Ɔdze Ɔyarsa wɔ Ne Ntsaban mu Asoɛr:

Yebotum Akyɛn Nkonyimdzifo

Elder Patrick Kearon ne Kasaa

Ɔkã Eduosuon no hɔn Presidency ho

Jesus edzi enyimtsiabu nyina a ɔwɔ wiadze yi mu do ama Ɔaama wo tum nnyɛ dza wɔdze tsena ase nkõ, mbom ama dabi, ɔnam No do, eetum eedzi do na mpo edzi konyim.

Marin, Emi nye Elder Holland, na ndzɛmba yɛ dɛ ɔrebɛsɛɛ.

Yɛkyɛn Nkonyimdzifo

Hɛn nyinara enyi gye nkwa ho nsɛm. Yɛtse nsɛm fa akokodurfo a wokyin hwehwɛ nsaase na nkorɔfo gyan ara a wotumii dua ɔhaw na dza enyi nnda mu eso wɔbɔɔ mbɔdzen tsenaa ase, na yebisa hɛnho dɛ, “Nkyɛ emi mubotum ayɛ?”

Ntsɛmara modwen Britainyi Ernest Shackleton a okyinii hwehwɛ nsaase na ne wusihɛn HMS Endurance, no mu edwumayɛfo ho a, hɔn wusihɛn no sɛɛ wɔ Antartic esukwankyɛba mu na wɔkaa wɔ nsupruw pawee bi do bɛyɛ mfe ebien. Shackleton ne baanodzi soronko na n’enyimpisi a ɔmmpa da gyee no nkorɔfo nkwa, mpo wɔ tsebew a ɔnnyɛ koraa mu.

Nkyii modwen Apollo 13 no mu edwumayɛfo a wɔnam wimu rokɔ ekesi bosoom do no hɔnho! Naaso atoweɛnkyɛm sii ber a mframa koradze kor paae, ntsi nna ɔwɔ dɛ wotwa akwantu no do. Hɔn mframa do atsew no, ewdumayɛfo na hɔn a wɔdandan akwantu no wɔ asaase do no nwanwa mu ara hyehyɛɛ biribi ma wotumii dze astronautfo baasa nyina sanee baa asaase do dwudwoodwo.

Ɔyɛ me nwanwa dɛ mubohu ahobow mu ara ankorankor na ebusua ebusua a ɔkõ akã hɔn, wɔakyer hɔn egu nseraban horow mu, na hɔn a wɔbɛyɛ etukɔrfo a wotum tsena ase, hɔn a konyimdze mu na akokodur mu ara wɔma hɔn mfɛfo a wɔrebrɛ enyidado, wɔyɛ ayamuyie wɔ ewurkadze ber mu, na wɔ kwan bi do no wotum boa binom ma wotsim da kor so ara kã ho.

Ana ɔwo anaa emi botum egyina wɔ atseetse tsebew a ɔtse dɛm mu?

Naaso bia hom mu binom tse hɔn a woennwu hɔn nsɛm na hom akra kã dɛ hom yɛ atseasefo nsɛm mu nyimpa a hom tse ase sesei ara dɛ hom asɔw enyimtsiabu, ɔpow, ehunahuna, fie basabasayɛ, anaa ɔhaw biara a ɔtse dɛm. Ewɔ wankasa wo ahohiahia aperdzi mu dɛ ibefi mu efi tsebea bi a ɔyɛ dɛ wo wusiw hɛn asɛɛ anaa woetwa w’akwantu pa bi do mu. Ana wɔbɛgye wo efi mu; ana ibotum asɔw edua woara wo tseasefo asɛm mu?

Nyiano no yɛ nyew. Ibotum efi mu efi atsena ase. Nokwar nye dɛ wɔagye wo dada; wɔagye wo nkwa dada—Nyia ɔasɔw ayaayaadze noara a erefa mu no nna ɔasɔw amandzehu noara a erosɔw no.¹ Jesus edzi enyimtsiabu nyina a ɔwɔ wiadze yi mu do² ama ɔama wo tum nnyɛ dza wɔdze tsena ase nkõ, mbom ama dabi, ɔnam No do, eetum edzi do na mpo edzi konyim—asoɛr koraa wɔ ɔyaw, atseetsee, ahohia do, na eehu dɛ asomdwee ahyɛ hɔn ananmu.

Ɔsomafo Paul bisa dɛ:

“Woana bɛtsew hɛn efi Christ dɔ no ho? Ahohia, anaa ahomtsew, anaa ɔhaw, anaa ɔkɔm, anaa adagyaw, anaa amandze, anaa afõwa a? …

“Naaso iyi nyina mu, yɛnam nyia ɔdɔɔ hɛn no do dzi konyim bor do.”³

Anohoba ma Israel Ahyɛmudzifo

Hom bɛkaa mber a President Russell M. Nelson dze nsato a odzi do no too gua wɔ wiadze mfɛndzanan ehyiadzi ase. Ɔkãa dɛ: “Ber a hom sũa hom kyerɛwsɛm no … , mehyɛ hom nkuran dɛ hom nkyerɛw dza Ewuradze abɔ ho anohoba dɛ Ɔbɛyɛ ama Israel ahyɛmufo no nyina nkorkor. Muhu dɛ ɔbɛyɛ hom ahobow!”⁴

Tum na awerɛkyekyer anohoba a m’ebusua hunii no mu kumaabi nye iyinom. Susu dɛ Ewurdaze rekã dɛm nsɛm yi kyerɛ wo—kyerɛ ɔwo a eretsena ase—osiandɛ wɔyɛ wo dze:

Mma nnsuro.⁵

Minyim w’awerɛhow, na mesian dɛ miribeyi wo efi mu.⁶

Morommpow wo.⁷

Me dzin da wo do, na m’abɔfoe hwɛ wo do.⁸

Mebɛyɛ anwanwadze wɔ hom mu.⁹

Hom nye me nnantsew; hom nsũa me; mebɛma hom ahomgye.¹⁰

Mowɔ hom finimfin.¹¹

Eyɛ medze.¹²

Ma Hɔn a Wɔretsena Ase

Dɛm awerɛhyɛmu nsɛm yinom wɔ m’adwen mu no, mepɛ dɛ mekasa pɔkyee kyerɛ hɔn a wɔdwen dɛ kwan biara nnyi hɔ a wɔdze befi mu efi hɔn atsena ase nsɛm mu osian ɔhaw a binom hɔn etsirmɔdzen ndzeyɛɛ dze abrɛ hɔn no ntsi. Sɛ iyi yɛ wo atsena ase asɛm a, yenye wo bɔ mu sũ. Yɛpɛ dɛ idzi adwensɛɛ, enyimguase, na suro do, na yɛhwɛ kwan ma wo dɛ ɔnam Jesus Christ do, ibedzi konyim

Fi Nyia Ɔahaw no kɔ Nyia Ɔtsena Ase kɔ Nyia Odzi Konyim hɔ

Sɛ edua enyimtsiabu biara mu, basabasayɛ, anaa atseetsee mu a, ɔyɛ a ogya wo adwen bi dɛ dza osii no yɛ wo mfom na efata dɛ esoa enyimguase na afɔdzi a etse no. Bia ɔyɛ a itum nya adwen bi dɛ:

Nkyɛ mubotum esiw no kwan.
Nyame nndɔ me bio.
Obiara ronndɔ me bio da.
M’asɛɛ atra dza wɔyɛ no yie.
Agyenkwa no no Werdam Afɔrbɔ no wɔhɔ ma binom mbom nnyɛ emi.

Bia dɛm mfom adwendwen na atsenkã yi ayɛ akwansiwdze ama wo dɛ ebɔhwehwɛ mboa efi ebusua, anyɛnkofo, baanodzifo, anaa abemfo hɔ, ntsi wo nko na idzi aper. Sɛ ahwehwɛ mboa efi hɔn a egye hɔn dzi hɔ mpo a, bia eda ho dzi aper wɔ enyimguase dwen ho na mpo etan woho. Dɛm nsɛm a osisi yi no nsusuando botum awɔ hɔ mfe pii. Ewɔ enyidado dɛ dabi woho bɔtɔ wo, naaso ɔyɛ dɛ dɛm da no nnyaa mbae.

Dɛm enyimtsiabu no nna ɔnnyɛ ɔwo, nnyɛ ɔwo na onnkotum ayɛ ɔwo wo mfom dabiarada, ɔmmfa ho dza nyia ɔdze dzii wo anaa ma obi fofor biara akã afa ho a ɔnngye iyi nnto mu. Sɛ woedzi wo etsirmɔdzen sɛm, anaa busuanyi bi aseesee wo, anaa wɔdze dza ɔmmfa kwan mu biara edzi wo a, nnyɛ ɔwo na ihia nnuhu; ɔnnyɛ wo mfom bi a.

Wobo a esom no do nntsewee anaa ɔdɔ ma wo dɛ eyɛ nyimpa, anaa dɛ Nyame ne babaa anaa babanyin no no do nntsewee, osian dza obi fofor dze edzi wo ntsi.

Nyame nnhu wo sesei, na Onnhun wo da dɛ, obi a ɔsɛ dɛ wobu no enyimtsia. Dza ato wo biara no, N’enyi nnto woho anaa Onndzi woho yaw. Ɔdɔ wo wɔ kwan a mbrɛana erebohu do a. Na ibohu ber a edze wo werɛ hyɛ N’anohoba mu na isũa dɛ ebɛgye No edzi sɛ Ɔkã dɛ “[e]som bo wɔ [N’]enyi do” a.¹³

Dɛm ndzɛmba bɔn a wɔdze ayɛ wo no nnkyerɛ wo nyimpa ban a eyɛ. Ewɔ enyimnyam nokwar mu, wo nyimpa ban nye wo onnyiewiei su dɛ Nyame ne babanyin anaa ne babaa, na wo Bɔadze n’emudzi, onnyiewiei dɔ na nsato ba ayarsa emudzi mu korakoraa.

Ɔyɛ dɛ ma ɔnnkɛyɛ yie dze, naaso etse nkã dɛ ɔnnkɛyɛ yie, ayarsa botum aba a ɔnam Jesus Christ no Werdam Afɔrbɔ no n’anwanwadze ɔpon tum no do, ɔno a ɔdze “ɔyarsa wɔ ne ntsaban mu” asoɛr.¹⁴

Hɛn Agyenkwa mbɔbɔrhufo no, Oedzi sum nye enyanyandze do konyim no, wɔ tum dɛ ɔtsen mfom nyinara nokwar, a ɔdze nkwa brɛ hɔn a binom afom hɔn.¹⁵

Meserɛ hu dɛ Agyenkwa no duaa ndzɛmba nyina mu, mpo dza ato wo no. Ɔnam dɛm ntsi, Onyim pɔkyee dza hu kɛse ankasa na enyimguase tse, na mbrɛ ɔtse sɛ woeyi wo tokyen anaa etse dɛ ebubu a.¹⁶ Fi No werdam amandzehu no bun mu no, Agyenkwa ma enyidado a edwen dɛ ɔayew afebɔɔ, ahoɔdzen a egye dzi dɛ nnkotum enya da, na ayarsa a anndwen ho dɛ obotum aba no.

Ewuradze na No Nkɔnhyɛfo Kasa Pefee Tsia Enyimtsiabu Sũ

Kwan biara nnyi hɔ ma enyimtsiabu biara—honamu o, mpa do nkitahodzi mu o, nkã tse mu o, anaa kasa mu—wɔ ofi, ɔman, anaa amambra biara mu. Biribiara nnyi hɔ a ɔyer, abofra, anaa okun bɛyɛ anaa ɔbɛkã a ɔma “wɔfata” ɔbor. Obiara nnyi hɔ, wɔ ɔman anaa amambra biara mu a, “ɔrohwehwɛ” ntoabɔ anaa basabasayɛ efi obi a ɔwɔ tum hɔ anaa obi a ɔsõ na ɔwɔ ahoɔdzen kyɛn no hɔ.

Hɔn a wobu enyimtsia na wɔhwehwɛ dɛ wobesie hɔn bɔn kɛse no botum afa hɔn tsir edzidzi mu mber kakra. Naaso Ewuradze a, ohu ndzɛmba nyina, nyim nyɛe na adwendwen na nsusui a ɔwɔ akoma mu.¹⁷ Ɔyɛ pɛrpɛr Nyame, na Ne atsɛmbu krɔnkrɔn no ɔdze bɛma.¹⁸

Nwanwa mu ara, Ewuradze san so yɛ ehumbɔbɔr Nyame ma hɔn a wonu hɔnho nokwar mu. Enyimtsiabufo—hɔn a hɔnankasa asɔw enyimtsiabu mber bi kã ho—a wɔkã hɔn bɔn, wogyaa hɔn bɔn, na wɔyɛ dza wotum nyina dze yɛ nsiesie na nhyɛananmu no, wɔ bɔnfakyɛ ho kwan a ɔnam Christ no Werdam Afɔrbɔ nwanwa no do.

Hɔn a mfom mu ara woebu hɔn fɔ no, afɔbu no dur a yenntum nnkã no dze noara n’ahohyehye nam. Mbom woehyira hɔn so ɔnam Agyenkwa no n’amandzehu ma hɔn no do na nyimdzee no dɛ ewiei no nokwar bedzi nyim.

Naaso enyimtsiabufo a wonnu hɔnho no begyina Ewuradze enyim ebu hɔn ewurkadze ho nkontaa.

Ewuradze Ɔnoara da no edzi pefee wɔ tsia a Otsia enyimtsiabu biara: “Na obiara a ɔbɔto mbofra nkakraba … yi mu baako fintsidua no, oye ma no dɛ wɔdze ewuyambo kɛse sɛn no kɔn mu, na wɔkɔtow no kyen nsu mu wɔ po bun mu.”¹⁹

Ewiei

Anyɛnkofo adɔfo a woepira hom yaayaayaw—nna obiara a wɔasɔw abrabɔ mu ndzebɔnyɛ—hom botum enya ahyɛse fofor na nhyɛasee fofor. Gethsemane ture no mu no, Jesus “faa … awerɛhow na amandzehu nyina a emi na ɔwo asɔw no pɛn,”²⁰ na Oedzi ne nyinara do! Agyenkwa no tserɛw ne nsamu, ma wo ayarsa akyɛdze no. Edze akokodur, abotar, na itsim No do nokwar mu no, ɔnnkɛkyɛr koraa wo so botum agye dɛm akyɛdze yi emudzi mu. Ibotum egyaa wo ɔyaw mu na edze ato N’ananadze.

W’Agyenkwa botoo no kãa dɛ, “Owifo no mmba gyedɛ orubowia, na oeku, na ɔasɛɛ; emidze, mebae ma [e]nya nkwa, na [e]nya no mbordo.”²¹ Eyɛ atsena ase nyi, ibotum enya ayarsa, na ibotum enya awerɛhyɛmu dɛ edze Jesus Christ no tum na adom no, ibedzi do na edzi konyim.

Jesus awea wɔ ndzɛmba a enyi do no ɔyɛ dɛ ɔnnkɛyɛ yie ho. Ɔbaa ha dɛ Ɔbɛma dza ɔnnkɛyɛ yie no ayɛ yie, dza wonntum mmpon no no ɔapon no, dɛ Ɔbɛsa yar a onnyi ayarsa, Ɔbɛtsen dza wɔtsen no a ɔnnkɛyɛ yie, na Ɔama hɔn a wonnkotum enya anohoba no anohoba.²² Na Ɔyɛ adze wɔ ho papaapa. Nokwar nye dɛ, Odzi mu wɔ ho. Jesus Christ hɛn Ɔyarsafo, ne dzin mu, amen.

Sɛ epɛ nsɛm na mboa horow akã ho a, hwɛ “Abuse” Life Help afã wɔ ChurchofJesusChrist.org nna wɔ Asɛmpa Nwoma Korabea app no mu.