Video: “Hom Nye Mbaa no a Ohunii no”
Afe 1979 mu nna President Kimball da asopitsi na ɔserɛɛ ne yer Camilla, dɛ ɔnkenkan ne amandzɛɛbɔ wɔ wiadze mfɛndzanan mbaa nhyiamu bi ase.
Sister Camilla Kimball: “Asɔr no ne nyinii kɛse noara a ɔreba wɔ nda a odzi ewiei no bɛba osian mbaa apapa dodow a wɔwɔ wiadze (a wɔtaa wɔ sunsum mu nkã tse wɔ hɔn mu) a wɔbɔtwe hɔn dodowara aba Asɔr no mu no ntsi. Iyi besi susuampara dɛ Asɔr mu mbaa no bɛkyerɛ tseneneeyɛ na kasakwan a ɔda edzi pefee wɔ hɔn abrabɔ mu ama woeebohu dɛ Asɔr mu mbaa no da nsew na wɔyɛ soronko—wɔ enyigye kwan horow mu—fi wiadze mu mbaa ho.”1
President Russell M. Nelson: “Me nkyerɛbaa adɔfo, hom a hom yɛ hɛn mfɛfo etsitsir wɔ dɛm ewiei mber yi mu, da no a President Kimball hunii no nye ndɛ. Hom nye mbaa no a ohunii no! Hom bra pa, kan, ɔdɔ, nyimdzee, akokodur, su, gyedzi, na tsenenee abrabɔ bɔtwe wiadze mu mbaa apapa a, hɔn ebusuafo kã ho, aba Asɔr no mu a hɔn dodow no mbaa da!
“Yehia hom ahoɔdzen, hom nsakyeree, hom gyedzi, hom akandzi mbɔdzembɔ, hom nyansaa, na hom ndze horow. Nyankopɔn ahenman nndzi mu, nna onnkotum edzi mu ber a mbaa a wɔyɛ ahyɛmudzi krɔnkrɔn na wosie no nnkã ho, mbaa a wɔdze Nyankopɔn no tum na tumdzi kasa! …
“… Ma hom ɔfrɛ tse biara, ma hom gyinabew ahorow tse biara no, yehia hom nsusui, hom nhunmu, na hom nkenyan. Yehia hom ma wɔakasa na wɔakyerɛ hom adwen wɔ, ward, na stake abaguafo mu. Yehia akyerɛbaa ɔwarfo biara ma ɔakasa dɛ ‘ɔboafo etsipɛnnyi a odzi mu’ ber a hom nye hom nkunnom bɔ mu yɛ kor wɔ hom ebusua nhwɛe mu. Ɔwarfo anaa ɔhokwafo, hom nkyerɛbaa wɔ ahoɔdzen horow na nkenyan soronko bi a ɔda edzi a hom enya dɛ akyɛdze horow fi Nyankopɔn hɔ. Hɛn enuanom no nnkotum esũasua hom nhyɛdo soronko no bi.
“Yenyim dɛ nyɛe a ɔkrɔn koraa wɔ abɔdze nyina mu nye ɔbaa no mbɔe! Yehia hom ahoɔdzen! …
“… Meda hom ase, me nkyerɛbaa adɔfo, na mihyira hom dɛ hom nsoɛr ndu hom kɛseyɛ mu emudzi mu, mfa nhyɛ hom mbɔe ho botaa mã, ber a yɛnantsew bɔ mu wɔ edwuma krɔnkrɔn yi mu. Yɛabɔ mu no yɛbɔboa esiesie wiadze ama Ewuradze ne Mbae a Otsĩa Ebien no.”2