Ɔkã Hɛn Akoma ne Nyina yie

Elder Dieter F. Uchtdorf ne Kasaa

Ɔkã Asomafo Duebien no hɔn Quorum no ho

Sɛ yɛpɛ dɛ Agyenkwa no maa hɛn do kɔ ɔsorsor a, nna otwar dɛ hɛn enyimpi si wɔ No mu na N’asɛmpa mu no nnyɛ biara biara anaa mpɛn kumabaa.

Afɔrbɔ ma No

Nda kakra a ansaana Ɔdze No nkwa rema hɛn no, nna Jesus Christ wɔ temple no a ɔwɔ Jerusalem no mu, rohwɛ mbrɛ nkorɔfo dze ntoboa roto temple sikakorabea mu no. “Dodow a wɔyɛ ahonyafo no toow pii guu mu,” mbom nkyii, na kunafo hianyi bi bae, “na ɔbɔtoow kɔɔbermba ebien guu mu.” Nna ɔyɛ sika ketseketse koraa, a ɔmmfata dɛ wɔkyerɛw mpo.

Naaso Agyenkwa no hun ntoboa a osuar koraa yi. Nokwar, ɔyɛɛ No enyisɔ ara yie ma “ɔfrɛɛ n’esuafo see hɔn dɛ, Nokwar mese hom dɛ, kunafo hianyi yi dze pii ebogu mu akyɛn hɔn a woebogu sikakorabea no mu no nyina:

“Na dza wɔwɔ na abor hɔn do na wɔdze bi ebogu mu, na oyidze, ofi ne hia mu dze dza ɔwɔ nyina, n’asetena nyina na ɔdze ebogu mu.”¹

Agyenkwa no dze dza ɔhyɛɛ no nsew yie yi kyerɛkyerɛɛ hɛn mbrɛ wosi susu afɔrbɔ wɔ N’ahenman mu—na ɔson ɔno koraa na mbrɛ yɛtaa susu ndzɛmba. Ewuradze no, ntoboa no bo a ɔsom no wonnsusu no wɔ nsunsuando a onya no wɔ sikakorabea no do, mbom wɔ nsunsuando a onya wɔ onyia ɔmae n’akoma do.

Ɔrekamfo kunafo nokwafo no, Agyenkwa no ma maa hɛn esusudze a yɛdze bosusu hɛn osuanyiyɛ wɔ n’akwan horow nyina mu. Jesus kyerɛkyerɛɛ dɛ hɛn afɔrbɔ no botum ayɛ kɛse anaa ketseaba, naaso kwan biara mu no, otwar dɛ ɔkã hɛn akoma, ne nyina yie.

Fapem yi Mormon Nwoma nkɔnhyɛnyi Amaleki san totɔserɛ bio: “Hom mbra Christ nkyɛn, nyia ɔyɛ Israel Krɔnkrɔnnyi no, na hom mbɛfa no nkwagye na ɔpon tum no bi. Nyew, hom mbra ne nkyɛn, na hom mfa hom akra nyinara mbɔ afɔr mma no.”²

Ana iyi besi dɛn bɛyɛ? Hɛn mu dodowara no, esusudze a ɔgye ɔkra mmae nyina no yɛ dɛ ma yenndu hɔ. Sesei, yɛreyɛ mbrɛ yebotum ayɛ nyina. Yebesi dɛn ahyehyɛ abrabɔ mu ahwehwɛdze beberebe na hɛn pɛ dɛ yɛdze hɛn akra nyina bɛma Ewuradze no asaa?

Bia hɛn tafɛrbanyinmbɔmu nye dɛ yɛrehyehyɛ ma asaa no nye yɛbɛkyekyɛ hɛn mber mu pɛpɛɛpɛ ama ahwehwɛdze ahorow no. Yɛhwɛ no kwan yi do a, hɛn enyimpi si ma Jesus Christ no kã ndzɛmba pii a yehia dɛ yɛdze hyɛ hɛn dwumadzi horow a akyer do no mu. Mbom, bia kwan fofor wɔ hɔ a yebotum dze ahwɛ.

Erehyehyɛ ma Wɔasaa: Tse dɛ Irutwuw Bicycle

Emi na me yer Harriet, yɛdɔ dɛ yebɔ mu twuw bicycle. Ɔyɛ kwan nwanwa a itum dze tsentsen w’apɔw mu ber a wɔbɔ mu so hwer hɔn mber. Sɛ yɛrutwuw a, menngye ahom ntaataado a, yɛdze enyigye hwɛ wiadze fɛɛfɛw a woetwa hɛn ho ehyia na yedzi nkɔmbɔ dɛɛdɛw mpo. Yɛnntaa mmfa hɛn adwen nnkɔ mbrɛ yesi atsena hɛn bicycle no do yie. Yeetwuw akyɛr ara yie a yɛnndwen ho mpo—wɔabɛyɛ hɛn ntɔyɛɛ.

Mbom ber biara mohwɛ obi a orusũa bicycle twuw fofor no, ɔkaa me dɛ ɔnnyɛ mberɛw dɛ ibɛtsena do yie wɔ ne tire ntseatsea ebien no do. Ɔgye mber. Ɔgye ekɔ do yɛ. Ɔgye abotar. Ɔgye famubɔ ber kor anaa ebien bi.

Ne nyina mu no, hɔn a wotum tsena do yie no sũa adwenkyerɛ yinom a ohia no:

Mma nnhwɛ w’anan.

Hwɛ w’enyim.

Fa w’enyiwa hwɛ kwan no a ɔda w’enyim no. Tsim wɔ bea a erokɔ no. Na kɔ do kã. Eretsena do yie no nyina fa erokɔ kan.

Nkyerɛkyerɛ a ɔtse dɛm so yɛ edwuma ber a yɛrohwehwe ma hɛn abrabɔ mu ndzɛmba asaa dɛ Jesus Christ esuafo. Ɔbɔson mbrɛ nyimpa kor biara besi bɛkyekyɛ ne mber na ahom mu ama no dwumadzi horow nyina na abrabɔ, ofi hyɛber kor kɔ hyɛber kor mu. Mbom hɛn nyina hɛn botae tsitsir ara kor nye dɛ yedzi hɛn Wura, Jesus Christ no Kwan no do, na yɛasan akɔ hɛn Ɔsor Egya dɔfo N’enyim bio. Botae yi otwar dɛ otsim na ɔnnsesã, mbrɛ yɛtse biara na dza ɔrokɔ do wɔ hɛn abrabɔ mu biara no.³

Mma do: Tse dɛ Iritu Wimuhɛn

Afei, hɔn a wɔpɛ bicycle twuw ara yie no, edze osuanyiyɛ roto irutwuw bicycle ho no botum ayɛ mfatoho a ɔboa. Hom a hom enyi nngye ho no, mma hom nnhaw. Mowɔ mfatoho kor so wɔ hɔ a, mowɔ enyidado dɛ banyin biara, ɔbaa, na abofra biara botum atse ase.

Osuanyiyɛ, tse dɛ abrabɔ mu ndzɛmba pii no, wobotum so dze ato erekã wimuhɛn ho.

Ana egyina adwen mbrɛ osi yɛ nwanwa dɛ wimuhɛn kɛse tum fi famu na otu kɔ sor? Ebɛnadze na ɔma wimu mfir yinom tu kɔ sorsor wɔ wimu fɛɛfɛfɛw dze twa po akɛse na asaasetɔw ahorow?

Yɛkã no tsiabaa ara a, wimuhɛn tu ber a mframa robɔ fa n’atsaban do. Dɛm no ma nsonsonee ba mframa ne nhyɛdo mu a ɔma wimuhɛn no ma noho do. Na ibesi dɛn benya mfra a ɔrobɔ no dodow afa atsaban no do a ɔbɛma ɔama no do? Nyiano no yɛ iripia akɔ kan.

Wimuhɛn biara a osi ahɛngyinabea no ronnkɔ sor. Da mpo a mframa robɔ kɛse, mma do a ɔdɔɔ sõ no mmba gyedɛ wimuhɛn no rokɔ kan, a oripia akɔ kan yie a ɔbɔbor ahoɔdzen horow a ɔtwe no ekyir no do.

Tse dɛ ma irutwuw akɔ kan no ma bicycle taa yie tsentsen do no, ɔrokɔ kan no boa wimuhɛn ma odzi dza ɔtwe no ba famu na ekyir no do.

Iyi kyerɛ dɛn ma hɛn dɛ yɛyɛ Jesus Christ esuafo? Iyɛ kyerɛ dɛ sɛ yɛpɛ dɛ yenya abrabɔ a ndzɛmba ahyehyɛ yie a, na yɛpɛ dɛ Agyenkwa no maa hɛn do kɔ ɔsorsor a, nna otwar dɛ hɛn enyimpi si wɔ No mu na N’asɛmpa mu no nnyɛ biara biara anaa mpɛn kumabaa. Tse dɛ Jerusalem kunafo no, otwar dɛ yɛdze hɛn akra nyina bɔ afɔr ma No. Hɛn afɔrbɔ no botum ayɛ kakraba dze, mbom otwar dɛ ofi hɛn akoma na hɛn kra mu.

Yɛreyɛ Jesus Christ osuanyi nnyɛ adze kor ara wɔ ndzɛmba pii a yɛyɛ mu. Agyenkwa no nye nkuranhyɛ tum a ɔwɔ dza yɛyɛ nyinara ekyir. Ɔnnyɛ hɛn ahomgyebea wɔ hɛn akwantu mu. Ɔnnyɛ dza ɔyɛ fɛw wɔ kwan do, anaa ahyɛnsewdze tsitsir. Ɔno nye “ɔkwan no, nokwar no, na nkwa no: obi mmba Egya no hɔ, gyedɛ ɔnam [Jesus Christ] do.”⁴ Ɔno nye Ɔkwan no na hɛn onnyiewiei nkrabea.

Atsena yie na mma do ba ber a “[yɛ]per kɔ kan gyina pintsinn wɔ Christ mu, nya enyidado a ɔhyerɛn na odzi mu, na [ye]nya Nyankopɔn nye nyimpa nyina ho dɔ.”⁵

Afɔrbɔ na Etuhoama

Na dwuma horow na asodzi horow a ɔma yennya adagyer wɔ hɛn abrabɔ so mu ɛ? Enye adɔfo rohwer mber, erokɔ skuul anaa ereyɛ edwumayɛ ho ahoboa, ereyɛ edwuma edzidzi, erohwɛ ebusua, erosom wɔ sɔn mu—iyinom nyina hyɛ mu wɔ hen? Agyenkwa no ma hɛn awerɛhyɛmu dɛ:

“Na hom sor Egya nyim dɛ yinom nyina hia hom.

“Mbom hom ndzi kan nhwehwɛ Nyankopɔn n’ahenman nye ne tsenenee, na wɔdze yinom nyina bɛkã hom ho.”⁶

Mbom ɔno nnkyerɛ dɛ ɔyɛ mberɛw.⁷ Ohia afɔrbɔ na etuhoama ebien nyina.

Ohia dɛ yegyaa ndzɛmba binom mu kɔ na yɛma ndzɛmba binom nyin.

Afɔrbɔ na etuhoama yɛ ɔsor mbra ebien a yedzi ho ahyɛmu dɛ yebɛyɛ ho setsie wɔ temple mu. Mbra ebien yinom dzi nsɛ mbom wɔnnyɛ adze kor. Afɔrbɔ kyerɛ dɛ egyaa biribi mu dze nya biribi a ɔsom bo kyɛn no. Tsetse no, Nyankopɔn no nkorɔfo dze hɔn nguankuw mu abakan no bɔɔ afɔr hyɛ Messiah ne mbae ho enyimnyam. Abakɔsɛm mber nyina mu no, Ahotseweefo nokwafo dze hɔn akorankor apɛdze, ahotɔ, na hɔn nkwa mpo abɔ afɔr ama Agyenkwa no.

Hɛn nyina yɛwɔ ndzɛmba, akɛse na nkakraba a, yehia dɛ yɛdze bɔ afɔr dɛ yɛbɛkã Jesus Christ do emudzi mu.⁸ Hɛn afɔrbɔ na ɔkyerɛ dza ɔsom hɛn bo ankasa. Hɛn afɔrbɔ yɛ krɔnkrɔn ma Ewuradze na Odzi no nyi.⁹

Etuhoama yɛ soronko fi afɔrbɔ ho wɔ annyɛ yie koraa no kwan tsitsir kor do. Sɛ yetu biribi ma a, yɛnngya no ekyir ma ɔnnhyew wɔ afɔrmbukyia no no do. Mbom yɛdze dzi dwuma wɔ Ewuradze no som mu. Yɛdze ma No na No botae krɔnkrɔn no.¹⁰ Yenya talent horow a Ewuradze dze ama hɛn na yɛbɔ mbɔdzen dɛ yɛma ɔdɔɔ sõ, ama yɛabɛyɛ mboa ara yie dze atow Ewuradze n’ahenman mpo.¹¹

Hɛn mu kumabaa na wobebisa hɛn da dɛ yɛmfa hɛn nkwa mbɔ afɔr mma Agyenkwa no. Na wɔto nsa frɛ hɛn nyina dɛ yetu hɛn abrabɔ nsi hɔ mma No.

Edwuma Kor, Enyigye Kor, Botae Kor

Ber a yɛhwehwɛ dɛ yɛbɛtsew hɛn abrabɔ ho na yɛhwɛ Christ wɔ adze nyina mu no,¹² biribiara hyɛ ase deda yie. Abrabɔ nnyɛ dza yɛtse dɛ ɔyɛ mbɔdzembɔ a wɔakyerɛw no nkorkor tsentseentsen a yɛdze ahom kɛse suo mu yie.

Mber rugu mu no, ne nyinara ba bɛyɛ edwuma kor.

Enyigye kor.

Botae krɔnkrɔn kor.

Ɔyɛ edwuma a yɛrodɔ na yɛrosom Nyankopɔn. Ɔyɛ yɛrodɔ na yɛrosom Nyankopɔn na Ne mba.¹³

Sɛ yɛhwɛ hɛn abrabɔ mu na yehu ndzɛmba piigyan a yɛwɔ yɛ a, ɔhyɛ hɛn do. Sɛ yehu adze kor—yɛrodɔ na yɛrosom Nyankopɔn na Ne mba, wɔ akwan soronko aha mu a—nna yebotum dze enyigye ayɛ dɛm ndzɛmba no.

Iyi nye mbrɛ yesi dze hɛn akra nyinara bɔ afɔr—yɛdze dza ɔtwe hɛn ekyir na yɛdze nkaa no si hɔ ma Ewuradze na No botae.

Nkuranhyɛ Nsɛm na Dasegye

Mo nuanom na nkyerɛbaa adɔfo na m’anyɛnkofo adɔfo, mber binom bɛba a hom bɛpɛ dɛ nkyɛ hom botum ayɛ no mbordo. Hom Egya a ɔwɔ Sor nyim hom akoma. Onyim dɛ hom nnkotum ayɛ adze nyina a hom akoma mu hom pɛ dɛ hom yɛ. Mbom hom botum adɔ na hom asom No. Hom botum abɔ hom mbɔdzen ara yie dze esie Ne mbrasɛm. Hom botum adɔ na hom asom Ne mba; Na hom mbɔdzembɔ bɛtsew hom akoma ho na wɔayɛ ahoboa ama hom ndaamba enyimnyam.

Iyi nye dza kunafo no a ɔwɔ temple sikakorabea no tsee ase. Nna onyim ara yie dɛ n’afɔrbɔ no rennsesã Israel sikasɛm, mbom obotum asesã na oehyira no—osiandɛ, osuar mpo a, ɔyɛ ne dze nyinara.

Ntsi, mo nuanom adɔfo na Jesus Christ esuafo mfɛfo, mma hom mma “yɛmmbrɛ wɔ papayɛ ho, osiandɛ [yɛro]tow dwumadzi kɛse ne fapem.” Na hɛn ndzɛmba nkakraba mu na “dza ɔyɛ akɛse” fi mu ba.¹⁴

Megye dase dɛ iyi yɛ nokwar, dɛ megye dase so dɛ Jesus Christ nye hɛn Wura, hɛn Pomfo, na hɛn kwan kor na Ɔkwan kor pɛr no dze san kɔ hɛn Egya a ɔwɔ Sor nkyɛn. Jesus Christ ne dzin krɔnkrɔn no mu, amen.

Nsɛnsin

1. Mark 12:41–44.

2. Omni 1:26.

3. Hɛn mbofra na mbabun wɔto nsa frɛ hɔn dɛ wonyin wɔ ɔkwan pa do ber a wɔka Jesus Christ do, a ber a ɔyɛ aberantsɛba no “ɔkɔr kan wɔ nyansa nye tsipɛn mu, na Nyankopɔn nye nyimpa hɔ enyimpa mu” (Luke 2:52).

4. John 14:6.

5. 2 Nephi 31:20.

6. 3 Nephi 27:33; hwɛ Matthew 7:14 so. Joseph Smith Nkyerɛasee, Matthew 6:38ma nhumu bi so kã ho: “Dɛm ntsi mma hom nnhwehwɛ wiadze ndzɛmba mbom hom ndzi kan nhwehwɛ nkyekyer Nyame n’ahenman, na wontsim ne tsenenee” (wɔ Matthew 6:33, ase nsɛnsin a

7. Mfatoho kor fi hɛn nkɔnhyɛnyi, President Russell M. Nelson hɔ. Ber a odur n’edwumayɛ no nkrɔnee dɛ akoma datser no, wɔfrɛɛ no dɛ stake president. Elderfo Spencer W. Kimball na LeGrand Richards na wɔtseen ɔfrɛ no. Wohun n’edwumayɛ ahwehwɛdze kɛse wɔ n’abrabɔ mu no, wɔsee no dɛ, Sɛ inya atsenkã dɛ woho akyer wo dodow na nnkotum agye ɔfrɛ no ato mu a, nna ɔyɛ wo ndzinoa.” Obuaa dɛ n’adwenpɔw wɔ dɛ ɔbɔsom anaa ɔnnkɔ som wɔ ɔfrɛ no mu no, ɔayɛ no dadaw, ber a ɔno na ne yer nye Ewuradze dzii ahyɛmu wɔ temple no. Ɔsee dɛ “yesii no pi mber no, “dɛ [yebe]dzi kan ahwehwɛ Nyankopɔn n’Ahenman na ne tsenenee’ [Matthew 6:33], a yenyaa awerɛhyɛmu atsenkã dɛ biribiara bio no wɔdze bɛkã hɛn ho, dɛ mbrɛ Ewuradze abɔ ho anohoba no” (Russell Marion Nelson, From Heart to Heart: An Autobiography [1979], 114).

8. Ndaansa yi President Nelson akasa afa “hia hɛn mu kor biara hia wɔ dɛ yɛdze Agyenkwa no mboa no, yeyiyi dza wɔayɛ adadaw fi hɛn abrabɔ mu. … Ɔkãa dɛ hom mbɔ mpaa “mfa nhu dza ɔnnsɛ wɔ hom abrabɔ mu a ɔsɛ dɛ hom yiyi ama hom ebedzi mu yie.” (“Akwaaba Nsɛm,” Liahona, Esusuw Aketseaba 2021, 7).

9. Kyerɛwsɛm no kã dɛ, Nyankopɔn mu no, hɛn afɔrbɔ yɛ krɔnkrɔn mbordo ma no kyɛn dza yeetum ayɛ (Hwɛ Nkyerɛkyerɛ na Ahyɛmudzi 117:13). Iyi bɛyɛ siantsir kor a Ewuradze buu kunafo no ne kɔɔbermba no dɛ ɔsombo kyɛn ahonyafo hɔn ntoboa no. Dza odzi kan no yɛ afɔrbɔ a onya ahotsew nsunsuando wɔ onyia ɔma no do. Dza odzi ekyir no, ber a wobotum dze ayɛ adze pii wɔ sika mu no, ɔnnyɛ afɔrbɔ, na ɔnnsesã onyia ɔma no.

10. Hɛn mu kumabaa na wobebisa hɛn da dɛ yɛmfa hɛn nkwa mbɔ afɔr mma Agyenkwa no. Mbom wɔto nsa frɛ hɛn nyina dɛ yentu hɛn abrabɔ nsi hɔ mma No.

11. Hwɛ Matthew 25:14–30.

12. Hwɛ Nkyerɛkyerɛ na Ahyɛmudzi 6:36.

13. Kwan yi do no yehu Ɔsomafo Paul nkɔnhyɛ no ne mahyɛ: “Mberano ne mãhyɛ mu no [Nyankopɔn] bɛkã ndzɛmba nyina abɔ mu kor wɔ Christ mu, ɔsorsor ndzɛmba o, asaase do ndzɛmba o, mese, wɔ no mu” (Ephesians 1:10).

14. Nkyerɛkyerɛ na Ahyɛmudzi 64:33.