Rebɛsa Wiadze no Yarba
Yebotum esiesie epirakur na nsonsonee na yɛasa no yarba mpo ber a yedzi Nyankopɔn, hɛn nyina hɛn Egya, na Ne Ba, Jesus Christ, nyi no.
Enuanom na nkyerɛbaa, Easter enyimnyam hyɛber yi mu no wɔayɛ hɛn adom kɛse dɛ yehyia na yɛgye afotu na kwankyerɛ fi Nyame n’asomfo hɔ.
Kwankyerɛ krɔnkrɔn na nkyerɛkyerɛ a ofi hɛn Ɔsor Egya hɔ no boa hɛn ma yetwa ɔbra sar yi wɔ awerɛhow mber yinom mu. Tse dɛ ma wɔhyɛɛ ho nkɔm no, “ogya na ehum,” akõkoekõ nye akosɛm nye asaasewosow wɔ mbea pii do,” “nye ekyiwadze horow nyina,”1 ɔyardɔm,”2 “ɔkɔm nye ɔyardɔm”3 resɛɛ ebusua ebusua, sɔn horow, na aman mpo.
Ɔsɛɛ kor so rutwuw wɔ wiadze no mu: emi na ɔwo hɛn asɔrsom ho fahodzi. Adwenkyerɛ yi a orinyin no hwehwɛ dɛ wobeyi nyamesom na gyedzi wɔ Nyankopɔn mu efi bagua do, skuul, sɔn abrabɔ gyinapɛn, na ɔmansɛm mu. Hɔn a wotsia asɔrsom ho fahodzi no hwehwɛ dɛ wɔdze nhyɛ bɔto mbrɛ yɛkã hɛn akoma mu atsenkã a okitsa hɛn no ho nsɛm. Wɔkasa tsia na wosi gyedzi amambra pa atwetwe.
Suban a ɔtse dɛm no yi nkorɔfo binom si nkyɛn, ɔbra ankorankor fapem adze, pɛrpɛrdzi, obu, sunsum mu atsenkã, na asomdwee tsiboa.
Asɔrsom ho fahodzi nye ebɛnadze?
Ɔyɛ fahodzi a wɔdze som wɔ n’afã biara mu: nhyiamu ho fahodzi, kasa ho fahodzi, ankorankor gyedzi dwumadzi ho fahodzi, na fahodzi ma nkaafo hɔn so ayɛ dɛmara. Asɔrsom ho fahodzi ma hɛn mu kor biara kwan ma yɛbɔ adwenpɔw ma hɛnho wɔ dza yɛbɛgye edzi ho, mbrɛ yɛbɔbɔ bra na yɛdze hɛn gyedzi edzi dwuma na dza Nyankopɔn enyi da hɛn kwan.
Mbɔdzembɔ dɛ wobotwa nyamesom ho fahodzi do no nnyɛ adze fofor. Abakɔsɛm ber nyina mu, agyedzifo ehu amandze kɛse noara wɔ binom nsa ano. Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no nnyɛ soronko.
Fi hɛn ahyɛse no, dodowara a wɔrohwehwɛ Nyame no atwe aba Asɔr yi mu osian ne nkyerɛkyerɛ wɔ nkyerɛkyerɛ krɔnkrɔn no ho, a gyedzi wɔ Jesus Christ mu na No Werdambɔ, nnuho, enyigye ho nhyehyɛɛ, na Ewuradze ne mbaa a Otsĩa ebien no kã ho.
Etsiafo, atseetsee, na begyabegyayɛ haaw hɛn nda a odzi kyir nkɔnhyɛnyi a odzi kan, Joseph Smith, na n’akadofo no.
Afe 1842 atseetsee ber mu no, Joseph dze Asɔr no a orinyin ne nkyerɛkyerɛ 13 puei guado, a iyi kã ho: “Yɛgye ndzinoa no to mu dɛ ɔwɔ dɛ yɛsom Otumfo Nyame wɔ kwan a hɛn tsibowa kã kyerɛ hɛn, na yɛma nyimpa nyinara ndzinoa kor noara bi dɛ wɔnsom dɛ mbrɛ wɔpɛ, bea a wɔpɛ, anaa dza wɔpɛ.”4
N’asɛm yi fua obiara, ogya fahodzi, na ɔkyerɛ obu. Dɛm nye nyamesom ho fahodzi ne tsirmpɔw.
Nkɔnhyɛnyi Joseph Smith so kãa dɛ:
“Mepaa mu kã no ndamyɛ mu wɔ Ɔsor enyim dɛ mayɛ krado dɛ mobowu ber a morobɔ Presbyterianyi, Baptistnyi, anaa nyimpa papa biara a ɔwɔ asɔr bi mu ne kyɛfa ho ban, osiandɛ fapem kor noara a obetsiatsia Ɔhotseweenyi ne kyɛfa do no … betsiatsia Roman Catholicnyi, anaa asɔr biara a wɔnnyɛɛ atsenkã anaa wɔyɛ mbrɛw dodow dɛ wɔbɔbɔ hɔn ho ban wɔ hɔn kyɛfa ho.
“Ɔyɛ dɔ ma fahodzi [na] okenyan me kra—ɔman mu na nyamesom ho fahodzi ma adasa mba nyina.”5
Naaso, Asɔrmba asɔpɔkanfo no wɔkɔr do tui hyɛɛ hɔn do na wopiaa hɔn akwansin mpempem, fii New York kɔr Ohio kɔr Missouri, bea a ambrado no dze ahyɛdze too gua dɛ Asɔrmba no “otwar dɛ wɔyɛ hɔn dɛ atamfo na otwar dɛ wɔhyew hɔn ase anaa wopia hɔn fi mantɔw no mu.”6 Woguanee kɔr Illinois, naaso ayakayakadze no toaa do. Dɔm tuii hyɛɛ Nkɔnhyɛnyi Joseph do na wokuum no, rodwen dɛ wokum no a wɔbɛsɛɛ Asɔr no na wɔabɔ agyedzifo no apetse. Mbom agyedzifo no gyinaa pintsinn. Joseph n’abadziekyir, Brigham Young, dzii mpempem a wɔhyɛɛ hɔn paam hɔn akwansin 1,300 kɔr anee kɔr bea a ndɛ ɔyɛ Utah mansin.7 Mankasa me nana nkansowanom kã edzikamfo a wɔkɛtsenaa hɔ no ho.
Fitsi dɛm nda no a atseetsee yaayaw kɔr do no, Ewuradze N’Asɔr akɔ do enyin abɛyɛ asɔrmba ɔpepe 17, a hɔn nkyɛmu fã na no mboree nntse United States mu.8
Ebɔbira 2020 mu no, hɛn Asɔr no dze mpaamukã ma wiadze, a President a Odzi Kan na N’Apamfo na Asomafo Duebien hɔn Quorum siesie no hyɛɛ asɛmpa Nsanananmu n’afrenhyia a otsia 200 no fa. “Yɛpaa mu kã no ahobrɛadze mu dɛ Nyankopɔn dɔ Ne mba a wɔwɔ wiadze aman nyina mu no.”9
Hɛn nkɔnhyɛnyi dɔfo, Russell M. Nelson, akã bio dɛ:
“Yɛgye fahodzi, ayamuyie, na pɛrpɛryɛ ma Nyankopɔn ne mba nyina.
Hɛn nyina yɛyɛ nuambanyin na nkyerɛbaa, kor biara yɛ Egya a ɔwɔ Sor ne ba. Ne Ba, Ewuradze Jesus Christ, to nsa frɛ obiara dɛ ɔmbra No hɔ, “bibinyi na borɔnyi, akowa na fahodzinyi, ɔbarimba na ɔbaa, (2 Nephi 26:33).”10
Hom nye me nsusu akwan anan a ɔman na ankorankor benya mfaso efi asɔrsom ho fahodzi mu.
Odzi kan. Asɔrsom ho fahodzi dzi mbrasɛm akɛse a odzi kan na otsia ebien no nyi, a ɔma Nyankopɔn da hɛn abrabɔ ne finimfin. Yɛkenkan wɔ Matthew mu:
“Dɔ Ewuradze wo Nyankopɔn, wɔ w’akoma nyina mu, nye wo kra nyina mu, nye w’adwen nyina mu.”11
“Na dza otsĩa ebien no a ɔtse dɛ ɔno nye dɛ, Dɔ wo nyɛnko dɛ wankasa woho.”12
Sɛ yɛwɔ chapel, synagogue, mosque, anaa mpapadan mu o, Christ n’esuafo na agyedzifo a wɔwɔ adwen kor no botum akyerɛ hɔn som ma Nyankopɔn ber a wɔsɔr no na wɔwɔ pɛ dɛ wɔsom Ne mba.
Jesus Christ nye dɛm dɔ na som ho fasusu mapã. No somdwuma ber mu no, Ɔhwɛɛ ehiafo,13 Ɔsaa ayarfo yarba14 na efurafo.15 Ɔmaa hɔn a ɔkɔm dze hɔn no edziban,16 obue N’abasa mu maa mbofra nkakraba,17 Ɔdze hɔn a wɔafom no hɔn bɔn kyɛɛ hɔn, hɔn a wɔbɔɔ No mbeamudua mu mpo.18
Kyerɛwsɛm no kyerɛ mu dɛ Jesus “kyinii yɛɛ papa.”19 Ntsi otwar dɛ yɛyɛ.
Otsia ebien. Asɔrsom ho fahodzi gyegya gyedzi, enyidado, na asomdwee ho nsɛnkã,
Dɛ yɛyɛ asɔr no, yɛkã nyamesom horow binom ho ma yɛbɔ nkorɔfo a wɔwɔ gyedzi horow na ndzeyɛɛ horow no hɔn kyɛfa ho ban dɛ wɔbɛkã dza wɔgye dzi. Iyi nnkyerɛ dɛ yɛgye dza wɔgye dzi to mu, nna hɔn so wɔgye hɛn dze, mbom yɛwɔ dza ɔsaa mbordo kyɛn ma yɛnye hɔn a wɔpɛ dɛ wɔbɔ hɛn men no.
Ɔnnkyɛree na mekegyinaa Asɔr no anan mu wɔ afrenhyia G20 Interfaith Nhyiamu wɔ Italy. Ɔhyɛɛ me nkuran, na ɔmaa muhuhuuwii mpo, ber a mihyiaa aman mpanyimfo na gyedzi baanodzifo fi wiadze nyina mu. Muhun dɛ yebotum esiesie epirakur na nsonsonee na yɛasa no yarba mpo ber a yedzi Nyankopɔn, hɛn nyina hɛn Egya, na Ne Ba, Jesus Christ nyi no. Amansan Ayarsafo Kɛse no nye hɛn Ewuradze na Agyenkwa, Jesus Christ.
Medze m’asɛm reba ewiei no ɔyɛɛ enyigyesɛm mber kumaa mu. Nkorɔfo beesuon a wodzii kan kasae ennwie wɔ gyedzi ntɔyɛɛ do anaa wɔ Nyame ne dzin mu. Mugudo rekasa no, modween ho dɛ, “Ana menkã meda ase ara na mentsena ase, anaa muwie “wɔ Jesus Christ dzin mu?” Mekaa me nyimpa ban, na minyim dɛ Ewuradze bɛpɛ dɛ mobɔ Ne dzin dze wie m’amandzɛɛbɔ nsɛm no. Ntsi meyɛɛ. Mohwɛ ekyir a, nna ɔyɛ kwan ma me dɛ mekã me gyedzi, na minyaa nyamesom ho fahozi dɛ mebɛgye me dase wɔ Ne dzin krɔnkrɔn no mu.
Otsĩa Ebiasa Nyamesom kenyan nkorɔfo ma wɔboa binom.
Ber a wɔma nyamesom kwan na fahodzi ma ɔtahye ara yie no, agyedzifo yɛ som edwuma kumabaa ahorow na ɔtɔfabi a akwabran mu. Tsetse Jewfo kasasin “tikkun olam,” ne nkyerɛasee “ibesiesie anaa ibɛsa wiadze no yarba,” reda edzi wɔ pii hɔn mbɔdzembɔ mu. Yɛnye Catholic Charities, a wonyim hɔn dɛ Caritas Internationlis; Islamic Relief, na Jewfo, Hiddufo, Buddafo, na Christian ekuwekuw tse dɛ Salvation Army na National Christian Foundation abɔ mu edzi dwuma. Yɛabɔ mu asom ɔpepe a wɔwɔ ohia mu, ndaansa yi yɛdze asese, kotoku a wɔda mu, na edziban aboa ɔkõ mu tukɔrfo,20 na yɛama vaccine horow, a mbubui yarba21 na COVID dze kã ho.22 Dza wɔakyerɛw no nkorkor a wɔreyɛ no war, naaso dɛmara na ehiadze no so tse.
Nsɛmbisa nnyi ho dɛ, agyedzifo, robɔ mu ayɛ edwuma no, botum ayɛ mboa tsitsir. Ber noara mu no, som a wɔyɛ no kor-ma-kor no wɔnntaa nkamfo no naaso ɔsesã abrabɔ kommyɛ mu.
Modwen mfatoho no a ɔwɔ Luke nwoma no mu ber a Jesus Christ tsenee hwɛɛ Nain kunafo no. Jesus a, akadofo kuw kã Noho no, ohun dɛ wɔso obi a oewu a ɔyɛ kunafo no ne ba kortoo. Sɛ Ɔnnkã ho a, nna orihyia nkã-tse, sunsum mu, na sikasɛm mu nkõgu koraa. Jesus, hun n’enyim a enyinsuwa egura no, Ɔsee no dɛ, “Mma nnsũ”23 Ɔdze Ne nsa kãa bonto no na hɔn a wɔso mmu no gyinae.
Na Ɔsee dɛ, “Aberantsɛ, mese wo dɛ, Soɛr.
“Na nyia a owui no, ɔsoɛree, na ɔhyɛɛ ase kasae. Na [Jesus] dze no hyɛɛ ne nã nsa.”24
Worinyan obi a oewu yɛ awanwadze, mbom papayɛ ndzeyɛɛ biara na yɛredwen obi a oridzi aper ho yɛ ahyɛmu kwan a hɛn mu kor biara so botum “yekyin ayɛ papa,” a yenyim dɛ “Nyankopɔn ka [hɛnho].”25
Na otsĩa anan. Asɔrsom ho fahodzi yɛ nkabɔmu na dɔmfrɛ tum a osiesie hɛn suban pa na ɔbrapa.
Ahyɛmu Fofor mu no yɛkenkan dodow a wɔdanee fii Jesus Christ hɔ ho asɛm a, worihwinhwin Ne nkyerɛkyerɛ dɛ, “Asɛm yi yɛ dzen; woana botum etsie?”26
Yɛda ho tse ntsẽa mu yi ndɛ fi hɔn a wɔrohwehwɛ eyi nyamesom efi nsɛmkã na tumdzi mu. Sɛ nyamesom nnyi hɔ a ɔbɔboa awen suban pa na wɔadwedwe nkõdzen mber a, woana bɔwɔ hɔ? Woana bɛkyerɛkyerɛ nokwardzi, enyisɔ, bɔnfakyɛ, na abotar? Woana bɛkyerɛ ayamuyie, tsema, na ehumbɔbɔr ama hɔn a werɛ efir hɔn na abɔbɔfo? Woana bofua hɔn a ɔson hɔn, a hɔn nyina yɛ Nyame ne mba na wɔfata? Woana bobue n’abasa mu ama hɔn a wohia na wɔronhwehwɛ akatua? Woana na ɔdze obu bɛma asomdwee na wɔayɛ setsie ama mbrasɛm a ɔkrɔn kyɛn ndɛ dza wɔaba do no? Woana bobua Agyenkwa no ntotɔserɛ no “Kɔ, na wo so kɛyɛ dɛmara”?27
Yɛbɛyɛ! Nyew, enuanom na nkyerɛbaa, yɛbɛyɛ.
Moto nsa frɛ hom dɛ hom mpegya asɔrsom ho fahodzi nsɛm mu. Ɔda nyimpa ne pɛ fapem nokwar a Nyame dze ama no edzi.
Asɔrsom ho fahodzi gyina tsia wiadze adwenkyerɛ a odzi esi. Nyamesom ne papayɛ, ne ntserɛwee, nye daa daa ɔdɔ ndzeyɛɛ a nyamesom kenyan no kɔ do nya mbɔho nko ber a yɛbɔ fahodzi a wɔdze kasa na wodzi hɛn gyedzi fapem ho dwuma no ho ban.
Megye dase dɛ Russell M. Nelson yɛ Nyankopɔn no nkɔnhyɛnyi tseasefo. Megye dase dɛ Jesus Christ dzi Asɔr yi kan na Ɔma no kwankyerɛ. Ɔbɔɔ hɛn bɔn ho werdam, wɔbɔɔ no mbeamuduamu, na Ɔsoɛree fii ewufo mu nda a otsĩa ebiasa no.28 Osian Ɔno ntsi, yebotum atsena ase bio afebɔɔ; na hɔn a wɔpɛ no botum nye hɛn Egya a ɔwɔ Sor atsena. Nokwar yi mepaa mu kã kyerɛ wiadze nyina. M’enyi sɔ fahodzi a mowɔ dze yɛ dɛm. Jesus Christ ne dzin mu, amen.