Mma Nnsuro, Gye Dzi Ara!
Hom mfua dodow no a hom enya fi onyia a ɔma akyɛdze papa nyina no hɔ mfa nhyɛ hom enyigye no nhwehwɛe no ase.
Ndɛ mekã me nsɛm kyerɛ Asɔr mu mbasirmba, mekyerɛ obiara a oedzi President Russell M. Nelson ne mfe anaa onndur hɔ. Menntaa mmfa mfonyin nkyerɛ adze, naaso munntum nntwe iyi nnsan.
Cri de couer iyi fi me mfe-esia nyɛnko Marin Arnold hɔ. Mebɛkyerɛ ne Egyptfo nsakyeree akyerɛw ahyɛse no ase ama hom:
Bishop Dɔfo
generle confrins
nna Ɔnnyɛ dɛw dɛn ntsi a
Ana ɔwɔ dɛ
Yɛyɛ a? kyerɛ me siantsir
Nokɔr mu, Marin
Arnold.1
Oye, Marin, asɛm a merebɛkã yi bɛma wo abagura bio. Mbom sɛ ekyerɛw wo bishop rokɔtõa asɛm a, ohia dɛ ebɛkã akyerɛ no dɛ wɔfrɛ me “Kearon. Elder Patrick Kearon.”
Bɛyɛ mfe ebien ntamu wiadze nsan yarba tse dɛ bible mu dze no ahyɛ hɛn wiadze yi do, na ber a yarba bɔn yi ama woegyaa nyimpa ntamu nkitahodzi dodow no, wɔamma ewurkadze, atseetsee, na amanyɛsɛm mu tsirmuɔdzen nsisi enngyaa—ɔman mu anaa wiadze nyina mu. Dɛ mbrɛ iyi nko nnsõ no, yɛda ho rihyia nyimpa ntamu nkitahodzi na amambra mu ɔhaw a wɔatahye, fi sikasɛm ho ahokyer kɔ asaase ne nsɛe kɔ ebusuakuw a koryɛ nnyi mu na piinara so.
Atseetsee mber na sum nda yinom mu no botum ayɛ abagura ama mbasirmba a wɔwɔ hɛn mu, hɔn a yɛhwehwɛ hɛn ndaamba abrabɔ mu enyikã na ahwerɛhyɛmu fi hɔn hɔ no. Ɔakã dɛ “mbabun no tum no yɛ ahonyadze ma wiadze no nyina. Mbasirmba … no … enyim nye hɛn … ndaamba.”2 Bio so, hɛn mba nsamu na yɛdze Asɔr yi ne nkrabea bɔtwer.
Yɛhwɛ ndɛ mber yinom a, ntseasee wɔ mu dɛ enyidado a ɔwɔ mbabum no mu no do ruhuan kakra. Dr. Laurie Santos, Yale Esũapɔn mu ɔbemfo, ndaansa yi ɔyɛɛ adzesũadze bi a ne dzin dze Psychology and the Good Life. [ Nyimpa Adwen mu ho Adzesũa na Abrabɔ Pa]. “Afe a odzi kan a wɔyɛɛ adzesũadze yi no bɛyɛ esũapɔn no esũafo [nyina] mu [ɔfã nkyɛmu ebien] na wosũae.”3 Bɔbor ɔpepe 64 na wɔseraa ne internet do adzekyerɛ no. Ɔrekyerɛw afa adze tsitsir yi ho no, nsɛnkyerɛwfo no baako hyɛɛ no nsew mbrɛ osi yɛ yaw dɛ ibohu adzesuafo mbasirmba a, wɔaben yie—nye mpanyimfo—a wɔreper enyiber do “rohwehwɛ biribi a wɔayew” anaa, dza omuo koraa, hɔn kɔn dɔ biribi a wonnyaa bi pɛn.4
Ndɛ me ntotɔserɛ ma hɛn mbabun, na ma hom awofo na mpanyimfo a hom tu hɔn fo no, nye dɛ hom mfua dodow no a hom enya dada fi onyia a ɔma akyɛdze papa nyina no hɔ mfa nhyɛ hom enyigye no nhwehwɛe no ase.5 Ber kor noara a wiadze rebisa ɔkra ne nsɛmbisa a ɔdɔ bun mu no, ɔwɔ dɛ yɛdze Jesus Christ asɛmpa no ne “nsɛmpa”6 no yɛ nyiano. Jesus Christ N’Asɔr a ɔwɔ hɔ ma Nda a Odzi Ekyir Ahotseweefo a ɔma wiadze Agyenkwa no botae na amandzɛɛbɔ no do kyerɛ no, ma onnyiewiei kwan tsitsir a wɔdze bohu papa na wɔdze bɛyɛ papa wɔ mber a ohia kɛse yi mu.
President Russell M. Nelson ase dɛ mbasirmba ebusuasantsen yi wobotum “enya nhyɛdo mapã [dze ayɛ papa] wɔ wiadze no do akyɛn ebusuasantsen biara a wɔabɛsen kɔ.”7 Hɛn, nye nkorɔfo a, nkyɛ ɔsɛ dɛ yɛtow “ɔpon ho ɔdɔ ndwom,”8 naaso ɔgye ahohyɛdo—anaaso ”osuanyiyɛ,”—dza ɔbɔ hɛnho ban fi su bɔn a ɔbɔtwe hɛn ekyir ber a yɛtow dɛm onnyiewiei nkwagye ho ndwom no.
Ber mpo a yɛgye ntaae wɔ “stiitsi n’afã a ɔhyerɛn no,”9 yetum kehyia dɛm nyimpa no a ɔagye enyim dɛ ɔbɔhwehwɛ dza ɔnnsɛ na ɔnnyɛ wɔ biribiara ho. Hom nyim n’asɛnkã: “Sum hyɛ tumm ana oebir korakora.” Enyido-adzehu bɔn na awerɛhow asetsena bɛn nye yi! Nyew, ɔtɔfabi a yɛpɛ dɛ yeguan fi bea a yɛwɔ, mbom onnyi dɛ yeguan dabiarada fi nyimpa ban a yɛyɛ ho—Nyame tseasefo ne mba a ɔdɔ hɛn, na ber biara Ɔayɛ krado dɛ ɔdze bɔn bɛkyɛ hɛn, na Ɔremmpa hɛn dabiarada. Eyɛ N’enyadze a ɔsombo kɛse papaapa Ɔwo nye Ne ba a, Ɔama wo nkɔnhyɛfo na anohoba horow, sunsum mu akyɛdze na nyikyerɛ, anwanwadze na amandzɛɛbɔ, nye abɔfo wɔ ntwamutam afã ebien nyina.10
Ɔama wo asɔr a ɔnnkyebo abrabɔ mu no ɔhyɛ ebusua ebusua dzen na ɔkyekyeer hɔn bɔ mu afebɔɔ. Ɔama ward na nkorbata horow bɔbor 31,000 a, nkorɔfo boa ano, na wɔtow ndwom, na wɔkye kɔm, na wɔbɔ mpaa ma hɔnho nkorkor na wɔdze hɔn ahonyadze ma ehiafo. Ha nye bea a wɔbɔ obiara ne dzin, wɔhwehwɛ no, na wɔsom no, na bea a anyɛnkofo na fipamfo som hɔnho etuhoakyɛ mu ara wɔ ɔfrɛ ahorow mu a ofi krakye edwuma dze kesi fie nsiesie edwuma. Mbasirmba—nye mpanyimfo awarfo kã ho, mpempem na hɔn ara bɔ akɔhoma dze som asɛmpakã dwuma a wonnyi biribiara kã wɔ bea a wɔbɔkɔ akɛyɛ edwuma ho, na asɔrmba mbabun nye mpanyimfo a wɔma hɔnho do kɔ temple horow kɛyɛ ayɛdze krɔnkrɔn horow a ɔkyekyeer ebusua bɔ mu—ndamyɛ dwumadzi a ɔwɔ wiadze a nkyekyɛmu wɔ mu yi naaso kor a ɔpaa mu kã dɛ nkyekyɛmu yinom nnyɛ afebɔɔ. Iyinom yɛ siantsir kakra ara a yɛdze ma wɔ “enyidado a ɔwɔ [hɛn] mu no ase.”11
Nyew, ndɛ wiadze yi mu no, nsɛm a ɔyɛ dzen papaapa na ohyia Jesus Christ ne osuanyi biara. Asɔr yi mu baanodzifo no, dze hɔn nkwa to hɔ dze hwehwɛ Ewuradze no kwankyerɛ a wɔdze besiesie ɔhaw horow yinom. Sɛ no mu binom wonnsiesiee no wɔ kwan a obiara n’enyi bɛgye ho a, nna bia a ɔkã mbeamudua no a Jesus see dɛ ɔsɛ dɛ yɛfa ama yɛaakã No do no ho.12 Osiandɛ nda binom bɛhyɛ sum na nsɛm a ɔyɛ dzen bɛba ntsi koraa na Nyankopɔn bɔɔ anohoba dɛ wɔ adzekyee mununkum na adzesaa gya fadum mu no, ɔkyerɛ nkɔnhyɛfo kwan, ɔma dadze poma, obue abow tseabaa no mu a, ogya kɔ kwan nkekãnkekã no mu, na ne nyina ekyir no, ɔma hɛn tum a yɛdze wie hɛn akwantu no.13
Ntsi meserɛ, tweɔn aponto no sɛ mmpɛ broccoli ahataw hataw mpo a. Tuw wɔ Ne kan mu na fa wo kyɛndar kã dwumadzi no ho.14 Primaryfo kã no nokwar mu ara dɛ: Jesus pɛ “[ɔwo dɛ eyɛ] ewia kan.”15
Ber a Jewnyi baanodzinyi Jairus totɔe serɛɛ Jesus dɛ ɔnsa ne mfe-12 babaa a, ɔda owu mpa do wɔ fie yarba no, dɔm a woetwa no ho ehyia no siiw Agyenkwa no kwan kɛpeem dɛ ɔsomfo bi bae bɛsee egya yi a ɔreper yi dɛ. “Wo babaa no ewu, mma nnhaw Kyerɛkyerɛfo no.”
“Na Jesus tsee no, obuaa no dɛ, Mma nnsuro, gye dzi ara, na obenya nkwa.”16
Na onyae. Na wo so benya. “Mma nnsuro, gye dzi ara.”
Osiandɛ hom mu kor biara a ɔkã etsiefo ho no som bo ma Nyankopɔn na Asɔr yi ntsi, medze ɔsomafo mpaamukã soroko yi wie. Ansaana erebenya Sunsum Krɔnkrɔn akyɛdze no, nna ewɔ Christ ne kan a wɔdze ahyɛ wo kra mu,17 dɛm “kan no a ɔwɔ adze nyina mu no, … ɔma ndzɛmba nyinara nkwa no,”18 na ɔyɛ nhyɛdo papa wɔ hɔn a wɔatsena anaa wɔbetsena ase hɔn akoma mu. Wɔdze dɛm kan no mae ama ɔaabɔ woho ban na ɔakyerɛkyerɛ wo. Ne fapem amandzɛɛbɔ nye dɛ nkwa nye akyɛdze a ɔsõ kyɛn akyɛdze nyina, akyɛdze a gyedɛ Ewuradze Jesus Christ No Werdambɔ no mu nko na hɛn nsa kã no afebɔɔ. Dɛ ɔyɛ wiadze ne Kan na Nkwa no,19 Egya Ne Ba a Wɔwoo no Kortoo no baa dɛ Oribedzi owu do konyim dze ama hɛn nkwa.
Otwar dɛ yetu hɛnho nyina si hɔ ma dɛm nkwa akyɛdze no na yetu mbirika kɔboa hɔn a wɔreyɛ egyaa akyɛdze krɔnkrɔn yi mu no. Baanodzifo, afotufo, anyɛnkofo, ebusua—hom nhwehwɛ abagura dzendzen, anaa biribiara a ɔkyerɛ aho-pira ho sɛnkyerɛdze. Fa wo mboa ma. Tsie. Yɛ nsiesiedze a ɔbɛfata.
Ɔkɔ ma hɛn mbabun bea biara a hom wɔ a hom ridzi aper, mbrɛ wo dadwen anaa ahokyer tse biara no, ahokum owu nnyɛ nyiano no. Ɔrenndwedwe yaw no a etse no anaa dza edwen dɛ edze reba no. Wiadze yi mu no yehia kan nyina a yebotum enya no enyiber do no, meserɛ mma hom mmbrɛ onnyiewiei kan no a Nyame dze ahyɛ hom akra mu ana wiadze yi reba no adze. Nye obi ndzi nkɔmbɔ. Serɛ mboa. Mma nnsɛɛ nkwa no a Christ dze No nkwa mae dze koraa do no. Ibotum asɔw ɔnnkyebo abrabɔ yi mu aperdzi horow no. Hom ho yɛ dzen kyɛn dza hom dwen. Mboa wɔ hɔ, fi binom hɔ na nkanka fi Nyame hɔ. Wɔdɔ wo na isom bo na wohia wo. Yehia hom! “Mma nnsuro, gye dzi ara.”
Obi a ohyiaa gyinabew a ɔyɛ dzen koraa kyɛn dza emi na ɔwo behyia pɛn no tsẽaa mu ber bi mu dɛ: “Hom nkɔ kan [m’anyɛnkofo mbasirmba]. Hom nnya akokodur … na wɔnkɔ do, nkedzi konyim! Hom mma hom akoma ndzi dɛw, na hom enyi ngye kɛse.”14 Yɛwɔ dodow a ɔsɛ dɛ hɛn enyi gye ho. Yɛwɔ hɔ ma hɛnho nkorkor, na yɛwɔ No. Mma mma kwan a yebenya wo no mmbɔ hɛn, mepa ho kyɛw, wɔ Ewuradze Jesus Christ , hɛn Wura, ne dzin Krɔnkrɔn no mu, amen.