Christ na N’Asɛmpa ho Ahobow
Hom mma dza hɛn enyiwa ehu na hɛn akoma atse ho nkã ne nkaadze ntu hɛn ahobow wɔ Agyenkwa no werdam afɔrbɔ ho mpon.
Mowɔ nyɛnko brɛbo bi, a onyim adze papa, sũapɔn mu ɔbemfo a ɔapon edwuma, ɔakyerɛw mbuukuu pii, na ne nyina ekyir no, Jesus Christ sũanyi a osi pi. Ɔakɔ ehyiadzi horow, ɔakɛyɛ adzesũa mu nhwehwɛmu, na oedzi nserahwɛ baano dze akɔ Asaase Krɔnkrɔn hɔ mpɛn pii. Asɛm a ɔkã nye dɛ, ber biara a ɔbɔkɔ asaase a Jesus nantsewee do no, ahobow kã no osiandɛ ekyingye biara nnyi hɔ dɛ osũa adze fofor, a ɔyɛ ahobow, na ɔyɛ enyikã a ɔfa Agyenkwa no, No ɔnnkyebo somdwuma, na Ne man a ɔdɔ ho asɛm. Ahobow a me nyɛnko no kyerɛ sɛ ɔkasa fa dza oesũa nyina wɔ Asaase Krɔnkrɔn no ho a, ɔyɛ nsan na ahobow yi ayɛ fapem wɔ no mbɔdzembɔ akɛse na adzesũa kankɔ wɔ n’abrabɔ mu.
Ber a metsie no sũahu horow na maatse n’ahokekã ho nkã no, madwendwen sunsum mu anwanwadze dodow no ho, sɛ merekã a, yebotum na ɔwɔ dɛ yɛtse ma Jesus Christ asɛmpa no na nsonsonee a obotum dze aba hɛn osũanyiyɛ mu na wɔ hɛn akwantu dze kɔ onnyiewiei nkwa mu. Anwanwadze a merekã ho asɛm no nye nkã-tse, ahobow, anaa nwanwa ho anwanwasɛm a ɔka hɔn a wɔdze hɔn akoma nyina na hɔn abrabɔ tsim Agyenkwa na Ne nkyerɛkyerɛ do na ahobrɛadze mu ara wohu N’enyim wɔ hɔn abrabɔ mu. Anwanwadze atsenkã a ɔtse dɛm no, a Sunsum Krɔnkrɔn ne nhyɛdo kenyaan no no, kenyan ahokekã no ma dɛwdzi mu ara wɔdze Christ ne nkyerɛkyerɛ no bɔ bra.1
Mfatoho ahorow beberee wɔ kyerɛwsɛm no mu wɔ mbrɛ ahokekã yi botum esi ada edzi ho. Mfatoho, nkɔnhyɛnyi Isaiah, nam n’ehurusi mu dze kyerɛɛ ne ndaase no bun mu dze maa Ewuradze.2 Ahobow kãa hɔn a wɔtsee dɛ Jesus robɔ asɛmpa no dawur wɔ nhyiamudan mu wɔ Capernaum no wɔ Ne nkyerɛkyerɛ na ahoɔdzen a nna Ɔdze kyerɛkyerɛɛ no ho.3 Ɔyɛ dɛm atsenkã kor yi ara na ohwiraa Joseph Smith n’akoma ne ntsen beebiara mu ber a ɔkenkan James tsir kor, fi Bible mu a ogyaa no ma ɔhwehwɛɛ Nyankopɔn ne nyansaa.4
Mo nuambanyin na nkyerɛbaa, sɛ nokwar mu ara Jesus Christ na N’asɛmpa no yɛ hɛn nwanwa a, hɛn enyi gye yie, yenya ahokekã mbordo ma Nyankopɔn n’edwuma, na yehu Ewuradze ne nsa wɔ adze nyina mu. Dza ɔkã ho no, hɛn adzesũa wɔ Nyankopɔn ne nsɛm ho yɛ mfaso mbordo; hɛn mpaabɔ, yɛgye enyim yie; wɔ hɛn som, yɛyɛ enyidzi mbordo; hɛn ɔsom wɔ Nyankopɔn n’ahenman mu, yɛyɛ enyimia mbordo. Nyɛe yinom nyina yɛ dza wɔboa ma Sunsum Krɔnkrɔn ne nhyɛdo no yɛ ntaataado wɔ hɛn abrabɔ mu.5 Dɛm ntsi, hɛn dasegye wɔ Agyenkwa na N’asɛmpa no ho bɛhyɛ dzen, yɛbɛma Christ atse ase wɔ hɛn mu,6 na yɛbɔbɔ hɛn bra a “yɛagye ndwow, na wɔdze [hɛn] esi no mu, na [ye]etsim wɔ gyedzi mu, … na [yɛa]bor do wɔ ndaase mu.’’7 Sɛ yɛbɔ bra wɔ kwan yi mu a, yɛhyɛ dzen mbordo wɔ sunsum mu na yenya bambɔ dze tsĩa dɛ yɛbɔtɔ sunsum mu ɔmmfa moho su mu.
Ɔmmfa moho su a ɔtse dɛm no nye hɛn enyigye a no do huan nkakrankakra dɛ yɛdze hɛnho bɛhyɛ Ewuradze n’asɛmpa no mu yie ho. Ɔtaa hyɛ ase sɛ yɛtse dɛ yeenya nyimdzee na nhyira nyina dada ma hɛn enyigye wɔ abrabɔ yi mu. Sɛ merekã a, abotɔyamu yi ma yɛfa asɛmpa akyɛdze no biara biara, na afei ofi hɔ no, yegyaagyaa hɛnho mu dɛ yɛdze hɛnho bɛhyɛ Jesus Christ n’asɛmpa etsitsir8 na ahyɛmudzi horow a yeedzi no mu. No nsunsuando no, nkakrankakra ara yɛtsew hɛnho fi Ewuradze ho; hɛn ahom dɛ “yebetsie No,’’9 yɛ mberɛw a yennhu N’edwuma ne kɛseyɛ na ɔmmfa hɛnho. Ekyingye a ɔfa nokwar a yeenya no dadaw no hɛɛn hɛn adwen na akoma mu, a ɔma kwan ma ɔtamfo no nsɔhwɛ no nya hɛn.10
Ɔsɔfo Aiden Wilson Tozer, Christiannyi a ɔyɛ ndam na ɔkyerɛwfo a ɔayɛ atsenkã, kyerɛɛw dɛ, “Abotɔyamu yɛ tamfo wudzinyi ma sunsum mu mpontu nyina.’’11 Ana iyi nnyɛ dza osii pɛpɛɛpɛ wɔ Nephi no nkorɔfo do mber tsĩabaa wɔ Christ n’awooe ekyir? “Na nkakrankakra sor asɛnkyerɛdze hyɛɛ ase dɛ origyaa hɔn ahobow yɛ, na wɔhyɛɛ ase dɛ … [wɔregye kyim] wɔ dza wɔtsee na wohunii nyinara ho.” Na dɛm na Satan ɔyɛe ara “dze furaa hɔn enyiwa ma wɔgyee dzii dɛ Christ ne nkyerɛkyerɛ no yɛ nkwaseasɛm na adzehun.’’12
Mo nuambanyin na nkyerɛbaa adɔfo, No dɔ a ɔmmbɔadze na odzi mu mu no, na onyim hɛn nyimpasu no,13 Agyenkwa no etsintsim kwan ama hɛn a yɛdze bokwetsir dɛ yɛbɔtɔ sunsum mu ɔmmfa moho su n’efir mu. Agyenkwa ne nsato a odzi do no ma hɛn nhumu a ɔtserɛw, tsitsir ara yɛhwɛ wiadze huhuuhu a yɛtse mu no a: “Suã me, na tsie me nsɛm; nantsew ɔdwe mu wɔ mo Sunsum mu, na ibenya asomdwee wɔ mo mu.’’14 Sɛ yɛgye Agyenkwa ne nsato no do a, yɛkyerɛ hɛn ahobrɛadze, hɛn pɛ dɛ yɛbɛyɛ adzesũafo, na hɛn enyidado dɛ yɛbɛyɛ tse dɛ Ɔno yie.15 “Yɛdze hɛn akoma, ahom, adwen, nye ahoɔdzen nyina’’ ka nsato yi ho so dɛ yɛrosom No na ɔsom ma Nyankopɔn ne mba.16 Nokwar, hɛn mbɔdzembɔ wɔ akwantu yi mu ne dza ohia tsitsir nye, mbrasɛm akɛse ebien no dɛ; yɛndɔ hɛn Ewuradze hɛn Nyankopɔn na yɛndɔ hɛn nyɛnko dɛ hɛnankasa hɛnho.17
Suban a ɔtse dɛm yi kã Jesus no su krɔnkrɔn ho na ɔdaa edzi wɔ biribiara a Ɔyɛe wɔ N’asaase somdwuma mu.18 Dɛm ntsi, sɛ yɛgye hɛn enyim na nokwar ara yetu hɛnho si hɔ dɛ yɛbɔhwɛ No na yeesũa efi Ne fasusu a odzi mu mu a,19 yɛba bohu No yie. Yenyin wɔ ahokekã na pɛ mu dɛ yɛdze gyinapɛn korakoraa no wɔ mbrɛ ɔwɔ dɛ yesi bɔ hɛn bra, fasusu a ɔwɔ dɛ yɛkyerɛ, na mbrasɛm a ɔwɔ dɛ yedzi do no bɛkã hɛn abrabɔ ho. Yɛsan so nya ntseasee, nyansa, su krɔnkrɔn, na adom dze ma Nyankopɔn na hɛn anyɛnkofo dze kã ho.20 Mutum ma hom awerɛhyɛmu dɛ hɛn ahom dɛ yɛbɛtse Agyenkwa ne nhyɛdo na ɔdɔ nkã bɛyɛ dzen wɔ hɛn abrabɔ mu, a ɔbɛda hɛn gyedzi edzi, hɛn pɛ dɛ yɛbɛyɛ ndzeyɛɛ tsenenee, na nkenyan dɛ yɛbɔsom Ɔno na binom.21 Dza ɔkã ho no, hɛn ndaase ma nhyira na ɔhaw horow a yenya wɔ ɔnnkyebo abrabɔ mu no bɛyɛ dzen na wɔabɛka hɛn nokwar som ho.22
M’anyɛnkofo adɔfo, ndzɛmba yinom nyina hyɛ hɛn sunsum mu anwanwadze a ɔfa asɛmpa no ho dzen na okenyan hɛn ma dɛwdzi mu ara yesie ahyɛmudzi horow a yɛnye Ewuradze ayɛ no—mpo wɔ hɛn haw na nsɔhwɛ a yenya mu. Nokwar, ama nsunsuando yinom esi no, yehia dɛ yɛdze gyedzi na yɛpra hɛn akoma mu dze hɛnho hyɛ Agyenkwa ne nkyerɛkyerɛ mu,23 a yɛper dze No suban bɛkã hɛn abrabɔ ho.24 Dza ɔkã ho no, yehia dɛ, yedua hɛn nnuhu do twe bɛn No25 hwehwɛ No bɔnfakyɛ na No ɔpon tum wɔ hɛn abrabɔ mu na yesie Ne mbrasɛm. Ewuradze Nankasa bɔɔ anohoba dɛ sɛ yɛdze hɛn werɛ nyina hyɛ No mu, na yɛanntwer hɛnankasa hɛn ntseasee na hɛn akwan nyinara mu yɛkan No to mu a, Ɔbɛkyerɛ hɛn hɛn akwan.26
Barimba bi a mihyiaa no nnkyɛree, a ne dzin dze Wes, na ɔaba ehyiadzi yi ase ndɛ, gyee nsato no too mu dɛ obosũa Ɔno na N’asɛmpa na ɔhyɛɛ ase nyaa No dɔ ho ahobow mfe 27 ekyir a ɔtseew noho fii ahyɛmu anamɔn kwan no ho no. Ɔkãa kyerɛɛ me dakor bi dɛ asɛmpasomafo bi, Elder Jones, a wɔdze no baa Wes n’apaamu hɔ mber kakra ansaana ɔrokɔ n’asɛmpakã edwuma wɔ Panama no, nam Facebook do nye no nyaa nkitahodzi. Mber a Elder Jones hun Wes no ho nsɛm no, a nna onnyim mpo dɛ ɔyɛ Asɔrba dadaw no, ɔtsee Sunsum Krɔnkrɔn n’akwankyerɛ na ohun dɛ ntsɛmara ɔwɔ dɛ ɔnye Wes nya nkitahodzi. Ɔdze nkenyan yi dzii dwuma ntsɛntsɛm. Wes noho boow no wɔ nkitahodzi yi a nna enyi nnda ho kwan no na ɔhyɛɛ ase hun dɛ Ewuradze nyim no a noho a ɔatsew efi ahyɛmudzi anamɔn kwan no ho mmfa ho.
Ofi hɔ rokɔ no, Wes na asɛmpasomafo no hyɛɛ ase nyaa nkitahodzi ntoatoado. Elder Jones na n’adamfo maa dapɛn dapɛn ɔsom na sunsum mu nsɛm a ɔboaa Wes ma ɔsanee nyaa n’ahobow wɔ Agyenkwa na N’asɛmpa no ho. Okenyaan ne dasegye ne kan no wɔ nokwar no ho na Agyenkwa no dɔ ma no no ho. Wes tsee asomdwee nkã no a ofi Ɔwerɛkyekyerfo hɔ ba no na onyaa ahoɔdzen a ohia no dze sanee ba nguankuw no mu. Ɔkãa kyerɛɛ me dɛ sũahu yi maa no sunsum mu na atsenkã mu ahom na ɔboaa no ma oyii ayawdzi nkã a oetsia no mfe pii osian atseetsee sũahu ahorow a nna ɔafa mu no ntsi no, fii hɔ.
Dɛ mbrɛ me nyɛnko kyerɛkyerɛnyi badwembanyi a medzi kan abɔ ne dzin ehu no, biribi nwanwa na ahobow wɔ hɔ daa daa a yesũa fa Jesus Christ na N’asɛmpa ho.27 Ewuradze abɔ anohoba nwanwa a ɔtsen kɔ obiara hɔ a, hɛn so yɛkã ho do, a wɔhwehwɛ dɛ wosũa No na wɔdze Ne nsɛm kã hɔn abrabɔ ho no. Ɔkãa kyerɛɛ Enoch dɛ, “Hwɛ mo Sunsum [bɔwɔ] wo do, dɛm ntsi wo nsɛm nyinara mebɛgye ato mu, na mbepɔw nyinara boguan efi w’enyim, na esutsen bɛdan efi hɔn kwan do; na ebɛtsena mo mu, na mo so matsena wo mu.’’28 Ɔnam N’akowa Ɔhen Benjamin do no, Ɔpaa mu kãa dɛ, “Wɔbɛfrɛ hom Christ ne mba, ne mbabanyin nye ne mbabaa; na hwɛ, ndɛ da yi wɔawo hom wɔ sunsum mu; na hom kã dɛ hom akoma enya nsakyer ɔnam dɛ woenya gyedzi wɔ ne dzin mu ntsi; dɛm ntsi, ɔawo hom ma hom abɛyɛ ne mbabanyin nye ne mbabaa.’’29
Dɛm ntsi, ber a nokwar mu na yɛkɔ do per sũa Agyenkwa no na yedzi Ne fasusu do no, mobɔ hom anohoba, wɔ Ne dzin mu, dɛ wɔbɛkyerɛw No su krɔnkrɔn no wɔ hɛn adwen na akoma mu,30 ama yɛabɛyɛ tse dɛ Ɔno ara yie, na ama yɛnye No anantsew.31
Mo nuambanyin na nkyerɛbaa adɔfo, meserɛ dɛ yengyina ahobow mu daa wɔ Jesus Christ na No dɔ a odzi mu, na ɔmmbɔadze da, no mu. Hom mma dza hɛn enyiwa ehu, na hɛn akoma atse ho nkã ne nkaadze, ntu hɛn ahobow wɔ Agyenkwa no werdam afɔrbɔ ho mpon, a obotum asã hɛn sunsum mu na atsenkã epirakur yarba na wɔaboa hɛn ma yɛatwe abɛn No yie. Hom mma anohoba ahorow akɛse a Egya wɔ no wɔ Ne nsamu na Oesiesie ama anokwafo no nyɛ hɛn nwanwa.
“Ahenman no yɛ homdze, na nhyira a ɔwɔ hɔ no yɛ homdze, na mbersantsen ahonyadze so yɛ homdze.
“Na nyia ɔnam ndaase mu bɛgye ndzɛmba nyina no, wɔbɛhyɛ no enyimnyam.’’32
Jesus nye wiadze no Pomfo, na iyi nye N’Asɔr. Megye dase wɔ nokwar yinom ho wɔ ahobow nkenyan, na wɔ hɛn Agyenkwa, Jesus Christ ne dzin krɔnkrɔn a ɔyɛ nwanwa mu, amen.