Erekyerɛkyerɛ Mbofra na Mbabun Ahodan

Elder Hugo E. Martinez ne Kasaa

Ɔkã Eduosuon no ho

Hom mma yendzi hɛn Agyenkwa Jesus Christ na N’asɛmpa no do ber a yɛyɛ ahodan wɔ hɛn abrabɔ nyina mu na yɛmfa iyi nkyerɛkyerɛ hɛn mbofra na mbabun.

Mebɛkã ahodan ho asɛm na mbrɛ yebesi dze akyerɛkyerɛ mbofra na mbabun. Ebia yɛbɔdwen dɛ ahodan yɛ mpanyimfo hɔn asɛm. Meebohu dɛ mpanyimfo botum awɔ ahodan anamɔn kwan no afamu yie ankasa ber a wɔakyerɛkyerɛ hɔn Jesus Christ n’asɛmpa na wɔdze ne nkyerɛkyerɛ na fapem horow no abɔ bra fitsi mbafober mu na dɛ mbabun wɔ fie no.

Nkyerɛkyerɛ ankasa yi yɛ nokwar abrabɔ fasusu kɛse. Wilfred Vanie, ne nuanom beesuon, na ne maame dɔɔm Asɔr no wɔ Abidjan, Ivory Coast, ber a nna oedzi mfe esia. Odzii mfe awɔtwe na wonumaa no. N’egya, nyia a nna ɔhwɛ ebusua no, wuii mber a nna Wilfried edzi dubiako.

Kaansa ebusua hɔn gyinabew maa odzii awerɛhow dze, Wilfred bɔɔ n’adwen pɔw dɛ ɔdze ne maame ne nkuranhyɛ na Asɔr mboa no ɔbɔsɔw skuul do. Owiee nsɔwdo skuul na ɔsoom etuhoakyɛ asɛmpakã wɔ Ghana Cape Coast Mission, bea a osũaa Borɔfo kasa. N’asɛmpakã ekyir no, ɔkɔɔr esũapɔn mu na onyaa abɔdzin krataa wɔ nkontaabu na sikasɛm mu. Nna ɔyɛ dzen dɛ obenya edwuma wɔ nyimdzee yi mu no dze, naaso onyaa edwuma wɔ nserahwɛ na ahɔhoyɛ edwuma mu.

Ɔhyɛɛ ase dɛ ɔsomfo wɔ ahɔhoyɛ bea bi a nna ɔayɛ atsenkã naaso n’akɔndɔ dɛ obotu mpon no kenyaan no ma osũa yie ara kɛpem dɛ ɔbɛyɛɛ receptionist a ɔkã kasa ebien wɔ hɔ. Mber a wobuei ahɔhoyɛbea fofor no, onyaa edwuma wɔ hɔ dɛ anafua sikahwɛfo. Ekyir no, ɔdze noho hyɛɛ BYU–Pathway Worldwide mu na seseiara orusũa adze dze enya abɔdzin krataa wɔ ahɔhoyɛ na nserahwɛ na edwuma nhwɛdo mu. Ne pɛ nye dɛ da kor bi ɔbɛyɛ ahɔhoyɛbea a ɔkrɔn bi no hwɛdofo. Wilfred tum hwɛ n’onnyewiei hokanyi na mbofra beenu, dɛmara dɛ ɔboa ne maame na no nuanom. Seseiara ɔsom wɔ Asɔr mu dɛ ɔkã stake abaguafo etsitsir ho.

Yɛkyerɛkyerɛ ahodan mu dɛ “ahom, pisi, na mbɔdzembɔ dɛ ebɔhwɛ ɔwo ankasa na w’ebusua hɔn sunsum mu na honandua mu abrabɔ ehiadze.”¹ Yɛreper abɛyɛ ahodan kã hɛn edwuma wɔ ahyɛmudzi anamɔn kwan no ho do a ogya hɛn ma yɛsan kɔ Ɔsor Egya na Ne Ba, Jesus Christ hɔ. Ɔbɛhyɛ hɛn gyedzi dzen wɔ Jesus Christ mu na dɛwdzi mu ara yeedua nkwagye na nkwagye ntowdo ayɛdze horow do atakyer No. Ahodan yɛ Jesus Christ asɛmpa n’asɛmpa nkyerɛkyerɛ, ɔnnyɛ nhyehyɛɛ. Ɔyɛ hɛn nkwa ber kwan, ɔnnyɛ dza osi prɛko pɛr.

Yɛyɛ ahodan wɔ hɛn abrabɔ nyina mu ber a yenyin wɔ sunsum mu ahoɔdzen mu, yerutu nyimpadua na nkã tse apɔmudzen mpon na yɛhwehwɛ hɛn nwomasũa na edwumayɛ, na yɛreyɛ honandua mu ahoboa.² Ana yebowie edwuma yi yɛ wɔ hɛn abrabɔ mu da a? Oho, ɔyɛ hɛn nkwa nda nyina mu adzesũa, mpontu, na edwuma kwan. Onnwie dabiarada; ɔyɛ daa daa kwan, a onngyae da.

Yebesidɛn botum dze ahodan ho nkyerɛkyerɛ na fapem horow no akyerɛkyerɛ hɛn mbofra na mbabun no? Kwan kor a ohia nye dɛ yɛdze Mbofra na Mbabun nhyehyɛɛ no bedzi dwuma daa daa. Awofo na mbofra sũa Jesus Christ n’asɛmpa no, dze hɔnho hyɛ ɔsom na dwumadzi ahorow mu, na wɔbɔ mu yɛ edwuma wɔ nyimpa ne mpontu nhyehyɛɛ anan no mu a ɔyɛ soronko ma abofra kor biara. Ɔnntse dɛ nhyehyɛɛ kor noara a ɔahyehyɛ ama obiara bio.

Mbofra Kwankyerɛ buukuu no kã dɛ: “Mber a nna Jesus tse dɛ ɔwo no, Osũaa adze na onyinii. Hom so rusũa adze na hom rinyin. Kyerɛwsɛm no kã dɛ: ‘Jesus kɔr kan wɔ nyansa nye tsipɛn mu, na Nyankopɔn nye nyimpa hɔ enyimpa mu’ (Luke 2:52).”³ Kyerɛwsɛm yi kã inyin na adzesũa wɔ sunsum mu afãmu, Nyankopɔn hɔ enyimpa; anyɛnkoyɛ afãmu, nyimpa hɔ enyimpa; nyimpadua afãmu, tsipɛn; na nyimdzee afãmu, nyansa ho asɛm. Mpontu nhyehyɛɛ yinom fa hɛn nyina hɛnho a hɛn mfe a yeedzi mmfa ho. Ebɛn mber na yɛkyerɛkyerɛ hɔn adze? Deuteronomy 6:6–7 mu no yɛkenkan dɛ:

“Na asɛm yi a merehyɛ wo ndɛ da yi, ɔnko w’akoma do:

“Na fa kyerɛkyerɛ wo mba yie, na twetwe ho nkɔmbɔ aber a etse wo fie, nye aber a enam ɔkwan mu, nye aber a ereda, nye aber a erosoɛr.’’

Yɛdze hɛn fasusu papa na yɛdze kyerɛkyerɛ hɛn mba ndzɛmba yinom, ber a yɛnye hɔn reyɛ edwuma na yɛnye hɔn rosom, yerusũa kyerɛwsɛm no, na yeridzi Jesus Christ ne nkyerɛkyerɛ do dɛ mbrɛ nkɔnhyɛfo akyerɛkyerɛ no.

Maakã ho asɛm dɛ wɔ Mbofra na Mbabun nhyehyɛɛ mu no, mbofra san mu yi botae ahorow wɔ mpontu nhyehyɛɛ anan no mu kor biara. Ɔyɛ dza ohia dɛ hɔnankasa wɔhyehyɛ hɔn botae ahorow wɔ nhyehyɛɛ kor biara mu. Awofo na akyerɛkyerɛfo botum akyerɛkyerɛ, etu fõ, na wɔama abamba.

Mfatoho, hɛn nanaba basia Miranda nyaa nkenyan dɛ obenyin sunsum mu ber a ɔdze noho hyɛɛ daa daa anapa tutu seminary adzesũa mu. N’enyi gyee dɛ ɔbɛtse ahohoahoa nsɛm efi seminary adzesũafo binom a wɔwɔ ne ward hɔ. Nna ne maame nnyan no dɛ ɔnsoɛr nkosũa adze. Ɔnoara ankasa soɛr, na 6:20 anapa wɔ mber a wɔhyehyɛ no ɔyɛ videoconference osiandɛ oenya suban papa a ɔboa no ma ɔyɛ dɛm. Ɔnnkyɛree na mankasa m’awofo kãe kyerɛɛ me dɛ afei sɛ Miranda kɛsera hɔn a, odzi nkɔmbɔ ara yie, osiandɛ oenyin wɔ noho a ɔgye dzi mu. Iyinom yɛ adzesũadze ma abrabɔ na mpontu a no nsunsuando yehu.

Awofo, nananom, baanodzifo, na anyɛnkofo boa wɔ mbofra hɔn nyin na mpontu mu. Mbanyin na nkyerɛbaa a wɔdze hɔnho ahyɛ ɔsom mu yie no, nye ward asɔfodzi na ekuwekuw baanodzifo ma abamba. “Ebusua no: Dawurbɔ ma Wiadze’’ kã dɛ: “Dɛ mbrɛ Nyame ahyehyɛ no, egyanom wɔdɛ wɔhwɛ hɔn ebusua ebusua do wɔ ɔdɔ na tseneneeyɛ mu na ɔyɛ hɔn asodzi dɛ wɔma hɔn ebusua ebusua abrabɔ mu ehiadze na bambɔ. Nãnom hɔn asodzi tsitsir ara nye dɛ wɔtsetse hɔn mba. Asodzi krɔnkrɔn yinom mu no, ɔyɛ egyanom na nãnom hɔn asɛdze dɛ wɔboa hɔn ho dɛ adamfo etsĩpɛmfo. … Ebusuafo nkaafo no wɔdɛ wɔma mboa wɔ hiaber mu.”⁴ Sensendo a odzi ekyir no ka nananom, a binom so kã ho, ho asɛm.

Ber a yɛsom wɔ West Africa yi, me yer Nuria ayɛ edwuma nwanwa dɛ ɔsom hɛn ebusua na nanamba a wɔmmbɛn hɛn na ɔkɔdo nye hɔn nya nkitahodzi. Ɔdze tɛknɔlɔgye dzi dwuma yi. Ɔkenkan mbuukuu kyerɛ nanamba nkakraba. Ɔkyerɛkyerɛ nanamba mpanyimfo no nsɛntsitsir tse dɛ hɛn ebusua ho nsɛm, abɔdzenyansapɛ, Puerto Rico hɔn abakɔsɛm, Gyedzi ho Nsɛmpɔw, na Jesus Christ n’asɛmpa. Ndɛ dze kwan tsentsen nntum nnsiw nkitahodzi, yɛreka ho, na yɛrosom obi, na yɛrekyerɛkyerɛ hɛn ebusua ebusua mu ebuasuasantsen a wɔaba do no kwan. Emi so mekã Nuria ho sɛ mubotum akyerɛkyerɛ hɛn nanamba a wɔsom bo no adze, dɛ yɛdɔ hɔn, na yɛma hɔn tsir mu yɛ hɔn dɛw na yɛma wɔserew.

Ɔwɔ dɛ hom hu nkenyan nsɛ a ɔda Mbofra na Mbabun nhyehyɛɛ na yɛrekyekyer ahodan ntamu no. Mpontu nhyehyɛɛ anan wɔ kor biara mu no dzi nsɛ ara yie. Sunsum mu ahoɔdzen wɔ ahodan mu no nye Mbofra na Mbabun sunsum mu no nam. Nyimpadua na nkã tse mu apɔwmudzen wɔ ahodan mu no nye Mbofra na Mbabun honandua na anyɛnkoyɛ no nam. Nwomasũa, edwumayɛ, na honandua mu ahoboa wɔ ahodan mu no fam nyimdzee no ho wɔ Mbofra na Mbabun nhyehyɛɛ no mu.

Murowie no, hom mma yendzi hɛn Agyenkwa Jesus Christ na N’asɛmpa no do ber a yɛyɛ ahodan wɔ hɛn abrabɔ nyina mu, na yɛmfa iyi nkyerɛkyerɛ hɛn mbofra na mbabun. Yebotum ayɛ iyi koraa ber a

yɛrosom binom dze ayɛ fasusu papa,
yɛdze ahodan ho nkyerɛkyerɛ na fapem horow no robɔ bra na yɛdze rekyerɛkyerɛ, na
yɛbɛyɛ setsie ama mbrasɛm no dɛ yɛbɛyɛ ahodan dɛ ɔyɛ Jesus Christ n’asɛmpa n’afã.

Nkyerɛkyerɛ na Ahyɛmudzi 104:15–16 kã dɛ:

“Ɔyɛ mo botae dɛ mehyɛ m’ahotseweefo hɔn ehiadze osiandɛ ndzɛmba nyina yɛ medze.

“Mbom ɔwɔ dɛ wɔyɛ no mankasa mo kwan do; na hwɛ, dɛm kwan yi do na Emi, Ewuradze, maahyɛ ho ɔmom dɛ mebɛfa do dze m’ahotseweefo hɔn ehiadze ama hɔn, ama wɔaakrɔn ehiafo no, dɛm na ɔbɛma wɔabrɛ esikafo adze.’’

Iyi nye Jesus Christ N’Asɔr no. N’asɛmpa no hyira ebusua ebusua wɔ asaase do ha na mfesantsen nyina mu. Ɔweɔn hɛn wɔ hɛn abrabɔ mu ber a yɛper dɛ yɛbɛyɛ onnyieiwei ebusua ebusua. Minyim dɛ iyi yɛ nokwar. Jesus Christ ne dzin mu, amen.