Bra Nyame no Nguambuw mu
Nyame no nguambuw mu no, yenya Oguanhwɛfo Pa no nhwɛdo, ntsetsee pa na ohyira hɛn ma yɛtse No mponee dɔ nkã.
Dɛ awofo a wonnyinii no, Onuabanyin nye Akyerɛbaa Samad sũaa Jesus Christ asɛmpa no wɔ hɔn dankora-ebien fi a ɔnnyɛ kyinkyinɛnn mu wɔ Semarang, Indonesia.1 Wɔtsena pon kakraba bi ho a, kandzea bi a ɔnnhyerɛn pii si hɔ a ɔyɛ dɛ ɔma ntonton pii ba sen dɛ ɔma kan no, asɛmpasomafo mberantsɛ beenu kyerɛkyerɛɛ hɔn onnyiewiei nokwar nsɛm. Ɔnam nokwar mpaabɔ na Sunsum Kɔnkrɔn n’akwankyerɛ do no, wɔbɛgyee dza wɔkyerɛkyerɛɛ hɔn no dzii na wɔsan mu yii dɛ wɔbɛgye enuma na wɔabɛyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no n’asɔrmba. Dɛm ngyinasi no, nna kwan a wɔfa do bɔ hɔn bra fi dɛm aber no, ehyira Onuabanyin nye Akyerɛbaa Samad na hɔn ebusua wɔ hɔn abrabɔ ne fã biara mu.2
Wɔkã Ahotseweefo edzikamfo a wɔwɔ Indonesia no ho. Ekyir no wɔgyee temple ayɛdze horow no, na Onuabanyin Samad soom dɛ branch president na nkyii district president a, otwuw hɛn faa Central Java nyinaa mu dze hyɛɛ n’asɛdze mã. Mfe du a etwa mu yi, ɔasom dɛ patriarch a odzi kan wɔ Surakarta Indonesia Stake mu.
Dɛ meyɛ asɛmpasomafo a wɔwɔ dɛm ahobrɛadze fi a, gyedzi ahyɛ mu mã no hɔn mu kor no mfe 49 a ɔabɛsen kɔ no, meehu dza Ɔhen Benjamin kyerɛɛe wɔ Mormon Nwoma no mu: “Mebɛpɛ dɛ hom dwendwen nhyira nye ahomka tsebew a hɔn a wodzi Nyankopɔn ne mbrasɛm do no wɔ mu. Na hwɛ, woehyira hɔn wɔ adze nyina mu, wɔ honam nye sunsum nyina mu.”3 Nhyira a ɔpem ba hɔn a wodzi Jesus Christ ne fasusu na nkyerɛkyerɛ do, hɔn a wɔafa dɛ wɔnkan hɔn nkã N’esũafo ho hɔn abrabɔ mu no, ɔdɔɔsõ, ɔyɛ dɛwdzi, na onnyiewiei.4
Nyame no Nguambuw
Alma ne enuma ahyɛmu nsato ma hɔn a nna wɔaboa ano wɔ Mormon Esu ho no dze nsɛmfua yi hyɛ ase: “Na hwɛ, hom enya pɛ dɛ hom bɛba Nyame no nguambuw mu.”5
Nguanbuw yɛ bea a wɔtow mu kɛse a, wɔtaa dze mboba aban si, bea a nguan nya bambɔ anafua. Ɔwɔ abow kortsee. Da no ba ewiei a, guanhwɛfo no frɛ nguan no. Wonyim ne ndze, na wodua abow no mu kɛhyɛ nguanbuw no ne bambɔ mu.
Alma no nkorɔfo no nyim dɛ nguanhwɛfo gyina abow tseaba a ɔda nguambuw n’ano ama sɛ nguan no hɛn mu a, wɔakan hɔn6 na woehu hɔn epirakur na nyarba horow na wɔahwɛ hɔn nkorkor. Nguan no hɔn bambɔ na hɔn yieyɛ gyina hɔn pɛ dɛ wɔbɛba nguambuw no mu na wɔatsena mu.
Binom wɔ hɛn mu a wɔtse nkã dɛ wɔda nguankuw n’ekyir a, bi a wɔdwen dɛ wonnhia anaa wɔnnsom bo anaa dɛ nguambuw no nnyɛ hɔn tsenabea. Na, tse dɛ wɔ nguambuw mu no, ɔtɔfabi a yetsia binom hɔn anan do wɔ Nyame no nguankuw no so mu na yehia dɛ yenu hɛnho anaa yɛdze bɔn kyɛ.
Mbom Oguanhwɛfo Pa no7—hɛn oguanhwɛfo ankasa no—oye daa daa. Nyame no nguambuw mu no, yenya No nhwɛdo, ntsetsee pa na ohyira hɛn ma yɛtse No mponee dɔ nkã. Ɔkãa dɛ, “Mekrukye wo wɔ me nsayamu; w’afasu wɔ m’enyim daa.”8 Hɛn Agyenkwa no ekrukye hɛn bɔn, ɔyaw, atseetsee,9 na dza ɔnnkɔ yie wɔ abrabɔ mu nyina egu Ne nsayamu.10 Obiara wɔ kwan dɛ ɔbɛgye dɛm nhyira yi, ber a “woenya pɛ dɛ [wɔ]bɛba”11 na wɔasan mu woeyi dɛ wɔbɛtsena nguambuw no mu. Nsanmuyi akyɛdze no nnyɛ kwan dɛ yɛyɛ nsanmu yi ara kɛkɛ, ɔyɛ kwan dɛ yɛbɛsan mu eyi dza oye. Na nguambuw n’afasu no nnyɛ akwansiwdze na mbom sunsum mu ahobambɔ ne farba.
Jesus kyerɛkyerɛɛ dɛ yɛwɔ “nguambuw kor, nye oguanhwɛfo kor.”12 Ɔkãa dɛ:
“Nyia odua abowano kɔ mu no nye nguan no hwɛfo. …
“Na nguan no tse ne ndze … ,
“… na nguan no dzi n’ekyir: osiandɛ wonyim ne ndze.”13
Nkyii Jesus see dɛ, “Emi nye abow no: emi na sɛ obiara nam mo do kɔ mu a, wɔbɛgye no nkwa,”14 ɔkyerɛkyerɛ pefee dɛ kwan kor pɛr na wɔdze kɔ Nyame no nguambuw no mu na kwan kor pɛr na wɔnam do nya nkwagye. Ɔnam na odua Jesus Christ do.15
Nhyira Ba Hɔn a Wɔwɔ Nyame no Nguambuw mu no hɔ
Yesũa mbrɛ yebesi bɛba nguanbuw no mu no fi Nyame n’asɛm no mu a, ɔyɛ nkyerɛkyerɛ a Jesus Christ na Ne nkɔnhyɛfo kyerɛkyerɛ.16 Sɛ yedzi Christ ne nkyerɛkyerɛ do na yedua gyedzi wɔ Jesus Christ mu, nnuhu, enuma na pisi, na nokwardzi a ɔkɔ do do ba nguambuw no mu a,17 Alma hyɛ hɛn bɔw wɔ ankorankor nhyira anan pɔkyee bi ho. Wo (1) “Nyankopɔn bɔpon wo,’’ (2) “ɔbɛkan wo afora owusoɛr a odzi kan edzikamfo noho,’’ (3) “enya onnyiewiei nkwa,’’ na (4) Ewuradze “bohue no Sunsum mbordo egu wo do.’’18
Alma kyerɛkyerɛe fa dɛm nhyira yinom ho ekyir no, nkorɔfo no dze enyigye bɔɔ hɔ nsamu. Siantsir no nye yi:
Odzi kan: Ebɔpon kyerɛ dɛ ibotua ɔkaw bi anaa asodzi bi efi hɔ anaa ebɛgye efi dza ɔtseetsee anaa opira nsamu.19 Sɛ Jesus Christ No Werdam Afɔrbɔ nnka ho a akorankor mpontu dodow biara nnyi hɛn afã a obotum asan hɛn efi bɔn a yɛayɛ ho anaa ɔbɛsã hɛn epirakur horow a yɛwɔ ho. Ɔyɛ hɛn Pomfo.20
Otsĩa ebien: Ɔnam Christ no Wusoɛr no ntsi, hɛn nyinara bɔsoɛr efi owu mu.21 Hɛn esunsum efi hɛn honandua mu ekyir no, ekyingye biara nnyi ho dɛ yɛbɔhwɛ kwan akɔ mber a yebotum dze wusoɛr honandua efua hɔn a yɛdɔ hɔn. Yɛbɔhwɛ kwan ar yie dɛ yɛbɛkã Owusoɛr Edzikamfo no ho.
Otsĩa ebiasa: Onnyiewiei nkwa asekyerɛ nye dɛ yɛnye Nyankopɔn bɛtsena na yɛabɔ bra tse dɛ ma Ɔyɛ no. Ɔyɛ “akyɛdze a ɔsõ sen Nyame n’akyɛdze nyina”22 na ɔdze dɛw a ɔhyɛ mã bɛba.23 Ɔyɛ hɛn abrabɔ ne siantsir na no botae a ɔkrɔn kɛse.
Otsĩa anan: Nyametsir kuwba n’anyɛnkoyɛ, Sunsum Krɔnkrɔn no, ma hɛn akwankyerɛ na awerɛkyekyer a yehia ankasa wɔ ɔnnkyebo abrabɔ yi mu.24
Susu ndzɛmba bi a ɔmma enyigye: mbɔbɔryɛ fi bɔn mu ba,25 awerɛhow na ankonamdzi fi dɔfo bi no wu ho mu ba, nna suro fi adwen konsenn wɔ dza osi owu ekyir ho mu ba. Naaso sɛ yɛhɛn Nyame no nguambuw mu na yesie hɛn ahyɛmudzi horow a yɛnye No wɔ a, yɛtse asomdwee nkã a yenyim na yɛgye dzi dɛ Christ bɔpon hɛn efi hɛn bɔn mu, dɛ hɛn esunsum na honandua mu ntsetsewee no bɛba ewiei ntsɛntsɛm, na yɛnye Nyame bɛtsena afebɔɔ wɔ enyimnyam a ɔkrɔn mu.
Nya Awerɛhyɛmu wɔ Christ mu na Fa Gyedzi Dzi Dwuma
Nuambanyin na nkyerɛbaa, mfatoho pii a ɔfa Agyenkwa no no tum kɛse na N’ayamuhyehye ehumbɔbɔr na N’adom ho ahyɛ kyerɛwsɛm no mu mã. Wɔ N’asaase do somdwuma ber mu no, N’ayarsa nhyira baa hɔn a wɔgyee No dzii na wɔdze gyedzi dzii dwuma hɔn do. Mfatoho, banyin ɔyarfo no a ɔda Bethesda nsutae ho no nantsewee, ber a ɔdze gyedzi dzii Agyenkwa no ne ɔhyɛ do dɛ “soɛr, fa wo kɛtɛ na nantsew.”26 Hɔn a nna wɔyaryar anaa wɔruhu amandze wɔ kwan biara do wɔ Bountiful asaase do no nyaa ayarsa ber a “wotuu punkum” dze “kɔree.”27
Dɛmara so na sɛ ebenya nwanwa nhyira horow a wɔdze abɔ hɔn a wɔba Nyame no nguanbuw mu anohoba no a, ɔsɛ dɛ yɛyɛ dɛm ara—yehia dɛ yɛsan mu yi dɛ yɛbɛba. Alma Kakraba kyerɛkyerɛɛ dɛ, “Na afei mese hom dɛ oguanhwɛfo pa no refrɛ hom; na sɛ hom tsie ne ndze a ɔdze hom bɛba no nguambuw mu.”28
Mfe pii a abɛsen kɔ no, me nyɛnko bi fii mu osian kokoram yarba ntsi. Ber a ne yer, Sharon, dzii kan kyerɛwee fa ne yarba noho no, ɔkãa dɛ: “Yɛsan Mu Yi Gyedzi. Gyedzi wɔ hɛn Agyenkwa, Jesus Christ mu. Gyedzi wɔ Ɔsor Egya ne nhyehyɛɛ mu, na gyedzi dɛ Onyim hɛn ehiadze na odzi Ne bɔhyɛ nyina do.”29
Meehyia Nda a Odzi Ekyir Ahotoseweefo pii tse dɛ Sharon a wɔtse asomdwee nkã wɔ hɔn mu dɛ wɔwɔ Nyame no nguambuw ne bambɔ mu, nkanka sɛ nsɔhwɛ, dza otsia, anaa akotorka ba a.30 Wɔafa dɛ wobenya gyedzi wɔ Jesus Christ mu na woedzi No nkɔnhyɛnyi ekyir. Hɛn nkɔnhyɛnyi dɔfo, President Russell M. Nelson, akyerɛkyerɛ dɛ “Abrabɔ mu biribiara a oye no—nhyira biara a ɔwɔ onnyiewiei nsunsuando no—dze gyedzi hyɛ ase.”31
Bra Nyame no Nguambuw mu Emu mu ara
Me nanasum James Sawyer Holman ba Utah wɔ 1847 mu, mbom nna ɔnnka hɔn a wɔnye Brigham Young bodurii wɔ Ayɛwoho mu no ho. Ɔbaa ekyir wɔ dɛm afe no mu, na ebusua nkrataa kyerɛ dɛ, nna ɔhyɛ ne nsa dɛ ɔdze nguan no ba. Ɔbɛsɛ ana orudu Salt Lake Valley, naaso ɔno na nguan no tumii durii.32
Kasa kwan do no, hɛn mu binom da ho wɔ sar no do. Nnyɛ obiara na ɔnye kuw a odzii kan no bodurii. M’anyɛnkofo adɔfo, meserɛ hom nkɔdo wɔ akwantu no mu—na hom mboa binom ma wɔmbra Nyame no nguambuw no mu emu. Nnkotum esusu Jesus Christ N’Asɛmpa no ne nhyira horow osiandɛ wɔyɛ onnyiewiei.
Ɔyɛ me enyisɔ papaapa dɛ meyɛ Jesus Christ N’asɔr a ɔwɔ hɔ ma Nda a Odzi Ekyir Ahotseweefo no n’asɔrba. Megye dase fa hɛn Ɔsor Egya na hɛn Pomfo, Jesus Christ, hɔn dɔ ho, na asomdwee a ofi Hɔnhɔ nko ba ho—asomdwee a ɔwɔ mu na nhyira a ɔwɔ Nyame no nguanbuw mu. Jesus Christ ne dzin mu, amen.