Wɔkã ator yi na wɔsan kã no akwanhorow soronko pii mu dɛ mbrɛ wiadze kã dɛ yennkotum asakyer ara—anaa omuo mpo no, onnyi dɛ yɛsakyer. Wɔkyerɛkyerɛɛ hɛn dɛ hɛn gyinabew horow na ɔhyɛ hɛn nsew. Wiadze no se dɛ “ɔwɔ dɛ yɛgye ma yɛtse no to mu, na yedzi nokwar ma hɛnankasa hɛn ho.’’
Yebotum Asakyer
Nokwar ara oye dɛ yɛbɛyɛ nokwafo no, ɔwɔ dɛ yɛyɛ nokwafo ma hɛnankasa hɛnho, dɛ yɛyɛ Nyankopɔn ne babanyin anaa babaa a yɛwɔ awoosu na hyɛbea krɔnkrɔn dɛ yɛbɛyɛ tse dɛ Ɔno.2 Sɛ hɛn botae nye dɛ yɛbɛyɛ nokwafo ama awosu na hyɛbea krɔnkrɔn yi a, nna ohia dɛ hɛn nyina yɛsakyer. Kyerɛwsɛm mu kasafua ma nsakyer nye nnuhu. President Russell M. Nelson kyerɛkyerɛ dɛ, “Nkorɔfo dodow, na wosusu nnuho dɛ ɔyɛ asotwe—biribi a wobokwetsir gyedɛ wɔ gyinabew dzendzen nko mu. … Sɛ Jesus se emi na ɔwo dɛ “yennu hɛnho’’ a nna Ɔroto nsa afrɛ hɛn dɛ yɛnsakyer.’’3
Nyankopɔn ne Ngyinado
Kɔmputa software abemfo dze ngyinado nsɛm kã kyerɛ kɔmputa dza ɔnyɛ. Ɔtɔfabi a wɔfrɛ iyinom sɛ-nna dɛm nsɛm. Dɛ mbrɛ ɔwɔ, sɛ x yɛ nokwar a, nna yɛ y.
Ewuradze nam ngyinado do so dzi dwuma: gyedzi ngyinado, tsenenee ho ngyinado, nnuhu ho ngyinado. Ngyinado ho nsɛm mfatoho yinom pii fi Nyankopɔn hɔ a ɔtsetse dɛ:
“Sɛ idzi me mbrasɛm do na itsim kodu ewiei a [ibenya] onnyiewiei nkwa, akyɛdze a ɔsõ sen Nyame n’akyɛdze nyina.’’4
Anaa “sɛ hom dze nokwar akoma bisa, pra hom akoma mu, na hom nya gyedzi wɔ Christ no mu a, [ɔnam] Sunsum Krɔnkrɔn no tum do bɛda nokwar a ɔwɔ mu no edzi akyerɛ hom.’’5
Nyankopɔn no dɔ mpo, a ɔwɔ mu dɛ ɔwɔ hɔ daapem na odzi mu no, so dzi ngyinado do.6 Mfatoho:
“Sɛ hom sie me mbransɛm a, [afei] hom bɛtsena mo dɔ mu, dɛ mbrɛ mo so mesie m’Egya ne mbransɛm, na metsena no dɔ mu.”7
Elder D. Todd Christofferson kyerɛɛ nokwar asɛmpa yi ase mu kɔr kan mber a ɔkyerɛkyerɛɛ dɛ: “Binom taa kã dɛ, “Agyenkwa No dɔ me dɛ mbrɛ metse yi ara,” na ɔno yɛ nokwar ampara. Mbom Onnkotum nye hɛn mu biara akɔ N’ahenman mu dɛ mbrɛ yɛtse yi ara, ‘osiandɛ adze biara a noho nntsew no nnkotum atsena hɔ, anaadɛ ɔatsena n’enyim’ [Moses 6:57]. Otwar dɛ wodzi kan siesie hɛn bɔn.”8
Ndzɛmba A Ɔyɛ Mberɛw No Botum Ahyɛ Dzen
Yɛregye Nyankopɔ no tum ho nhyira ma wɔaboa hɛn ma yɛasakyer no so wɔ ngyinado. Agyenkwa no, rekasa dua nkɔnhyɛnyi Moroni wɔ Mormon Nwoma mu no, kyerɛkyerɛɛ dɛ: “Sɛ adasa ba me nkyɛn a mebɛma woehu hɔn mberɛwyɛ. Mema adasa mberɛwyɛ ama wɔaabrɛ hɔn ho adze, na m’adom sõ adasamba nyina a wɔbrɛ hɔnho adze wɔ m’enyim no do; na sɛ wɔbrɛ hɔnho adze wɔ m’enyim, na wonya gyedzi wɔ mo mu a, nna mebɛyɛ ma ndzɛmba a ɔyɛ mberɛw no ahyɛ dzen ama hɔn.’’9
Yɛhwɛ dza Ewuradze rekyerɛkyerɛ hɛn yie ara wɔ ha no a, Odzi kan kã dɛ Ɔma mbanyin na mbaa kor biara mberɛwyɛ, a ɔkã hɛn ɔnnkyebo sũahu ho dɛ nyimpa a wɔahwe ase. Osian Adam n’Asehwe no ntsi yɛabɛyɛ mbanyin na mbaa honammufo. Mbom ɔnam Jesus Christ No Werdambɔ do no, yebotum edzi hɛn mberɛwyɛ anaa hɛn asehwe su no do.
Nkyii Ɔkã dɛ N’adom sõ na sɛ yɛbɛbrɛ hɛnho adze na yeenya gyedzi wɔ No mu a, nna Ɔbɛma “ ndzɛmba [ɔdodow] a ɔyɛ mberɛw ahyɛ dzen ama [hɛn].’’ Yɛrekã no bio a, sɛ yedzi kan sakyer hɛn asehwe su, hɛn mberɛwyɛ no a, nkyii na yebotum asakyer hɛn suban, hɛn mberɛwyɛ.
Nsakyer ho Ehiadze
Hom mma yɛnhwehwɛ nsakyer ho ehiadze mu dɛ mbrɛ Ewuradze ne nhwɛdo tse:
Odzi kan, otwar dɛ yɛbrɛ hɛnho adze. Ewuradze ne ngyinado ma nsakyer yɛ ahobrɛadze. Ɔkãa dɛ,“Sɛ wɔbrɛ hɔnho adze wɔ m’enyim,’’10 Ahobrɛadze n’ebirabɔdze nye ahantan. Sɛ yɛdwen dɛ yenyim ara yie—sɛ dza yɛdwen anaa yɛtse no dzi kan wɔ dza Nyankopɔn dwen ho anaa ɔtse no do a nna ahantan wɔ hɔ.
Ɔhen Benjamin, kyerɛkyerɛɛ dɛ “honammunyi no yɛ ɔtamfo ma Nyankopɔn … na ɔbɔkɔdo ayɛ dɛm afebɔɔ kesi afebɔɔ, gyedɛ … na ɔpɔr nyimpa su no gu nkyɛn na ɔnam Ewuradze Christ no werdambɔ no do bɛyɛ ɔhotsewnyi, na ɔbɛyɛ dɛ abofra, na ogyaa noho ma ɔdwe, [na] ahobrɛadze.’’11
Ama yɛasakyer no, ohia dɛ yɛpɔr honammunyi no na yɛbɛyɛ ahobrɛadze na yegyaa hɛnho ma ɔdwe. Otwar dɛ yɛyɛ ahobrɛadze yie ma yɛaka nkɔnhyɛnyi tseasefo no do. Ahobrɛadze yie ma yɛayɛ na yeesie temple ahyɛmudzi horow. Ahobrɛadze yie ma yeenu hɛnho daa daa. Otwar dɛ yɛyɛ ahobrɛadze yie ma yɛapɛ dɛ yɛsakyer, ma “yegyaa [hɛn] akoma mu ama Nyankopɔn.’’12
Otsĩa ebien, otwar dɛ yenya gyedzi wɔ Jesus Christ mu. Agyenkwa ne nsɛm , bio dɛ: “Sɛ wɔbrɛ hɔnho adze wɔ m’enyim, na wonya gyedzi wɔ mo mu a,’’13 Ɔbɛma hɛn tum ma yeedzi hɛn mberɛwyɛ do. Ahobrɛdze, a gyedzi wɔ Jesus Christ mu kã ho, bɛma hɛn kwan ma yeenya N’Adom no tum na nhyira ne mãhyɛ a ɔwɔ hɔ osian No Werdambɔ no ntsi.
President Nelson akyerɛkyerɛɛ dɛ “nokwar nnuhu dze gyedzi dɛ Jesus Christ wɔ tum dɛ Ɔtsew ho, Ɔsa yarba, na Ɔhyɛ hɛn dzen hyɛ ase. … Ɔyɛ hɛn gyedzi na obue Nyankopɔn no tum wɔ hɛn abrabɔ mu.’’14
Otsĩa ebiasa, ɔnam No tum do na Obotum ama ndzɛmba a ɔyɛ mberɛw no ahyɛ dzen. Sɛ yɛbrɛ hɛnho adze na yenya gyedzi wɔ Jesus Christ mu a, nna N’adom botum ama yɛaasakyer. Yɛkã no bio a, Ɔbɛma hɛn tum ma yɛdze asakyer. Iyi bɛyɛ hɔ osiandɛ, dɛ mbrɛ Ɔkã no, “m’adom sõ adasamba nyina.”15 N’ahoɔdzen, adom tum ma hɛn tum ma yedzi akwansiwdze, nyinara tafɛrbanyinmbɔmu, nyinara na hɛn mberɛwyɛ nyinara do ber a yɛhwehwɛ dze sakyer.
Hɛn mberɛwyɛ kɛsenara botum abɛyɛ hɛn ahoɔdzen kɛsenara. Wobotum asakyer hɛn na “yɛabɛyɛ abɔdze fofor.’’16 Nokwar ara ndzɛmba a wɔyɛ mberɛw no botum “ahyɛ dzen ama [hɛn].’’17
Agyenkwa no yɛɛ Ne daapem na onnyiewiei Werdambɔ ho edwuma ama nokwar yeetum asakyer, yeenu hɛnho, na yɛabɛyɛ yie. Nokwar mu ara wobotum awoo hɛn bio. Yebotum edzi su bɔn tse dɛ, nkekaho, na mpo “pɛ dɛ yɛbɛyɛ bɔn’’18 do. Dɛ Ɔsor Egya dɔfo ne mbambanyin na mbabaa no, yɛwɔ tum wɔ hɛn mu dɛ yɛsakyer.
Nsakyer ho Mfatoho
Mbanyin na mbaa a wɔsakyeree no hɔn fasusu hyɛ kyerɛwsɛm no mu mã.
Saul, Phariseenyi na ahyɛase Christian asɔr ntanenyi a ɔbɔ hyew no,19 bɛyɛɛ Paul, Ewuradze Jesus Christ no Ɔsomafo.
Nna Alma yɛ sɔfo wɔ Ɔhen Noah omumuyɛnyi no ne fie. Ɔtsee Abinadi ne nsɛm, nuu noho emudzi mu, na ɔbɛyɛɛ Mormon Nwoma asɛmpasomafo akɛse no mu kor.
Ne babanyin dzii ne mbabun mber dɛ ɔrohwehwɛ dze asɛe Asɔr no. Nna ɔkã “bɔn mu abɔnfo ankasa’’20 no hɔn ho kɛpem dɛ onyaa akoma nsakyer na ɔbɛyɛɛ asɛmpasomafo tumfo wɔ ɔnoara ankasa ne pɛ do.
Wɔnyɛɛn Moses kãa Pharaoah n’ebusua ho na wɔtsetsee no dɛ Egypt ɔhenba. Mbom mber a ɔbɛtsee ne nyimpa ban ase ankasa na ohun ne hyɛbea krɔnkrɔn no, ɔsakyeree na ɔbɛyɛɛ Ahyɛmu Dadaw no ne mbramanyi nkɔnhyɛnyi kɛse.21
Me yer ne nanabanyin, James B. Keysor, aber nyina dze ɔnoara n’akoma nsakyer kɛse ekenyan me.22 Nda a Odzi Ekyir edzikamfo anokwafo na wɔwoo no wɔ Salt Lake wɔ 1906 mu, ne maame wui wɔ mber a nna osuar na odzii aper wɔ ne mbabun mber mu nyina. Ne mbasirba na mberantsɛ mber mu no nna oefi Asɔr no mu, mber a ɔdze nyaa suban bɔn beberee. Naaso, ohyiae na ɔwaar ɔbaa fɛfɛɛfɛw bi na wɔbɔɔ mu tsetsee mba beenum.
1943, nkõdzen mfe mu wɔ Ahokyer Kɛse mu na Wiadze Ɔsatu II ekyir mu no, Bud, dɛ mbrɛ anyɛnkofo na ebusuafo dze frɛɛ no no, fii Utah na otui kɔr Los Angeles, California, kɔhwehɛɛ edwuma. Ofii fie no, ɔnye n’akyerɛbaa na no kun a nna ɔrosom dɛ hɔn ward bishop no kɛtsenae.
N’akyerɛbaa na n’akonta hɔn dɔ na nhyɛdo do no, ɔhyɛɛ ase kenyaan n’enyigye wɔ Asɔr no mu na ɔhyɛɛ ase dɛ ɔrekenkan Mormon Nwoma no anafua biara ansaana ɔakɛda.
Anafua bi, ber a nna ɔrekenkan Alma tsir 34, mu no, ɔkaa n’akoma ber a ɔkenkaan nsɛm a odzi do no:
“Nyew, mepɛ dɛ hom ba na dɛ hom mmpirim hom akoma bio. …
“Na hwɛ, nkwaber yi mu nna ɔwɔ dɛ nyimpa siesie hɔnho hyia Nyankopɔn kwan; nyew, hwɛ dɛm nkwanda yi mu nna ɔwɔ dɛ nyimpa dze yɛ hɔn ndwuma.’’23
Ber a nna ɔrekenkan nyiyimu yinom no, tum nkã tse bi hyɛɛ no do na ohun dɛ nna ɔwɔ dɛ ɔsakyer, onu noho, na nna onyim dza otwar dɛ ɔyɛ. Ɔsoɛree fii ne mpa do na obuu ntwɛr na ɔhyɛɛ ase bɔ mpaa, a ɔtotɔe serɛɛ Ewuradze dɛ ɔmfa no bɔn nkyɛ no na ɔmma no ahoɔdzen a ohia ma ɔnnyɛ nsakyer wɔ n’abrabɔ mu. Onnya ne mpaabɔ ne nyiano, na fi dɛm mber dze kɔ no, ɔannsan n’ekyir bio. Bud kɔɔr do som wɔ Asɔr no mu na ɔbɛyɛɛ Nda a Odzi Ekyir Ɔhotsewnyi enyimpisinyi, nokwafo dze kesii n’abrabɔ n’ewiei. Ɔsakyeree wɔ kwan biara mu. N’adwen, n’akoma, ne ndzeyɛe, no su na suban nsakyer.
Nuambanyin na nkyerɛbaa, hɛn hyɛbea na botae krɔnkrɔn koraa nye dɛ yɛbɛba abɛyɛ tse dɛ hɛn Ɔsor Egya na Agyenkwa, Jesus Christ. Yɛbɛyɛ iyi ber a yɛsakyer anaa yenu hɛnho. Yenya Agyenkwa “no su wɔ [hɛn] enyim.’’24 Yɛbɛyɛ fofor, hɛnho tsew, yɛyɛ soronko, na yɛkɔdo yɛho edwuma dabiara ara. Ɔtɔfabi a nna ɔyɛ dɛ yedzi akɔ na aba, mmbom yɛkɔdo ahobrɛdze mu ara kɔ kan wɔ gyedzi mu.
Na sɛ yɛbrɛ hɛnho adze na yenya gyedzi wɔ Jesus Christ mu a, Christ n’adom na Ne daapem werdam afɔrbɔ no ma yɛsakyer.
Midzi dase na megye dase dɛ nokwar Jesus Christ yɛ hɛn Agyenkwa na Pomfo. Nokwar N’adom sõ. Mepaa mu kã dɛ Ɔno “nye ɔkwan no, nye nokwar no, nye nkwa no.”25 Jesus Christ ne dzin mu, amen.