Hɛn Awoosu Krɔnkrɔn na Onnyiewiei Nkrabea
Moto nsa frɛ wo dɛ fa w’abrabɔ tsim Jesus Christ do na kaa fapem nokwar nsɛm a ɔwɔ Young Women theme no mu.
Nkyerɛbaa adɔfo, meda hom ase dɛ hom wɔ ha. Ɔyɛ me enyimnyamhyɛ dɛ mowɔ wiadze mfɛndzanan ehyiadzi yi ne mbaa nhyiamu ase. Menya ndzinoa so ma makɔ Young Women adzesũa mbea ahorow. Naaso hom mma me nda no edzi dɛ—meyɛ panyin, na mennyɛ ɔbaa so. Naaso mehu dɛ, minnya atsenkã kɛse dɛ maatɔ mu, sɛ mutum si do nye nkataasia no kã Young Women theme no a. Nkyerɛkyerɛ nwanwa a Young Women theme no kyerɛkyerɛɛ no1 ho hia papaapa ma nkataasia, naaso ɔyɛ mfaso ma obiara, a hɛn a yɛnnyɛ nkataasia no kã ho.
Young Women theme no hyɛ ase dɛ, “Meyɛ ɔsor awofo hɔn dɔba ɔbaa, a mowɔ awoosu krɔnkrɔn na onnyiewiei nkrabea.”2 Asɛm yi wɔ nokwar tsitsir anan. Odzi kan, eyɛ dɔba ɔbaa. Biribiara ibɛyɛ—anaa nnkɛyɛ—nnkotum asesã no. Nyankopɔn dɔ wo osiandɛ eyɛ No sunsum mu babaa. Ɔtɔfabi a yennya No dɔ ho atsenkã, naaso ɔwɔ hɔ daa. Nyankopɔn no dɔ no dzi mu.3 Yenntum nntse dɛm dɔ ne nkã.
Sunsum n’akotsin asɛdze nye dɛ ɔda Nyankopɔn no dɔ edzi kyerɛ hɛn.4 Naaso “nkã-tse yerɛwyerɛw tse dɛ ebufuw, ɔtan, … [anaa] suro,” botum efura Sunsum Krɔnkrɔn no ne nhyɛdo no, … ɔtse dɛ idzi jalapeño muoko taw dze ahwɛ grape eduaba ne dɛw. … [Kor ne nhyehyee] hyɛ kor ne dɛw do korakora.”5 Dɛm ara so, ndzeyɛɛ a ɔma yɛnye Sunsum Krɔnkrɔn ntamu twe no, a bɔn kã ho,6 ma ɔyɛ dzen ma hɛn dɛ yɛbɛtse Nyankopɔn no dɔ a ɔwɔ ma hɛn no.
Dɛm ara so, ɔhaw gyinabew ahorow anaa honandua mu anaa adwen mu nyarba, na ndzɛmba binom so no bir Nyankopɔn no dɔ ho atsenkã. Gyinabew yinom nyina mu no, baanodzifo a yɛgye hɔn dzi anaa hɔn a wɔawea hɔn afotu botum ataa aboa. Yebotum so ebisa hɛnho, dze abɔ mbɔdzen etu mbrɛ yesi tse Nyankopɔn no dɔ nkã dɛ, “Ana modɔ Nyankopɔn daa, anaa modɔ No ber a ndzɛmba kɔ yie mbom no do huan ber a ndzɛmba annkɔ yie?”
Nokwar a otsĩa ebien nye dɛ yɛwɔ ɔsor awofo, egya na enã.7 Ɔsor Enã bi ho nkyerɛkyerɛ no nam nyikyerɛ do ba na Latter-day Saintfo yɛ soronko wɔ gyedzi yi ho. President Dallin H. Oaks kyerɛkyerɛɛ nokwar yi ho hia a ohia, “Hɛn nyamesom ho gyedzi dze ɔsor awofo hyɛ ase. Hɛn ahwehwɛdze a ɔkrɔn kɛse nye dɛ yɛbɛyɛ tse dɛ hɔn.”8
Ɔsor Enã ho nsɛm kakrabaa na woeyi akyerɛ, mbom dza yenyim no woetwa no tsia wɔ asɛmpa nsɛngyinado a wobohu no wɔ Asɛmpa Nwoma Korabea app no do.9 Sɛ hom kenkan dza ɔwɔ hɔ no wiei a, hom bohu biribiara a minyim wɔ nsɛngyinado no ho. Me yamu ankyɛ minyim pii kã ho. Bia hom so bɛda ho enya nsɛmbisa na hom bɛpɛ dɛ hom nya mbuae binom kã ho. Erohwehwɛ ntseasee kɛse no yɛ sunsum mu mpontu mu n’afã tsitsir, naaso meserɛ hom nyɛ ahwɛyie. Siantsir nnkotum ahyɛ nyikyerɛ ananmu.
Adwen nsusui mmfa sunsum mu nyimdzee kɛse mmba, mbom obotum dze ndaadaa anaa wɔadan hɛn enyi efi dza woeyi akyerɛ no do.10 Mfatoho, Agyenkwa no kyerɛkyerɛɛ N’esuafo no dɛ, “Hom mbɔ mpaa daa mma Egya no wɔ me dzin mu.”11 Yɛdzi nhwɛdo yi do na yɛsom hɛn Ɔsor Egya wɔ Jesus Christ ne dzin mu na yɛmmbɔ mpaa mma Ɔsor Enã.12
Ofitsi ber a Nyankopɔn yii nkɔnhyɛfo no, woenya tumdzi dɛ wɔkasa ma No. Mbom wɔnnkã nkyerɛkyerɛ a hɔn ara wɔdze “{hɔnara] hɔn adwen” ayɛ13 anaa wɔnkyerɛkyerɛ dza wonnyii nnkyerɛe. Hom nsusu Ahyɛmu Dadaw nkɔnhyɛnyi Balaam, a wɔdze sika daadaa no dɛ ɔndom Israelfo ma Moabfo nya ho mfaso. Balaam see dɛ, “Sɛ [Moab hen] dze dwetɛ nye sika fi mã mpo bɛma me a, murunntum mmbu Ewuaradze me Nyankopɔn n’asɛm do, mennkɛyɛ biribi ketseaba anaa kɛse.”14 Latter-day Saintfo nkɔnhyɛfo wɔ dɛm nsiwdze yi ara. Ereper hwehwɛ nyikyerɛ fi Nyame hɔ yɛ enyiansɔ a mfaso biara nnyi mu. Mbom, yɛtweɔn Ewuradze na ne mber nyehyɛɛ dɛ obodua kwan a Ɔahyehyɛ do dze eyi No nokwar akyerɛ.15
Nokwar a otsĩa ebiasa wɔ Young Women theme no mbuei nsɛnsin no nye dɛ yɛwɔ “awoosu krɔnkrɔn.” Iyi yɛ hɛn nyimpa ban ne fã tsitsir. Ɔyɛ hɛn sunsum mu “su ankasa” a yenya fi hɛn ɔsor awofo hɔ16 na onnhia mbɔdzembɔ biara fi hɛn hɔ. Ɔyɛ hɛn nyimpa ban no su tsitsir, a dza yɛpɛ yɛ ada hɛnho edzi biara mpo no mfa ho. Yɛretse nokwar a ɔkrɔn yi ase no hia papaapa ma obiara, mbom nkankara ma ankorankor a wɔwɔ ekuw a abakɔsɛm mu no woeyi hɔn tow kyen, wɔatseetsee hɔn, anaa wɔahyɛ hɔn do. Kaa dɛ wo nyimpa ankasa no fa w’awoosu krɔnkrɔn dɛ Nyame ne ba ho.
Nokwar a otsĩa anan nye dɛ yɛwɔ “onnyiewiei nkrabea.” Wɔremmfa dɛm nkrabea yi nnhyɛ hɛn do. Owu ekyir no, yebenya dza yɛafata na “yeenya enyigye [nko] wɔ dza yeenya ho pɛ dɛ yebenya.17 Yerenya hɛn onnyiewiei nkrabea gyina hɛn nsanmuyi do. Ohia yɛreyɛ ahyɛmudzi krɔnkrɔn horow na yerisie. Ahyɛmu anamɔn kwan no kwan a yɛdze ba Christ hɔ na ne fapem nye nokwar trɔdɔɔdɔ na onnyiewiei mbra a ɔnnsesã. Yennkotum abɔ hɛnankasa hɛn anamɔn kwan na hɛn enyi ada nsunsuando a Nyame abɔ ho anohoba no. Enyi bɛda Ne nhyira kwan, ber a yerinndzi onnyiewiei mbra a wogyina do no do17 no yɛ ndaadaa hun, tse dɛ yɛbɔdwen dɛ yebotum dze hɛn nsa akã fononoo hyew na “yɛabɔ adwenpɔw” dɛ ɔnnkɛhyehye hɛn.
Bia hom nyim dɛ nna mohwɛ ayarfo a hɔn akoma rodwedwe. Dza owie yie koraa ma hɔn nye wobedzi eduryɛ nhyehyɛɛ a wɔagye ato mu do. Wonyim iyi mpo no, ayarfo binom bɔ mbɔdzen dɛ wobedzi eduryɛ nhyehyɛɛ fofor do. Wɔkã dɛ, “Memmpɛ dɛ mefa edur pii” anaa “memmpɛ dɛ meyɛ nhwehwɛmu pii no a ɔtoa do no.” Ampaara, ayarfo no wɔ fahodzi dɛ wɔbɔ hɔnankasa hɔn adwenpɔw, mbom sɛ wofi eduryɛ nhyehyɛɛ a ɔkrɔn no ho a, otsĩa hɔn apɔwmutse. Ayarfo a hɔn akoma rodwedwe no nnkotum afa ayarhwɛ kwan a ɔnnsɛ na wɔdze nsunsuando a ɔnnyɛ ho mfomdo no ato hɔn akoma datser no do.
Ɔyɛ nokwar dɛmara ma hɛn nyina. Ɔsor Egya anamɔn kwan a Ɔakyerɛ no na ogya kwan kɔ onnyiewiei nsunsuando mapã no. Yɛwɔ fahodzi dɛ yɛbɛsan mu eyi, mbom yennkotum asan mu eyi nsunsuando a sɛ ammfa anamɔn kwan no a woeyi akyerɛ no do a ɔba no.19 Ewuradze ase dɛ: Na nyia ɔtõ mbra, na onndzi mbra do, na mbom ɔper dɛ ɔbɛyɛ mbra ama noho, … mbra nnkotum atsew no ho, anaa ehumbɔbɔr, pɛrpɛrdzi anaa atsɛmbu.20 Yennkotum aman efi Ɔsor Egya no kwan ho na nkyii yɛdze nsunsuando a ɔnnsɛ ho mfom no ato No do.
Asɛnsin a otsĩa ebien wɔ Young Women theme mu no kenkan dɛ: “Dɛ meyɛ Jesus Christ osuanyi no, mobɔbɔ mbɔdzen abɛyɛ tse dɛ Ɔno. Mohwehwɛ mankasa me nyikyerɛ na me dze dzi dwuma na masom binom wɔ Ne dzin krɔnkrɔn mu. Yebotum etu dasegye wɔ Jesus Christ mu mpon ber a yɛdze gyedzi dzi dwuma.21 Yebotum agye sunsum akyɛdze no a [ɔ]ma wohu dɛ Jesus Christ nye Nyame ne Ba no, na wɔbɔɔ no mbeamudua mu dze maa wiadze bɔn. Anaa yebotum agye akyɛdze dze agye hɔn a wonyim no hɔn nsɛm edzi,22 kɛpɛm dɛ yebohu ama hɛnho. Yebotum edzi Agyenkwa no ne nkyerɛkyerɛ do na yɛaboa binom ma wɔaba No hɔ. Kwan yi do no, yɛkã Noho wɔ N’edwumayɛ mu.23
Young Women theme no kɔ do dɛ, “Mibegyina dɛ Nyankopɔn ne dasefo wɔ mber nyina na wɔ ndzɛmba nyina mu na wɔ mbea ahorow nyina.” Wohia Asɔrmba nyina dɛ Nyankopɔn adasefo,24 ɔwɔ mu dɛ Duebienfo na Eduosuonfo no wɔhyɛ hɔn dɛ adasefo soronko wɔ Christ ne dzin mu.25 Susu hockey agordzi akansi a nyia ɔda goal no nko na ɔbɔ goal no ho ban. Sɛ kuw mba nkaafo no amma mboa a, nyia ɔda goal no nko runntum mmbɔ goal no ho ban yie, na kuw no bedzi nkõgu aber nyina. Dɛm ara so, wohia obiara wɔ Ewuradze no kuw no mu.26
Asɛnsin a odzi ewiei wɔ Young Women theme mu no hyɛ ase dɛ, “Ber a mobɔ mbɔdzen dɛ me bɛfata nkwagye ntowdo no, nnuho akyɛdze no som me bo na mohwehwɛ mpontu daa daa. Osian Agyenkwa no werdam afɔrbɔ no ntsi, yebotum enu hɛn ho, esũa efi hɛn mfom horow ho, na yɛmma ommbua hɛn fɔ. President Russell M. Nelson kyerɛkyerɛɛ dɛ, “Nyimpa pii na wosusu nnuho dɛ ɔyɛ ntsẽa. … Naaso Satan na ɔdze asotwe ho atsenkã no ba. Ɔbɔ mbɔdzen dɛ obesiw hɛn kwan ma yɛnnkɔhwɛ Jesus Christ, a Oebue N’abasa mu gyina hɔ, Ɔdze enyidado na pɛ dɛ Ɔbɛsã hɛn yarba, dze hɛn bɔn akyɛ hɛn, atsew hɛnho, ahyɛ hɛn dzen, na Ɔasan hɛnho.27
Sɛ yenu hɛnho nokwar mu ara a, sunsum mu epirakur biara nnka, dza yɛayɛ biara mpo no, mbrɛ ne dzen anaa mpɛn ahen na yɛdze yɛɛ mpo no mfa ho.28 Mber dodow biara a yenu hɛnho na yɛserɛ bɔnfakyɛ nokwar mu no, wobotum dze akyɛ hɛn.29 Akyɛdze nwanwa bɛn nyi a ofi hɛn Agyenkwa, Jesus Christ hɔ!30 Sunsum Krɔnkrɔn no ma hɛn awerɛhyɛmu dɛ wɔdze akyɛ hɛn. Yɛtse enyigye na asomdwee nkã,31 wɔpepa [hɛn] afɔdzi.32 na hɛn bɔn ho atseetsee no nnhaaw hɛn bio33
Nokwar nnuhu ekyir mpo no, bia yebotum efintsiw. Mfintsiwii nnkyerɛ dɛ nnuho no enndzi mu mbom bia ɔbɛkyerɛ nyimpa ne mberɛwyɛ. Mbrɛ osi yɛ awerɛkyekyer dɛ, “ɔson mbrɛ Ewuradze hu mbrɛwyɛ horow na mbrɛ [Ohu] etuatsew.” Onnyi dɛ yɛgye Agyenkwa no tum dɛ Ɔbɔboa hɛn wɔ hɛn mbrɛwyɛ horow mu ho kyim, osiandɛ “sɛ Ewuradze kã mbrɛwyɛ horow ho asɛm a, daa Ɔdze mbɔbɔrhu.34
Young Women theme no wie dɛ, “Medze gyedzi no, mebɛhyɛ me fie na m’ebusua dzen, mebɛyɛ na mesie ahyɛmudzi krɔnkrɔn horow, na magye temple ho ayɛdze horow na nhyira no. Yɛrehyɛ fie na ebusua dzen bɛkyerɛ dɛ yeridzi kan abɔ nokwardzi suban, yɛdze gyedzi egyapadze rokɔ kan anaa yɛdze robɔbɔ adze.35 Naaso, ahoɔdzen fi gyedzi wɔ Jesus Christ mu ba na yɛreyɛ ahyɛmudzi krɔnkrɔn.
Temple mu no yesũa hɛn nyimpa ban na bea a yɛakɔ. Rome ɔbemfo Cicero kãa dɛ, Sɛ nnyim dza osii ansaana wɔrowo wo ho nyimdzee a, nna ibɔbɔ wo bra daa dɛ abofra.”36 Nokwar ara, nna ɔrekasa fa abakɔsɛm adzesũa ho, naaso ne enyidahɔ kann no wobotum atra mu. Yɛbɔ hɛn bra dɛ yɛyɛ mbofra aber nyina sɛ yennyi onnyiewiei nhumu no a yenya no temple mu no a. Hɔ no yenyin wɔ Ewuradze mu, “yɛgye Sunsum Krɔnkrɔn ne mãhyɛ,”37 na yɛbɛyɛ Agyenkwa n’esuafo ara yie.38 Ber a yesie hɛn ahyɛmudzi no, yenya Nyankopɔn no tum wɔ hɛn abrabɔ mu.39
Moto nsa frɛ wo dɛ fa w’abrabɔ tsim Jesus Christ do na kaa fapem nokwar nsɛm a ɔwɔ Young Women theme no mu. Sɛ ipɛ a, Sunsum Krɔnkrɔn no bɛma wo kwankyerɛ. Hɛn Ɔsor Egya pɛ dɛ ibɛyɛ N’adzedzifo na egye dza Ɔwɔ nyina.40 Onnyi bio dze ma wo. Onnyi bio dze abɔ wo anohoba. Ɔdɔ wo kyɛn dza inyim na Ɔpɛ dɛ inya ahomka wɔ abrabɔ yi mu nye dza ɔreba no mu. Jesus Christ ne dzin mu, amen.